¹ Ezoɖuɖu ŋkɔtɔ lɔ can wa sɛnsɛn ɖoɖowo ɖɛ, yi gbe wa gbedoɖa tɔxu ɖɛ nɔ Mawu do nyigban ji. ² Wo wa agbaxɔ ɖeka, yi sɔ avɔ suimɛ do amɛve, yi wo nyi sɛnsɛntɔxuwo. Wo yɔnɔ sɛnsɛntɔxu ŋkɔtɔ mɔ, texwe kɔkɔɛ. Enɔ yi kaɖigbanhɛnnu koɖo ekplɔn ci ji yi kpɔnnɔ ciwo yi wo na Mawu nɔnɔ nɛ. ³ Wo yɔnɔ sɛnsɛntɔxu amɛvetɔ lɔ mɔ texwe kɔkɔɛ cɛkii. E le godu nɔ avɔ ci yi so agbaxɔ lɔ mɛ. ⁴ Avɔsakpe ci yi wo sɔ shika mɛ, yi tɔnɔ ezo enuhwɛnkuwo le ji koɖo ezoɖuɖu ɖaka ci yi wo shi shika do pleŋ lɔ le tɔxu. Shika 'ze ci mɛ yi enuɖuɖu ci yi wo yɔnɔ mɔ mana le koɖo Arɔn 'cikplɔ ci yi do sese sɔkpenɔ enuŋwlɛkpe kpakpɛ ciwo ji ezoɖuɖu lɔ sewo le, le ɖaka lɔ mɛ. ⁵ Cikplɔ 'cikpakpɛ awanɔwo le ezoɖuɖu daka lɔ tamɛ. Wo ɖenɔ Mawu klɛnklɛn doasɛ. Wo ke wowo 'wawo yi sɔ cɔn fini ci yi wo nanɔ ehun Mawu le nɔ enuvɔnwosɔsɔke. Mi ɖa sɛnŋ dre enu cɛwo mɛ ceke ceke sɔwu cɛ le elɛ o. ⁶ Ahan yi wo to enu lɔwo le agbaxɔ lɔ mɛ do nɛ. Eyi avɔsatɔwo ɖonɔ texwe ŋkɔtɔ lɔ mɛ gbeɖeka duu, yi vayi wanɔ sɛnsɛn 'kɔnuwo. ⁷ Vɔ texwe amɛvetɔ lɔ yɛ ɔ, avɔsatɔ gangantɔ lɔ ɖekɛ yi ɖonɔ yɛ mɛ zeɖeka le exwe ɖeka mɛ. E hɛnnɔ elan 'hun, yi ava sɔ yi na Mawu do yiŋtɔ koɖo enuvɔn ciwo yi jukɔn lɔ wa le manyamanya mɛ 'ta. ⁸ Gbɔngbɔn Kɔkɔɛ dodoɔ asɛ nɔ mi toto enu hunnɔwo mɛ mɔ, nɔ agbaxɔ ŋkɔtɔ lɔ kpɔtɔ li ɔ, emɔɖeɖe ɖe li nɔ agbetɔwo yi wa sɛnŋ ɖo texwe kɔkɔɛ cekii lɔ mɛ o. ⁹ Enyɔ cɛ nyi enudodoasɛ ɖeka nɔ amɛ so egbɛ ŋkekewo nu. Yi gɔnmɛ yi nyi mɔ, enuɖe ci yi 'mɛɖe a nana Mawu koɖo avɔsa ciwo yi a wawa nii, yi a sɔ siinsiin'ɔ ɖa na yi amɛ lɔ 'jimɛ a kɔ cekii o. ¹⁰ Enyɔ hunnɔwo ɔ, agbetɔwo ɖoɖowo yi wo nyi, yi ku so enuɖuɖu kodo enununu sɔkpenɔ eɖyiklɔklɔ 'kɔnu vovovowo nu. Toto lɔwo wa edɔ kaka je hwenu yi Mawu va trɔ toto enuwo pleŋ ji. ¹¹ Vɔ ɔ, Kliso va shigbe avɔsatɔ gangantɔ nɛ, nɔ enunyui ciwo yi li. E ɖo agbaxɔ ɖeka ci yi kpɛn, yi gbe kɔ cekii sɔwu nyigbanjitɔ mɛ. Ɖe nyi agbetɔwo yi cui o; ɖe nyi xexe cɛ mɛ 'gbaxɔ ɖe yɔ o. ¹² Hwecinu yi Kliso ɖo texwe kɔkɔɛ cekii lɔ mɛ ɔ, ɖe nyi egbɔsuwo alo xwenyisuviwo 'hun yi e hɛn sɔyi na Mawu o. E ɖo mɛ zeɖeka, yi e vɔ do enunɔ ŋkeke kpɛtɛwo pleŋ, yi sɔ yiŋtɔ 'hun na Mawu. Ahan yi e wɛɛ do nɛ, yi na yiMawu hwlɛn mi gan sɔyi mavɔmavɔ le enuvɔnwo shi. ¹³ Sasa le ese mɛ ɔ, wo sɔnɔ egbɔsu koɖo xwenyisu alo xwenyishivi 'fi shi nɔ amɛ makɔmakɔwo, nɔ wa kɔ le gbaza mɛ. ¹⁴ Nɔ e nyi mɔ elanwo 'hun ɖo ŋsɛn ahan ɖee, Kliso 'hun ɖa ɖo ŋsɛn sɔwu ehun hunnɔwo ba? Ɖo sɔ toto Gbɔngbɔn mavɔmavɔ ji ɔ, Kliso sɔ yiɖeki na Mawu shigbe avɔsanu ci ɖe ɖo afɛn nɛ. Yi 'hun a klɔ wana dɔndɔnwo ɖaɖa le miwo yixa mɛ; nɔ mi a sɛnŋ sɛn Mawu agbeagbe lɔ. ¹⁵ Enu ci yi na taɖo yi Kliso nyi amɛdomɛdradotɔ le ezoɖuɖu yoyutɔ lɔ mɛ do ne. Kliso ku yi sɔ hwlɛn agbeatɔwo gan le enuvɔn ciwo yi wo wa sasa, hwecinu yi wo le ezoɖuɖu xoxuitɔ lɔ gɔnmɛ shi. Gahunnɔmɛ ɔ, amɛ ciwo yi Mawu, yi a sɛnŋ xɔ enunyui mavɔmavɔ ciwo 'gbe yi e ɖo. ¹⁶ Nɔ wo ɖe cinɔɖuɖu wema ci yi amɛɖe wa daɖɛ ti ɔ, wo ɖo a doasɛ mɔ amɛ ci yi wa wema hunnɔ daɖɛ ɖe gbe li o. ¹⁷ Ɖo cinɔɖuɖu wema ɖe tɔnɔ edɔwawa nɔ amɛ ci yi wɛɛ gbe kpɔtɔ le agbe o. Vɔ ɔ, wo sɔ tɔnɔ edɔwawa nɔ amɛ ci wɛɛ daɖɛ ku. ¹⁸ Nɛnɛke yi e le do, yi ehun va kɔdo nyigban gbɔxwe yi ezoɖuɖu xoxuitɔ va tɔ edɔ wawa nɛ. ¹⁹ Doŋkɔ ɔ, Mɔyizi hlɛn ese lɔwo, shigbe lehan yi wo le do le esewo wemawo mɛ do nɛ, le jukɔn lɔ pleŋ ŋmɛ. Le yi godu ɔ, e va sɔ xwenyisuviwo koɖo egbɔsuwo 'hun koɖo eshi, yi sɔ avɔ jin ɖeka koɖo yizɔpu, yi sɔ dodoɔ ehun koɖo eshi lɔ mɛ, yi sɔ wuwuɔ do ese wema lɔ koɖo jukɔn lɔ pleŋ nu. ²⁰ Yi nunuɔ mɔ: «Ehun ci yi ɖoɖoɔ ekpe ezoɖuɖu ci yi Mawu sɔ ɖo anyinɔnɔ nɔ mi ke.» ²¹ Nɛnɛke ɔ, Mɔyizi gbe wu ehun lɔ do agbaxɔ lɔ nu koɖo edɔwanu ciwo pleŋ yi wo zannɔ nɔ sɛnsɛn 'dɔ lɔ nu. ²² Le ese mɛ ɔ, ehun yi wo sɔ klɔnɔ eɖyiwo shi le enuwo pleŋ nu, yi nɔ ehun ɖe kɔ ɔ, Mawu ɖe sɔnɔ enuvɔn ke amɛ o. ²³ Nɔ e nyi mɔ wo klɔklɔ eɖyiwo le enu ciwo yi ɖyi jiŋkuimɛtɔ hunnɔwo ji ɔ, e le veviɖe mɔ avɔsa ciwo yi nyɔ sɔwu hunnɔwo, yi wa sɔ klɔ eɖyiwo so jiŋkuimɛnuwo nu. ²⁴ Sɛnsɛntɔxu ci yi agbetɔwo cu, yi e nyi kpɔwɛ kpoŋ nɔ sɛnsɛntɔxu adoduitɔ lɔ ɔ, ɖe nyi e yi mɛ yi Kliso ɖo o. Vɔ ɔ, jiŋkuimɛ yi e ɖo, yi vayi cu ete le ŋmɛ nɔ Mawu ɖaa yɛ do miwo ta. ²⁵ Exweta ɖeka duu ɔ, avɔsatɔ gangantɔ hɛnnɔ elanwo 'hun, yi yinɔ sɛnsɛntɔxu lɔ. VɔKliso yɛ ɔ, yɛ ɖe ɖo jiŋkuimɛ yi sɔ yiɖeki sa avɔ zenɛniɖe o. ²⁶ Nɔ e nyi mɔ ahan yi e le sasa nɛ ɔ, Kliso a le efun kpeɔ zenɛniɖe xoxoxo so xexe lɔ gɔnmɛjeje mɛ. Vɔ eviɛɛ ɔ, e va le ŋkeke hunnɔwo ciwo yi nyi godugodutɔ mɛ, yi sɔ yiɖeki sa avɔ, yi ɖe nuvɔnwo shi. ²⁷ Zeɖeka yi agbetɔ ɖekpokpui ɖo a ku; yi le yi godu ɔ, Mawu a ɖo kojo koɖyi. ²⁸ Ahan lɔ ke yi e le do nɛ, yi Kliso sɔ yiɖeki sa avɔ zeɖeka, yi cucu amɛ sugbɔ nuvɔn si. Kliso lɔ a gbe va va zevetɔ lɔ. Nɔ e gbe va va ɔ, ɖa gbe nyi nuvɔnwo yi a va cucu shi o. Vɔ ɔ, va a va hwlɛn amɛ ciwo yi kpɔkpɔ emɔ nii gan.