¹ Ci yi e le ahan ɔ, mi na nɔ mi a tashi nukplankplan ciwo yi nyi ɖeviwo le Kliso mɛ tɔ hunnɔwo ɖɛ, yi a trɔ ɖaɖa mɛganxoxuwo le Kliso mɛ tɔwo gbɔ. Mi ɖe ṣo yi a gbe kplankplan klistotɔnyinyi gɔnmɛɖɔkpe nyɔwo o. Wowo nyi mɔ: Wa trɔ amɛɖeki a jinyɔnɔnuitɔ, yi a mi enu ciwo yi kplɔnɔ amɛ yi ekumɛ wawa, yi a xɔ Mawu ji se. ² Mi ɖe ɖo a gbe kplankplan enu mi ke so mawushilele nɔ amɛ, alo alɔdadado etanɔamɛ, amɛkukuwo fɔnfɔnso ekuwodi koɖo kojoɖoɖo mavɔmavɔ ci yi Mawu a va ɖo koɖo agbetɔwo nu o. ³ Mi na nɔ mi a yi ŋkɔ koɖo enu yoyuwo kplankplan. Nɔ Mawu dro ɔ, ahan yi mi a tɔ wɛwɛ do nɛ. ⁴ Ɖo ɔ, amɛ ciwo yi kpɔ Mawu klɛnklɛn xɔ kpɔ, yi kpɔ Mawu nunanawo tɔ enu kpɔ, yi kpɔ Gbɔngbɔn Kɔkɔɛ xɔ kpɔ. ⁵ Yi do jeshii mɔ Mawu nyɔ nyɔ nɔ yewo yi se xexe ci yi gbɔgbɔ ŋsɛnwo le lanmɛ. ⁶ Ganŋkegan yi gbe trɔ tɔ enu manyɔ manyɔ wawa ɔ, wo ɖa gbe sɛnŋ na yi wowo a va trɔ wowoɖekiwo a ji nyɔnɔnuitɔ ke o. Ɖo wowo ɔ, wo gbe trɔ yi kankan Mawu Eviɛ lɔ do acisoga ji, yi gbe sɔɛ do ahwadomɛ, yi amowo zuizuiɔ. ⁷ Nɔ e nyi mɔ nyigban ɖe nunu ɔ eshi ci wo yi jaja kplɔ nɔnɔdo do ji, yi na yi jinukuwo minɔ nɔ amɛ ciwo yi denɔ wowo gblewo ɔ, Mawu le eshi cucu ɔ nɔ nyigban hunnɔ. ⁸ Vɔ nɔ e nyi mɔ nyigban lɔ va mi ŋja gbewo koɖo aŋwakanwo ɔ, ɖe gbe nyi enuɖe wanu o. Majinjinɖe yɛ ɔ, Mawu a pofi di, yi wa tɔ ezo yi. ⁹ anyi xlɔ veviwo, nɔ xoxoɔ nuxu ahan can ɔ, mi kandoji mɔ miwo yɛ ɔ, mi le emɔ nyui ji. E yi nyi hwlɛngankpɔkpɔ. ¹⁰ Mawu ɖe nyi enumajɔmajɔɛwatɔ o. Ɖa ŋlɔbe edɔ ciwo yi mi wa koɖo lɔnlɔn ci yi mi ɖo nii, sɔ toto enu ciwo yi mi wa, yi gbe kpɔtɔ wawa nɔ yi mɛ cancanwo mɛ o. ¹¹ Vɔ ɔ, mi ji nyɔnɔnuitɔ mɔ, miwo domɛtɔ ɖeka ɖeka le kpɔtɔ a sɔsɔ ezo do edɔnyuiwawa nu ahan kaka sɔyi vɔvɔnu nɔ enu ci yi mi kpɔkpɔ emɔ nɔ lɔ, a nyi miwo tɔ blebu. ¹² Mi ɖe ji mɔ, mi a nyi amɛmabi do enunu tɔwo o. Vɔ ɔ, mi kpɔ do amɛ ciwo yi xɔ Mawu ji se, yi gbe gbɔnnɔ eji ɖɛ wo nu, yi a wa. Ɖo amɛ hunnɔwo han yi xɔnɔ enunyui ciwo yi ŋgbe Mawu ɖo nɔ mi nɛ. ¹³ Ci yi enu bu ɖe ɖe gbe li yi wu egan Mawu, yi a ta ɔ, hwecinu yi e ɖo egbe nɔ Ablahamu ɔ, e ta yiɖeki do ji nii. ¹⁴ Mɔ: «Dandandan ɔ, na cu eshi nɔ eo sugbɔ; yi a na yi ao jijimɛviwo a sugbɔ.» ¹⁵ Ablahamu gbɔn eji ɖɛ yi nɔ ete kpɔ Mawu. Eyi Mawu sɔ enu ci ŋgbe yi e ɖo nii lɔ jo nii. ¹⁶ Nɔ agbetɔwo a ta enu do enuɖe ji ɔ, enu ci yu wu egan wo, yi wo tanɔ. Eyi enu ci yi wo ta hunnɔ nyinɔ ekpeɖonujinu ci yi cunɔ emɔ do enyɔdɔndɔnkpɔ ɖekpokpui. ¹⁷ Enu ci yi na taɖo yi Mawu ta yiɖeki do egbeɖu ci yi e wa nɔ Ablahamu ji nɛ. E wɛɛ ahan a gbe sɔ doasɛ do ji, nɔ amɛ ciwo yi a xɔ enu ciwo ŋgbe yi e ɖo mɔ gbeta ci yi ye sɔ lɔ ɔ, trɔtrɔ buɖe ɖe li nii o. ¹⁸ Nɛnɛ ɔ, enu amɛve cɛwo, ciwo yi nyi kpɔ mɔ: egbe ci yi Mawu ɖo koɖo yiɖeki ci ji yi e ta enu do ɖa trɔ gbeɖe o. Ɖo Mawu ɖa sɛnŋ xovi o. Ci yi e le ahan ɔ, miwo ciwo yi shi, yi va be do Mawu gbɔ ɔ, enyɔ cɛ le do ŋsɛn lanmɛ nɔ mi sugbɔ, nɔ mi a kpɔtɔ yi a sɔ miwo 'mɔkpɔkpɔ dado enu ci ŋgbe yi e ɖo nɔ mi lɔ ji goguiɖe. ¹⁹ Emɔkpɔkpɔ hunnɔ hɛn miwo sewo do ete goŋgoŋ shigbe lehan yi etɔjihunganganshinu 'ga hɛnnɔ etɔjihunganganwo do ete do nɛ. Emɔkpɔkpɔ lɔ to avɔ ci yi wo sɔ cu enu nɔ texwe kɔkɔɛ lɔ mɛ kaka yi yi godu nii. ²⁰ Texwe kɔkɔɛ cɛ lɔ mɛ yi Yesu doŋkɔ yi yi do miwo ŋci. Ɖo ɔ, e trɔ avɔsatɔ gangantɔ sɔyi mavɔmavɔ sɔ zɔndo Mɛlukisedɛki ɖoɖo ji.