¹ Sɔlu xɔ egbe mɔ wo ɖe wu Etiyɛli. Gbenɔgbe lɔ ke ɔ, wo tɔ yumɛ cici nɔ Mawu ha lɔ sɛnŋsɛnŋɖe le ʒeluzalɛmu. Eyi xɔsetɔ lɔwo kpu gbahlɛn yi jeŋkɔ ʒude koɖo samali kanwo mɛ. Dɔla lɔwo ɖeka yi kpɔtɔ ci ʒeluzalɛmu. ² Amɛ ciwo yi donɔ bubu Mawu nu domɛtɔ ɖeka wo sɔ Etiyɛnu cɔ sɔ yi ɖyi yi fiin nyuiɖe. ³ Sɔlu yɛ le egblado ɔ, mɔ ye agban Mawu ha lɔ. E ɖonɔ axwemɛ axwemɛ wo yi le nɔ xɔsetɔwo le ŋsumɛ le nyɔnumɛ yi sɔ wo don gakpamɛ. ⁴ Amɛ ciwo yi gbahlɛn le ʒeluzalɛmu lɔwo todo ɔ afi, afiwo yi dodo ɔ eŋɛnyui lɔ yi yikɔ. ⁵ Filipu yi samali jugan mɛ yi xo nuxu sɔso kliso lɔ nu nɔ wo koɖo axwa. ⁶ Ci yi eju lɔ mɛ tɔwo kpu se enyɔ ciwo yi Filipu nunu ɔ, yi gbe jeshidu ciwo yi e wawa ɔ, wo sɔ egbe ɖo ɖekɛ yi xɔ enyɔ lɔwo. ⁷ Ɖo ɔ, gbɔngbɔn vɔnvɔn dodo ɔ, axwa sɛnŋsɛnŋɖe yi toto ɔ le amɛ sugbɔ mɛ. Ekplɛxotɔwo tɔ zɔnlin zɔnzɔn yi ebutɔntɔwo can gbe tɔ zɔnlin zɔnzɔn nyuiɖe. ⁸ Enu lɔwo jɔ eji nɔ ejulɔ mɛtɔwo sugbɔ. ⁹ Ŋsu ɖeka le jugan lɔ mɛ sasa xoxoxo, yi wo yɔɛni mɔ simɔ. E wa nɔ maʒiki nu wanawo. Samali jukɔn lɔ kpɔɛni yi eji nɔ eŋ nii, ɖo e nu mɔ eɖe yi nyi ŋsɛntɔ. ¹⁰ Samalitɔwo pleŋ so ɖevi ji kaka sɔ je mɛganxoxuwo ji ɔ, wo eto yi, yi nu nɔ mɔ:« Mawu ŋsɛn ci yi wo yɔnɔ mɔ ŋsɛn gngan Mawu tɔ le eyɛ shi. ¹¹ Wo ɖonɔ eto yi, ɖo maʒikinu lɔwo tɔ eŋ jiji nɔ wo yɛ ɔ, e jiji. ¹² Vɔ ci Filipu va do eŋɛnyui lɔ nɔ wo sɔso Mawu fiɔ ɖuxu lɔ koɖo amɛ ci yi yesu kliso nyi nu yi wo xɔ enyɔ lɔ ji se ɔ, wo le Mawushi nɔwo le ŋsu mɛ; le nyɔnu mɛ. ¹³ Simɔ lɔ ŋtɔ can xɔ enyɔ lɔ ji se wo le Mawwushi nii yi e kplɔ Filipu so. Ci yi e kpɔ jeshidu koɖo enujiŋ gangan ciwo Filipu wawa ɔ, wo ji eŋ nii. ¹⁴ Dɔla ci wo yi le ʒeluzalɛmu se mɔ samalitɔwo xɔ Mawu nyɔ lɔ ji se ɔ, wo ɖo Piyɛ koɖo ʒan ɖaɖa wo gbɔ. ¹⁵ Ci yi wowo va yi ɖo ɔ, wo do egbe ɖaɖa do eta nɔwo nɔ wo a xɔ gbɔngbɔn kɔkɔɛ. ¹⁶ Ɖo ɔ, gbɔngbɔn kɔkɔɛ de dyiva amɛɖe ji le wo mɛ hɔɖe go. Mawushi ɖekɛ yi wo le nɔ wo le Axwetɔ Yesu kliso nyikɔ mɛ. ¹⁷ Eyi Piyɛ koɖo ʒan sɔ alɔ dado wo ji yi wo xɔ gbɔngbɔn kɔkɔɛ lɔ. ¹⁸ Ci yi Simɔ kpɔ mɔ nɔ dɔla sɔ alɔ dado xɔsetɔ lɔ wo ji, wo xɔxɔ gbɔngbɔn kɔkɔɛ ɔ, e na eho Piyɛ koɖo ʒan, yi nu nɔ wo mɔ:« Mi na ŋsɛn hunnɔ enyɛ can. ¹⁹ Gahun nɔ mɛ ɔ, nɔ ŋ sɔ alɔ dado amɛɖe ji ɔ, a xɔ gbɔngbɔn kɔkɔɛ.» ²⁰ Vɔ ɔ, Piyɛ koɖo ʒan nu nii mɔ:« Wɔ koɖo eho tɔo ɖe trɔn ɖo e bu mɔ ye a sɛn eŋ xwle Mawu nu nana koɖo eho.» ²¹ Enu ɖe kan oo le enyɔ cɛ mɛ go. Ɖo ɔ, eji tɔo ɖe me le Mawu gbɔ. ²² Ci yi e le nɛnɛ ɔ, tashi susu vɔin hunnɔ yi a ɖe kuku nɔ Mavɔmavɔtɔ lɔ, taŋfɔin ɔ, a sɔ ke o. ²³ Ɖo ɔ? ŋ Kpɔ mɔ ŋhwan koɖo nuvɔn bla wu do ete.» ²⁴ Eyi Simɔ nu nɔ Piyɛ koɖo ʒan mɔ:« Miwoŋtɔwo ɖe do egbe ɖaɖa do eta nɔ ŋ, nɔ Mavɔmavɔtɔ ŋ gbe lɔn nɔ enyɔ ciwo mi nu hunnɔwo domɛtɔ ɖe ŋgbe va jɔ do ŋ ji. » ²⁵ Ci yi Piyɛ koɖo ʒan nu Mavɔmavɔtɔ nyɔ nyui lɔ nii ɖe gbɔ ɔ, wo trɔ kpe ʒeluzalɛmu. Le emɔ ji ɔ, wo le Mavɔmavɔtɔ ŋɛnyui do ɔ le samali kɔxwi sugbɔwo mɛ, gbɔxwe yi ɖo. ²⁶ Mavɔmavɔtɔ dɔla ɖeka nu nɔ Filipu mɔ:« Shite a kpe ɖaɖa afɔde ɖaa, a sɔ emɔ ci yi so ʒeluzalɛmu yi yi Gaza jugan mɛ. Kpɔ amɛɖekpokpo ɖe le emɔ lɔ ji » ²⁷ Eyi Filipu so ɖedo zeɖeka. Hunnɔtɔ ɔ, ŋsutata Etiwopi fiɔdɔwatɔ gangan ɖeka vayi sɛn Mawu le ʒeluzalɛmu. E yi kpɔnɔ kandashi nyɔnu ci yi ɖu efiɔ le Etiwopi dɔku nuwo pleŋ ji. ²⁸ E trɔ so ʒeluzalɛmu lɔ yi vayikɔ axwe, yi n'anyinɔnɔ do ahwahun ɖeka ji yi le Mawu ŋɛdotɔ Ezayi wema hlɛn ɛn sɛnsin ɖe. ²⁹ E yi gbɔngbɔn kɔkɔɛ nu nɔ Filipu mɔ:« Ɖe eblɛ a xotɔ ahwahun hunnɔ. ³⁰ Filipu shi eju yi xotɔɛ, yi se yi Etiwopitɔ lɔ hlɛnhlɛn enu le Mawu ŋɛdotɔ Ezayi wema mɛ. Eyi Filipu biɛ se mɔ:« E se enu ci yi e hlɛnhlɛn gɔnmɛ a? ³¹ Eyi ŋsu lɔ ɖonu nii mɔ:« Le na wɛɛ a se gɔnmɛ nii nɔ amɛɖe ɖe drii nɔ ŋ? » Eyi e yɔ Filipu mɔ yi ɖe ɖo ahwahun lɔ mɛ yi a va nɔ axa nɔ eye. ³² Wo ŋwlɛ do fi ci yi ehlɛnhlɛn le wewa lɔ mɛ mɔ:« Amɛ lɔ le shigbe lɛngbɔ ci yi wo kplɔ yikɔ wuwugbe nɛnɛ. E bɔ enu kplii shigbe lɛngbɔvi ci wo ɖeɖɛ efun kpɔtɔ le gotu nɔ nɛnɛ yi ɖe ke enu yi fan kpetii o. ³³ Wo do ŋkpɛn yi, vɔ kpɔ wo ɖe so ɖe so kojo jɔjɔɛ nii. Ci yi wo gu agbe e yitɔ le xexɛɛ ɖe, mɛ e yi a sɛn eŋ xo nuxu sɔso yi jijimɛviwo nu?» ³⁴ Etiwopi fiɔhadɔwatɔ lɔ ɖe kuku nɔ Filipu yi biɛ se mɔ:« Mɛ ye nu yi Mawu ŋɛdotɔ Ezayi xoxoɔ nuxu so nɛnɛ ɔ? yiŋtɔ nu yɔ alo amɛ bu nu?» ³⁵ Eyi Filipu xɔ nuxu, yi nu yesu ŋɛnyui lɔ nii sɔ to enyɔ ci yi le enɔtɔxu nɔ ezayi wema lɔji. ³⁶ Wo le emɔ lɔ ji yi yikɔ yi va yi ɖo afiɖeka ci yi eshi xɔ do. Efiɔ hadɔwatɔ lɔ nu nɔ filipu mɔ:« Eshi ke. Ŋɖe yi kpɔtɔ yi wo a le Mawushi nɔ nɔ ŋ ɔ? » ³⁷ Filipu ɖo nu nii mɔ:« Nɔ e xɔ yesu ji se koɖo awu ji blebu vɔ, wo a le Mawushi nɔ wu dru » Eyi ŋsu lɔ ɖonu nii mɔ:« ŋ xɔɛ ji se mɔ Yesu kliso yi nyi Mawu eviɛ lɔ» ³⁸ Le e yi godu ɔ, e dɔ yi wo ɖo ete ahwahun eyi Filipu koɖo ŋsu lɔ ɖyi yi ɖo eshi lɔ mɛ, yi Filipu le Mawushi nii. ³⁹ Ci yi wo to eshi lɔ mɛ ɔ, Mavɔmavɔtɔ gbɔngbɔn kɔ Filipu le ŋsu lɔ gbɔ yi d'e gbe kpɔɛ, vɔ ɔ, ŋsu lɔ le emɔ ɖedo ⁴⁰ Filipu yɛ ɔ, kaka Azotosu jugan mɛ yi yɛ vayi fo todo yi jeŋkɔ sezale jugan mɛ ɖaa. Nɔ e ɖo jugan ɖe mɛ ɔ, e nunɔ eŋɛnnyui lɔ le emɔtɔxu. Nɛnɛ e wɛwɛ kaka vayi ɖo nɛ