¹ Keŋɖee, ŋ nunu ɔ nɔ mi mɔ: Nɔ egbeɖunuwo kpaɖexɔtɔ ɖe kpɔtɔ yi nyi ɖevixwɛ ɔ, ɖe nyi nyi enu bu ɖe to akpo nɔ hwashi o. Ganŋkegan yi e trɔ nyi mɔ, e yɛ yi nyi axwetɔ nɔ enuwo gbɔxwe. ² 'Mɛ buwo yi wo sɔ cunɔ nɔ, yi wa hinhin'ɛ, yi enujikpɔtɔ can a kpɔkpɔ e yi nuwo ji, kaka a sɔna hwecinu yi edalɔ ɖo a sun. ³ Ahanke yi e le do nɔ mi nɛ. Gacimɛ yi mi kpɔtɔ le shigbe ɖevixwɛwo nɛ ɔ, mi nyi hwashiwo nɔ xexemɛ nuwo. ⁴ Vɔ ci yi gamɛ ciwo Mawu ɖo lɔ va sun ɔ, e dɔ Eviɛ ɖaɖa xexe lɔ mɛ, yi nyɔnu ɖeka jii le esegɔnmɛ nɔnɔ gamɛ. ⁵ E wɛɛ nɛnɛ yi cu efɛn, yi sɔ xwle 'mɛ ciwo yi le ese gɔnmɛ, yi a sɔ mi wa Mawu 'viɛwo. ⁶ Eyi ci yi mi nyi Mawu viwo taɖo ɔ, Mawu dɔ eviɛ Gbɔngbɔn ɖaɖa miwo jiwo mɛ, yi e dodoɔ axwa mɔ: «Edanyɛ!» ⁷ Ci yi e le nɛnɛ ɔ, ɖe gbe nyi hwashi o; vɔ ɔ, evi yi e nyi. Eyi nɔ e nyi evi ɔ, a nyi e gbe nyi egbeɖunuwo kpaɖexɔtɔ hɛnnɛ. Mawu yi wɛɛ nɛnɛ. ⁸ Sasa ci yi mi ɖe kpɔ jeshi Mawu ɔ, mi kpɔtɔ nyi hwashiwo nɔ enusɛnsɛnwo. Vɔ nɔ wo kpɔ jɔjɔmɛ nɔ wo ɔ, kpɔ wo ɖe nyi enusɛnsɛn ɖe o. ⁹ Vɔ ecɛɛ ci mi va jeshi Mawu alo ci yi Mawu va jeshi mi ɖee, le yi mi a sɛnŋ gbe trɔyi xexemɛ nu maɖoŋsɛn koɖo maɖota hunnɔwo gbɔ, yi gbe ji a nyi wowo hwashiwo ke do ɔ? ¹⁰ Mi can ŋkeke ɖewo , wleci ɖewo, hwenu ɖewo koɖo exwe ɖewo daɖɛ yi nyinɔ ekɔ le wo ji. ¹¹ Ŋ vɔnvɔn do enu nɔ mi mɔ, cukaɖa ci yi ŋ je, yi sɔ wa edɔ le mi gbɔ, a va nyi gbali. ¹² Nɔvinyɛwo, ŋ ɖeɖeɔ kuku nɔ mi, mi nɔ shigbe enyɛ nɛ. Ɖo ɔ, enyɛ can, ŋ wa enyɛɖeki shigbe miwo nɛ. Mi ɖe wa enuvɔin ɖe koɖo ŋ o. ¹³ Mi nya nyuiɖe mɔ edɔlele hwenu yi ŋ le, yi do Mawu ŋɛnyui lɔ nɔ mi ŋkɔtɔ. Vɔ ci yi anyi gbaza ɖe nya kpɔkpɔ hwenɔnu can ɔ, mi ɖe gbali ŋ; yi ŋ ɖe nyɔŋ nɔ mi o. ¹⁴ Vɔ ɔ, mi xɔ ŋ shigbe Mawu dɔla ɖe nɛ, alo lehan yi mi xɔ Yesu Kliso ŋtɔ do nɛ. ¹⁵ Fiŋge yi jijɔ ci yi nɔnɔ mi ji sasa nyuiɖe lɔ le ɔ? Ŋ ɖenɔ kunnu nɔ mi mɔ, nɔ sɛn mi a sɛnŋ ylɔ ŋkuviwo le etanu, yi a sɔ jo nɔ ŋ ɔ, mi a wɛɛ dru sasa lɔ. ¹⁶ Ecɛɛ ɖe, va ŋ va trɔ miwo ketɔ ci ŋtotoɔ nyonɔnui nɔ mi taɖo a? ¹⁷ Kpakpa hunnɔ yi sɔsɔ 'mɛ lɔwo do mi nu; vɔ ɖe nyi enyui tɔ yɔ o. Ji wo jijiɔ a ɖe mi so mi nu kpoŋ, keŋ nɔ miwo a tɔ zozo, yi a kplɔ wo do. ¹⁸ E nyɔ nyao mɔ kpakpa nyui a sɔnɔ amɛ do enu nu hweɖekpokpuinu. Ɖe nyi gacimɛ yi ŋ le miwo domɛ ɖekɛ yi kpakpa a sɔsɔ mi o. ¹⁹ Evinyɛwo, gbaza gbe veveɛ ŋ ke do miwo ta shigbe lehan yi gbaza venɔ nyɔnu efunɔ ci yi gbɔgbɔ evi jigbe do nɛ. Ahan lɔ yi gbaza a veveɛ ŋ nɛ kaka va sɔɖo gacimɛ yi wa kpɔ mɔ Kliso lɔ le mi mɛ nyao nɛ. ²⁰ E dro ŋ veviɖe mɔ ma le miwo domɛ nɛnɛ gacɛmɛ ɛ sa, yi a sɔ egbemɛ ci yi je a sɔ xo nuxu nɔ mi. Ɖo ɔ, miwo nyo do xaxa nɔ ŋ sugbɔ. ²¹ Ma biɔ mi se ɖa, miwo ciwo yi jijiɛ mɔ yewo a nɔ ese gɔnmɛ ɖee, mi ɖe se enyɔ ci yi ese nunuɔ ba? ²² Wo ŋwlɛ daɖɛ nyao mɔ Ablahamu wa ŋsuvi amɛve ɖɛ. E ji ɖeka le Haga, nyɔnu hwashi lɔ dɔmɛ. Yi ji halɔtɔ le Sala, nyɔnu manyi hwashi lɔ dɔmɛ. ²³ Nyɔnu hwashi lɔ eviɛ ɔ, wo ji shigbe lehan yi wo jinɔ eviwo pleŋ do le gbaza mɛ nɛ. Vɔ Sala yɛ ji eyitɔ to egbeɖu ci yi Mawu wa nɔ Ablahamu mɛ yi wo ji eyɛ le. ²⁴ Enu lɔwo ci yi jɔ nɛnɛ ɖo gɔnmɛsese citocito ɖeka. Nyɔnu lɔwo sɔ ezoɖuɖu hata amɛve fɔ sɔ ɖo ete. Haga sɔ ezo ci yi Mawu ɖu koɖo Israyɛli le Shinayi kpo lɔ ji fɔ sɔ ɖo ete. Evi ciwo yi wo ji le ezoɖuɖu hunnɔ mɛ nyi hwashiwo. ²⁵ Keŋ Haga ɔ, e yi nyi Shinayi kpo ci yi le Alabi kan mɛ. E yi lɔ yi gbe sɔ koɖo Ʒeluzalɛmu ci yi li egbɛ hɛnnɛ. Ɖo jugan hunnɔ koɖo eviɛwo yi le hwashinyinyimɛ. ^{26 27} Vɔ Ʒeluzalɛmu ci yi so jiŋkuimɛ yɛ ɔ, yɛ vo le yiɖeki shinu. E yɛ yi nyi miwo nɔ. Nyao ɔ, wo ŋwlɛ daɖɛ mɔ: «Kpɔ jijɔ, eɔ ekonɔ ci yi ɖe ji evi ɖe! Eɔ ci yi evi dɔmɛ ɖe ɖu kpɔ, do jijɔ xwawo. Ɖo ɔ, nyɔnu ci yi asuɔ gbe, eviɛwo a va sugbɔ sɔwu nyɔnu ci yi asu le koɖo.» ²⁸ Nɔvinyɛwo, shigbe Izaki nɛ ɔ, mi nyi egbeɖu viwo. ²⁹ Shigbe lehan yi e le do sasa xoxoxo lɔ yi evi ci yi Haga ji le gbaza dro mɛ cinɔ yumɛ nɔ evi ci yi wo ji sɔ todo Mawu Gbɔngbɔn mɛ nɛ ɔ, nɛnɛ lɔ ke yi e gbe le egbɛmɛ ɛ can nɛ. ³⁰ Keŋɖe, enyɔ hinɖe yi le Mawu nyɔ wema lɔ mɛ ɔ? Wo ŋwlɛ daɖɛ mɔ: «Nya nyɔnu hwashi lɔ koɖo eviɛ. Ɖo ɔ, nyɔnu hwashi lɔ eviɛ ɖa xɔ ŋɖe le egbeɖunuwo mɛ koɖo evi ci yi nyɔnu manyi hwashi lɔ ji o.» ³¹ Eyi na taɖo ɔ, nɔvinyɛwo, mi ɖe nyi nyɔnu hwashi lɔ eviɛwo o. Nyɔnu manyi hwashi lɔ 'viɛwo yi mi nyi.