¹ Sasa vayi ɔ, Mawu ɖo egbe nɔ mi mɔ, mi a yi gbɔngbɔndomɛ ju ci yi e drado daɖɛ nɔ mi mɛ, yi egbeɖu lɔ kpɔtɔ li nɔ mi egbɛ. Nɛnɛ ɔ, mi kpɔ miwoɖekiwo ji nɔ miwo domɛtɔ ɖe ŋ gbe gli emɔnukpɔkpɔ cɛ ci yi mi a sɔ ɖo gbɔngbɔndomɛ ju lɔ mɛ do o. ² Ɖo miwo ɔ, mi se Mawu ŋɛnyui lɔ shigbe lehan yi miwo tɔgbiwo sii do le zoxu sakl sakli lɔ mɛ nɛ. Vɔ ɔ, eŋɛ lɔ ci wo do nɔ wo, ɖe hɛn enyui ɖe va nɔ wo o; nɔ ci yi wo ɖe xɔ enyɔ lɔ ji se taɖo. ³ Miwo ciwo yi xɔɛ ji se ɔ, mi a ɖo gbɔngbɔndomɛ ju cɛ lɔ mɛ. E yi nu yi e nu so mɔ: «Ɖo hwecinu yi ŋ shinxomɛ ɔ, ŋ ta enyɛɖeki mɔ wo ɖa ɖo gbɔngbɔndomɛ ju ci ŋ drado daɖɛ mɛ gbeɖe o!» Mawu ɖegbɔ yi dɔwawawo le xexe lɔ gɔnmɛjeje mɛ ɖyii, gbɔxwe yi ɖo egbe lɔ. ⁴ Ɖo ɔ, e nu yi wo ŋwlɛ do fiɖeka le Mawu nyɔ wemawo mɛ so ŋkeke amadrɛtɔ lɔ nu mɔ: «Mawu gbɔndomɛ le edɔ ciwo pleŋ yi e wa nu le ŋkeke amadrɛtɔ lɔ ji.» ⁵ E gbe nu yi wo ŋwlɛ daɖɛ do fi bu le wema lɔwo ke mɛ mɔ: «Wo ɖa ɖo gbɔngbɔndomɛ ju ci yi ŋ drado daɖɛ mɛ gbeɖe o!» ⁶ Ci yi e le ahan ɔ, amɛ ŋkɔtɔ ciwo yi se Mawu ŋɛnyui lɔ ɖe ɖo gbɔngbɔndomɛ ju lɔ mɛ o. Ɖo ɔ, wo tri eto. Nɛnɛ ɔ, gbeɖu lɔ gbe kpɔtɔ li; yi nɔ 'mɛɖewo hɛn ɔ, wowo a ɖo gbɔngbɔndomɛ ju lɔ mɛ. ⁷ Eyi na taɖo ɔ, Mawu gbe trɔ azan bu ke. Azan lɔ yi nyi «Egbɛ». Boo ɔ, e gbe xo nuxu so todo Davidi ji shigbe lehan yi wo nui do sasa nɛ, le wema lɔ ke mɛ mɔ: «Nɔ mi se yi Mawu yɔyɔ mi egbɛ ɔ, mi a ɖo eto yi; mi ŋgbe shinŋta o.» ⁸ Ɖo nɔ e nyi mɔ Ʒozuwe kplɔ jukɔn lɔ yi gbɔngbɔndomɛ ju lɔ mɛ sa ɔ, Mawu ɖa gbe va xo nuxu le yi godu mɛ so azan bu nu o. ⁹ Nɛnɛ ɔ, gbɔngbɔndomɛ li nɔ Mawu jukɔn lɔ, yi gbɔngbɔndomɛ cɛ lɔ ɖyi gbɔngbɔndomɛ ci yi le ŋkeke amadrɛtɔ lɔ ji. ¹⁰ Ɖo 'mɛ ciyi ɖo ju ci yi Mawu drado ɖɛ mɛ gbɔnnɔ domɛ le edɔ ciwo yi e wa nu shigbe lehan yi Mawu gbɔndomɛ le yi dɔwawawonu do nɛ. ¹¹ Eyi na taɖo ɔ, mi na nɔ mi a ɖɔŋ, yi a ɖo gbɔngbɔndomɛ ju lɔ mɛ. Nɛnɛ ɔ 'mɛɖe ɖa va sɛŋ eto le mi mɛ shigbe miwo tɔgbiwo nɛ, yia juin o. ¹² Ɖo Mawu nyɔ lɔ le agbe, yi hlɔnhlɔn le nu. E ɖa xlɛxlɛxlɛ sɔwu ewui enu amɛve nɔ ɖekpokpui. E dɔnɔ amɛ mɛ kaka yi a ma ese koɖo gbɔngbɔn mɛ, yi a ma kpexukpexuwo koɖo exumɛmiwo mɛ. E kijenɔ agbetɔ drowo koɖo yi jimɛ nyɔwo kpɔ, yi a kpɔ mɔ, wo nyɔ mɛ.

¹³ Enuɖe ɖe le Mawu nuwawawo mɛ, yi wla do Mawu o. Enushianu le maama, yi le dandanŋgbe le yi ŋkuviwo mɛ. Eyɛ yi mi ɖo a jo kɔnŋta nɔ. ¹⁴ Avɔsatɔga gangantɔ ɖeka le mi shi. E yi nyi Yesu, Mawu Eviɛ lɔ, ci yi Mawu gbɔ le jiŋkuimɛ. Ci e le nɛnɛ ɔ, mi na nɔ mi a le xɔse ci mɛ yi mi hun le amɛshimɛ ŋmɛ do ashi goguiɖe. ¹⁵ Ɖe nyi avɔsatɔ gangantɔ ci yi ɖa sɛnŋ se enugɔnmɛ nɔ mi le miwo gbɔjɔgbɔjɔ hwenuwo, yi le mi shi o. Vɔ ɔ, miwo 'vɔsatɔ gangantɔ to tetekpɔ mɛ kpɔ le enushianu mɛ, shigbe miwo hanwo nɛ; ganŋkegan yi ɖe wa enuvɔn kpɔ o. ¹⁶ E yi na taɖo, koɖo kankandoji ɔ, mi na nɔ mi a tegogo Mawu fiɔʒinkpin lɔ, fini ci yi xomɛvunuwo le. Le enɔtɔxu ɔ, Mawu a ku ŋshishi nɔ mi, yi a gbe na xomɛvunuwo mi. Nɛnɛ nɔ mi va ʒian yi kpekpedonu ɔ, a kpedo mi nu.