¹ Mi kpɔtɔ a ɖo lɔnlɔn nɔ miwonɔnɔwo ahan sigbe nɔvinɔwo nɛ. ² Mi ŋgbe ŋlɔbe mɛdru xɔxɔ nyuiɖe o. Ɖo ci yi 'mɛɖekawo le ji, yi xɔxɔ mɛdru amowo nyuiɖe ɔ, wowo domɛtɔ ɖewo va xɔ mɛdru cikplɔtɔwo do mɛ manyamanya. ³ Mi ɖo eŋui 'mɛ ciwo yi le gakpa mɛ shigbe miwo can mi le gakpa mɛ kodo wo nɛ. Mi ɖo eŋui amɛ ciwo yi wo dodoɔ agbeya nɔ. Ɖo gbaza ci yi senɔ vevi le miwo can nu hɛnnɛ. ⁴ Amɛshiamɛ le do bubu asuɖeɖe alo nyɔnuɖeɖe nu. Asu koɖo ashi le nɔ egbeji nɔ wowo nɔnɔwo. Ɖo Mawu a ɖo kojo hetelitɔnɔwo koɖo asuwatɔwo alo 'mɛbushi koɖo mɛbusu xɔtɔwo. ⁵ Mi ŋgbe lɔn nɔ a ze le miwo 'gbenɔnɔ mɛ mɔ eho bianɔ ŋkuvi nɔ mi sugbɔ o. Enu ci yi le mi shi, le jeŋ nɔ mi. Ɖo Mawu ŋtɔ nu mɔ: «Ŋ ɖa tashi eo gbeɖe o; nɛnɛke yi ŋ ɖa ɖe ekɔ le wu nu gbeɖe o nɛ.» ⁶ Ci yi e le ahan ɔ, mi a sɛnŋ do eji, a nu mɔ: «Axwetɔ yi kpenɔ do ŋ nu, ŋ ɖa vɔn nɔ enuɖekpokpui o. Ŋde yi agbetɔ a sɛnŋ wa koɖo ŋ ɔ?» ⁷ Mi ɖo eŋui 'mɛ ciwo yi kplɔkplɔ mi, yi nu Mawu nyɔ nɔ mi ji. Mi bu tamɛ kpɔ so lehan yi wo nɔ agbe do koɖo lehan yi wo ku do nu, yi a xɔ Mawu ji se shigbe wowo nɛ. ⁸ Yesu Kliso, ɖe trɔnɔ o. Enu ci yi e nyi esɔ vayi ɔ, e yi ke e gbe nyi egbɛ, yi a gbe nyi enu lɔ ke sɔyi mavɔmɛ. ⁹ Mi ŋgbe tashi miwoɖekiwo ɖɛ nɔ enukplanmɛ 'nyɔ hamɛhamɛ ciwo yi to akpo nɔ ciwo yi mi kplankplan mi, yi a kplɔ mi so Mawu 'mɔ lɔ ji o. Xomɛvu ciwo Mawu wawa nɔ mi ɔ, wowo yi ɖo a dodoɔ ŋsɛn mi. Ɖe nyi ese ciwo yi kuso enuɖuɖuwo nu yɔ o. Amɛ ciwo yi wawa do nɛnɛ 'sewo ji ɖe kpɔnɔ ele ɖe le wo mɛ gbeɖe o. ¹⁰ Avɔsakpe ɖeka le miwo shi. Vɔ ɔ avɔsatɔ ciwo yi wawa edɔ le agbaxɔ xoxuitɔ mɛ, ɖe ɖo acɛ yi a ɖu enu ci yi wo sɔ sa avɔ do miwo 'vɔsakpe lɔ ji o. ¹¹ Avɔsatɔ gangantɔ hɛnnɔ elan ciwo yi wo wu 'hun sɔyi texwe kɔkɔɛ cekii lɔ mɛ, yi a va sɔyi sa enuvɔnwosɔsɔke 'vɔsa. Vɔ ɔ, wo tenɔ ezo elan ciwo yi wo wu lɔwo lankpu do azɔge nɔ agbaxɔ lɔ. ¹² Eyi na yi Yesu can ku do azɔge nɔ jugan lɔ keŋ, yi a sɔ yiŋtɔ 'hun klɔ enuvɔnwo ɖaɖa le jukɔn lɔ nu. ¹³ Nɛnɛ ɔ, mi na nɔ mi a yi gbɔ le azɔge nɔ agbaxɔ lɔ, nɔ wa do ŋkpɛn mi shigbe lehan yi wo do ŋkpɛn yi do nɛ. ¹⁴ Ɖo ɔ, mi ɖe ɖo jugan ɖe, ci yi a li ɖɛ tɛgbɛɛ le nyigban cɛ ji o. Vɔ ɔ, jugan ci yi a va lɔ, yi mi nɔnɔ ete kpɔ. ¹⁵ E yi na taɖo ɔ, mi na, nɔ mi a tonɔ Yesu ji, yi a sɔnɔ miwo kanfukanfu shigbe enunana nɛ, vɛ nɔ Mawu. E yi nyi mɔ, enunana ci yi tonɔ so enu mɛ nɔ amɛ ciwo yi hunnɔ mɛ le amɛshiamɛ ŋmɛ mɔ yi nyi yewo 'xwetɔ. ¹⁶ Mi ɖo eŋui, yi a wanɔ enyui nɔ amowo, yi a kpenɔ do miwo nɔnɔwo nu. Ɖo avɔsa hunnɔwo nu yi jenɔ ji nɔ Mawu nɛ. ¹⁷ Mi se 'tonu nɔ miwo kplɔtɔwo, yi a bɔbɔ miwoɖekiwo nɔ wo. Ɖo wowo yi kpɔkpɔ mi ji, yi wo ɖo a va na kɔnŋta Mawu so lehan yi wo kplɔkplɔ mi do nu. Mi na nɔ wa sɛnŋ wa edɔ lɔ koɖo jijɔ. Mi ŋgbe na nɔ wa wɛɛ koɖo huunsese o. Nɔ e va nyi ahan yɔ nɛ ɔ, kpɔ nyɔna ɖekpokpui ɖa gbe va le mɛ nɔ mi o. ¹⁸ Mi wa kuifan nɔ Mawu do eta nɔ mi. Mi kandoji mɔ, eji mɛ vo nɔ mi. Ɖo mi jinɔ mɔ, mi a nɔ agbe nyuiɖe le enuwo pleŋ mɛ. ¹⁹ Veviɖe ɔ, ŋ biɔbiɔ mɔ, miwo le wa kuifan nɔ Mawu do eta nɔ, nɔ a wɛɛ nɔ ma trɔgbɔ va mi gbɔ kaba. ²⁰ Mawu ci yi nyi fafa jɔxu fɔn miwo 'xwetɔ Yesu so amɛkukuwo domɛ. Yesu va trɔ lɛngbɔ kplɔtɔ gangantɔ toto yi 'hun ci yi kɔdo nyigan ji mɛ, yi sɔ ɖo ekpe ezo tɛgbɛɛtɔ ci yi Mawu ɖu koɖo mi ji. ²¹ Mawu hunnɔ lɔ, le na nɔ mi akpe ji, yi a wanɔ enunyui tɛgbɛɛ keŋ yi a sɔ wanɔ yi 'dro. Le wanɔ enu ciwo yi jɔnɔ eji nii le miwo 'gbewo mɛ sɔ toto Yesu Kliso, amɛ ci yi wo ɖo a kanfu sɔyi mavɔmɛ! Axoaɖyi! ²² Nɔvinyɛwo, ŋ biɔbiɔ mi mɔ, miwo le xɔ gbɔngbɔn, yi a ɖo eto ŋsɛndoamɛnyɔ cɛ ciwo yi ŋ ŋwlɛŋwlɛ ɖaɖa mi. Can hɛnnɛ can ɔ, kpɔ wema lɔ ci yi ŋ ŋwlɛŋwlɛ ɖaɖa mi ɖe jinjin sugbɔ ɖe o. ²³ Ŋ ji mɔ na na mi nɔ mi a nya mɔ wo jo miwo nɔvi Timɔte. Nɔ e nyi mɔ, e ɖe eblɛ, yi gbɔva ŋ gbɔ ɔ, enyɛ koɖo eyɛ a va mi gbɔ. ²⁴ Mi do egbe nɔ miwo kplɔtɔwo koɖo xɔsetɔwo pleŋ nɔ mi. ²⁵ Mawu le wa xomɛvunu nɔ mi pleŋ!