¹ Axwetɔwo, miwa enujɔjɔɛ, yi a wa enu do ese ji ɖaɖa miwo hwashiwo gbɔ. Ɖo mi nya mɔ Axwetɔ le miwo can shi le jeŋkui mɛ. ² Mi sɔ miwoɖekiwo cu nɔ kuifanwawa teŋteŋ. Nɔ mi wawa kuifan ɔ, mi nɔnɔ aceji le akpedodo nɔ Mawu gashiagamɛ. ³ Mi wa kuifan nɔ Mawu do eta nɔ miwo can, nɔ a hun emɔ nɔŋ nɔ ma nu Kliso lɔ nuwlawlawo nɔ amɔwo. Ɖo enuwlawla hunnɔwo tamɛ yi ŋle gakpamɛ do nɛ. ⁴ E yi na taɖo ɔ, mi wa kuifan nɔ ma sɛnŋ dre enuwlawla lɔwo mɛ petii nɔ amɔwo shigbe lehan yi ŋɖo a wɛɛ do nɛ. ⁵ Mi nɔ agbe le nunyanya mɛ koɖo jimaxɔsetɔwo. Mi ɖeblɛ do gamɛ lɔ nu. ⁶ Miwo nuxuwo le lenɔ aɖe tɛgbɛɛ, yi a nyi enyɔ veviwo. Mi ɖo a nya lehan yi mi a trɔnɔ aɖe yi a ɖonɔ enyɔ nu nyuiɖe nɔ mɛɖekamɛɖeka do. ⁷ Tishiki, nɔvi vevi le Axwetɔ mɛ koɖo miwo bɔdonutɔ le Axwetɔ dɔwawa mɛ, edɔwatɔ gbejinɔtɔ ɖeka yi e nyi; a va, yia dre enyɔwo pleŋ mɛ nɔ mi. ⁸ Ŋ dɔɛdɔɛ ɖaɖa mi gbɔ akpobutɔ nɔ mi a sɛnŋ jeshi nɔnɔmɛ ci mɛ yi mi le, yi nɔ agbe do ŋsɛn lanmɛ nɔ mi. ⁹ Onezimu, miwo nɔvi vevi, Mawu gbejinɔtɔ, ci yi so miwo xwe a kplɔɛ do yi a va. Wa va nu enu ciwo pleŋ yi jɔjɔ le elɛ nɔ mi. ¹⁰ AAlishitaki ci yi enyɛ koɖo eyɛ bɔ le gakpamɛ, do egbe ɖaɖa mi. Nɛnɛke Maki ci yi nyi Banabasi nɔviɛ can do egbe ɖaɖa mi nɛ. Wo dre lehan yi mi a xɔ mɛdru Maki lɔ do nɔ mi vɔ. E yi na taɖo yi nɔ e va mi gbɔ ɔ, mi a xɔɛ nyuiɖe. ¹¹ Yesu ci yi wo yɔnɔ mɔ Ʒutusu can do egbe ɖaɖa mi. Amɛ amɛtɔn hunnɔwo ɖekɛ yi nyi Yuɖatɔ xɔsetɔ ciwo yi bɔ wawa edɔ koɖoŋ nɔ Mawu fiɔnuxulɔ. Amɛ yi wo nyi yi donɔ akɔnfa nɔŋ. ¹² Epaflasi, miwotɔwo domɛtɔ ɖeka can do egbe ɖaɖa mi. Yesu Kliso dɔwavi hunnɔ ɖe mi ahwa wawa do eta nɔ mi le yi kuifanwo mɛ o. Nɔ ahan ɔ, mi a li eke, a shin nyuiɖe vɛ le gbɔngbɔnmɛ, yi a sɔ gbeta koŋ, yi a wawa do Mawu dro ji le enushianumɛ. ¹³ Ŋ ɖeɖeɔ kunnu cɛ so nu mɔ yi jenɔ cukaɖa sugbɔ do miwo koɖo Lawodise koɖo Iyelapolisi juganmɛtɔwo ta. ¹⁴ Luiki, miwo xlɔ vevi ci yi nyi ɖɔkita koɖo Demasi do egbe ɖaɖa mi. ¹⁵ Mi do egbe nɔ miwo nɔvi xɔsetɔwo ci wo yi le Lawodise nɔŋ, yi a gbe do egbe no nɔvi Nɛfasi koɖo Mawu ha ci yi bɔnɔ do yi xwemɛ nɔŋ. ¹⁶ Nɔ wo hlɛn wema cɛ le mi gbɔ ɖegbɔ ɔ, mi a dɔ nɔ wa hliin hɛnnɛ nɔ Mawu ha ci yi le Lawodise. Nɛnɛke ɔ, miwo can mi a hlɛn wema ci yi wa xɔgbɛ nɔ mi so Lawodise. ¹⁷ A sɔ ɖe egbɔ ɔ, mi nu nɔ Ashipu mɔ, yi le lebu nɔ edɔ ci yi e xɔ le Axwetɔ lɔ mɛ, yi a wɛɛwɛ nyuiɖe. ¹⁸ Enyɛ Pɔlu ŋtɔ yi sɔ anyi lɔ ŋwlɛn enyɔ godugodutɔ cɛwo ɖaɖa mi. Ŋ dodoɔ egbe nɔ mi. Mi ɖoŋui gakpamɛnɔtɔ nɔnɔmɛ ci mɛ yi ŋ gbe le ji. Mawu le wa xomɛvunu nɔ mi!