¹ Agbetɔwo mɛ yi wo cannɔ avɔsatɔ gangantɔ ɖekpokpui le, yi sɔ donɔ anyinɔnɔ, nɔ a sɔ agbetɔwo fɔ ɖo ete le Mawu gbɔ. Edɔ ci yi e ɖo, yi a wa, yi nyi mɔ, e dɔ yi a nanɔ enuwo Mawu, yi a gbe sanɔ avɔwo nɔ Mawu do eta nɔ enuvɔn ciwo yi agbetɔwo wanɔ. ² Ci yi ehɛnwo le avɔsatɔ gangantɔ ŋkɔ nu hɛnnɛ ɔ, a sɛnŋ se enu gɔnmɛ nɔ amɛmanyaɖewo koɖo enumanyamanya watɔwo. ³ Ehɛn hunnɔwo ŋci ɔ, ɖe nyi jukɔn lɔ 'nuvɔnwo ɖekɛ yi a sanɔ avɔ do eta nɔ o; e ɖo a sanɔ avɔ do eta nɔ yiŋtɔ nuvɔnwo hɛnnɛ. ⁴ Amɛɖekpokpui ɖa sɛnŋ sɔ bubu ci yi le avɔsatɔ gangantɔ nu na yiɖeki o. Nɔ Mawu yɔ amɛ, yi sɔ amɛ ɖui ɔ, e yi wo trɔnɔ avɔsatɔ gangantɔ shigbe lehan yi e yɔ Arɔn yi sɔ ɖui do nɛ. ⁵ Nɛnɛke yi Kliso lɔ ɖe sɔ bubu ci yi le avɔsatɔ gangantɔ nu na yiɖeki do nɛ. Vɔ ɔ, Mawu yi sɔɛ nii, yi nu so nu mɔ: «E nyi Evinyɛ, ŋ ji eo egbɛ.» ⁶ Eyi le fibuwo ɔ, wo gbe nu hɛnnɛ mɔ: «Avɔsatɔ gangantɔ, yi e nyi sɔyi mavɔmavɔ. Sɔ zɔndo Mɛlukiseɖɛki ɖoɖo ji.» ⁷ Hwecinu yi Yesu le nyigban ce ji ɔ, e nya mɔ Mawu ɖo ŋsɛn yi a hwlɛn eye gan le eku shi. Nɛnɛ ɔ, e wanɔ kuifan nii, yi ɖenɔ kuku nii, axwa koɖo ɖashi le ŋmɛ. Eyi Mawu wanɔ do ji nii, nɔ ci yi Yesu buini sugbɔ taɖo. ⁸ Ci yi e nyi Mawu Eviɛ can ɔ, e kplan lehan yi wa se etonu nɔ Mawu do le veve ciwo yi e se mɛ. ⁹ Ci yi Mawu ɖe egbɔ nɔ enu ci yi e drɔ do ete toto ji vɛ ɔ, Yesu lɔ va trɔ hwlɛngan mavɔ jɔxu nɔ amɛ ciwo pleŋ yi senɔ 'tonu nii. ¹⁰ Ɖo Mawu sɔ avɔsatɔ gaangantɔ sɔ zɔndo Mɛlukiseɖɛki ɖoɖo ji. ¹¹ Enyɔ sugbɔ le mi shi, yi mi a nu nɔ mi so enyɔta cɛ nu. Vɔ ɔ, enyɔwo wo nyi, yi wowo mɛ ɖeɖe nɔ mi, a gbɔn enu. Ɖo mi trɔ amɛ ciwo yi ɖe sɛnŋ senɔ enugɔnmɛ kaba o. ¹² Azan ci yi wa le Mawu nyɔwo sese mɛ yɛ sun mɔ mi a nyi cicawo nɔ amowo sa ɛ dru. Ganŋkegan kpɔ mi ɖe senɔ wo nyuiɖe o. Eyi na tado yi mi gbe ʒian mɔ, wa gbe kplankplan mi afɔɖeɖe ŋkɔtɔwo le Mawu nyɔ mɛ. Ci yi mi ɖo, yi a nyi mɛganxoxuwo le xɔse mɛ, yi a ʒian enuɖuɖu sɛnŋsɛŋ sa ɔ, mi gbe le shigbe devixwɛwo nɛ; yi e nyi anɔshi yi wa gbe kpɔtɔ a nana mi. ¹³ Amɛɖekpokpui ci yi a kpɔtɔ a le anɔ nɔɔ ɔ, devixwɛ yi e kpɔtɔ nyi tɛgbɛɛ, yi ɖa sɛnŋ jeshi enujɔjɔɛ ɖe le Mawu mɛ o. ¹⁴ Vɔ ɔ, mɛganxoxuwo yi ɖunɔ enu sɛnŋsɛnŋwo. Eyi sɔ todo enu sugbɔ ciwo mɛ yi wo to kpɔ ɔ, wo zan wowo susuwo, yi sɔ jeshi enunyui le enudɔndɔn gbɔ kaka e ma do wo do nɛnɛ ji.