¹ Gbeɖeka ɔ, Piyɛ koɖo Ʒan yikɔ Mawu xwemɛ do nyidɔn gatɔn mɛ nu le kuifan hwenu. ² Amɛwo kɔnɔ ŋsu ɖeka ci yi xo ekplɛ so jijimɛ, sɔ danɔɖɛdo Mawuxwelɔ xɔmɔnu. Wo yɔnɔ xɔmɔnu lɔ mɔ "xɔmɔnu nyui". Gbeɖeka duu ɔ, wo kɔɛni va enɔ lɔ, nɔ a biɔbiɔ enu amɛciwo yi ɖoɖoɔ Mawuxwe lɔ mɛ. ³ Ci yi ŋsu lɔ kpɔ Piyɛ koɖo Ʒan ɖoɖoɔ Mawuxwe lɔ mɛ ɔ, e mɔ woɖe ku ŋshishi nɔ eye, a na enu 'ye. ⁴ Eyi Piyɛ koɖo Ʒan lɔwo kpoɛ juun yi nu nii mɔ: «glo mi kpɔ». ⁵ Ŋsu lɔ tɔ wo gloglo kpɔ, ɖo ɔ, e nɔnɔ ete kpɔ wo mɔ wa na ŋɖe ye. ⁶ Vɔ ɔ, Piyɛ nu mɔ: «ŋ ɖe wa eho alo shika ɖɛ lo, vɔ ŋci yi le ŋshi ɔ, na na wu. Le Yesu Kliso Nazalɛtitɔ nyikɔ mɛ ɔ, so je ete yi a zɔn zɔnlin!» ⁷ Piyɛ le ɖushi lɔ nɔ ŋsu lɔ, yi eso je ete. Eyi zeɖeka vɔ ɔ, ŋsɛn ɖo afɔ koɖo afɔcikɔɛwo mɛ nii. ⁸ Yi e te bii, yi so je ete, yi tɔ zɔnlinn zɔnzɔn. Eɖo Mawuxwe lɔmɛ koɖo Piyɛ koɖo Ʒan, yi zɔnzɔn zɔnlin, yi teteɛ, yi kankanfu Mawu. ⁹ Jukɔn lɔ pleŋ kpɔɛ yi e zɔnzɔn zɔnlin, yi kankanfu Mawu. ¹⁰ Amɛwo jeshidɛ mɔ eyi nɔnɔ anyinɔnɔ do Mawuxwe lɔ xɔmɔnu sa, yi nu nɔ mɔ woɖe ku ŋshishi nɔ 'ye, a na enu 'ye. Enu ci yi wo wa ni lɔ ɔ, kpaca wo, yi wu enu nɔ wo. ¹¹ Ci yi ŋsu lɔ le Piyɛ koɖo Ʒan gbɔ kpoŋ, le Salomɔ yaxoxu ɔ, eyi enu lɔ kpɔtɔ yi kpakpaca jukɔn lɔ kpu, yi wo shiju va cɔn wo. ¹² Ci Piyɛ kpɔ jukɔn lɔ ɔ, enu nɔ wo mɔ: «Israyɛli viwo, ŋɖe yi jɔ taɖo yi edɔ ci yi wo da nɔ ŋsu lɔ jijiɛŋ nɔ mi ɔ ? Ŋɖe yi jɔ taɖo yi mi gloglo ɔ mi kpɔ shigbe emiwo ŋtɔwo ŋsɛn mɛ yi ŋsu lɔ tɔ zɔnlin zɔnzɔn do nɛ ɔ ? Ŋɖe yi jɔ taɖo yi mi gloglo ɔ mi kpɔ shigbe egbe yi mi le nɔ Mawu taɖo yi da edɔ lɔ nɛnɛ o ? ¹³ Ablahamu, Izaki, Ʒakɔbu koɖo miwo tɔgbiwo Mawu yi kanfu yi dɔwavi Yesu nɛnɛ. Miwo yɛ ɔ, miwo sɔ doashi nɔ eju mɛganwo, yi gbe nu sonu le Pilati gbɔ, le hwenu ci yi e jiji a juii. ¹⁴ Miwo gbe amɛ kɔkɔɛ kpɖo amɛ jɔjɔɛ, yi dɔ mɔ wo ɖe jo amɛ wutɔ nɔ ye wo. ¹⁵ Mi wu agbenaamɛtɔ lɔ. Vɔ ɔ, Mawu fɔin so amɛ kukuwo domɛ kaka miwo kpɔ tɔxu. ¹⁶ Xɔse ci yi wo ɖo nɔ Yesu nyikɔ ɔ, e yi da edɔ nɔ ŋsu ci yi mi kpɔkpɔ yi gbe jeshi ɖɛ hunnɔ. Ɖo ɔ, xɔse yi na yi lanmɛ bii nii vɛ le miwo pleŋ ŋmɛ. ¹⁷ Eviɛ ɔ, nɔvignɛwo, ŋnya mɔ manyamanya mɛ yi miwo koɖo miwo fiɔwo nɔ yi wa enu hunnɔ koɖo Yesu. ¹⁸ Vɔ ɔ, enyɔ ci Mawu ŋtɔ nu daɖɛ todo eyi ŋɛdotowo pleŋ ji, yi e va wa do. Enu daɖɛ sa mɔ Kliso lɔ ava kpe efun. ¹⁹ Eyi na taɖo ɔ, Mitrɔ emiwo ɖekiwo a ji atrɔva Mawu gbɔ nɔ a cucu miwo nuvɔnwo shi nɔ mi. ²⁰ Nɛnɛ ɔ, Mavɔmavɔtɔ lɔ a na vovo mi, yi a dɔ Yesu Kliso ɖaɖa; ɖo ɔ, edoŋkɔ yi ciin daɖɛ nɔ mi. ²¹ Eyɛ yi ɖo anɔ jeŋkuimɛ kaka asɔ je hwenu ci yi Mawu a dra enuwo pleŋ do shigbe lehan yi e nui todo yi ŋɛdotɔ kɔkɔɛwo ji vayi xoxo nɛ. ²² Nyɔnɔnuitɔ ɔ, Mɔyizi nu vayi mɔ: "Mavomavotɔ miwo Mawu a na yi e ŋɛdotɔ ɖeka a to so miwo xomu mɛ, yi a doɛ ɖaɖa mi shigbe lehan yi edɔŋ ɖaɖa do nɛ. Yi mia vaɖo eto yi, yia se enyɔ ciwo kpu yi ava nu nɔ mi. ²³ Vɔ ɔ, amɛ ci yi ɖa va ɖo eto yi, yia se enyɔ ci yi Mawu ŋɛdotɔ lɔ a nu ɔ, wa ɖii ti le Mawu jukɔn lɔ mɛ, yia na yi woa wui. ²⁴ Mawu ŋɛdotɔ wo kpu sɔ so Samiyɛli ji kaka va je Samiyɛli yumɛcitɔ wɔ ji can xo nuxu sɔso enu ciwo yi va jɔjɔ le ŋkeke cɛwo mɛ nu. ²⁵ Egbe ci yi Mawu ɖo nɔ miwo tɔgbiwo to do eyi ŋɛdotɔwo ji, yi nu nɔ Ablahamu mɔ "na to a o jijimɛviwo ji a cu eshi nɔ xomu pleŋ yi le nyigban lɔ ji" ɔ, miwo can yi e ɖo egbe lɔ nɔ. ²⁶ «Ci yi Mawu na yi eyi dɔwavi lɔ va ɔ, emiwo gbɔ yi e dɔɛ ɖaɖa doŋkɔ nɔ a vayi cu eshi nɔ mi, yi a va na yi miwo domɛtɔ ɖeka a tashi xomɛveve».