¹ Miwo yɛ ɔ, amɛ sugbɔ hunnɔ ciwo yi doasɛ enu ci yi nyi xɔse nɔ mi, trɔdo mi. E yi na taɖo ɔ, mi na nɔ mi a ɖe enu ciwo yi nyi agban yi kpɛnkpɛn mi, yi mi a yi ŋkɔ le Mawu 'mɔ lɔ ji, yi e glo shi. Veviɖe ɔ, mi a tashi enuvɔn ci yi dɔnnɔ mi le Mawu mɔ ji fafɛɖe wawa, yi a shi eju koɖo vevidonu, yi a kplɔ enu ci yi wo sɔ ɖo ŋmɛ nɔ mi do. ² Mi a sɔ miwo ŋkuviwo dado Yesu Kliso ji le ejushishi hunnɔ mɛ. Yi le ŋkɔ nɔ mi le xɔse 'mɔ lɔ ji, yi a kplɔ mi yi vɔvɔnu. E xɔ egbe, yi ku do acisoga ji, yi ɖe vɔn nɔ ŋkpɛn ci yi le nɛnɛ 'ku mɛ o. Ɖo ɔ, e kpɔkpɔ jijɔ ci yi wo sɔ ɖo ŋmɛ nii lɔ ɖaɖa. Eyi eviɛɛ ɔ, e nɔ anyinɔnɔ do dushimɛ nɔ Mawu 'fiɔʒinkpin lɔ. ³ Mi sɔ susu dado Yesu ci nu yi enuvɔnwatɔwo fɔn egu do, ganŋkegan yi edo eji, yi xɔɛ ji, nɔ mi ŋgbe va gbɔjɔ, yi enu a ci ekɔ nɔ mi o. ⁴ Ɖo ahwa lɔ ci yi mi wawa koɖo enuvɔn ɔ, amɛɖe ɖe le mi mɛ, yi a wɛwɛɛ kaka yi ku do mɛ vɔ o. ⁵ Alo, mi ŋgbe ŋlɔbe ŋsɛndoamɛnyɔ ci yi Mawu nu nɔ mi, evi koɖo eda tɔ a? E nu nɔ mi mɔ: «Evinyɛ, nɔ Axwetɔ le eto dɔn'ɔ nɔ eo ɔ, ŋgbe kpɔɛ do enugbali ji o, yi nɔ e le enyɔ gbeɔ nɔ eo ɔ, ŋgbe gbɔjɔ le wɔɖeki mɛ o. ⁶ Ɖo amɛ ci yi Axwetɔ lɔn ɔ, e yi e dɔnnɔ eto nɔ; amɛ ci yi e jeshi ɖɛ do eviɛ ji ɔ, eyi e xonɔ.» ⁷ Hwecinu yi Mawu dɔndɔn etɔ nɔ mi toto efunkpekpe ɖewo mɛ ɔ, mi lɔn yi a xɔ wo koɖo edɔngbegbe. E hɛnhɛn ɔ mi evi koɖo eda tɔ. Alo evi ɖe li, yi edalɔ gbe etomadɔnnɔ nii a? ⁸ Nɔ Mawu ɖe dɔndɔn eto nɔ mi shigbe lehan yi e wɛɛni nɔ eviɛ kpɛtɛwo do ne ɔ, a nyi ke mi nyi evi ciwo yi Mawu ɖe nyi eda ŋtɔ nɔ o; a nyi ke ahunmɛ viwo yi mi nyi. ⁹ Mi a ɖo eŋui mɔ edawo le mi shi ɖeka ɖeka le nyigban cɛ ji. Wo dɔnnɔ eto nɔ mi, yi mi bunɔ wo. Sɔwu lehan yi mi wɛɛni nɔ miwo dawo do ɔ, e ʒian mɔ mi a gbe bɔbɔ miwoɖekiwo nɔ miwo 'da ci yi le jiŋkuimɛ keŋ yi a kpɔ agbe. ¹⁰ Miwo 'da, nyigban cɛ jitɔwo dɔnnɔ eto nɔ mi sɔnanɔ hwenu ɖe, shigbe lehan yi e dro wo do nɛ. Vɔ Mawu yɛ ɔ, yɛ dɔnnɔ eto nɔ mi, nɔ enyui a to so mɛ nɔ miwoŋtɔwo keŋ nɔ mi a kɔ shigbe eyɛ nɛ. ¹¹ Nɔ wo kplan enu mi, yi dɔn eto nɔ mi ɔ, ɖe zenɔ zeɖeka shigbe jijɔ 'nyɔ nɛ o; vɔ ɔ, eɖyinɔ shigbe ŋshishi 'nyɔ nɛ. Ganŋkegan nɔ e va sɔgbe ɔ, amɛ ciwo yi wo dɔn eto lɔ nɔ, kpɔnɔ ele ci yi nɔnɔ mɛ: e yi nyi kpɔ mɔ fafa ci bɔnɔ do agbenɔnɔ le enujɔjɔɛwawa mɛ nu. ¹² Mi do ŋsɛn miwo 'lɔ ciwo yi gblɔ, yi a do ŋsɛn miwo 'klo ciwo yi gble. ¹³ Mi to emɔ jɔjɔɛ ji nɔ amɛ ci yi tɔntɔn 'bu ŋgbe va tɔn 'bu doji o. Vɔ ɔ, nɔ a lo do ji. ¹⁴ Mi je agbla nɔ fafa anɔ miwo koɖo amɛshiamɛ domɛ, yi a nɔ agbe kɔkɔɛɖe. Ɖo nɔ amɛde ɖe wɛɛ ahan ɔ, ɖa sɛnŋ kpɔ Axwetɔ lɔ o. Mi ¹⁵ kpɔ miwoɖekiwo ji nyuiɖe nɔ amɛɖe ŋgbe va xomɛvunu Mawu tɔwo le yi 'gbe mɛ o. Amɛɖekpokpui ŋgbe va ci shigbe aci ci mɛ yi enuwuamɛ le nɛ, le miwo domɛ, yi a va do yi nuwuamɛ lɔ amɛ sugbɔ mɛ le miwo bɔbɔ lɔ mɛ o. ¹⁶ Amɛɖekpokpui ŋgbe va ci do eha koɖo hetelitɔnɔ le mi mɛ o. Mi shi Mawu 'nuwo. Mi ŋgbe wa shigbe Eso ci yi sɔ evi ŋkɔtɔnyinyi 'cɛ yitɔ sɔ ɖɔli koɖo zeɖeka ŋɖuɖu nɛ o. ¹⁷ Hwenu ɖewo godu ɔ, e va ji mɔ yedaye a cu eshi nɔ eye. Vɔ ɔ, edalɔ gbe nii. E ɖe kuku, yi fan avi kaka ganŋkegan, ɖe kpɔ emɔnu ɖe yi trɔ enu ci yi e wa vayi o. ¹⁸ Hwecinu yi mi tegogo Mawu ɔ, mi ɖe va ekpo ɖe ci yi wa sɛnŋ ta alɔ gbo shigbe lehan yi israyɛliviwo wɛɛ do le Mɔyizi hwenu nɛ. Ezo gangan ɖe ɖe jejeɔ le ekpo ci yi miwo gogo lɔ ji o; yi ʒinflu ciɖiciɖi ɖe can ɖe do le ji o. Nɛnɛ yi jihɔn gangan ɖe ɖe xoxoɔ le ji o nɛ. ¹⁹ Israyɛliviwo se ekpɛn ɖyiɖyi, yi gbe se Mawu 'gbe mɛ hɛnnɛ le ekpo lɔ ji. Ci yi wo se egbe lɔ mɛ ɔ, wo vɔn yi ɖe kuku mɔ, wo ŋgbe gbe nu enyɔ ɖe bɔdonu nɔ yewo o. ²⁰ Ɖo ɔ, egbe ci yi wo ɖe do wo ji lɔ wugan wo. E yi nyi mɔ: «Nɔ amɛɖe klɛn ekpo lɔ ɔ, wa xoxoɔ ekpe yi kaka a ku; nɔ e gbe nyi elan ɖe yɔ can.» ²¹ Enu ciwo yi wo kpɔ le ekpo lɔ ji ɖyi vɔnvɔn sugbɔ kaka Mɔyizi nu mɔ: «Ŋ vɔnvɔn kaka yi hunhunhnu'ɔ le enyɛɖeki mɛ.» ²² Vɔ miwo yɛ ɔ, miwo tegogon Siyɔ 'kpo lɔ koɖo Mawu agbeagbe lɔ jugan lɔ ci yi nyi jiŋkuimɛ Ʒeluzelɛmu jugan koɖo cikplɔtɔ sugbɔ ciwo yi mɛ lɔwo. ²³ Miwo tegogo Mawu Eviɛ ŋkɔtɔ ciwo yi jijɔ kpɔkpɔ 'ha mɛ. Mawu ŋwlɛ wowo nyikɔ do jiŋkuimɛ. Miwo tegogo Mawu ci yi ɖonɔ kojo koɖo agbetɔwo pleŋ, yi gbe tegogo amɛjɔjɔɛwo gbɔngbɔn ciwo yi Mawu na yi wo kɔ vɛ gbɔ. ²⁴ Miwo tegogo Yesu ci yi nyi amɛdomɛdradotɔ le Mawu koɖo agbetɔwo domɛ, yi Mawu toto jii, yi ɖu ezo yoyu koɖo mi. Miwo tegogo Yesu 'hun cɛ le eŋɛ ɖeka ci yi nyɔ sɔwu Abɛli 'hun tɔ dodoɔ nɔ mi. ²⁵ E yi na taɖo ɔ, mi kpɔ miwoɖɛkiwo ji nɔ mi ŋgbe va gbe etoɖoɖo amɛ ci yi le nuxu xoɔ nɔ mi o. Sasa vayi le nyigban lɔ ji ɔ, amowo gbe etoɖoɖo amɛ ci yi xoxoɔ Mawu nuxu nɔ wo. Vɔ ɔ, Mawu todɔndɔnnɔamɛ ɖe to akpa nɔ wo o. Dandanmɛ ɔ, Mawu a dɔn eto nɔ miwo can, nɔ e nyi mɔ mi gbe etoɖoɖo amɛ ci yi xoxoɔ nuxu nɔ mi so jiŋkuimɛ boo. ²⁶ Sasa vayi, ci yi Mawu xo nuxu ɔ, yi 'gbemɛ hunhun nyigban lɔ. Vɔ eviɛ ɔ, e va ɖo egbe nɔ mi mɔ: «Na gbe hunhun nyigban zeɖeka ke; vɔ ɔ, ɖe nyi nyigban ɖekɛ yi na hunhun o; na gbe hunhun jiŋkui hɛnnɛ.» ²⁷ Enyɔgbe ciwo yi nyi mɔ: «Zeɖeka ke» dodoɔ asɛ mɔ a hunhun enuwawawo, yi wa bu. Gahunnɔmɛ a nyi enu ciwo yi ɖa sɛnŋ hunhun wo dru ɖekɛwo yi a kpɔtɔ a li. ²⁸ Eyi na taɖo ɔ, mi na nɔ mi a do akpe nɔ Mawu. Ɖo e sɔ efiɔɖuxu ci yi ɖe hunhunnɔ wo na mi. Mi na nɔ mi a doasɛ nii mɔ, enu jeŋ nɔ mi, yi a siin do alɔkpa ci yi jɔnɔ eji nii ji koɖo bubu, yi a vɔnnɔ nii. ²⁹ Ɖo ɔ, miwo Mawu nyi ezo yi fiɔnnɔ enu.