¹ Nɔvinyɛwo, Mawu can mi do akpo nɔ yiɖeki. Eyi na taɖo ɔ, miwo susuwo le nɔ Yesu ji. Mi hunhun'ɔmɛ le amɛshiamɛ ŋmɛ mɔ, yi nyi Mawu mɛdɔdɔ koɖo avɔsatɔ gangantɔ. ² Ɖo ɔ, e nɔ gbeji nɔ Mawu ci yi ciin nɔ edɔ hunnɔ lɔ shigbe lehan yi Mɔyizi nɔ egbeji nɔ Mawu do, yi wa edɔ nii le yi xwe lɔ pleŋ ci yi nyi yi jukɔn lɔ mɛ do nɛ. ³ Wo donɔ bubu amɛ ci yi cu axwe nu sɔwu axwe lɔ ŋtɔ. Nɛnɛke yi e le nɛ mɔ, bubu ci yi wo do Yesu nu gangan sɔwu ci yi wo do Mɔyizi nu nɛ. ⁴ Axwe ɖe ɖeli yi ɖe nyi agbetɔ yi cui o. Vɔ ɔ, enuwo pleŋ watɔ, yi nyi Mawu. ⁵ Vayi ɔ, Mɔyizi yɛ nɔ 'gbeji nɔ Mawu le edɔwavi ci yi e nyi nii, le yi xwemɛ. E nyi kunuɖeɖe nɔ enyɔ ciwo yi Mawu a va nuwo nu. ⁶ Vɔ eviɛɛ ɔ, Kliso lɔ yɛ nɔ 'gbeji nɔ Mawu le Evi ci yi e nyi, yi Mawu ciin, yi sɔ ɖo etɔ do enu nɔ Mawu xwe lɔ. Miwo yi nyi Mawu xwe lɔ, nɔ mi kpɔtɔ le emɔkpɔkpɔ mɛ koɖo jijɔ. ⁷ Eyi na taɖo, shigbe lehan yi Gbɔngbɔn Kɔkɔɛ nui do nɛ: «Nɔ mi se yi Mawu yɔyɔ mi egbɛ ɔ, ⁸ mi a ɖo eto yi; mi ŋgbe sɛn ŋta shigbe lehan yi mi wɛwɛ do sasa, yi fɔn egu do ji gbecigbe yi mi duikpɔ le zoxu sakli sakli ji nɛ o. ⁹ Ci yi miwo tɔgbiwo kpɔ enu ciwo yi ŋ wawa le ŋmɛ nɔ wo kaka sɔnanɔ exwe eka can ɔ, wo vun enu kpɔ nu ŋ le zoxu sakli sakli lɔ mɛ. ¹⁰ Eyi na taɖo ɔ, ŋ shinxomɛ ɖo wo, yi nu mɔ: "wo ɖeɖeɔ, wowo susuwo so ŋ nu, mami mami; wo ɖe mɔmɔŋje, enu ci yi ŋ jijiɔ sɔso wo gbɔ mɛ o". ¹¹ Eyi le xomɛshin lɔ mɛ ɔ, ŋ ta enyɛɖeki mɔ: "Wo ɖa ɖo gbɔngbɔndomɛ ju ci yi ŋ drado daɖɛ mɛ gbeɖe o!"» ¹² Nɔvinyɛwo, mi kpɔ nyuiɖe nɔ amɛɖe ŋgbe nɔ miwo domɛ yi susu a kpotu nii o, yi a gbe Mawu jimaxɔse, yi a ɖe yi susuwo so Mawu agbeagbe lɔ ji o. ¹³ Vɔ ɔ, mi donɔ ŋsɛn miwonɔnɔwo tɛgbɛɛ kaka a sɔnanɔ «egbɛ» nyɔ cɛ ci yi wo nu le fiɖeka le Mawu nyɔ wemawo mɛ, hwenu a ɖo. Gahunnɔmɛ ɔ, amɛɖe ɖa gbe eto nɔ Mawu le mi mɛ, yi a je enuvɔn mɛ o. ¹⁴ Ɖo ɔ, mi a nyi Kliso yumɛjetɔwo; nɔ e nyi mɔ kankandoji ci yi le mi shi le gɔnmɛjeje kpɔtɔ li kaka sɔyi vɔvɔnu. ¹⁵ Wo ŋwlɛ daɖɛ do fiɖeka le Mawu nyɔ wemawo mɛ mɔ: «Nɔ mi se, yi Mawu yɔyɔ mi egbɛ ɔ, mi a ɖo eto yi; mi ŋgbe shinŋta shigbe lehan yi mi wɛwɛ do sa, yi fɔn egu do ji nɛ o.» ¹⁶ Ci yi e le ahan ɖee, mɛwo yi se, yi Mawu yɔyɔ wo, ganŋkegan yi wo fɔn egu do ji ɔ? Ɖe nyi 'mɛciwo yi Mɔyizi je ŋkɔ nɔ, yi kplɔ ti so Eʒiputu jumɛ vayi sa yɔ ba? ¹⁷ Miwo yi Mawu shinhomɛ do kaka nanɔ exwe eka ɔ? Ɖe nyi amɛ ciwo yi wa enuvɔn, yi ku do zoxu sakli sakli lɔ mɛ, yi e shinhomɛ do ba? ¹⁸ Gacimɛ yi Mawu ta enu mɔ: «Wo ɖa ɖo gbɔngbɔndomɛ ju ci yi ŋ drado ɖɛ nɔ wo mɛ gbeɖe o» ɖee, mɛ nu yi e xoxoɔ nuxu so ɔ? Ɖe nyi amɛ ciwo yi fɔn egu nu yi e xoxoɔ nuxu so ba? ¹⁹ Mi kpɔ mɔ wo ɖa sɛnŋ yi vayi ɖo gbɔngbɔndomɛ ju cɛ lɔ mɛ o nɔ ci yi wo gbe xɔse maɖo taɖo.