1 Enyɔ vevitɔ le enyɔ ciwo yi mi nunuɔ me yi nyi mɔ: avɔsatɔ gangantɔ hunnɔ hanwo yi le mi shi nɛ. E nɔ anyinɔnɔ do ɖushimɛ nɔ Mawu, ŋsɛntɔ gangantɔ lɔ fiɔʒinkpin le jiŋkui mɛ. 2 E le avɔsatɔ gangantɔ 'dɔ waa le gbedoɖa tɔxu, agbaxɔ adodui ci yi Axwetɔ ŋtɔ cu mɛ; yi ɖe nyi agbetɔ ɖe yi cui o. 3 Wo ɖonɔ avɔsatɔ gangantɔ, nɔ a sɔ enunanawo ɖo ŋmɛ nɔ Mawu, yi a sa avɔwo nii. E le mɔ miwo 'vɔsatɔ gangantɔ can a wa enuɖe ci yi a sɔ na Mawu ɖɛ. 4 Nɔ e nyi mɔ nyigban ji yi e le sa ɔ, ɖa nyi avɔsatɔ kpetii o. Ɖo avɔsatɔ buwo le nyigban lɔ ji vɔ, yi sɔnɔ enunanawo ɖonɔ ŋmɛ nɔ Mawu shigbe lehan yi ese nui do nɛ. 5 Sɛnsɛn 'dɔ ci waa yi avɔsatɔ hunnɔwo le, nyi shiŋmɛ alo nɔnɔmɛ nɔ enu ciwo yi wo wanɔ le jeŋkuimɛ. E sɔ egbe koɖo enu ci yi jɔ le Mɔyizi hwenu: gacimɛ yi a cu agbaxɔ a sɔ wa tɔxwe kɔkɔɛ lɔ ɔ, Mawu nu doashi nii mɔ: «Kpɔɛ gbɔ nyuiɖe nɔ a sɔ egbe koɖo kpɔɖonu ci yi ŋ doasɛ nɔ eo le ekpo lɔ ji.» 6 Vɔ eviɛɛ ɔ, edɔ ci yi Mawu ɖonɔ Yesu wu egan avɔsatɔ hunnɔwo tɔ boo. Ɖo ɔ, gblamɛdradonɔamɛ 'zoɖuɖu dɔ ci yi e wa, nyɔ sɔwu; edɔ lɔ nɔ anyinɔnɔ do egbeɖu ciwo yi nyɔ sɔwu ji. 7 Nɔ afɛn ɖe ɖe le ezoɖuɖu ŋkɔtɔ lo nu sa ɔ, kpɔ ɖa gbe va le dandandan mɛ mɔ wa ɖɔli yi koɖo amɛvetɔ ɖe o. 8 Vɔ ɔ, afɛnwo yi Axwetɔ kpɔ le ezoɖuɖu hunnɔ lɔ nu hwecinu yi e nu mɔ: «Ŋkekewo gbɔgbɔ yi na trɔ a ɖu ezo yoyu koɖo Israyɛli kodo Yuɖa jukɔnwo. 9 Ezɔɖuɖu cɛ ɖa le shigbe ci yi ŋ ɖu koɖo wowo tɔgbiwo hwecinu yi ŋ le alɔnu nɔ wo, yi kplɔ wo ti le Eʒiputu ju mɛ nɛ o. Nɔ ci yi wo ɖe nɔ egbe ji nɔ ŋ le ezoɖuɖu lɔ mɛ taɖo ɔ, enyɛ can, ŋ ɖe ɖo eŋui wo o, Axwetɔ yi nu ahan. 10 Axwetɔ gbe nu ke mɔ: Enu ciwo 'zo yi na ɖu koɖo Israyɛli jukɔn le ŋkeke hunnɔ lɔwo godu ke: Na ŋwlɛ anyi sewo do wowo susuwomɛ, na ŋwlɛ wo do wowo 'jiwomɛ, na nyi wowo Mawu, yi wa nyi anyi jukɔn. 11 Amɛɖe ɖa gbe va kplan enu yi 'jumɛvi alo nɔviɛ mɔ: Tekpɔ a jeshi Axwetɔ! Ɖo wo pleŋ a va jeshi ŋ, so ɖeviwo ji kaka je mɛganxoxuwo ji. 12 Ɖo ɔ, na sɔ wowo 'numajɔmajɔɛwo ke wo, ŋ ɖa gbe ɖoɖoɔ eŋui wowo 'nuvɔnwo o.» 13 Ci yi Mawu xoxoɔ nuxu so ezoɖuɖu yoyutɔ nu ɔ, e sɔ ŋkɔtɔ lɔ sɔ wa xoxui. Keŋ ɔ, enu ci do xoxui, yi kpo ɔ, va yi e va gunɔ le majinjinɖe mɛ kpoŋ, yi a nyi e vɔ.