¹ Exwe winɛ godu ɔ, ŋ trɔgbɔva Ʒeluzalɛmu koɖo banabasi. Ŋ kplɔ titu can hɛn bɔbo enyɛɖekinu hɛnnɛ. ² Ŋ yi enɔtɔxu, ɖo Mawu ɖe doasɛ nɔ ŋ mɔ enyɛ ɖe yí. Eyi ŋ kplɔ xɔsetɔ lɔwo ŋkɔnɔtɔwo yi ekpa le enɔ lɔ yi hun Eŋɛnyui ci yi do axwa yi do do ɔ o nɔ amɛmanyi yuɖatɔwo mɛ nɔ wo. Ɖo ɔ, ŋ ɖe ji mɔ wo a kpɔ edɔ ciwo yi ŋ wa vayi koɖo ciwo yi ŋ gbe wawa ɛ do edɔgbali ji o. ³ Titu ci yi ŋ kpɔ hɛnva Ʒeluzalɛmu lɔ nyi Glɛkitɔ. Vɔ kpɔ wo ɖe ʒiin ji mɔ wo a so evo nii kpetii o. ⁴ Vɔ ɔ, amɛ ɖekawo li yi xoxo ɔ evi mɔ yowo nyi nɔvi xɔsetɔwo. Wo be yi ɖo miwo bɔbɔ mɛ yi jiji ɛ gɔnmɛ kpɔ nɔ miwo wanawo le vovo ci yi ɖo le Yesu kliso lɔ mɛ. Wowo susu yi nyi kpɔ mɔ yowo a gbe sɔ miwo wa hwashi. ⁵ Vɔ ɔ, mi ɖe na ŋmɛ amɛ hunnɔ lɔwo eɖeeɖe go. Mi ɖe xɔ egbe do wowo nyɔ ji o nɔ nyɔnɔnui ci yi le Eŋɛnyui lɔ mɛ a nɔ alɔji keɖii nɔ miwo. ⁶ Amɛ ciwo yi wo kpɔnɔ do amɛ kpɛnkpɛnwo ji le mɛ ɔ, enyɛ ŋ ɖe sɔsɔ eɖe le enu ci yi wo nyi ji o ɖo Mawu ɖe donɔ vovototo do amɛ mɛ o. Amɛkpɛnkpɛn hunnɔ lɔwo ɖe sɔ enuɖe ʒin ŋ ji mɔ nyɛ ŋ ɖo a wa o. ⁷ Nɔ yɛ to mɛ ɔ, wo kpɔ mɔ Mawu dɔ enyɛ mɔ enyɛ ɖe yi do Eŋɛnyui lɔ nɔ amɛmanyui yuɖatɔwo shigbe lehan yi dɔ Piyɛ ɖaɖa yuɖatɔwo gbɔ do nɛnɛ. ⁸ Ɖo Mawu ci yi wa edɔ lɔ le Piyɛ mɛ le amɛdɔdɔ ci yi e nyi dɔwawa mɛ le yuɖatɔwo, amɛ ciwo yi nyi evosoiwo gbɔ ɔ, Mawu lɔ ke yi gbe wa edɔ le enyɛ mɛ le amɛmanyi yuɖatɔwo gbɔ. ⁹ Ci yi wo le ŋkuvi do xomɛvunu ci yi Mawu wa nɔ ŋ nu ɔ, Ʒaki, Kefasi koɖo Ʒan ciwo yi wo kpɔnɔ do eha lɔ xɔdomɛ ciwo ji na ashi enyɛ koɖo banabasi yi sɔ daasɛ mɔ yowo xɔ egbe do edɔ ci yi miwo wawa ji. Eyi mi pleŋ lɔ bɔ nui kpe mɔ miwo a yi wa edɔ le amɛma nyi yuɖatɔwo gbɔ yi wowo a yi wa le yudatɔwo, evosoiwo gbɔ. ¹⁰ Enu kuɖeka ci yi wo biɔ sɔsɔ mi gbɔ yí nyi kpɔ mɔ miwo ɖe ɖonɔ eŋui wamɛnɔwo. Eyi ŋ gbe wa do ji nɔ wo koɖo vevido do enu. ¹¹ Vɔ le enyɔ hunnɔwo godu ci yi kefasi va va antiwɔshi ɔ, ŋ gbe enyɔ nii le amowo ŋmɛ. Ɖo ɔ, e wa afɛn. ¹² Nyɔnɔnui ɔ, ci yi Piyɛ va antiwɔshi ɔ, yi koɖo nɔvi, amɛmanyi yuɖatɔ ciwo yi xɔ kliso ji bɔ yi ɖunɔ enu do ɖekɛ. Le e yi godu ɔ Ʒaki va dɔ amɛ ɖekawo ɖaɖa antiwɔshi. Ci yi amɛ lɔwo va ɖegbɔ ɔ, Piyɛ va te so wo nu yi mi enu ɖuɖu koɖo wo. Ɖo ɔ, e vɔnvɔn nɔ yuɖatɔ ciwo yi ɖɔnɔ eŋ do evososo nɔ amɛshamɛ nyɔ ji. ¹³ Eyi nɔvi klisotɔ ciwo yi nyi yuɖatɔ kpɛtɛwo kpu tɔ ayemɛnu wawa shigbe Piyɛ nɛnɛ kaka Banabasi can kplɔ wo do. ¹⁴ Vɔ cí yi ŋ mɔ wo ɖe waɖaŋ zɔnzɔn do nyɔnɔnui ci yi Eŋɛnyui lɔ kplakpla mi ji ɔ, ŋ nu nɔ kefasi le amɛ shamɛ ŋmɛ mɔ: «kefasi, yuɖatɔ yi e nyi vɔ ɖ'e wa enu shigbe yuɖatɔ nɛnɛ o. E wa enu shigbe amɛmanyi yuɖatɔ nɛnɛ. Ci yi e le ahan ɔ, ŋ ɖe yi na taɖo yi e nu nu ɔ nɔ amɛmanyi yuɖatɔwo nɛnɛɔ? ». ¹⁵ Miwo ɖe, yuɖatɔwo yi mi nyi sɔsɔ jɔjɔmɛ. Mi ɖe le enuvɔnwatɔ amɛmanyi yuɖatɔwo mɛ o. ¹⁶ Ci yi e le nɛnɛ can ɔ, mi nya mɔ ɖ'e nyi esejiwawado mɛ yi Mawu sɔ amɛ nanɔ amɛjɔjɔɛ le o. Vɔ ɔ, Yesu kliso jixɔxɔse ɖekɛ mɛ yi e tonɔ yi sɔ amɛ wanɔ amɛjɔjɔɛ. E yi na taɖo yí miwo can mixɔ Yesu kliso ji se nɔ Mawu a sɔ mi wa amɛjɔjɔɛ wo sɔ todo kliso lɔ jixɔxɔse mɛ. Ɖ'e nyi yuɖatɔwo se ji wawa do mɛ yɔ o. Ɖo ɔ, Mawu d'a sɔ amɛɖe wa amɛjɔjɔɛ nɔ ci yi amɛ lɔ wanɔ do ese ji taɖo o. ¹⁷ Vɔ nɔ e nyi kpɔ mɔ ci miwo yuɖatɔwo xɔsetɔwo jijiɛ mɔ wo a sɔ mi wa amɛjɔjɔɛwo ɔ, wo gbe va kpɔ miwo can yi mi nyi enuvɔnwatɔwo ɔ, e yi a nyi kliso lɔ nyi enuvɔn dɔwatɔ a? Gbeɖe! A jɔ kpɔ go. ¹⁸ Nɔ e nyi kpɔ mɔ enu ci yi ŋ gban ɔ, ŋ gbe va trɔ yi cuicuiɛ do ete ɔ, ŋ do doasɛ to do nɛnɛ wawa mɛ mɔ ŋ dada le ese Ji. ¹⁹ Ŋyɔnɔnui ɔ, le ese nyɔ mɛ ɔ, ŋ ku yi e nyi ese lɔ yi wu ŋ, nɔ nɛnɛ ɔ, ma nɔ agbe nɔ Mawu. Wo kan ŋ do acisosa ji hɛnnɛ koɖo kliso lɔ. ²⁰ Nɛnɛ ɔ, ɖ'e gbe nyi enyɛ yi le agbe o. Vɔ ɔ, kliso lɔ yi le agbe le ŋ mɛ. Ɖo agbe ci yi ŋ va nɔnɔ le gbaza mɛ le kaaka mɛ ɛ ɔ, ŋ niniiɛ Mawu Eviɛ lɔ ci yi lɔn ŋ, yisɔ yiɖeki sa avɔ do eta nɔ ŋ xose mɛ. ²¹ Ŋ d'a lɔn yi a gbali xomɛvunu ci yi Mawu wa. Ɖo nɔ e nyi kpɔ mɔ esejiwawaɖo mɛ yi wo a xɔ lɔ ku gbali.