¹ Nɔvinyɛwo, nɔ wo kpɔ 'mɛɖe, yi e wawa afɛn ɖekpokpui ɔ, miwo ciwo yi Mawu Gbɔngbɔn kplɔkplɔ ɔ, mi a sɔ ecufafa ɖɔɖɔɖɔ a kpedo nu, nɔ a trɔva emɔ nyuitɔ lɔ ji. Kpɔ wɔɖekiji nyuiɖe nɔ ewɔ can ɔ, wo ŋgbe va te ewɔ kpɔ hɛnnɛ o. ² Mi a hɛnnɔ enyɔgbanwo koɖo miwonɔnɔwo. Nɔ mi wɛwɛɛ nɛnɛ ɔ, a nyi mi wawa do Kliso lɔ se ji keŋkeŋ. ³ Amɛ ci yi kpɔkpɔ mɔ ye nyi amɛnɔnui ganŋkegan yi ɖe nyi enuɖe, blebleɛ yiɖeki. ⁴ Amɛ ɖeka ɖeka ɖe glo yiŋtɔ dɔwawawo kpɔ, yi a kpɔ mɔ wo nyɔ mɛ. Eyi gbɔxwe yi a sɛnŋ kpɔ enu ci nu yi a gangan le so yiɖeki nu. Ɖe nyi mɔ 'mɛɖe nu yi a sɔ yiɖeki sɔ do, yi a dodoɔ yiɖeki do ji o. ⁵ Ɖo ɔ, amɛ ɖeka ɖeka a hɛn yiŋtɔ gban. ⁶ Amɛ ci yi wo kplankplan Mawu nyɔ lɔ, le na nɔ 'mɛ ci yi kplankplan Mawu nyɔ lɔ yi, a kpɔ a xɔ le e yi dɔkunnuwo mɛ. ⁷ Mi ŋgbe bleble ɔ miwoɖekiwo o. Wo ɖe gbanɔli Mawu o. Enu ci yi wo kan ɔ, e yi ke wo vayi ɖenɔ. ⁸ Amɛ ci yi kan enu nɔ yiŋtɔ gbaza ɔ, a gbe vayi ɖe gbazamɛ kusɛnsɛn, ci yi nyi eku. Vɔ amɛ ci yi kan enu nɔ Gbɔngbɔn lɔ a gbe ɖe Gbɔngbɔnmɛ kusɛnsɛn ci nyi agbemavɔ ⁹ Eyi na taɖo ɔ, mi ŋgbe na nɔ enu a ci ekɔ nɔ mi le enunyuiwawa mɛ o; ɖo nɔ gamɛ ci yi wo ɖo ɖɛ lɔ va sun ɔ, mi a va ɖe nukuwo, nɔ mi ɖe va gblɔ alɔ le enunyuiwawa nu o. ¹⁰ Ci yi e le nɛnɛ ɔ, mi na nɔ mi a wawa enyui nɔ amɛshiamɛ hweɖekpokpuinu ci yi emɔnukpɔkpɔ lɔ a ze nɔ mi. Veviɖe ɔ, mi a wanɔ miwo nɔvi xɔsetɔwo. ¹¹ Mi kpɔ lehan yi wemakui cɛwo sugbɔ do ɖa! Enyɛŋtɔ yi sɔ anyi lɔ sɔ ŋwlɛŋwlɛ enyɔ cɛwo ɖaɖa mi. ¹² Amɛ ciwo yi jijiɔ mɔ yowo a nyɔ le agbetɔ gbɔ yi ʒinʒin do mi ji mɔ, miwo ɖo a so evo. Wo nunuɔ nɛnɛ nɔ amowo ŋgbe va ci yumɛ nɔ wo do Kliso lɔ 'cisoga tamɛ o. ¹³ Ɖo amɛ hunnɔwoŋtɔ ciwo yi dɔ yi wo so evo nɔ wo ɖe wawa do ese ji o. Ganŋkegan ɔ, wo jijiɔ mɔ miwo a so nɔ yowo a sɔ gangan. ¹⁴ Vɔ enyɛ ɛ ɔ, miwo 'Xwetɔ Yesu Kliso ku do acisoga ji ɖekɛ yi enyɛ ŋ sɔ gangannɔ. Ɖo acisogajikukudo hunnɔ mɛ yi xexegbɛ lɔ ku le enyɛ gbɔ le nɛ, shigbe lehan yi enyɛ can, ŋ ku le xexegbɛ lɔ gbɔ do nɛ. ¹⁵ Ɖo ɖe nyi evososo alo evomasomaso yi le veviɖe o. Enu ci yi le veviɖe yi nyi kpɔ mɔ amɛ yoyu nyinyi. ¹⁶ Amɛ ciwo pleŋ yi a wanɔ do ɖoɖo hunnɔ ji ɔ, Mawu ɖe na fafa wo yi a ku ŋshishi nɔ wo. Nɛnɛke ɔ, Mawu ɖe gbe na fafa yi jukɔn Israyɛli yi a kpɔ ŋshishi nɔ wo. ¹⁷ Sɔ so egbɛ ji ɔ, amɛɖe ŋgbe gbe do cukaɖa ɖe nɔ ŋ o. Ɖo enyɛ ɔ, abikpa xoxui ciwo yi le gotu nɔ ŋ, nyi Yesu jeshiduwo le ŋ nu vɔ. ¹⁸ Nɔvinyɛwo, miwo 'Xwetɔ Yesu Kliso xomɛvu ɖe nɔ koɖo miwo gbɔngbɔn! Axoaɖyi!