¹ Le ŋkeke hunnɔwo ji ɔ, nukplaviwo va susuɔgbɔ do ji, yi yuɖatɔ ciwo yi se glɛkigbe le enyɔ to ɔ, nɔ mɛciwo yi Eble gbe do ɔ mɔ nɔ wo le enuɖuɖu ma a gbeɖeka duu ɔ, wo ɖe nanɔ ye wo kposuwo nuiɖe go. ² Eyi dɔla wive lɔwo va yɔ nukplavi lɔwo yi nu nɔ wo mɔ:« Ɖ'e nyɔ mɔ mi a tashi Mawu nyɔ nunu ɖɛ yi a vayi mama enuɖuɖu go. ³ E yi na ta ɖo ɔ, nɔvinyɛwo, mi can ŋsu amadrɛ le emiwonɔnɔwo mɛ, yi a sɔ edɔ hunnɔ doashi nɔ wo. Ŋsu lɔwo ɖo a nyi amɛ ciwo yi a nyi amɛ jɔjɔɛ nyuiɖewo, yi anyi amɛ ciwo yi gbɔngbɔn kɔkɔɛ ɖɔ koɖo amɛ ciwo yi nta ŋɖɛ. ⁴ Miwo yɛ ɔ, liwo a sɔ miwo gamɛwo jo nɔ gbedoɖa wawa koɖo Mawu nyɔ nunu dɔ koŋ.» ⁵ Enyɔ ci yi wo nu lɔ jɔ eji nɔ bɔbɔ lɔ kpu. Eyi wo can Etiyɛnu amɛ ci yi xɔse koɖo gbɔngbɔn kɔkɔɛ ɖɔ nyuiɖe, Filipu, Plokɔ, Nicanɔ, Timɔ, Pamɛnasu koɖo Nicola ci yi nyi Antiwɔsgitɔ ci yi ɖe nyi xɔsetɔ sa gbɔxwe va ɖo Yuɖatɔwo mɛ. ⁶ Wo doasɛ amɛ lɔwo nɔ dɔla lɔwo yi wo do egbe ɖaɖa eta nɔ wo yi sɔ alɔ do etanɔwo ⁷ Mawu nyɔ lɔ kakaka do ji jikɔ. Nɔkplavi wo va susu ɔ gbɔ do blablaŋ le ʒeluzalɛmu yi avɔsatɔ Yuɖatɔwo sugbɔ wo va xɔxɔ Yesu ji se. ⁸ Etiyɛnu ɖɔ koɖo xomɛvu koɖo ŋsɛn yi le enudanŋdinuwo koɖo jeshidu gangan wo waa le jukɔn lɔ domɛ. ⁹ Mawusɛnxu ci yi nyi hwashi ciwo yi le vovo mɛ wo tɔxu yi wo nɔnɔ. Le wo mɛ ɔ, ɖekawo nyi yuɖatɔ ciwo yi so silɛnu koɖo Alɛsandri jugan wo mɛ; ɖekawo nyi Yuɖatɔ ciwo yi so silisi koɖo Azi kanwo mɛ. Wo pleŋ tɔ enyɔ dɔndɔn kpɔ koɖo Etiyɛnu. ¹⁰ Vɔ kpɔ wo sɛnŋ ɖu ŋnyanyakoɖo gbɔngbɔn kɔkɔɛ ciwo yi e sɔ xoxo ɔ nuxu lɔ ji. ¹¹ Eyi wo ble ŋsu ɖekawo yi wowo va nu mɔ:« Mi se yi e gbagbali Mɔyizi koɖo Mawu le nuxuwo mɛ. ¹² E yi wo dodo ɔ ezo nɔ jukɔn lɔ koɖo mɛganwo koɖo esedɔwatɔwo yi wo va va Etiyɛnu gbɔ yi tii yi kplɔɛ yi sɛnsɛn kojoɖoxu. ¹³ Wo ji kunɖetɔwo yi kplɔ sɔyi kojo ɖoxu lɔ hɛnnɛ yi wo va yi nu mɔ: « Enyɔ wo yi ŋsu hunnɔ nu nɔ le elɛ yi sɔ gbalinɔ miwo Mawuxwe kɔkɔɛ lɔ koɖo ese ciwo yi Mawu do todo Mɔyizi ji ! ¹⁴ Ɖo ɔ, mi se yi e nu nu ɔ mɔ Yesu ci so Nazalɛti jugan mɛ lɔ a va gban Mawuxwe cɛ lɔ, yi a trɔ akɔnu ci yi Mɔyizi kpla miwo. ¹⁵ Eyi amɛshamɛ ci yi le sɛnsɛn kojoɖoxu gloglo ɔ Etiyɛnu kpɔ yi va kpɔkpɔ mɔ e yi ɛ kɔ shigbe dɔla ɖowo ŋmɛ nɛnɛ.