¹ Ci yi Mawu fɔn mi sɔ ekuwodi koɖo Kliso lo ɔ, mi ji enu ciwo yi le jeŋkuimɛ, le fini ci yi Kliso lɔ le anyinɔnɔ do ɖushimɛ nɔ Mawu le. ² Miwo susu le nɔ enu ciwo yi le eji, le jeŋkuimɛ ji. Ɖe nyi nyigban ji nuwo ji yi susu a le nɔ mi o. ³ Ɖo ɔ, mi ku, yi wo sɔ miwo gbe wla do Kliso lɔ mɛ, yi sɔ do Mawu mɛ. ⁴ Hwecinu yi Kliso lɔ ci yi nyi miwo gbe ŋtɔŋtɔ a va to, yi amɔwo a kpɔɛ ɔ, miwo can mi a to koɖi le yi klɛnklɛn gangan lɔ mɛ. ⁵ E yi na taɖo ɔ, mi gu enu ciwo pleŋ yi nyi nyigbanji nuwo le miwo gbe mɛ. Wowo yi nyi mɔ: heteliwawa, laganuwawa, gbazamɛ nudroamu dɔndɔnwo, susu dɔndɔnwo ɖoɖo, shikanujiji. Shikanujiji ɔ, vojusɛnsɛn yi e nyi. ⁶ Enu hunnɔ hanwo yi dɔ yi Mawu shinnɔ xomɛ do egufɔntɔwo ji nɛ. ⁷ Nɛnɛ nuwo yi miwo can mi wanɔ vayisa, gacimɛ yi mi nɔnɔ agbe ahan nɛ. ⁸ Vɔ eviɛɛ ɔ, mi ɖo a gbenu so enu cɛwo pleŋ nu : xomɛshin, elannuwawa, xomɛveve, eshivɔinlele nɔ amɛ, amɛzuzu, yi enyɔdɔndɔn ɖe ŋgbe totoɔ le miwo glan mɛ o. ⁹ Mi ŋgbe xonɔvi le miwonɔnɔwomɛ o. Ɖo ɔ, mi xuxu miwo jɔjɔmɛ xoxwi lɔ koɖo yi nuwawawo kɔŋgbe. ¹⁰ Yi sɔ,jɔjɔmɛ yoyutɔ sɔ do shigbe awu nɛ. Jɔjɔmɛ yoyutɔ cɛ trɔ, yi wawa yoyu yi kedo enunyanya nu shigbe lehan yi amɛ ci yi nyi yi watɔ nɔnɔmɛ le do nɛ. ¹¹ Le mɛ ɔ, vovototo eɖeɖe ɖe gbe le Glɛshitɔ alo Yuɖatɔ, evosui alo tɔtɔnɔ, amɛkɔŋmɛ alo bomɛtɔ, hwashi alo amɛ ci vo domɛ o. Vɔ ɔ, Kliso lɔ yi nyi enu pleŋ le amɛshiamɛ mɛ. ¹² Mawu can mi do evo, yi sɔ mi wa yi jukɔn ci yi ɖe lɔnnɔ enu le ekɔ nɔ o. E yi na taɖo ɔ, mi ɖo a sɔ enuɖewo do shigbe awu nɛ. Enu lɔwo yi nyi : ŋshishikukunɔamɛ, xomɛvuwawa, amɛɖekisɔsɔhwe, xomɛfafa koɖo jigbɔnɖɛxɔxɔ. ¹³ Mi a xɔnɔ jigbɔnɖɛ, yi a xɔnɔ miwonɔnɔwo. Nɔ amɛɖe ɖo enyɔɖe do yi kpena nu le miwo domɛ ɔ, le sɔ kii. Shigbe lehan yi Axwetɔ sɔ enuwo kenɔ mi do nɛ ɔ, miwo can mi sɔ enu kenɔ amɔwo hɛnnɛ. ¹⁴ A sɔ xo eta nɔ enu hunnɔwo pleŋ ɔ, mi sɔ lɔnlɔn wa awu yi a do. Ɖo lɔnlɔn yi nyi eka ci yi blanɔ enuwo do eju vɛ. ¹⁵ Fafa Kliso lɔtɔ ci yi wo yɔ mi bɔ nɔ, yi mi nyi lankpu kuɖeka mɛ ŋcinuwo le ɖu efiɔ le miwo ji mɛ. E nu le jenɔŋ nɔ mi. ¹⁶ Kliso lɔ nyɔ le nɔ miwo ji mɛ koɖo dɔkunnu ci yi le mɛ. Mi kpla enu miwonɔnɔwo koɖo nunyanya. Mi sɔ eji blebu, enujeŋnɔamɛ susu a sɔ le bubu hajijiwo, kanfukanfun hajijiwo koɖo akpedodo hajiji gbɔngbɔnmɛtɔwo jiji nɔ Mawu. ¹⁷ Nuxu ɖekpokpoi ci yi mi a xo alo enu ɖekpokpoi ci mi a wa ɔ, mi wɛɛni le Axwetɔ Yesu nyikɔ mɛ. Mi wɛɛni ahan a sɔ donɔ akpe nɔ Mawu miwo Da toto Yesu ji. ¹⁸ Nyɔnuwo, miwo domɛtɔ ɖekaɖeka le bɔbɔ yiɖeki nɔ asuɔ shigbe lehan yi e je do le Axwetɔ lɔ mɛ nɛ. ¹⁹ Ŋsu axwetɔwo, miwo domɛtɔ ɖekaɖeka le lɔn ashiɛ. Mi ŋgbe shinnɔ xomɛ di o. ²⁰ Ɖeviwo, mi se tonu no miwo da koɖo miwo nɔwo le enushianumɛ. Ɖo ɔ, etonusese nɔ amɛ da koɖo amɛ nɔ nyi enuɖeka ci yi nyɔ le Axwetɔ mɛ. ²¹ Evidawo, mi ŋgbe donɔ xomɛshin nɔ miwo 'viwo nɔ lanmɛ a gbɔjɔ nɔ wo o. ²² Hwashiwo, mi se 'tonu nɔ miwo xwetɔ nyigban cɛ ji tɔwo le enushianu mɛ. Ŋgbe nyi ŋmɛ ɖekɛ yi mi a shinɔ nɔ wo o; nɔ a le shigbe mɔ agbetɔ yi mi jijiɔ a jeŋ nɔ nɛ o. Vɔ ɔ, mi shinɔ wo koɖo eji faa, le shishiɖoɖo nɔ Axwetɔ lɔ mɛ. ²³ Edɔ ɖekpokpoi ci yi mi a wa ɔ, mi wɛɛ koɖo eji faa koɖo susu mɔ Axwetɔ yi mi wɛɛwɛ nɔ, yi ɖe nyi agbetɔwo yɔ o. ²⁴ Mi a nya mɔ Axwetɔ a va sɔ enunyui ciwo yi e drado daɖɛ nɔ yi mɛwo cu efɛn nɔ mi. Mi nɔ edɔ wawa ji shigbe Axwetɔ adoduitɔ, Kliso lɔ hwashiwo nɛ. ²⁵ Ɖo amɛ ci yi wa enu majɔɛmajɔɛɖe a gbe xɔ enumajɔɛmajɔɛ fɛncu hɛnnɛ. Le mɛ ɔ, Mawu ɖe nɔnɔ amɛ ji o.