¹ Ŋ ji mɔ miwo le nya mɔ gbazamɛ hwa sɛnŋsɛnŋ yi ŋ wawa do eta nɔ mi. Ŋ gbe wɛɛwɛ hɛnnɛ do eta nɔ xɔsetɔ ciwo yi ɖe kpɔ ŋ ahan kpɔ o. ² Ŋ wawa nɛnɛ 'hwa nɔ wowoji a ɖɔ koɖo edɔngbegbe, nɔ wa ca do ɖeka koŋ le wowo nɔnɔ lɔnlɔn mɛ. Nɛnɛ ɔ, wa ɖɔ koɖo kankandoji blebu ci yi nyɔnɔnui lɔ mɛ mɔmɔŋje sɔ donɔ amɛ mɛ. Gahunnɔmɛ ɔ, wa sɛnŋ a jeshi enudanŋdo ci yi Mawu sɔ wla lɔ: e yi nyi Kliso lɔ. ³ Eyi mɛ yi Mawu sɔ dɔkunnu ciwo pleŋ yi le enunyanya koɖo enujejeshi sɔ wla do. ⁴ Ŋ nunuɔ enyɔ hunnɔwo nɔ mi, nɔ amɛɖe ŋgbe va sɔ numɛvivi sɔ flu mi o. ⁵ Ci yi ŋɖe le mi gbɔ le gbazamɛ can ɔ, ŋ le kodo mi le gbɔngbɔnmɛ, yi lehan yi mi wawa enuwo do ɖoɖonu do, yi li eke le Kliso lɔ ji xɔxɔse mɛ do jɔjɔ eji nɔŋ. ⁶ Ci yi mi xɔ Yesu Kliso, Axwetɔ lɔ ɔ, mi nɔ agbe le me. Mi do eke egu nyuiɖe, yi a cu miwo ɖekiwo le mɛ. ⁷ Mi kpɔtɔ a nɔnɔ ete gliŋ le xɔse mɛ qhigbe lehan yi enu ci yi wo kplan mi nui do nɛ. Asɔwu ahan ɔ, mi donɔ akpe sugbɔ nɔ Mawu. ⁸ Mi kpɔ nyuiɖe nɔ amɛɖe ŋgbe sɔ xexemɛ nunyanya nyɔ ciwo yi nyi enyɔ tootu ɖo fɛnca nɔ mi, nɔ mia je mɛ o. Enunyanya hunnɔ nɔ anyinɔnɔ do agbetɔwo kɔnuwo koɖo gbɔngbɔnmɛ ŋsɛn ciwo yi wawa edɔ le xexe cɛ mɛ ji. Ɖe nyi Kliso lɔ ji yi e nɔ anyinɔnɔ do o. ⁹ Ɖo Kliso lɔ mɛ yi enu ciwo pleŋ yi le Mawu mɛ ɖo lankpu le, yi ɖo nɔxu domɛ teŋ. ¹⁰ Mi kpɔ enuwo pleŋ yi xɔ blebu le Kliso lɔ ci yi le eta nɔ gbɔngbɔnmɛ ga ɖekpokpoi koɖo gbɔngbɔnmɛ cɛkpakpa ɖekpokpoi shi. ¹¹ Mawu so evo nɔ mi le Kliso lɔ mɛ. Ɖe nyi agbetɔ lɔ yi wo sɔ soi nɔ mi o. Vɔ ɔ, enuvɔn ciwo yi mi wa le gbaza mɛ cɛ yi Kliso lɔ so dɔŋkpe nɔ mi. ¹² Nyao, gacimɛ yi wo le Mawushi nɔ mi ɔ, wo dyi mi koɖo Kliso lɔ, yi mi gbe fɔn koɖyi hɛnnɛ. Ɖo ɔ, mi xɔ Mawu ŋsɛn ci yi fɔin so ekuodi lɔ ji se. ¹³ Miwo ci wo yi ku sasa le gbɔngbɔnmɛ do miwo fɛnwawawo koɖo tɔtɔnɔnyinyi le gbazamɛ nu sa ɔ, Mawu gbe fɔn mi do agbe koɖo Kliso lɔ, yi sɔ miwo fɛnwawawo pleŋ ke mi. ¹⁴ E cucu ehwɛdonɔamɛ wema ci yi wo nɔ anyinɔnɔ do sɛnsɛnɖoɖowo ji, yi ŋwlɛ do mi nu lɔ. E kan wema lɔ do acisoga ji, yi goi. ¹⁵ Ahan yi Mawu xɔ ŋsɛn le gbɔngbɔnmɛ gawo koɖo gbɔngbɔnme cekpatɔwo shi do nɛ. E dɔn wo vayi shigbe ahwagbeji mɛwo nɛ, le amɛjiɖuɖu jijɔ mɛ, yi sɔ wo wa enukpɔkpɔ nɔ eju gbaja lɔ. ¹⁶ E yi na taɖo ɔ, amɛɖe ŋgbe va dodoɔ ehwɛ mi so enu ci yi mi ɖuɖuɔ, ci yi mi nunuɔ alo exweɖuɖu nyɔ ɖe, alo wleci a va 'ji nyɔ ɖe, alo gbɔngbɔngbe nyɔ ɖe nu o. ¹⁷ Enu hunnɔwo pleŋ nyi nɔnɔmɛ nɔ enu ciwo yi le godu yi gbɔgbɔ; vɔ ɔ, Kliso yi nyi lankpu lɔ. ¹⁸ Amɛɖekawo wanɔ enu shigbe wo hwehweɔ wowoɖekiwo nɛ, yi gbe sɛnnɔ cikplɔtɔwo. Wo nanɔ kpɛnkpɛnmɛ gangan ŋtegan ciwo yi wo kpɔnɔ. Kpɔ wo ɖe ɖenɔ susu toto Mawu mɔ ji o. Nɛnɛ wawa dɔ yi wo ɖɔ koɖo egoyiyi. Mi ŋgbe ɖe emɔ nɔ nɛnɛ han mɛwo a va ʒinʒin'ɛ mi ji, yi a dodoɔ ehwɛ nɔ mi o. ¹⁹ Nɛnɛ mɛwo ɖe ca do Kliso ci yi nyi etakpu lɔ nu o. Etakpu lɔ yi trɔ na yi lankpu lɔ pleŋ kpɔnɔ enuɖuɖu, yi kpexukpexu koɖo ŋwlanŋwlan tɔxuwo wadaŋ li do ete sɛnsin. Nɛnɛ ɔ, lankpu lɔ a shinnɔ shigbe lehan yi e dro Mawu do nɛ. ²⁰ Ci yi mi ku koɖo Kliso lɔ, yi to le xexe gbɔngbɔn ŋsɛnwo cɛkpakpa gɔnmɛ ɖee, ŋ ɖe yi jɔ yi mi le agbe nɛnɛ ɔ? ²¹ Wo gbe donɔ ese nɔ mi mɔ: «Ŋgbe sɔ enu cɛ o! ŋgbe tɔnu enu hunnɔ o! ŋgbe tɔ alɔ enu cɛ o!» ²² Ese lɔwo kan enu ciwo yi donɔ ahɛn le wowo hwenu. Agbetɔ gbeɖeɖe koɖo yi nukplanmɛnyɔwo kɛdɛɛ yi wo nyi. ²³ Nyɔnɔnuitɔ ɔ, e zezeɔ le agogbe shigbe mɔ nunyanya le wo mɛ nɛ. Ɖo wo xɔxɔ nuwu so amɛŋtɔ Mawu sɛnsɛn, amɛɖeki sɔsɔhwe koɖo xomɛveve do amɛŋtɔ lankpu nu. Vɔ ɔ, afixɔxɔ ɖekpokpoi ɖe le wo nu o; yi wo ɖe va wanɔ enubuɖe sɔwu mɔ lankpu nudrodrowo ji yi wo donɔ o.