¹ Eyi na taɖo ɔ, mi ɖo a le ŋkuvi sɛnŋsɛnŋɖe do enyɔ ciwo nu yi mi se nu; nɔ mi ŋgbe va tran so wowo mɔ ji o. ² Eŋɛ ci yi cikplɔtɔwo va do nɔ jukɔn lɔ ɖo kankandoji. Amɛ ciwo yi ɖe xɔ eŋɛ lɔ ɔ, yi gbe wawa do ji ɔ, Mawu dɔn eto nɔ wo shigbe lehan yi e je do. ³ Ci yi e le ahan ɖee, Mawu a sɛnŋ gbe etomadɔnmadɔn nɔ mi, nɔ mi gbali hwlɛngan gangan hunnɔ nuxu ciwo yi e xo nɔ mi ba! Axwetɔ ŋtɔ yi do eŋɛ lɔ doŋkɔ, yi amɛ ciwo yi se, yi Axwetɔ le enyɔ lɔwo nuɔ nu nɔ mi mɔ nyɔnɔnui yi enyɔ lɔwo nyi. ⁴ Mawu can ɖo ekpe yi zeɖeka mɔ, wowo kunuɖeɖewo nyi nyɔnɔnui, yi wa jeshidu nu, enudanŋdo koɖo enujiŋ vovovowo todo wo ji; e gbe na Gbɔngbɔn Kɔkɔɛ nunanawo wo ɖeka deka shigbe lehan yi e drui do nɛ, yi sɔ ɖo ekpe wowo kunuɖeɖe lɔwo ji. ⁵ Mawu ɖe sɔ xexex ci yi gbɔgbɔ lɔ, xexe ci nuxu yi mi xoxoɔ lɔ doashi nɔ cikplɔtɔwo nɔ wa kplɔɛ o. ⁶ Vɔ ɔ, le Mawu nyɔ wema ɖeka mɛ ɔ, 'mɛɖeka ɖe kunu cɛ mɔ: «Mawu, mɛ yi agbetɔ nyi, yi eɖo eŋui yi a han ɔ? Mɛ nyi agbetɔ, yi e le leɔ ebu nii a han ɔ? ⁷ E na yi e hwe hwɛɖeka le dɔlawo gbɔ; yi e na bubu yi, yi ɖo texwe nii. ⁸ E sɔ enuwo pleŋ do yi cɛkpakpa gɔnmɛ.» Nɔ Mawu sɔ enuwo pleŋ do yi cɛkpakpa gɔnmɛ ɔ, yi nyi mɔ, enuɖe ɖe li, yi ɖe gbe masɔ do yi cɛkpakpa gɔnmɛ o. Ganŋkegan ɔ, mi ɖe kpɔkpɔ enu lɔwo pleŋ le agbetɔ lɔ cɛkpakpa gɔnmɛ vɛ hɔɖe o. ⁹ Vɔ ɔ, enu ci nu yi mi le ŋkuvi do yi nyi mɔ: Mawu na yi Yesu va hwe le yi cikplɔtɔwo gbɔ sɔnanɔ hwenu kleŋ ɖeka; nɔ todo xomɛvunu Mawu tɔ mɛ ɔ, e ku, nɔ ado agbetɔwo pleŋ ji. Ecɛɛ ɔ, Mawu sɔɛ dado bubu koɖo kɔkɔ tɔxu. Ɖo ɔ, e se gbazavi. ¹⁰ Ɖo Mawu ci yi wa xexe lɔ, yi le enushianu do ete le mɛ, ji mɔ, ye a kplɔ evi sugbɔ va ye klɛnklɛn gangan lɔ mɛ. E yi na taɖo yi e lɔn yi Yesu todo efunkpekpewo mɛ, yi a kplɔ wo vayi klɛnklɛn hunnɔ lɔ mɛ. Ɖo Yesu yi nyi wowo hwlɛngantɔ. ¹¹ Ɖo ɔ, Yesu ci yi klɔnɔ enuvɔnwo shi le amowo nu koɖo amɛ ciwo nu wo klɔklɔ enuvɔnwo so, bɔ yi ɖo Eda ɖeka. Ci yi e le ahan ɔ, ɖe wanɔ ŋkpɛn nɔ Yesu mɔ, a yɔ wo mɔ, yenɔviyewo o. ¹² Ɖo ɔ, e nunɔ mɔ: «Mawu, na xo nuxu sɔso eɔ nu nɔ nɔvinyɛwo, na kanfu wo le Mawu ha lɔ ŋmɛ.» ¹³ Egbe nu mɔ: «Na kando Mawu ji.» Egbe nu hɛnnɛ ke mɔ: «Enyɛ ke, enyɛ koɖo evi ciwo yi Mawu na ŋ.» ¹⁴ Ci yi ɖevi hunnɔ lɔwo nyi agbetɔwo, yi ehun le wo mɛ, yi lankpu le wo nu ɔ, Yesu can va trɔ agbetɔ, yi nɔ agbe shigbe wowo nɛ. Nɛnɛ yi e wɛwɛ do nɛ; yi sɔ todo yi ku mɛ ɔ, e wu ete nɔ legba ci lo mɛ eku ŋsɛn le sa. ¹⁵ Yi hwlɛn amɛ ciwo yi vɔnvɔn nɔ eku sa kaka va trɔyi hwashiwo gan, le wowo gbe ŋkekewo pleŋ mɛ. ¹⁶ Ɖo ɔ, ɖe nyi cikplɔtɔwo nu yi e va kpedo o; vɔ ɔ, Ablahabu jijimɛviwo nu yi e va kpedo. ¹⁷ Ci e le ahan ɔ, Yesu cin shigbe mɔ nɔviɛ, agbetɔwo nɛ le enuwo pleŋ mɛ. Nɛnɛ ɔ, a sɛnŋ trɔ avɔsatɔ gangantɔ, ŋshishikunɔamɛtɔ koɖo egbejinɔtɔ ɖeka ci yi a sa avɔ nɔ Mawu, nɔ jukɔn lɔ nuvɔn sɔsɔke. ¹⁸ Ecɛɛ ɔ, a sɛnŋ kpedo amɛ ciwo yi je tetekpɔwo mɛ nu. Ɖo ɔ, yiŋtɔ todo tetekpɔwo koɖo efunkpekpewo mɛ, yi ɖu wo ji.