¹ Mɛlukisedɛki hunnɔ lɔ nyi Salɛmu fiɔ yi gbe nyi avɔsatɔ nɔ Mawu ci yi le eji boo. Hwecinu yi Ablahamu ɖu efiɔwo ji, yi gbɔkɔ ɔ, Mɛlukisedɛki va do ego yi, yi cu eshi nii. ² Eyɛ yi Ablahamu na ahwagbejinu ciwo pleŋ yi e kpɔ, mado amɛwo. Do ŋkɔ ɔ, nyikɔ ci yi le shi gɔnmɛɖeɖe yi nyi mɔ: «Enujɔjɔɛwawa fiɔ», yi sɔyi ji ɔ, e gbe nyi Salɛmu fiɔ ci gɔnmɛ yi nyi mɔ: «fafa fiɔ». ³ Eda, enɔ koɖo tɔgbi ɖe le Mɛlukisedɛki shi o; yi ŋkeke ci ji wo jii le koɖo ci ji yi e ku le, ɖe le shi o. E ɖyi Mawu Eviɛ lɔ. Ɖo ɔ, e nyi avɔsatɔ sɔyi mavɔmavɔ. ⁴ Mi kpɔ lehan yi Mɛlukisedɛki lɔ nyi bubumɛ do ɖa! Miwo tɔgbi tɔgbi Ablahamu na madowo yi le ahwagbejinu ciwo yi e kpɔ mɛ! ⁵ Le Mɔyizi seci lɔ nu ɔ, wo ɖe emɔ nɔ Levi jijimɛvi ciwo yi nyi avɔsatɔwo mɔ, wo le xɔnɔ madowo le israyɛliviwo nuwo pleŋ ji. Nɔ wa nui ɔ, wo xɔxɔ madowo le wowo nɔvi ciwo yi gbe nyi Ablahamu jijimɛviwo hɛnnɛ shi. ⁶ Vɔ ɔ, Mɛlukisedɛki yɛ ɖe le Levi jijimɛviwo mɛ o. Ganŋkegan ɔ, e xɔ madowo le enu ciwo yi Ablahamu kpɔ le ahwagbeji ji. Sɔwu nɛnɛ ɔ, e gbe cu eshi nɔ amɛ ci yi Mawu ɖo egbewo nɔ. ⁷ Mi trɔgbɔ nya nyuiɖe mɔ mɛgan xoxu yi cunɔ eshi nɔ ɖevixwɛ. ⁸ Levi jijimɛvi ciwo yi xɔnɔ madowo le israyɛliviwo shi ɔ, agbetɔ wo nyi yi kunɔ. Vɔ Mɛlukisedɛki ye ɔ, yɛ kpɔtɔ le agbe tɛgbɛɛ shigbe lehan yi Mawu 'nyɔ wemawo nui daɖɛ do nɛ. ⁹ A sɔ cu eta nii ɔ, wo hɛn wa nu mɔ Levi jijimɛvi ciwo yi xɔnɔ madowo hunnɔwo can na madowo toto Ablahamu ji hwecinu yi Ablahamu na madowo Mɛlukisedɛki. ¹⁰ Ɖo wo ɖe ji Levi vɔ o. E kpɔtɔ le tɔgbiɛ Ablahamu mɛ, hwecinu yi Mɛlukisedɛki vayi do ego koɖo Ablahamu. ¹¹ Avɔsatɔwo dɔ ci yi Levi jijimɛviwo wanɔ ji yi ese ciwo yi Mawu do nɔ Israyɛli jukɔn nɔ anyinɔnɔ do. Nɔ e nyi mɔ Levi jijimɛviwo 'vɔsatɔ dɔwawa lɔ le blebu le agowo pleŋ mɛ sasa ɖee, e gbe ʒian mɔ amɛ ci yi nyi avɔsatɔ sɔ zɔndo Mɛlukisedɛki ɖoɖo ji; yi ɖe nyi Arɔn ɖoɖo ji yi e zɔndo o. a gbe va a? ¹² Ɖo nɔ wo trɔ avɔsatɔ dɔ lɔ ɔ, wo ɖo a gbe trɔ ese lɔ can hɛnnɛ. ¹³ Miwo 'Xwetɔ ci nu yi wo nu enyɔ hunnɔwo so le akɔta ɖeka ci mɛ yi 'mɛɖe ɖe so yi wa avɔsatɔ dɔ le avɔsakpe lɔ ji kpɔ o nɛ. ¹⁴ Amɛshiamɛ nya nyuiɖe mɔ, miwo 'Xwetɔ lɔ jɔ so Yuɖa 'kɔta mɛ. Hwecinu yi Mɔyizi xo nuxu so avɔsatɔwo nu ɔ, ɖe nu enyɔ ɖe so akɔta hunnɔ nu o. ¹⁵ Enu ci yi gbe ɖe enyɔ lɔ gɔnmɛ do ji, yi nyi mɔ: avɔsatɔ bu ci yi va lɔ ɖyi Mɛlukisedɛki. ¹⁶ Ɖe trɔ avɔsatɔ le agbetɔ koɖo yi jijimɛviwo gbeɖeɖe ŋsɛn nu o. Vɔ ɔ, e trɔ avɔsatɔ le agbemaɖosɛnxu lɔ ŋsɛn mɛ. ¹⁷ Ɖo Mawu nyɔ wemawo ɖe kunu so nu daɖɛ mɔ: «Avɔsatɔ yi e nyi sɔyi mavɔmavɔ sɔ zɔndo Mɛlukisedɛki ɖoɖo ji.» ¹⁸ Ahan ɔ, wo ɖe ese xoxui lɔ shi. Ɖo ɔ, ŋsɛn ɖe le nu o, yi ɖe nyɔ nɔ enuɖe wanu o. ¹⁹ Ese ci yi Mawu na toto Mɔyizi ji lɔ ɖe na yi enuɖe nyɔ vɛ o. Ecɛɛ ɔ, enubu ba. E wu egan esewo. E yi na mɔkpɔkpɔ adoduitɔ mi; yi ɖe emɔ nɔ mi; yi mi a sɛnŋ tegogo Mawu. ^{20 21} Sɔwu ahan ɔ, Mawu gbe ta yiɖeki do ji. Amɛ ɖetɔlɔwo ɔ, wowo trɔ avɔsatɔ enutata ɖe mabɔ do nu. Vɔ ci yi Mawu sɔ Yesu yɛ ɖo avɔsatɔ ɔ, e gbe ta yiɖeki do ji, yi nu nii mɔ: «Tɔhonɔ ta enu, yi ɖa va trɔɛ gbeɖe o mɔ: "Avɔsatɔ yi e nyi sɔyi mavɔmavɔ".» ²² E yi na taɖo yi Yesu can va trɔ amɛ ci yi na, yi mi kandoji mɔ ezo yoyu ci yi Mawu va ɖuɖuɔ koɖo mi nyɔ sɔwu xoxwitɔ. ²³ Sɔwu ahan ɔ, vovototo ɖeka gbe le avɔsatɔ lɔwo mɛ: Avɔsatɔ sasatɔ, Levi ²jijimɛvi lɔwo sugbɔ. Ɖo eku ɖe lɔn, yi wa ci agbe tɛgbɛɛ a sɔ le avɔsatɔ dɔ lɔ waa o. ²⁴ Vɔ Yesu ɔ, yɛ le agbe tɛgbɛɛ, yi le avɔsatɔ dɔ waa sɔyi mavɔmavɔ. ²⁵ E yi na taɖo yi amɛ ciwo yi tonɔ Yesu ji, yi gogonɔ Mawu ɔ, Yesu a hwlɛn wo gan sɔyi mavɔmavɔ. Ɖo e le agbe tɛgbɛɛ, yi a ɖeɖeɔ kuku nɔ Mawu do wowo 'ta. ²⁶ Nɛnɛ ɔ, Yesu yi nyi avɔsatɔ gangantɔ ci yi ʒian nɔ mi. E nyi amɛ kɔkɔɛ. E nyi xomɛvunɔ. Ɖe xo eɖyi o. Mawu ma yi koɖo nuvɔnwatɔwo mɛ, yi kɔɛ yi eji boo le jeŋkuimɛ. ²⁷ Ɖe ɖyi avɔsatɔ gangantɔ kpɛtɛ ciwo yi sanɔ avɔ gbeɖeka duu do wowo nuvɔnwo'ta, yi a gbe sasa do jukɔn lɔ nuvɔnwo'ta o. E wa avɔsa hunnɔ zeɖeka pɛɛ do enu nɔ ŋkeke kpɛtɛwo pleŋ, hwecinu yi e sɔ yiɖeki sɔ jo, yi wo sɔ sa avɔ. ²⁸ Ɖo ɔ, amɛ ciwo yi wo sɔ ɖo avɔsatɔ le ese ci yi Mawu na toto Mɔyizi ji lɔ nu nyi amɛ gbɔjɔgbɔjɔwo shigbe agbetɔwo pleŋ nɛ. Vɔ ci yi Mawu ta yideki le ese lɔ godu ɔ, yɛ sɔ Eviɛ lɔ sɔ ɖo avɔsatɔ gangantɔ, yi e trɔ amɛ ci yi mɛ vɛ le enuwo pleŋ mɛ sɔyi tɛgbɛɛ.