¹ Ese ciwo yi Mawu na toto Mɔyizi ji ɖe nyi nɔnɔmɛ tata adoduitɔ nɔ enunyui ciwo yi gbɔgbɔ o. Vɔ ɔ, wowo kpɔli yi e nyi. Ese lɔ ɖui mɔ, wo le nɔnɔ avɔ ŋmɛ ɖekɛwo saaɔ mamimami, xweta ɖeka duu. Nɛnɛ ɔ, e ɖe lehan yi ɖa sɛnŋ wɛɛ do nɔ amɛ ciwo yi te gogoɔ Mawu a kɔ cekii o doasɛ. ² Nɔ e nyi mɔ, avɔ ciwo yi amowo sanɔ nɔ Mawu, yi sɔ siinni klɔnɔ eɖyiwo le wo nu zeɖeka, yi e vɔnɔ sasa ɔ, wowo 'yixa ɖa gbe va donɔ ehwɛ wo mɔ enuvɔn kpɔtɔ le wo nu o. E yi nɛnɛ ɔ, wo ɖa gbe sa avɔ ɖekpokpui o. ³ Xweta ɖeka duu, avɔ hunnɔ ciwo yi amowo sanɔ, dɔnɔ yi amowo gbe kpɔtɔ ɖonɔ eŋui wowo 'nuvɔnwo. ⁴ Ɖo ɔ, xwenyisuwo koɖo egbɔsuwo 'hun ɖa sɛnŋ cucu enuvɔnwo shi gbeɖe o. ⁵ E yi na taɖo yi hwecinu Kliso jijiɔ a va xexe lɔ mɛ ɔ, e nu nɔ Mawu mɔ: «Ɖe ji avɔsa alo enunana o. Vɔ ɔ, e na yi ŋ sɔ agbetɔ nɔnɔmɛ. ⁶ Ɖe kpɔ jijɔ so ezodovɔsawo nu alo so enuvɔnsɔsɔke 'vɔsawo nu o. ⁷ Eyi ŋ nu mɔ: "Mawu, enyɛ ke! Ŋ gbɔgbɔ yi a va wa awu 'dro shigbe lehan yi wo ŋwlii do so ŋ nu daɖɛ do wema kɔkɔɛ lɔ mɛ nɛ."» ⁸ Kliso nu doŋkɔ mɔ: «Ɖe jinɔ avɔsawo alo enuvɔnsɔsɔke 'vɔsawo o. Enu hunnɔwo ɖe donɔ jijɔ nɔ eo o.» Ganŋkegan, ese yi nu mɔ wo le sa nɛnɛ 'vɔsawo. ⁹ Le yi godu ɔ, e sɔ bɔdo nu mɔ: «Mawu enyɛ ke! Ŋ gbɔgbɔ yi a va wa awu 'dro.» Eyi e gu avɔsa xoxuitɔwo, yi sɔ yitɔ ci yi e wa sɔ ɖɔliwo. ¹⁰ Yesu Kliso wa do Mawu 'dro ji. E wa avɔsa hunnɔ zeɖeka pɛɛ do enu nɔ ŋkeke kpɛtɛwo pleŋ, hwecinu yi e sɔ yi lankpu sɔ jo, yi wo sɔ sa avɔ. Ahan yi e wɛɛ do yi klɔ miwo 'nuvɔnwo shi le mi nu nɛ. ¹¹ Avɔsatɔ ɖekpokpui nɔnɔ ete tɛgbɛɛ le mawusɛnxu lɔ yi a le 'dɔ waa. Wo kpɔtɔ sɔnɔ enu kuɖeka lɔwo sanɔ avɔ; enu ciwo yi ɖa sɛnŋ cucu enuvɔnwo shi so ekɔ nɔ agbetɔwo gbeɖe o. ¹² Vɔ Kliso lɔ yɛ ɔ, sɔ yiɖeki sa avɔ zeɖeka, yi e vɔ do enuvɔnwo 'ta, yi vayi nɔ anyinɔnɔ do ɖushimɛ nɔ Mawu. ¹³ Enɔtɔxu yi e le ɛ nɛ, yi nɔ ete nɔ Mawu a sɔ yi ketɔnɔwo wa yi 'fɔɖonuwo. ¹⁴ Nɛnɛ sɔ toto avɔsa kuɖeka pɛɛ ci yi Kliso sɔ yiɖeki sa mɛ ɔ, e na yi amɛ ciwo nu yi e klɔ enuvɔnwo shi le, kɔ cekii. ¹⁵ Gbɔngbɔn Kɔkɔɛ can ɖo ekpe yi ji nɔ mi hɛnnɛ. Ɖo doŋkɔ ɔ, e nu mɔ: ¹⁶ «Axwetɔ nu mɔ: Enu ciwo 'zo yi na ɖu koɖo wo le ŋkeke hunnɔ lɔwo godu ke: na ŋwlɛ anyi 'sewo do wowo 'jiwo mɛ, yi a ŋwlɛ wo do wowo susuwo mɛ. ¹⁷ Ŋ ɖa gbe ɖoɖoɔ eŋui wowo 'nudɔndɔnwo alo wowo 'nuvɔnwo o.» ¹⁸ Keŋ fini ci yi enuvɔnwosɔsɔke le ɔ, kpɔ ɖe ʒian mɔ wa na enu do eta nɔ enuvɔn o. ¹⁹ Ci yi e le ahan ɔ, nɔvinyɛwo, kankandoji le mi shi mɔ mi a sɛnŋ ɖo texwe kɔkɔɛ cekii lɔ mɛ faa sɔ toto Yesu 'hun ci yi e kɔdo anyi mɛ. ²⁰ E hun emɔ yoyu agbeagbe ɖeka nɔ mi toto xɔmɛsovɔ ji, hwenu ci e sɔ yiŋtɔ lankpu sa avɔ. ²¹ Avɔsatɔ gangantɔ ci yi kpa acɛ do mawuxwe lɔ ji ɖeka le mi shi. ²² E yi na taɖo ɔ, mi na nɔ mi a tegogo Mawu koɖo eji ci yi tonɔ nyɔnɔnui koɖo xɔse blebu. Ɖo ɔ, wo klɔ enu ciwo yi nanɔ ayixa vɔinwo mi so ejimɛ nɔ mi, yi sɔ eshi kɔkɔɛ le eshi nɔ miwo lankpu. ²³ Mi na nɔ mi a kpɔtɔ yi a hunhunmɛ le amɛshiamɛ ŋmɛ mɔ, mi kpɔkpɔ emɔ nɔ egbe ci yi Mawu ɖo. Mi ŋgbe xo enu kpɔ o. Ɖo gbejinɔtɔ yi nyi Mawu. ²⁴ Mi na nɔ mi a le ŋkuvi do miwonɔnɔwo nu, yi a do ŋsɛn lanmɛ miwonɔnɔwo le lɔnlɔn koɖo edɔ nyuiwo wawa mɛ. ²⁵ Mi ɖa mi miwo hawo ji yiyi shigbe lehan yi miwo domɛtɔ ɖekawo wɛwɛɛ do nɛ o. Vɔ ɔ, mi na nɔ mi a dodoɔ ŋsɛn lanmɛ nɔ miwonɔnɔ. Mi ɖo a wɛɛ ahan do ji nɔ ci yi mi nya mɔ Axwetɔ ŋkeke lɔ gogo taɖo. ²⁶ Nɔ e nyi mɔ mi jeshi enu ci yi nyi nyɔnɔnui lɔ ɖegbɔ ganŋkegan yi gbe xa yi le nuvɔn waa fɛɛ ɔ, avɔsa ɖe ɖe gbe li yi mi a wa, yi a sɛnŋ gbe cucu enuvɔnwo so mi nu o. ²⁷ Enuɖe ɖe gbe kpɔtɔ nɔ mi sɔwu mɔ jikasui ji yi mi a le, yi a kpɔkpɔ emɔ nɔ kojo ci yi Mawu a ɖo koɖo amowo koɖo ezo gɛgɛ ci yi a va sɔ fiɔn yi ketɔwo o. ²⁸ Amɛɖekpokpui ci yi a da le ese ciwo yi Mawu do toto Moyizi ji ɔ, wo ɖa ku ŋshishi nii o; wa wui. Yi amɛ amɛve alo amɛtɔn a ɖe kun mɔ yi da le wo ji nya. ²⁹ Nɔ e le ahan nɔ amɛ ci yi da le ese lɔ ji ɖee, le a nɔ do nɔ amɛ ci yi a gbali Mawu Eviɛ lɔ ɔ? Amɛ ci yi a kpɔ ehun ci yi ɖe ekpe ezoɖuɖu yoyu lɔ ji, yi wo sɔ klɔ enuvɔn so eyɛ nu do enugbali ji ɖee, etodɔndɔn sɛnŋsɛnŋ hinɖe yi wa ɖo nii ɔ? Amɛ ci a kpɔ Gbɔngbɔn kɔkɔɛ, ci yi doasɛ Mawu xomɛvu nɔ mi, do enugbali ji ɖee, le a nɔ do nɔ eyɛ can ɔ? Mi hɛn mi a sɔ ŋkuvi so lehan yi etodɔndɔn ci le ete kpɔ nɛnɛ mɛ ! ³⁰ Ɖo ɔ, mi jeshi amɛ ci yi nu mɔ: «Enyɛ yi ɖenɔ ehlɔn, enyɛ yi a cu enu ci yi mɛɖeka mɛɖeka wa fɛn nii.» Amɛ lɔ ke yi gbe nu mɔ: «Axwetɔ a ɖo kojo koɖo yi jukɔn.» ³¹ Mi kpɔ lehan yi wa je Mawu agbeagbe 'lɔmɛ ɖyi vɔnvɔ, do ɖa! ³² Mi ɖo eŋui enu ci yi kpe mi sasavayi; hwecinu yi mi kpɔ Mawu klɛnklɛn lɔ kpɔ. Mi kpe efun sugbɔ le amowo 'shimɛ gahunnɔmɛ. Ganŋkegan ɔ, mi do eji, yi wa ahwa sɛnŋsɛnŋɖe. ³³ Hweɖewonu ɔ, wo zunɔ miwo domɛtɔ ɖewo, yi ɖenɔ efun nɔ wo le ahwadomɛ. Nɛnɛke hweɖewonu va vanɔ nɛ, yi miwo can kpenɔ do amɛ ciwo yi wo ɖeɖeɔ nɛnɛ 'fun nɔ nu. ³⁴ Ɖo ɔ, mi se veve koɖo amɛ ciwo yi le gakpamɛ, yi gacimɛ yi wo va shinɔ eʒi miwo dɔkunuwo ɔ, mi xɔnɔ egbe koɖo jijɔ. Mi nya mɔ, dɔkunu ci yi nyɔ sɔwu hunnɔwo, yi gbe nɔnɔ amɛ shi tɛgbɛɛ li nɔ yɔwo. ³⁵ Ci yi e le ahan ɔ, mi ŋgbe tashi kankandoji ci yi mi ɖo nɔ Mawu o. Ɖo efɛncu gangan ɖeka le kankandoji lɔ mɛ. ³⁶ Vevidodonu yi ʒian nɔ mi, nɔ mi a sɔ wa Mawu 'dro; yi le yi godu ɔ, mi a xɔ enu ci ŋgbe yi Mawu ɖo nɔ mi. ³⁷ Ɖo ɔ, wo ŋwlɛn daɖɛ do fiɖeka le Mawu 'nyɔ wemawo mɛ mɔ: «E kpɔtɔ egaxoxo hwɛɖeka, hwɛɖeka ŋtɔ, yi amɛ ci yi ɖo a va lɔ, a va. Ɖa jinjin gbɔxwe yi a va o.» ³⁸ Mawu nu mɔ: «Amɛ ci yi nyi amɛjɔjɔɛ le anyi ŋmɛ a nɔ agbe sɔ toto xɔse ŋsɛn mɛ. Vɔ nɔ e trɔ yi kpe godu ɔ, anyi 'se ɖa kpɔ jijɔ so nu o.» ³⁹ Vɔ miwo yɛ ɔ, mi ɖe le amɛ ciwo yi trɔ kpe godu, yi a sɔ wowoɖekiwo bu mɛ o. Mi le amɛ ciwo yi xɔ xɔ Mawu ji se, yi a sɔ hwlɛn wowo 'sewo gan mɛ.