¹ Piyɛ koɖo Ʒan gbe kpotɔ le nuxu xo ɔ nɔ jukɔn lɔ gbɔxwe yi avɔsatɔwo, Mawuxwe ji kpɔ ga koɖo Sadukitɔ wo va kɔɖɛ. ² E ve wo nu sugbɔ mɔ dɔlawo kplakpla enu jukɔn mɔ Yesu fɔn so ekuwodi, yi sɔ so yɛ ji ɔ, amɛkukuwo can a va fɔn so ekuwodi. ³ Eyi wo le wo sɔ yi cu do gakpamɛ kaka eŋ ke; ɖo ɔ, fiɛshi ɖo vɔ. ⁴ Vɔ ɔ, wowo sugbɔtɔ le mɛciwo yi se enyɔ ci yi Piyɛ nu lɔ wo mɛ yi trɔ xɔsetɔ .Wo su gbɔ shigbe kotokun amatɔn (5.000) han nɛ. ⁵ Ŋkegbu ɔ, Yuɖatɔwo sɛnsɛn gawo , mɛganwo koɖo esedɔwatɔwo va bɔdo Ʒeluzalɛmu. ⁶ Le wo wo domɛ ɔ, wo a kpɔ Hani avɔsatɔ gangantɔ, Kayifu, Ʒan, Alɛsandru koɖo amɛ ciwo pleŋ yi le avɔsatɔ gangan lɔ xomumɛ. ⁷ Wo dɔ yi wo kplɔ dɔla lɔwo va ŋkɔ nɔ wo; yi biɔ wo se mɔ : «Ŋsɛn hin ɖe yi mi sɔ da edɔ nɔ ŋsu xo ekplɛ lɔ ɔ ? Mɛ e nyikɔ mɛ yi mi da edɔ hunnɔ le ɔ ?» ⁸ Eyi Piyɛ ci mɛ yi Gbɔngbɔn Kɔkɔɛ ɖɔ, ɖonu nɔ wo mɔ: «Jukɔn lɔ fiɔhawo koɖo mɛganwo, ⁹ mi wa enu nɔ ŋsu xo ekplɛ ɖeka, yi miwo va biɔbiɔ se egbɛ mɔ le e yi egando mɛ? ¹⁰ Mi pleŋ koɖo Israyɛli jukɔn lɔ pleŋ ɖe nya mɔ Yesu Kliso ci yi so Nazalɛti juganmɛ ɔ, ŋsɛn ɖeka le eyi nyikɔ mɛ. Ŋsɛn hunnɔ yi mi sɔ da edɔ nɔ ŋsu hunnɔ ci yi le ete le ŋkɔ nɔ mi nɛ. Mi kan Yesu hunnɔ do acisosa ji, ganŋkegan ɔ, Mawu fɔin sɔ so ekuwodi. ¹¹ Eyɛ yi nyi ekpe ci miwo exɔcutɔwo gbe, yi eva trɔ ekpe vevi, zogojikpe. ¹² Yesu lɔ ɖekɛ kpaŋ yi hwlɛn nɔ amɛgan. Ɖo ɔ, woɖe na nyikɔ bu amɛɖe le nyigban cɛ ji, yi wa toji, yia kpɔ hwlɛngan o.» ¹³ Amɛlɔwo kpɔ mɔ Piyɛ koɖo Ʒan ɖenyi amɛ kpoŋ o, kpɔ woɖe se wema o. Ci e le nɛnɛ can ɔ, wo gbegbeɛ edɔn do ŋɖeka nu, yi eji eŋ nɔ wo sugbɔ. Hwenɔnu ɔ, wo va do jeshi yi mɔ Yesu do wo kplɔ. ¹⁴ Vɔ ɔ, ci yi wo kpɔ ŋsu ci yi wo da edɔ nɔ le ete le axanɔ Piye kodo Ʒan ɔ, wo ɖe gbe nya enyɔ ɖe yi a nu nɔ wo o. ¹⁵ Eyi wo gbe nɔ wo mɔ, wo ɖe to le hwɛxɔnu lɔ ; yi wo va yi tɔ ekpa ɖeɖe. ¹⁶ Yi va nunuɔ nɔ wowo nɔnɔwo mɔ: «Ŋɖe yi mia wa koɖo mɛlɔ wo? Ʒeluzalɛmutɔwo kpu nya nyuiɖe mɔ, wowo ji yi Mawu to yi wa jeshidu cɛ kaka kpɔ miɖa gbe sɛnŋ do ɖyika yi o. ¹⁷ Vɔ ɔ, mi ɖo a wɛ do eɖe nɔ enyɔ lɔ ŋ gbe kaka do eju lɔ mɛ sɔwu ecɛ o. Eyi taɖo ɔ, mia do ese nɔ wo nyuiɖe mɔ, wo ŋ gbe gbe xo nuxu sɔso ŋsu cɛnu nɔ mɛɖe o.» ¹⁸ Eyi wo gbe trɔ yɔ Piyɛ koɖo Ʒan, yi do ese nɔ wo sɛnŋsɛnŋɖe mɔ Yesu nyikɔ ŋgbe gbe to le aglan mɛ nɔ wo o. Nɛnɛke wowo ŋgbe gbe kpla enu amɛ sɔso Yesu nu o. ¹⁹ Vɔ ɔ, Piyɛ koɖo Ʒan ɖoŋci nɔ wo mɔ: «Miwoŋtɔwo ɖe sɔ ŋkuvi a glui kpɔ mɔ. Mawu nɛ, miwo nɛ, mɛ e enyɔmɔ wa se egbe nɔ ɔ? ²⁰ Miwo yɛ ɔ, miwo ɖasɛnŋ tashi nuxu xoxo so enu ci yi mikpɔ yi gbe se nu o.» ²¹ Jukɔn lɔ kpunkankanfu Mawu nɔ enu ci yi jɔ lɔ nu. Eyi taɖo yi ega lɔ wo de gbe nya le han yi wo a wɛ yi a dɔn eto nɔ Piyɛ koɖo ʒan o. Eyi wo do vɔnvɔn nɔ wo do ji ,yi tashi wo. ²² Ŋsu ci yi wo da edɔ nɔ ŋdanŋdonu tɔ lɔ ɖo exwu sɔwu exwe eka (40ans). ²³ Ci yi wo jo Piyɛ koɖo Ʒan ɔ, wo trɔyi wowo kpenawo gbɔ. Yi vayi to enyɔ ciwo avɔsatɔ wo gawo koɖo mɛganwo nu nɔ wo. ²⁴ Ci yi wo se enyɔ lɔ goduɔ, wo pleŋ sɔ egbe ɖo ɖekɛ yi kɔ egbe yi eji yi nu nɔ Mawu mɔ :« Mavɔmavɔtɔ, eo yi wa jeŋkui, nyigban,axu koɖo enu ciwo pleŋ yi le womɛ. ²⁵ Ewo yi to gbɔngbɔn kɔkɔɛ ji yi na yi miwo tɔgbi Davidi ci yi ao dɔwavi, biɔ se mɔ: "ŋɖe taɖo yi maxɔsetɔwo le adan ji? Ŋɖe taɖo yi jukɔn wo le susu gbaliwo ɖe ɔ hɛnnɛ! ²⁶ Nyigban ji fiɔ wo drado a wa ahwa. Fiɔhawo bɔ do ɖekɛ yi le susu ɖe ɔ kpaŋkɔ Mavɔmavɔtɔ Mawu koɖo e yi mɛ cancan Kliso lɔ nu. ²⁷ Nyɔnɔnuitɔ ɔ, Elodi Ancipasi koɖo Pɔnsu Pilati ca eha koɖo Israyɛli jukɔnwo koɖo jukɔn kpɛtɛwomɛtɔwo, le jugan cɛ mɛ, yi fɔn egu do awu dɔwavi kɔkɔɛ Yesu ci yi e shi ami nɔ no. ²⁸ wo wɛɛ nɛnɛ nɔ ɖoɖo ci yi e wa sa xoxoxo koɖo aɖaŋ asɛn ŋ jɔ do ji. ²⁹ Ecɛ yɛ ɔ, Mavɔmavɔtɔ kpɔ lehan yi wo le vɔnvɔn do ɔ nɔ mi doɖa.Na nɔ awu dɔwaviwo a nu awu nyɔ koɖo edɔngbegbe. ³⁰ Ɖe awu ŋsɛn ti yi a da edɔ nɔ amɛwo, yi a na nɔ wo a ɖe jeshiduwo koɖo enudanŋdonuwo doasɛ to do awu dɔwavi kɔkɔɛ Yesu nyikɔ mɛ ». ³¹ Ci yi wo wa kuifan lɔ ɖegbɔ ɔ, nyigban hunhun le fini ci yi wo bɔ le lɔ. Gbɔngbɔn kɔkɔɛ ɖo wo pleŋ mɛ yi wo tɔ Mawu nyɔ nunu koɖo edɔngbegbe. ³² Susu le ɖeka nɔ xɔsetɔ ha lɔ, yi wo wanɔ enu shigbe amɛ kuɖeka wo nyi nɛnɛ. Wowo domɛtɔ ɖekɛ ɖe gbe sɔnɔ eyi dɔkunuwo mɔ wo nyi eye ɖekɛ tɔ o. Wo sɔnɔ wo shigbe wo pleŋ tɔ yɔ nɛnɛ. ³³ Dɔla lɔ wo ɖe kunu sɛnŋsɛnŋ ɖe mɔ axwetɔ Yesu fɔn so ekuwodi yi Mawu wa xomɛvunu nɔ xɔsetɔ lɔwo pleŋ sugbɔ. ³⁴ Wowo domɛtɔ ɖekɛ ɖe jinɔ enuɖe do kpa o. Nyɔnɔnuitɔ ɔ, amɛ ciwo shi yi nyigban koɖo axwewo le, le wo mɛ sanɔ nyigban koɖo axwe lɔwo yi sɔnɔ eho lɔ jonɔ nɔ Mawudɔ. ³⁵ Wo sɔɛ nii danɔ do akɔnmɛ nɔ dɔla lɔwo. Wo kpɔnɔ enu ci yi ʒian amɛ ɖeka ɖeka yi manɔ eho lɔ do wo nu ³⁶ Nɛnɛ yi Ʒosɛfu, Levi jijimɛvi ɖeka ci yi wo ji le Shiplo ju mɛ wa nɛ. Dɔlawo na nyikɔ yii wɔ:«Banabasi» ci gɔnmɛ yi nyi mɔ "Akɔnfanɔ amɛtɔ". ³⁷ E sa agble nyigban yi sɔ ɖeka; yi gbe sɔ eho lɔ, yi sɔ dado akɔnmɛnɔ wo.