¹ Galatitɔ ŋunumanyatɔ wo, mɛ e yi flu eta mɛ nɔ mi nɛnɛ ɔ? Ɖ'e nyi miwo ŋmɛ yi ŋ dre lehan yi kan Yesu kliso do acisosa ji do le ba? ² Enyɔ ci yi ɖekɛ yi ŋ jiji ɛ a se sɔso mi gbɔ ke: Eseji ci yi mi wawa do taɖo yi mi xɔ Gbɔngbɔn kɔkɔɛ lɔ do alo alo ci yi mi se Eŋɛnyui lɔ yi xɔɛ ji dɔ yi Mawu sɔ na mi do? ³ Ɖee mi jɔ ŋunumanyatɔ kaka yi je enɔ a? Ci yi waɖaŋ je agbe nɔnɔ gɔnmɛ koɖo gbɔngbɔn kɔkɔɛ ŋsɛn ɖee, mi jiji ɛ a vayi vɔvɔnu nii koɖo gbaza yɔ a? ⁴ Enu ciwo kpu yi mi kpɔ wo jɔ ɖee, enu gbaliwo yi wo nyi a? Wa sɛn eŋ nyi enugbaliwo ba! ⁵ Amɛ ci yi sɔ e yi gbɔngbɔn kɔkɔɛ na mi yi wawa enujiŋwo le miwo domɛ ɖee, yuɖatɔwo sejiwawado taɖo yi e wɛwɛɛ do a alo ci yi mi se Eŋɛnyui lɔ yi xɔɛ ji se yi taɖo yi e wɛɛ nɛnɛ a? ⁶ Nɛnɛ ɔ, wo ŋwlɛ daɖɛ so Ablahamu nu mɔ: «Ablahamu xɔ mawu ji se eyi wo xɔ Mawu ji xɔxɔse lɔ nii do amɛjɔjɔɛnyinyi ji.» ⁷ Eyi na taɖo ɔ, mi ɖo a mɔŋje mɛ mɔ amɛ ciwo yi wo kpɔ le Mawu ji xɔxɔse nyɔ mɛ yi nyi ablahamu jijimɛvi ŋtɔŋtɔwo. ⁸ Sasa lɔ ci yi wo nyanya mɔ Mawu a va sɔ amɛmanyi yuɖatɔwo wa amɛjɔjɔwo sɔ todo xɔse mɛ ɔ, wo ŋwlɛ daɖɛ do Mawu nyɔ wema mɛ mɔ wo doŋkɔ yi do Eŋɛnyui lɔ nɔ Ablahamu mɔ: «Mawu a cu eshi nɔ akɔtawo pleŋ to do wu ji». ⁹ Toɖo ɔ, amɛ ciwo yi wo kpɔ le Mawu jixɔxɔse nyɔ mɛ yi nyi Ablahamu jijimɛvi ŋtɔŋtɔwo. Wo a nyi shicunɔwo koɖo Ablahamu, amɛ ci yi ɖo xɔse lɔ. ¹⁰ Vɔ amɛ ciwo yi wo kpɔ le esejiwawado nyɔ mɛ ɔ, wo kpu le Mawu kpɛnsɛn gɔnmɛ. Ɖo ɔ, wo ŋwlɛ daɖɛ mɔ: «kpɛnsɛn ɖe va amɛɖekpokpoi ci yi d'a do vevi enu ciwo kpu yi le ese wema lɔ mɛ yi a wawa do wo pleŋ ji o» ¹¹ E ze gbajɛɛ mɔ amɛɖe kpokpoi d'a xɔ amɛjɔjɔɛ nyinyi le Mawu ŋme sɔ to do esejiwawado mɛo. Ɖo ɔ, wo ŋwlɛ ɖaɖɛ mɔ:«Amɛ ci yi nyi amɛ jɔjɔɛ sɔ todo ŋsɛn mɛ mɛ anɔ agbe. ¹² Keŋ ɔ, ese nyɔ ɖe nyi xɔse nyɔ ɖe o. Vɔ ese nu yi wo ŋwlɛ daɖɛ mɔ: «amɛ ci yi wa do enu hunnɔwo ji a gbe nɔ agbe todo enu lɔwo wawa ji». ¹³ Kliso lɔ cu efɛn yi sɔ xwle mi le ese kpɛnse shi gacimɛ yi yiŋtɔ trɔ ekpɛsɛn nu do miwo ta. Ɖo ɔ, wo ŋwlɛ ɖaɖɛ mɔ: «kpɛnsɛn le amɛɖe kpokpoi ci yi wo kan do aciji.» ¹⁴ Yesu wɛɛ nɛnɛ nɔ Ablahamu shicu lɔ a to do Yesu kliso jí nɔ amɛmanyi yuɖatɔwo hɛnnɛ. E gbe wɛɛ nɛnɛ nɔ mia xɔ gbɔngbɔn kɔkɔɛ ci gbe yi Mawu ɖo lɔ sɔ todo xɔse mɛ. ¹⁵ Nɔvinyɛ, ma sɔ Mawu sɔ na kpɔwɛ cɛ le agbetɔwo nuwawawo mɛ: nɔ 'mɛɖe ɖu ezo do enuɖe ji shigbe lehan yi e je do nɛ ɔ, 'mɛbu ɖe ɖa sɛnŋ cucu ezoɖuɖu lɔ alo a sɔ enuɖe do ji nii o. ¹⁶ Keŋ ɔ, Ablahamu koɖo e yi jijimɛ yi Mawu ɖo egbe lɔwo nɔ. Wo ɖe nu mɔ: «nɔ e yi jijimɛviwo» shigbe mɔ jijimɛ sugbɔ nyɔ yi wo nunuɔ nɛ o. Vɔ ɔ, jijimɛ kuɖeka kpaŋ nyɔ yi wo nunuɔ mɔ: «koɖo nɔ a wu jijimɛ». Jijimɛ lɔ yi nyi Kliso lɔ. ¹⁷ Enyɔ ci yi ŋ jijiɛ a nu, yi nyi mɔ: ezo ci yi Mawu ɖu koɖo Ablahamu nyuiɖe koŋ, yi e li ɖɛ ɔ, ese ci yi va va nɔ yuɖatɔwo le exwe sanŋdi amɛnɛ taatɔn (450) godu ɖa sɛnŋ a cucu ezo lɔ ci Mawu ɖu koɖo Ablahamu o. Nɔ e cucui ɔ, a nyi egbeɖu lɔ nyi enugbali. ¹⁸ Ɖo nɔ, dɔkunu kpɛnkpɛn ci yi wa kpɔ a xɔ le Mawu mɛ, a sɔ esejiwawado mɛ ɔ, a nyi mɔ ɖa gbe so egbeɖu mɛ. Keŋ ɔ, egbeɖu lɔ ji yi Mawu wa do, yi wa xomɛvu nɔ Ablahamu. ¹⁹ Ecɛɛ ɖee, ŋ ɖe yi na taɖo yi Mawu do ese ɔ? Mawu sɔ ese kpe nii do agɔjejewo ŋci , kaka a sɔ nanɔ hwecinu yi Ablahamu jijimɛ hunnɔ lɔ ci yi wo ɖo egbe lɔ nɔ a va. Mawu sɔ ese lɔ na dɔlawo yi wo sɔ va na agbetɔwo todo amɛdradotɔ ɖeka ci yi le agbetɔ lɔwo koɖo Mawu domɛ ji. ²⁰ Keŋ ɔ, kpɔ amɛdradotɔ ɖe wu do wo nɔ e nyi mɔ amɛ kuɖeka yi wawa enu o. E va trɔ nyi kpɔ mɔ, Mawu ɖekɛ yi wawa enu. ²¹ Ci yi e le nɛnɛ ɖee, ese so je ete do Mawu gbeɖuwo nu yɔ a? Gbeɖe, a jɔ kpɔ go. Nɔ e nyi kpɔ mɔ wo na ese ɖe ci yi a na yi agbetɔwo a nɔ agbe sasa ɔ, a nyi ke amɛjɔjɔɛnyinyi can a va nyɔnɔnuitɔ sa todo esejiwawado mɛ. ²² Vɔ ɔ, Mawu nyɔ wemawo wla enuwo pleŋ do enuvɔn mɛ. Nɔ nɛnɛ ɔ, Mawu a sɔ egbeɖu lɔ na amɛ ciwo yi xɔɛ ji se sɔ todo Yesu Kliso lɔ jixɔxɔse mɛ. ²³ Gbɔxwe yi xɔse nyɔ a va va ɔ, yuɖatɔwo se gɔnmɛ yi mi le, yi e cu mi ɖɛ shigbe gakpamɛnɔtɔwo nɛ. ²⁴ Ahan yi mi le nɛ, sɔɖɛnɔ xɔse lɔ ci yi wa ɖe doasɛ. Nɛnɛ ɔ, ese ɖu amɛcɔtɔ nɔ mi gahunnɔmɛ kaka va ɖo gacimɛ yi Kliso lɔ va. E le ahan nɔ Mawu a sɔ mi wa, amɛjɔjɔɛwo le e yi ŋmɛ todo Kliso lɔ jixɔxɔse ²⁵ mɛ. Ecɛɛ, ci xɔse va va ɔ, mi ɖe gbe le amɛcɔtɔ ɖe gɔnmɛ o. ²⁶ Ɖo, todo xɔse mɛ ɔ, mi pleŋ nyi Mawu 'viɛwo le Yesu Kliso mɛ. ²⁷ Nyao ɔ, mi pleŋ ciwo yi wo le Mawushi nɔ le Kliso lɔ mɛ ɔ, mi sɔ Kliso lɔ do shigbe awu nɛ. ²⁸ Ci yi e le nɛnɛ, kpɔ yuɖatɔ ke, amɛmanyi yuɖatɔ nɛ, hwashi ke, amɛmanyi hwashi nɛ, ŋsu ke, nyɔnu nɛ ɖe ɖe gbe li o. Ɖo miwo pleŋ ɔ, mi nyi enu kuɖeka le Kliso lɔ mɛ. ²⁹ Nɔ mi nyi Kliso lɔ mɛwo ɔ, a nyi miwo yi nyi Ablahamu jijimɛ, yi gbe nyi egbeɖunuwo kpaɖexɔtɔ.