¹ Xɔse ɖoɖo yi nyi wa ɖo kankandoji do enu ci yi wo kpɔkpɔ emɔ nɔ ji, yi a nya mɔ enu yi wo ɖe kpɔ kpɔkpɔ vɔ can ɔ, yɛ li nyɔnɔnuitɔ. ² Xɔse lɔ taɖo yi Mawu ɖe kunu nyuin so hwenu xoxui 'mɛwo nu. ³ Sɔ toto xɔse ji ɔ, mi mɔŋje mɛ mɔ, Mawu sɔ nuxu wa xexegbɛlɔ. Ahan ɔ, enu ci yi wo kpɔkpɔ jɔ so enu ci yi wo ɖe kpɔkpɔ mɛ. ⁴ Sɔ toto xɔse ji ɔ, Abɛli sa avɔn nɔ Mawu yi yi 'vɔsa jeŋ nɔ Mawu sɔwu enu ci yi Kayɛn wa nii. Ɖo Abɛli xɔse taɖo ɔ, Mawu ŋtɔ xɔ yi 'vɔsawo, yi ɖe kunu mɔ, yi nyi amɛjɔjɔɛ. Ɖo yi xɔse lɔ ke ta ɔ, ci e ku can ɔ, enu ci e wa gbɔxwe yi ku lɔ, le kunu ɖeeɔ so nu. ⁵ Xɔse ci yi le Enɔki shi na mɔ ɖe ku o. Mawu kɔɛ hɛnyi yiɖeki gbɔ. Amɛɖe ɖe gbe va kpɔɛ kpɔ o; ɖo Mawu kɔɛ hɛnyi yiɖeki gbɔ. Mawu 'nyɔ wemawo ɖe mɛ le fiɖeka mɔ, gbɔxwe yi wa kɔ Enɔki hɛnyi ɔ, wo ɖe kunu so nu mɔ, yi 'nujenɔji nɔ Mawu. ⁶ Keŋ ɔ, e trɔ nyi mɔ amɛɖe 'nu ɖa sɛnŋ jeji nɔ Mawu, nɔ 'mɛ lɔ ɖe xɔɛ ji se o. Ɖo ɔ, amɛ ci ti tegogo Mawu ɖo yi a xɔɛ ji se mɔ Mawu li, yi wanɔ enu nyuiwo nɔ amɛ ciwo yi jiijiɔ. ⁷ Sɔ toto xɔse ji ɔ, Nɔwe se afɔɖoafɔji nɔ amɛ 'nyɔ ciwo yi Mawu nu nii so enu ciwo yi gbɔgbɔ yi a va jɔ, yi amɛɖe ɖe kpɔ kpɔ vɔ o nu. Nɔwe xɔ enyɔ ci yi Mawu nu nii do nyɔnɔnui ji, yi kpa ɖakahun lɔ ci mɛ yi, yi koɖo yi xomu kpɔ hwlɛngan le. Nɛnɛ ɔ, e doasɛ mɔ xexe lɔ wa afɛn, yi do yi xɔse taɖɔ ɔ, e va trɔ amɛjɔjɔɛ le Mawu ŋmɛ. ⁸ Sɔ toto Ablahamu xɔse ji, hwecinu yi Mawu yɔɛ ɔ, e se egbe nii. E sɔ ɖedo eju ɖeka ci yi Mawu a va sɔ jɔ nii mɛ. E ɖedo manya fini ci yi e yikɔ. ⁹ Sɔ toto yi xɔse ji ɔ, Ablahamu vayi nɔ eju ci yi Mawu ɖo egbe nii mɔ ye a sɔ jɔ nii mɛ shigbe mɛdru nɛ. Izaki koɖo Ʒakɔbu ciwo yi Mawu wa egbeɖu lɔ nɔ hɛnnɛ can nɔ agbaxɔ mɛ. ¹⁰ Ablahamu wɛɛ ahan, ɖo e nɔ nɔ ete kpɔ jugan nyui ci yi gɔnmɛɖokpɛwo lo edo nɔ. Mawu ŋtɔ yi te afɔshi nɔ jugan lɔ, yi gbe cui. ¹¹ Sɔ toto Sala xɔse ji, ci yi e nyi konɔ, yi exwe gbe yi nii can ɔ, Mawu na yi e sɛnŋ fɔn efu. Ɖo e kandoji mɔ, Mawu ci yi ɖo egbe nɔ eye ɔ, yɛ nɔnɔ egbeji. ¹² Ahan yi e le do nɛ, yi sɔ toto Ablahamu, ŋsu ci yi shin, yi kpo daɖɛ vɔ ji ɔ, jijimɛvi sugbɔ va jɔ, yi sugbɔ shigbe wleciviwo le jiŋkui mɛ nɛ, yi do mahlɛnmahlɛn shigbe axu 'kewo nɛ. ^{13 14} Xɔse lɔ mɛ yi amɛ hunnɔwo pleŋ ku do, enu ciwo ŋgbe yi Mawu ɖo daɖɛ nɔ wo maxɔ. Vɔ ɔ, wo kpɔ, yi enu lɔwo gbɔgbɔ ɖa je jinjintɔxu, yi eji jɔ wo. Wo hunmɛ le amɛshiamɛ ŋmɛ mɔ, 'mɛdruwo yi yewo nyi le nyigban lɔ ji, yi va yewo vayikɔ. Amɛ ciwo yi xoxoɔ nuxu ahan, doasɛ petii mɔ yewo jijiɔ soxunyigban ɖeka. ¹⁵ Nɔ e nyi mɔ ve yi soxunyigban ciji wo so le vevveɔ eŋ nɔ wo ɔ, wa gbe ɖo 'mɔnukpɔkpɔ yi a gbe trɔyi ji sa. ¹⁶ Vɔ le mɛ ɔ, soxunyigban ci yi nyɔ sɔwu hunnɔ, yi gɔnmɛ yi nyi mɔ, ci yi le jiŋkui mɛ jiɔ yi wo le. E yi na taɖo ɔ, ɖe wanɔ ŋkpɛn nɔ Mawu mɔ, wo le yɔɛ mɔ wowo Mawu o. Ɖo ɔ, e cu jugan ɖeka daɖɛ nɔ wo hɛnnɛ. ¹⁷ Sɔ toto Ablahamu xɔse ji ɔ, e kplɔ eviɛ akogo Izaki, yi a sɔ vayi savɔ hwecinu yi Mawu dui kpɔ. Ganŋkegan e nyi mɔ, Mawu ɖe egbe nɔ Ablahamu lɔ sasa vayi mɔ: ¹⁸ «Izaki ji yi na to yi a nawo, a wu jijimɛvi ŋtɔŋtɔwo.» ¹⁹ Vɔ ɔ, Ablahamu kpɔ mɔ nɔ amɛ ku can ɔ, Mawu ɖo ŋsɛn, yi a fɔin. E yi na taɖo yi Mawu trɔ sɔ eviɛ jo nii. Nuxu yi e nyi, yi e xo ahan mɔ, ku yi Izaki ku, yi gbe fɔn. ²⁰ Sɔ toto Izaki xɔse ji ɔ, e cu eshi nɔ Ʒakɔbu koɖo Eso daɖɛ nɔ esɔgodu mɛ. ²¹ Sɔ toto Ʒakɔbu xɔse ji ɔ, e fn je ete hwecinu yi eku 'zan gogoɔ nii, yi cu eshi nɔ Ʒozɛfu eviɛ ŋsuvi amɛve lɔwo ɖeka ɖeka. Nɔ a sɛnŋ a bubu ɔ, e ʒin ekpo ci yi le alɔmɛ nii ji, yi doŋdo sɔ sɛn Mawu. ²² Sɔ toto Ʒozɛfu xɔse ji ɔ, hwecinu yi eku 'zan gogoɔ nii ɔ, e xo nuxu nɔ israyɛlivi so hwecinu yi wa va to so Eʒiputu 'jumɛ nu, yi na egbe so lehan yi wa va wa exu yitɔwo 'nu do nɔ wo. ²³ Sɔ toto Mɔyizi 'dalɔwo xɔse ji ɔ, ci yi wo ji Mɔyizi ɔ, wo sɔ wla kaka e xɔ wleci amɛtɔn. Wo kpɔ mɔ yi nyi evi nyɔvi nyɔvi ɖeka, yi wo ɖe vɔn nɔ enu ci yi Eʒiputu 'fiɔ nu mɔ wo le wa ji, dada le o. ²⁴ Sɔ toto Mɔyizi xɔse ji, ci yi e va shin ɔ, e gbe mɔ wo ŋgbe gbe yɔ eye mɔ Falawɔn eviɛ nyɔnuvi 'vi o. ²⁵ E lɔn mɔ wo le ɖe efun nɔ eye koɖo Mawu jukɔn lɔ sɔwu mɔ, ci yi ye a kpɔ jijɔ ci yi le enuvɔnwawa mɛ sɔnanɔ hwenu kleŋ ɖe. ²⁶ E kpɔ mɔ nɔ wo gbali eye shigbe lehan yi wa va gbali Kliso lɔ do nɛ, xɔ afi sɔwu Eʒiputu dɔkunuwo. Ɖo ɔ, yi ŋkuviwo le efɛncu ci yi Mawu a va na amɛ esɔgodumɛ ji. ²⁷ Do Mɔyizi xɔse taɖo ɔ, e so le Eʒiputu 'jumɛ mavɔn nɔ xomɛshin Eʒiputu 'fiɔ tɔ. E lo edo goŋgoŋ le yiɖeki mɛ shigbe mɔ, e kpɔkpɔ Mawu ci yi wo ɖe kpɔnɔ gbeɖe lɔ nɛ. ²⁸ Sɔ toto yi xɔse ji ɔ, Mɔyizi ɖo atadodoamɛxwe anyi. E ɖe egbe nɔ israyɛliviwo mɔ wo le shishi elan 'hun do ehɔwo nu. Gahunnɔmɛ ɔ, cikpɔtɔ ci yi Mawu dɔ ɖaɖa, ɖa va wu israyɛliviwo 'vi ŋkɔtɔwo o. ²⁹ Sɔ toto israyɛliviwo xɔse ji ɔ, wo so klogbu 'xu lɔ kodo afɔ shigbe mɔ, nyigban gbali ji yi wo zɔnzɔn nɛ. Vɔ ci yi Eʒiputu tɔwo ji mɔ yewo a so axu lɔ ɔ, wo ku, yi ci axu lɔ mɛ. ³⁰ Sɔ toto israyɛliviwo xɔse ji, ci yi wo trɔtrɔɔ do Ʒeliko jugan gbogbu gangan lɔ kaka sɔnanɔ ŋkeke amadrɛ ɔ, e juin hwliŋ. ³¹ Sɔ toto Hlahabu, sakabo lɔ xɔse ji ɔ, ɖe ku koɖo amɛ ciwo yi fɔn egu do Mawu ji o. Ɖo amɛ ciwo yi Israyɛliviwo ɖo ɖaɖa nɔ wa vayi ji enu gɔnmɛ kpɔ so yi ju nu ɔ, e xɔ wo mɛdru nyuiɖe. ³² Enyɔ hinɖe yi na gbe nu bɔdo nu ɛ ɔ? Gamɛ ɖe gbe li nɔ ma gbe xo nuxu nɔ mi so Ʒedewɔn, Balaki, Samusɔn, Ʒɛfute, Davidi, Samiyɛli koɖo Mawu 'ŋɛdotɔwo nu o. ³³ Nɔ ci yi wowo can xɔ Mawu ji se taɖo ɔ, wo wa ahwa koɖo efiɔɖuxuwo, yi ɖu wo ji. Wo wa enujɔjɔɛ, yi kpɔ enu ci ŋgbe yi Mawu ɖo lɔ, yi xɔ. Wo bɔ aglan cu nɔ jaŋtanwo; ³⁴ Yi ci ezo ciwo yi jejeɔ gɛgɛgɛ, yi to so amɛ ciwo yi jijiɔ mɔ yewo a wu wo koɖo ewui shi mɛ. Xɔse lɔ yi na yi, ci wo nyi amɛ ciwo kpo sa can ɔ, wo va trɔ amɛ ŋsɛntɔwo. Ahwawatɔ edɔngbetɔwo yi wo va nyi, yi nya sɔjawo 'hwakɔn ciwo yi kpe eta koɖo wo do egbe. ³⁵ Nyɔnu ɖekawo gbe trɔ xɔ amɛ ciwo yi ku, ɖo 'mɛ lɔwo fɔn so ekuwodi. Amɛ buwo lɔn yi wo do agbeya nɔ wo, yi wo de lɔn mɔ, wo le jo yewo kaka yi ku o. Ɖo wo kpɔ mɔ, nɔ yewo va fɔn so eku, yi je agbe ci yi nyɔ sɔwu ecɛ mɛ ɔ, yi a do yewo ji sɔwu hunnɔ. ³⁶ Amɛ buwo gbe li, yi wo zu wowo, yi do eba nɔ wo, yi do ega ebuwo, yi cu wowo do gakpamɛ. ³⁷ Wo le ekpe xoɔ wo, yi le wo zɛnzɛn wo koɖo saka, yi wu wo koɖo ewui. Can hɛnnɛ ɔ, wo trɔ abɔnɔwo, yi sɔ lɛngbɔ gbaza alo gbɔgbɔɛ gbaza do, yi flufluɔ, yi dandan, yi a yi elɛ a yi elɛ. Wo ci yumɛ nɔ wo, yi do agbeya nɔ wo. ³⁸ Xexe lɔ mɛ ɖe je nɔ amɛ hunnɔwo mɔ wa nɔ sa o ba! Wo flufluɔ, yi dandan toto zoxu sakli sakliwo koɖo ekpowo ji. Wo nɔnɔ ekpegbaja doduwo koɖo nyigban doduwo mɛ. ³⁹ 'mɛ cɛ lɔwo xɔse taɖo yi Mawu ɖe kunu nyui so wo nu. Vɔ ɔ, wo ɖe kpɔ enu ci ŋgbe Mawu ɖo lɔ, yi xɔ o. ⁴⁰ Ɖo ɔ, Mawu dra enu ciwo yi nyɔ sɔwu hunnɔ do daɖɛ nɔ mi. Vɔ ɔ, Mawu ɖe lɔn mɔ amɛ ŋkɔtɔ cɛwo a sɔ egbe le enuwo pleŋ mɛ vɛ, miwo mabɔdo wo nu o.