¹ Nɔ mi a vo taɖo yi Kliso lɔ cu eka nɔ mi do. Ci yi e le nɛnɛ ɔ, mi li eke goŋgoŋ le vovo lɔ mɛ, yi mi ŋgbe gbe sɔ hwashinyinyi kɔkuci kpa ekɔ nɔ miwoɖekiwo ke o. ² Enyɛ Pɔlu, ŋ nunuɔ nɔ mi mɔ, nɔ mi gbe ɖe emɔ, yi wo so evo nɔ mi ɔ, a nyi ke edɔ ci yi Kliso lɔ va wa nɔ mi nyi edɔ gbali. ³ Ŋ gbe trɔ ɖoɖoɔ ekpe yi ji nɔ amɛɖekpokpui ci yi gbe dɔ yi wo so evo nii mɔ, e le nɔ 'mɛ lɔ dandandan mɔ, a wa do ese ji vɛ. ⁴ Miwo ciwo yi bubuɔ mɔ yuɖatɔwo se ji yowo a wa do yi a nyi amɛjɔjɔɛwo le Mawu ŋmɛ ɔ, mi klan so Kliso lɔ nu. Nɛnɛ ɔ, mi gli Mawu xomɛvu lɔ do. ⁵ Vɔ miwo yɛ ɔ, Gbɔngbɔn Kɔkɔɛ ji yi mi todo yi nɔnɔ ete kpɔ amɛjɔjɔɛnyinyi sɔ todo Kliso jixɔxɔse mɛ. ⁶ Ɖo nɔ wo le Yesu Kliso mɛ ɔ, evo soso alo tɔtɔnɔnyinyi ɖe le veviɖe o. Enu ci yi le veviɖe nyi mɔ xɔse ci yi a wawa edɔ sɔ todo amɛ lɔnlɔn mɛ. ⁷ Mi nɔnɔ eju ji sasa nyuiɖe a! Ecɛɛ ɖe, mɛ yi va ɖo ete mi, yi va xe emɔ do mi mɔ, miwo ŋgbe kando nyɔnɔnui lɔ ji ɔ? ⁸ Enyɔ hunnɔ ci yi wo nu kaka yi mi xɔ egbe do ji, ɖe so Mawu ci yi yɔ mi gbɔ o. ⁹ Kpɔnnɔcike kankin yi honɔ kpɔnnɔwɔ blebu. ¹⁰ Enyɛ yɛ ɔ, ŋ kando mi ji le Axwetɔ mɛ mɔ: Miwo ɖa bui do ebu ɖe to akpo nɔ kinyɛ o. Vɔ amɛ ci yi cacaka mi yɛ ɔ, eɖekpokpuiɖe ci yi e le ɔ, a ɖu e yi le. ¹¹ Vɔ enyɛ yɛ ɖe, nɔvinyɛwo, nɔ nyɛ gbe va nunuɔ evososo nyɔ koɖo axwa nɔ amowo, yi dandan ɖee, ŋ ɖe yi na taɖo yi wa gbe va ci yumɛ nɔ ŋ ke ɔ? Nɔ ŋ nunuɔ nɛnɛ ɔ, acisoga lɔ nyɔ ci yi nyinyiɔ afɔklɛnnu nɔ amowo a trɔ enyɔ gbali hunnɔ. ¹² Amɛ hunnɔ ciwo yi cacaka mi koɖo evososo nyɔ ɖe gbe ta wowoɖekiwo kpe nii! ¹³ Vɔ nɔvinyɛwo, miwo yɛ ɔ, Mawu yɔ mi, nɔ mi a nɔ miwoɖekiwo shinu. Enu ci yi le mɛ kpoŋ yi nyi mɔ amɛɖekishinɔnɔ lɔ ŋgbe dɔ nɔ mi a tɔ enu ciwo yi dro miwo gbaza wawa o. Vɔ todo lɔnlɔn ci yi Mawu lɔn mi ji ɔ, mi nyi edɔwaviwo nɔ miwonɔnɔwo le lɔnlɔn mɛ. ¹⁴ Ɖo ɔ, ese lɔ pleŋ xoxu do enyɔgbe cɛ mɛ mɔ: «Lɔn nɔvio shigbe ewɔŋtɔ nɛnɛ.» ¹⁵ Vɔ nɔ mi leleɔ miwonɔnɔwo ɖu, yi drɛndrɛn miwonɔnɔwo ɖu shigbe elanwadanwo nɛnɛ ɔ, mi kpɔ miwoɖekiwo ji! Nɔ ɖe nyi nɛnɛ ɔ, mi a va gu miwo nɔnɔwo. ¹⁶ E yi na taɖo ɔ, ŋ nunuɔ nɔ mi mɔ: Mi zɔn todo Gbɔngbɔn lɔ ŋsɛn mɛ; nɛnɛ ɔ, mi ɖa va wawa enu ciwo yi dronɔ gbaza lɔ gbeɖe o. ¹⁷ Ɖo enu ciwo yi dro nɔ gbaza lɔ to akpo nɔ ciwo yi dro nɔ Gbɔngbɔn lɔ. Nɛnɛ lɔ ke yi enu ciwo yi dro nɔ Gbɔngbɔn lɔ to akpo nɔ gbaza lɔ tɔwo nɛ. Wowo amɛve llɔwo nɔnɔ evu ji le agbetɔ lɔ mɛ, yi le vɔvɔnu ɔ, agbetɔ lɔ ɖe sɛnŋ va wanɔ enu ci yi drui o. ¹⁸ Nɔ Gbɔbgbɔn lɔ kplɔkplɔ mi ɔ, mi ɖe le ese gɔnmɛ o. ¹⁹ Keŋ ɔ, edɔ ciwo yi gbaza lɔ wanɔ ze goɖuu. Wowo yi nyi: Heteliwawa, enuxoɖyixoɖyi, mateliwawa, ²⁰ vojusɛnsɛn, maʒikiwawa, lɔnlɔn ma ɖo nɔ amɛ, evuwawa, ŋhwan dɔndɔntɔwo, xomɛshinwawa, amɛɖekɛtɔjiji, mamawo, makpemakpewo, ²¹ ŋbiawo, ahanumuwo, sukanuɖuɖuwo, koɖo wana buwo ciwo yi nyi ecɛwo han. Ŋ gbe kpɔtɔ ɖoɖo afɔ afɔta nɔ mi shigbe lehan yi ŋ wɛ nɔ mi vayi do nɛ mɔ: amɛ ciwo yi wawa enu hunnɔwo ɖa sɛnŋ kpɔ texwe ɖe a xɔ le Mawu fiɔɖuxu lɔ mɛ o ²² Vɔ Gbɔngbɔn Kɔkɔɛ yɛ ɔ, eku ciwo yi yɛ sɛnnɔ le agbetɔ mɛ, yi nyi lɔnlɔn, jijɔ, fafa, jigbɔnɖɛ, dɔmɛnyɔnyɔ, xomɛvuwawa, xɔse, ecufafa koɖo amɛɖekijiɖuɖu. ²³ Ese ɖe ɖe shite do enu hunnɔwo nu o. ²⁴ Vɔ ɔ, amɛ ciwo yi nyi Yesu Kliso mɛwo kan gbaza lɔ koɖo enuvɔn jɔjɔmɛ ci yi le shi koɖo eyi drowo do acisoga ji. ²⁵ Ci yi e nyi todo Gbɔgbɔn lɔ ji yi mi le agbe le ɔ, mi na nɔ mi a gbe wanɔ enu todo Gbɔngbɔnmɛ lɔ ŋsɛn mɛ. ²⁶ Mi na nɔ mi ŋgbe trɔ egoyitɔwo o; mi na nɔ mi a mi enyɔ jiji le miwonɔnɔwo nu; mi a mi eŋbiabia do miwonɔnɔwo nu.