¹ Avɔsatɔ gangan nu nɔ Etiyɛnu mɔ:« Nyɔnɔnyui yi nyi enyɔ ci yi wo nunuɔ so wu wu a? ² Eyi Etiyɛnu ɖonu mɔ:« Fofonyɛwo koɖo edanyɛwo mi ɖo eto yi a se enyɔ ci yi na mu. Gbɔxwe yi miwo tɔgbi Ablahamu a hun le Mezopotami a vayi ci halanu ɔ, Mawu kanfukanfu ɖe nɔ yiɖeki doasɛ nii, ³ Yi nu nii mɔ: " hun le eju tɔo koɖo awu xomu mɛ keŋ a yi ci eju ci yi na doasɛ nɔ wu mɛ ⁴ Eyi Ablahamu so le kaluɖe kan mɛ yi va yi ci halanu. Ci yi edalɔ ku godu ɔ, Mawu na yi e hun le halanu yi va yi ci fi ci yi mi va le egbɛ ɛ. ⁵ Gahun nɔ mɛ ɔ, Mawu ɖe kan nyigban afɔgba ɖeka kpetii le nyigban lɔ nu nɔ Ablahamu mɔ yi a nyi yiŋtɔ tɔ go. Vɔ gahunnɔ mɛ ci yi Ablahamu ɖe wa eviɖe can ɔ, Mawu ɖo egbe nii mɔ ye a sɔ nyigban lɔ na yi koɖo yi jijimɛviwo yi nɔ yi va ku can ɔ, yia nyi yi jijimɛviwo lɔwo tɔ tɛgb€€. ⁶ Enyɔ ci yi Mawu nu nɔ Ablahamu lɔ yi nyi mɔ awu jijimɛviwo a va yi ci mɛdru nyigban ji le eju ɖeka mɛ. Wo a sɔ wo wa hwashi yi a ɖe efun nɔ wo kaka sɔ na exwe sanŋdi amɛnɛ. ⁷ Vɔ ɔ, e nyɛ Mawu yi a ɖo kojo koɖo jukɔn ci yi a sɔ woo wa hwashi lɔ. Le eyi godu ɔ, wo a so le enɔtɔxo yi a va sɛnŋ le elɛ. ⁸ Le enyɔ hun nɔ godu ɔ, Mawu ɖu ezo koɖo Ablahamu yi nu nii mɔ nɔ wo ji evi le xomu ɖe mɛ ɔ, woɖo a so evo nii a sɔ doasɛ mɔ ye ɖu ezo kkoɖo eyɛ Ablahamu. Eyi na taɖo ci yi woji Izaki ŋkeke amɛnyi mɛ ɔ, Ablahamu so evo nii. Izaki yɛ va so evo nɔ ʒakɔbu yi ʒakɔbu yɛ va so nɔ miwo tɔgbi wive lɔwo. ⁹ Tɔgbi lɔwo hwan ŋ koɖo wowo nɔvi ʒozɛfu yi sɔ sa hwzshi nɔ wa hin yi Eʒiputu. Vɔ ɔ, Mawu le koɖo. ¹⁰ Yi ɖii ti le eyi fun kpekpewo mɛ. Mawu lɔ na ŋununyanya yi, eyi ni je eŋ nɔ Falawɔn, Eʒiputu fiɔ yi yɛ sɔ ɖo eʒiputu ju lɔ pleŋ koɖo efiɔxwejikpɔtɔ. ¹¹ Ecɛ yɛ ɔ, shive va to le efishafi le Eʒiputu koɖo kanaan kan mɛ. Efukpekpe va vugan Miwo tɔgbi lɔ wo ɖe gbe kkpɔ enuɖe yi a ɖu. ¹² vɔ ci yi Ʒakɔbu va se mɔ eliku le eʒiputu ɔ, e va dɔ miwo tɔgbi lɔwo ɖaɖa yi wo yi;yi gbɔ. ¹³ Zevetɔ ci wo va yi ɔ, ʒozefu va doasɛ yi ɖeki nɔ wo. Eyi Falawɔn va nya xomu ci mɛ yi ʒozɛfu so. ¹⁴ Le e yi godu ɔ, ʒozefu va dɔ fofo ɔ lɔwo mɔ; wo ɖe yi kplɔ yedaye ʒakɔbu koɖo xomu lɔ kpu vɛ nɔ eye. Wo pleŋ lɔwo nyi agbetɔ eka howi hawo hoatɔn ¹⁵ Nɛnɛ yi ʒakɔbu vayi ci Eʒiputu so mɛ. ¹⁶ Yi nɔ e ɖe ku ɔ, wo sɔ nɔ wowo cɔ yi nɔ sishɛmu jugan mɛ, yi vayi ɖyii nɔ do yɔdu ci yi Ablahamu xwle le hamɔ viɛwo shi mɛ. ¹⁷ Ci yi ega xo nɔ Mawu yi a wa do egbe ci yi e ɖo nɔ Ablahamu ji ɔ, Jukɔn lɔ jijiɛ do ji yi susuɔ gbɔ le Eʒiputu. ¹⁸ Vɔ ɔ, efiɔ ɖeka va xɔ ʒinkpin le Eʒiputu, kpɔ yɛ ɖe jeshi ʒozɛfu ɖɛ sasa. ¹⁹ E yi flu miwo jukɔn lɔ, yi ɖe efun nɔ miwo tɔgbiwo yi gbe ʒin amɛwo ji nɔ wo a shi gbe wowo viwo ɖɛ nɔ wo ŋgbe ci agbe o. Hwenɔ nu yi wo ji Mɔyizi do nɛ. ²⁰ Mɔyizi nyi evi nyɔnyɔ ɖeka le ŋmɛ nɔ Mawu. Wo hiin le edalɔ xwemɛ sɔ na wleci amɛtɔn. ²¹ Eyi edalɔ kodo enɔlɔ wo tashii ɖɛ, yi Falawɔn eviɛ nyɔnuvi ɖeka va kpɔɛ yi sɔɛ yi hiin shigbe yiŋtɔ vi nɛnɛ. ²² Mɔyiziɔ, wo hiin le Eʒiputuwo nunyawo pleŋ mɛ. E ɖo ŋsɛn le nuxuxoxo koɖo e nu wawa mɛ. ²³ Ci yi Mɔyizi ɖo exwe eka vɔ ɔ, susu va va nii mɔ ye a yi ji yenɔvi ye Israyɛliviwo kpɔ. ²⁴ Ci e kpɔ yi Eʒiputu ɖeka le efun ɖee ɔ nɔ Israyɛli ɖeka ɔ, e ji mɔ ye a hwlɛn eta nii, yi wu Eʒiputu lɔ yi sɔ ɖe ehlɔn nii. ²⁵ E bubu ɔ mɔ, ye nɔvie lɔ a mɔŋjemɛ mɔ ji yi Mawu jiji a to eye ji a hwlɛn eye wo gan, vɔ kpɔ wo ɖe se gɔnmɛ. ²⁶ E yi ŋkegbu ɔ, Mɔyizi va kpɔ Israyɛli ɖeɖewo wawa evu. Yi e ji mɔ ye a ṣa wo, yi nu wo mɔ:" Exlɔ nyɛ wo, nɔviwo mi nyi, ŋɖe jɔ yi ni wawa evu koɖo emiwo nɔnɔwo ɔ? ²⁷ Vɔ ɔ, mɛci yi xoxo ɔ nɔviɛ cucu mɔyizi ɖaɖa yi nu mɔ; Mɛ yi sɔ wu ɖo ega koɖo kojoɖotɔ nɔ mi ɔ? ²⁸ Ji e ji jiɛ mɔ ye a wu enyɛ shigbe le han yi e wu Eʒiputu lɔ do esɔ nɛnɛ a? ²⁹ Ci yi Mɔyizi se nyɔ hunnɔwo ɔ, e shi yi va yi ci Madiyanu ju mɛ. E nɔ enɔtɔxu shigbe mɛdru nɛnɛ kaka yi ji evi amɛve. ³⁰ Le exwe eka godu ɔ, dɔla ɖeka va ze do ji to do egbejɔɛ ɖeka ci yi bibiɛ ezo le zoxu saklisakli ci yi le axa nɔ shinayi kpo mɛ. ³¹ Mɔyizi kpɔɛ eyi e ji eŋ nii. Vɔ ci yi e te yi kɔ, yi a yi kpɔɛ nyuiɖe ɔ, Mavɔmavɔtɔ gbe yi ɖyi va enɔlɔ mɔ: " Emyɛ yi nyi tɔgbiono Ablahamu, Izaki kkoɖo ʒakɔbu wo Mawu. ³² Eyi vɔnvɔn le Mɔyizi yi e tɔ hunhun hun kaka kpɔ d'e gbe edɔn yi le ŋkuvi do dɔla lɔ nu. ³³ Eyi Mavɔmavɔtɔ nu nii mɔ: " Ɖe fɔkpawo, ɖo ɔ, texwe ci yi e le ɔ, nyigban kɔkɔɛ yi e nyi. ³⁴ Ŋ kpɔ lehan yi wo ɖeɖe ɔ efun nɔ anyi jukɔn do le Eʒiputu nyiɖe, yi sese ɛ edɔnyinyi wo tɔ, e yi na taɖo yi ŋ ɖyiva mɔ na va ɖii ti le mɛ. ³⁵ Mɔyizi hunnɔ yi Israɛyli gbe yi nu nɔ mɔ:" mɛ e yi sɔwu ɖo ega koɖo kojoɖotɔ ɔ?. Vɔ ɔ, e yi lɔ ke yi Mawu va dɔ ɖaɖa todo ɖeka ji yi sɔ ɖo ega nɔwo, e hwlɛn wo gan le Eʒiputuwo shi. Dɔla lɔ doasɛ yiɖeki nɔ Mɔyizi le egbejɔɛ ɖeka mɛ. ³⁶ Mɔyizi yi kplɔ Israyɛliviwo ti le Eʒiputu yi wa enudanŋdonuwo koɖo jeshiduwo le eju lɔ mɛ, le klogbu xu lɔ tu, le zoxu sakli sakli lɔ mɛ sɔna exwe eka. ³⁷ Mɔyizi lɔ ke yi nu nɔ Israyɛliviwo mɔ;" Mawu a na yi eyi ŋɛdotɔ ɖeka a to so miwo xomu mɛ yi a dɔɛ ɖaɖa mi shigbe lehan yi e dɔ enyɛ ɖaɖa nɛnɛ. ³⁸ Hwecinu yi jukɔn lɔ bɔdo zoxu sakli sakli mɛ ɔ, Mɔyizi li hwenɔ nu. E yi lɔ yi nɔ gblamɛ nɔ miwo tɔgbiwo koɖo dɔla lɔ le shinayi kpo ji, yi xɔ agbe nyɔwo so gbɔ yi va nu nɔ mi. ³⁹ Vɔ ɔ, miwo tɔgbiwo ɖe ji mɔ yewo a ɖo eto enyɔ lɔwo, yi gbii. Eʒiputu trɔtrɔ yi, le eji mɛ nɔ wo. ⁴⁰ Wo nu nɔ Ahalɔn mɔ:« Li vaju ciwo yi a kplɔ mi nɔ mi. Ɖo Mɔyizi hunnɔ ci yi kplɔmi ti so Eʒiputu ɔ, mi ɖe nya ŋci yi vatɔ wɛwɛ cucucu ⁴¹ Eyi le ŋkeke hunɔ wo ji ɔ, wo mɛ nyibu vi ɖeka nɔ wowoɖekiwo, sa avɔ nii, yi kpɔ jijɔ da alɔnu dɔ ci yi wo wa koɖo wowo ŋtɔwo lɔwo wa nu. ⁴² Eyi Mawu ɖe ekɔ le wo nu, yi tashi wo yi wo sɛnsɛn jeŋkuimɛ wleciwo. Nɛnɛ yi Mawu ŋɛdotɔwo nui yi wo ŋwlii do wema mɛ daɖɛ mɔ:" Israyɛli jukɔn, ci mi va exwe eka le zoxu saklisakli mɛ ɖe, enyɛ Mawu yi mi wuwu ɔ elanwo yi sɔ sasa avɔ nɔ a? ⁴³ Ɖ'e nyi kpajɛxɔ mi ji nɔ voju Mɔlɛki ci mi yi yi sɛn ba?. Ɖ'enyi mɛ yi mi mɛ voju hlefanu wlecivi yi sɛ ba? Mi doŋdo nɔ enu mɛmɛ hunnɔwo! E yi na taɖo ɔ, na dɔ yi mi a nyi mɛdru le nyigban buwo ji le kaka Babilɔnu godu ɖaa. ⁴⁴ Kpajɛxɔ ci ɖonɔ ŋwi enu ji nɔ miwo tɔgbiwo mɔ Mawu li koɖo wo, lɔ le wo shi so kaka xoxoxo le zoxu saki mɛ, Nɔnɔmɛ ci yi Mawu doasɛ yi do Mɔyizi ji wo wɛɛ do. E cui shigbe lehan yi Mawu nu mɔ yi le cui do nɛnɛ. ⁴⁵ Kpajɛxɔ cɛ ci miwo tɔgbiwo xɔ so wowo dawo gbɔ, le wo shi le gacimɛ yi ʒozuwe kplɔkplɔ wo yi wo kɔ eju lɔ le jukɔn ci yi Mawu doŋkɔ yi nya sii nɔ wo a shi. E nɔ enɔ lɔ kaka na Davidi gamɛ. ⁴⁶ Davidi nu jɔnɔ eji nɔ Mawu. Eyi na taɖo yi e biɔ egbe yi mɔ ye a cu axwe kɔkɔɛ ɖeka nɔ ʒakɔbu jijimɛviwo. ⁴⁷ Nɔ ɔ, salamɔ yi va cu axwe nɔ Mawu. ⁴⁸ Ganŋkegan kpɔ Mawu ci yi kpe enuwo keŋkeŋ ji ɖe nɔnɔ exɔ ciwo yi egbetɔwo cu mɛ, shigbe lehan yi Mawu ŋɛdotɔ nui daɖɛ do nɛnɛ mɔ: ⁴⁹ " Mavɔmavɔtɔ nu mɔ: jeŋkui yi nyi anyi fiɔʒinkpin yi nyigban nyi anyi fɔɖɔjinu. Exɔ hinɖe han ŋmɛ yi mi a sɛn eŋ cu nɔ ŋ? Fiŋgbe yi na sɛn ŋ xɔ gbɔngbɔn le? ⁵⁰ D'e nyi anyi lɔnudɔwawawo yi nyi hunnɔwo kpu ba? ⁵¹ Miwo etosɛntɔwo, ŋtashinwo koɖo Mawugbemasetɔ wo, mi fɔnnɔ egu tɛgbɛɛ do gbɔngbɔn kɔkɔɛ ji shigbe lehan yi miwo tɔgbiwo wɛdo vayi nɛnɛ. ⁵² Mawu ŋɛdotɔ ci yi miwo tɔgbiwo ɖe ci yumɛ nɔ vayi ɔ? Wo wu amɛ ciwo yi nu ɖaɖɛ mɔ amɛjɔjɔɛ kuɖeka lɔ le emɔji gbɔgbɔ, e yi egbɛ ɔ amɛjɔjɔɛ lɔwo yi miwo sɔ doasɛ nɔ amɛwo yi wo wii. ⁵³ Miwo ciwo yi xɔ Mawu se lɔwo sɔso sɔlawu gbɔ, taŋ, yi gbe mɔ yewo d'a wa do ji o!» ⁵⁴ Ci yi amɛ ciwo yi le kojoɖoxu lɔwo se Etiyɛnu nyɔ cɛwo ɔ, xomɛshi wo, yi wo tɔ aɖukli ɖuɖu do Etiy€nu nu. ⁵⁵ Vɔ ɔ, ci yi gbɔngbɔn kɔkɔɛ ɖɔ eyɛ ɔ, yɛ ɖe ekɔ kpɔ eji, yi kpɔ Mawu klɛnklɛn koɖo Yesu ɖaɖa yi yesu le ete le ɖushimɛ nɔ Mawu. ⁵⁶ Eyi e nu nɔ amɛwo mɔ:« ŋ kpɔ jeŋkui le nuvo yi amɛ agbetɔvi lɔ le ete le ɖushimɛ nɔ Mawu.» ⁵⁷ Eyi amɛ lɔwo do axwa sɛnŋsɛnŋɖe yi cu eto yi wo pleŋ lun ehwan do Etiyɛnu ji yi nyii tii le jugan lɔmɛ; yi tɔ ekpe xowii nɔ a ku ⁵⁸ Enu lɔ tɔxukpɔtɔwo ɖe wowo wuwo daɖo ɖajɛvi ɖeka ci yi wo yɔnɔ mɔ sɔlu gbɔ. ⁵⁹ Hwecinu yi wo dɔdɔ ekpe lɔ yi ɔ, Etiyɛnu do egbe ɖaɖa mɔ:« Axwetɔ Yesu xɔ anyi gbɔngbɔn!». ⁶⁰ Eyi e je kloji yi do axwa mɔ:« Axwetɔ ŋgbe dro enuvɔn cɛ gban nɔ wo o!». Enyɔ lɔ yi e nu ɖegbɔ vɔ ɔ, yi ku .