¹ Edro Mawu yi e can e can enyɛ Pɔlu, yi ŋ nyi Yesu Kliso mɛdɔdɔ. Enyɛ koɖo miwo nɔvi Timɔte yi ŋwlɛŋwlɛ wema cɛ. ² Mi ŋwliiŋwliiɛ ɖaɖa miwo nɔvi Kolosetɔ ciwo yi nyi xɔsetɔwo, yi gbe le egbeji nɔ Mawu le Kliso lɔ mɛ. Miwo Da Mawu le wa xomɛvu nɔ mi, yi a na fafa mi! ³ Mi donɔ akpe nɔ Mawu, miwo Xwetɔ Yesu Klisto Edalɔ, yi wanɔ kuifan tɛgbɛɛ do miwo ta. ⁴ Mi wɛɛni nɛnɛ, ɖo wo xo miwo xɔse ci yi mi ɖo nɔ Yesu Kliso nɔ mi, koɖo lehan yi mi ɖo lɔnlɔn nɔ xɔsetɔwo pleŋ do. ⁵ Mi wɛɛ nɛnɛ ɖo emɔkpɔkpɔ ci yi wo drado daɖɛ nɔ mi le jeŋkuimɛ taɖo. Wo nu emɔkpɔkpɔ hunnɔ nyɔ nɔ mi hwecinu yi wo nu nyɔnɔnui nyɔ lɔ, ⁶ eŋɛnyui lɔ nɔ mi; yi e le eku sɛn ɔ le miwo domɛ. Ahan lɔ ke yi e gbe sɛnsɛn eku, kaka yi kɔta do ji le xexe lɔ pleŋ mɛ do nɛ. Nɛnɛ yi e wawa edɔ lɔ le miwo domɛ do nɛ, so hwecinu yi mi se xomɛvunu Mawu tɔ nyɔ, yi jeshii ɖɛ le nyɔnɔnui mɛ teŋ nɛ. ⁷ Epaflasi, miwo kpena vevi, miwo bɔdonutɔ le edɔmɛ, yi kplan enu lɔ mi. E wanɔ edɔ nɔ mi shigbe Kliso lɔ dɔwavi ci yi le egbeji nɔ Mawu nɛ. ⁸ E va xo lehan yi Gbɔngbɔn Kɔkɔɛ zanzan mi do, nɔ lɔnlɔn fɔɖeɖe do nɔ mi. ⁹ E yi na taɖo yi so gbecigbe yi mi se miwo nyɔwo ɔ, mi ɖe mi kuifan wawa do eta nɔ mi gbeɖe o. Mi biɔnɔ Mawu mɔ yi le na nɔ mi a jeshi yi dro blebu le nunya koɖo gbɔngbɔnmɛ ŋɖɛnyanya mɛ. ¹⁰ Gahunnɔmɛ ɔ, mi a sɛnŋ a nɔnɔ agbe ci yi je koɖo Axwetɔ nɔ miwo nu a kpenɔ nii le enuwo pleŋ mɛ. Mi a wawa edɔ nyui hamɛ hamɛwo, yi a sɛnsɛn ɔ eku do ji, yi a gbe shinshin ɔ le Mawu jejeshi lɔ mɛ. ¹¹ Mi biɔɛni mɔ yi le wɛɛ nɔ mi a trɔ ŋsɛntɔwo le enushianu mɛ sɔ toto yi ŋsɛn gangan lɔ mɛ. Nɔ nɛnɛ ɔ, mi a do 'ji, yi a tonɔ tetekpɔ ɖekpokpoi mɛ koɖo ejigbɔnɖɛ. ¹² Mi donɔ akpe nɔ miwo Da Mawu koɖo jijɔ. Ɖo e na yi miwo can mi sundo yi a kpɔ miwo kpamama a xɔ le enu ciwo yi e dradrado daɖɛ nɔ amɛ ciwo yi e can do evo le yi klɛnklɛn lɔ mɛ mɛ ¹³ E hwlɛn mi gan le vinvinmɛ cɛkpakpawo shi, yi kplɔ mi va Eviɛ vevi lɔ fiɔɖuxu mɛ. ¹⁴ Sɔ toto Eviɛ lɔ ji ɔ, Mawu hwlɛn mi gan le enuvɔn jɔjɔmɛ shi, yi mi xɔ miwo nuvɔnwo sɔsɔke. ¹⁵ Kliso lɔ nyi Mawu nɔnɔmɛ ɖaɖa agogbe. Eyɛ yi nyi Evi ŋkɔtɔ le Mawu nuwawawo pleŋ mɛ. ¹⁶ Ɖo ɔ, e yi ji Mawu to yi wa enu ciwo pleŋ yi le jeŋkuimɛ koɖo nyigbanjiwo, enu ciwo wa kpɔ koɖo ŋkuvi dru, koɖo gbɔngbɔnmɛ nuwo; fiɔʒinkpinwo, efiɔɖuɖuwo. Kliso lɔ ji yi Mawu to yi ɖo enuwo pleŋ, yi enu lɔwo pleŋ nyi Kliso lɔ tɔ. ¹⁷ E li do ŋkɔ nɔ enushianu, yi enushianu li to e yi ŋsɛn mɛ. ¹⁸ E yi nyi eta nɔ lankpu lɔ ci yi nyi Mawu halɔ. E yi nyi enuwo tɔtɔmɛ, amɛ ŋkɔtɔ ci Mawu fɔn so ekuwodi keŋ nɔ a sɛnŋ nyinyiɔ ŋkɔtɔ le enushianu mɛ. ¹⁹ Ɖo e dro Mawu mɔ a nɔ Eviɛ lɔ mɛ blebu. ²⁰ Yi a dra yiŋtɔ koɖo xexe lɔ pleŋ gblamɛ do, toto Eviɛ lɔ ji. E todo Eviɛ lɔ ku ci yi eku le acisoga ji, yi kɔ yi hun do nyigban mɛ, yi hɛn fafa va yi koɖo amɛshiamɛ gblamɛ le nyigban ji koɖo le jeŋkuimɛ ²¹ Sasa ɔ, nɛnɛ lɔ ke yi miwo can mi jinjin le Mawu nu nɛ. Mi nyi yi ketɔnɔwo gahunnɔmɛ sɔ toto susu ciwo yi mi wanɔ mɛ. ²² Vɔ ecɛɛ ɔ, e dra miwo koɖo yi gblamɛ do todo Eviɛ lɔ lankpu ci yi nyi enukuku mɛ, sɔ todo eku ci yi Eviɛ lɔ ku mɛ. Mawu wɛɛ ahan yi a sɛnŋ a vayi doasɛ mi le yiɖeki ŋmɛ kɔkɔɛɖe, afɛnɖe ma le nu, alo amɛ ciwo nu yi wo ɖe kpɔ enyɔɖe le yi a gbe nu o. ²³ Ganŋkegan ɔ, mi ɖo a li eke, yi a sɛnŋ le xɔse lɔ mɛ, yi a nɔ anyinɔnɔ do gɔnmɛɖokpe sɛnŋsenŋwo ji. Mi ŋgbe tashi miwo ɖekiwo dɛ nɔ amɛɖe a ɖe susu so hwecinu yi mi se eŋɛnyui lɔ nu o. Eŋɛnyui hunnɔ lɔ yi wo do nɔ enuwawawo pleŋ le jeŋkui gɔnmɛ elɛ nɛ. Eŋɛnyui lɔ dɔwavi yi enye, Pɔlu va trɔ. ²⁴ Eviɛɛ ɔ, ŋ kpɔkpɔ jijɔ so veve ciwo yi ŋ seseɔ do miwo tamɛ nu. Ŋ gbe seseɔ veve lɔ le anyi gbaza mɛ sɔ bɔdo nɔ veve ciwo yi Kliso lɔ se do eta nɔ yi lankpu ci yi nyi Mawu ha lɔ. ²⁵ Eha lɔ dɔwatɔ yi enyɛ, Pɔlu ŋva trɔ shigbe lehan yi Mawu ɖo edɔ lɔ nɔ ŋ, yi na wa nɔ mi do nɛ. Nɔ nɛnɛ ɔ, ma nu yi nyɔ vɛ nɔ amɛwo. ²⁶ E yi nyi enudanŋdonu ci yi Mawu sɔ wla so tɛgbɛɛ do jijimɛwo pleŋ. Vɔ eviɛɛ ɔ, e va ɖii doasɛ nɔ amɛ ciwo yi e can do akpo ɖɛnɔ yiɖeki. ²⁷ Mawu ji mɔ ye a doasɛ dɔkunu ciwo yi le yi nudanŋdonu hunnɔ lɔ mɛ koɖo kɔkɔ gangan ci yi le nu le jukɔn manyi yuɖatɔwo domɛ. Enudanŋdo lɔ yi nyi mɔ Kliso lɔ ci yi le mi me ɔ, e yi nyi emɔkpɔkpɔ nɔ Mawu klɛnklɛn lɔ le mi mɛ. ²⁸ Kliso lɔ nyɔ yi miwo nunuɔ nɔ amɛwo. Mi zannɔ enunyanya ci pleŋ yi Mawu na mi, yi sɔ kplankplan enu amɛshiamɛ. Nɛnɛ ɔ, mi a wɛɛ yi amɛshiamɛ a nyɔ vɛ le Kliso lɔ mɛ. ²⁹ E yi na taɖo yi ŋ le agbla je ɔ, yi wawa ahwa sɛnŋsɛnŋɖe sɔ to Klisto lɔ ŋsɛn ci yi wawa edɔ le ŋmɛ ji.