¹ Ci yi Panŋtekoti zangbe va ɖo ɔ, nukplaviwo pleŋ va bɔdo texwe ɖeka. ² Zeɖeka vɔ ɔ, enu ɖeka ɖyi gbe so jeŋkuimɛ shigbe lehan yi jehɔn gangan xo nɔ nɛ ; yi gban do axwe ci mɛ yi wo le anyinɔnɔ le lɔ keŋkeŋ mɛ. ³ Eyi wo kpɔ enu ɖekawo ; yi enu lɔwo le shigbe ezo 'ɖewo nɛ. Enu lɔwo klan le wonɔnɔwo nu yi va je nukplavi lɔwo domɛtɔ ɖeka ɖeka ji. ⁴ Gbɔngbɔn Kɔkɔɛ ɖɔ ejimɛ nɔ wo pleŋ yi wo tɔ egbe ebu ebu wo dodo shigbe lehan yi gbɔngbɔn lɔ na wo do nɛnɛ. ⁵ Ga hunnɔ mɛ ɔ, Yuɖatɔ ɖekawo trɔ le Ʒeluzalɛmu hwe nɔ nu. Wo so nyigban ji kɔtawo pleŋ mɛ. ⁶ Ci yi wo se lehan yi enun lɔ ɖyi egbe do ɔ, wo shi eju vabɔ giji. Eji eŋ nɔ wo sugbɔ, ɖo ɔ, wo se seɛ nyɔci enukplavi lɔwo nu nu ɔ do wowo ŋtɔ wo gbe wo mɛ ɖeka ɖeka. ⁷ Ewu enu nɔ wo, yi gbe ji eŋ nɔ wo. Eyi wo va biɔ se mɔ: «Amɛ ciwo yi le nuxu xo ɔ lɔ ɖee, de nyi Galile kanmɛ tɔ wo yi wo kpu nyi ba ? ⁸ Le e nyi do yi miwo domɛtɔ ɖeka ɖeka sese ɛ enyɔ ci yi nu ɔ wo le do emiwo ŋtɔ wo gbe wowo me ɔ ? ⁹ Amɛɖekawo so Pɛsi, Mɛdɛsi koɖo Elamiti juwo mɛ ; yi amɛɖewo so Mezopotami, Ʒuɖe, Kapadɔsi, Pɔn koɖo Azi kanwo mɛ. ¹⁰ Nɛnɛlɔke yi amɛbuwo so Flizi, Panfili, Eʒiputu koɖo Sirɛnu ci yi le Libi ju mɛ nɛ, yi amɛbuwo gbe so Hlɔmu, ¹¹ Klɛti tɔdomɛju koɖo Alabi kanmɛ nɛ. Wo ji amɛɖekawo do Yuɖatɔwo sɛnsɛn mɛ yi amɛɖewo shin gbɔxwe yi va ɖomɛ ; ganŋke enu gangan ci yi Mawu wa, yi wo nunuo ɔ, mi sisiɛ do emiwoŋtɔwo gbewo mɛ.» ¹² Enyɔ lɔ wu enu nɔ wo kpu kaka kpɔ wo ɖe gbe nya nyɔɖe a nu. Eyi wo va tɔ nunu nɔ wowo nɔnɔwo mɔ: «Enyɔ lɔ ci jɔjɔ lɔ gɔnmɛ ɖe ?» ¹³ Vɔ ɔ, amɛɖowo kokoɔ nukplavi lɔwo mɔ: «Vɛn vivitɔ yi wo nu mu!» ¹⁴ Eyi Piyɛ koɖo dɔla wiɖeka kpɛtɛwo shite, yi Piyɛ kɔ egbe yi ji yi nu nɔ ahwakɔn lɔ mɔ : «Emiwo Yuɖatɔwo koɖo Ʒeluzalɛmu juganmɛtɔwo kpu ɖe ɖo eto a se enyɔ ciwo yi ŋnunuɔ, yi a mɔŋjemɛ nywiɖe mɔ, ¹⁵ yi ɖe nyi aha yi amɛ lɔwo nu mu shigbe lehan yi miwo buibuiɔ do nɛ o; ɖo ɔ, nyidin gatɔn mɛ yi mi le viɛ. ¹⁶ Vɔ ɔ, enyɔ ci Mawu ŋɛdotɔ Ʒowɛli nu daɖɛ sasa yi va tɔ jɔjɔ egbɛ. ¹⁷ Enudaɖɛ vayi mɔ Mawu nu mɔ: "Na na anyi Gbɔngbɔn agbetɔwo kpu le ŋkeke kpɛtɛwo ji. Miwo 'vi ŋsuviwo koɖo miwo 'vi nyɔnuviwo a va do anyi 'ŋɛ nɔ amɛwo. Emiwo 'vi jajɛwo, wa ɖo enukpɔkpɔ, yi miwo mɛ shinshinwo a ku edrɔ wo. ¹⁸ Ɛɛ, le ŋkeke hunnɔwo ji ɔ, na ja anyi Gbɔngbɔn do anyi dɔwavi ŋsuwo koɖo nyɔnuwo ji; yi wa do anyi ŋɛ nɔ jukɔnwo. ¹⁹ Na na yi enujiŋwo a jɔ le jeŋkui mɛ, yi enudanŋdonuwo a jɔ le nyigban ji. Ehun koɖo ezo koɖo azɔ a li. ²⁰ Ewe a do ʒinflu yi wleci a bia xɛxɛxɛ shigbe ehun nɛ gbɔxwe yi Axwetɔ ŋkeke lɔ, ŋkeke gangan lɔ ava ɖo. ²¹ Eyi nɔ amɛɖekpokpui fan ekui yɔ Axwetɔ nyikɔ ɔ, a tɔ nii.» ²² Israyɛlitɔwo, mi ɖo eto a se enyɔ cɛwo : Yesu Nazalɛtitɔwo, Mawu doasɛ amɛ ci yi e nyi nɔ mi, yi to ji yi wa jeshiduwo, enujiŋwo koɖo enudanŋdonuwo le miwo domɛ, shigbe lehan yi emiwoŋtɔwo jeshi do nɛ. ²³ Wo sɔ ŋsu hunnɔ do ashi nɔ mi shigbe lehan yi Mawu sɔ gbeta yi gbe toi daɖɛ do nɛ. Mi dɔ yi danuwatɔwo kiin do acisosa ji yi sɔ wu. ²⁴ Vɔ ɔ, Mawu fɔin so ekuwodi yi ɖyi yi le eku vevesesewo mɛ. Ɖo ɔ, eku ɖe ɖo ŋsɛn yi a gbin ɖɛ o. ²⁵ Davidi xo nuxu sɔso Yesu lɔ nu sasa mɔ: "Ŋ kpɔ nɔ Axwetɔ le ŋkɔ nɔ nyɛɖeki gashiagamɛ, ɖo enɔnɔ ɖushimɛ nɔŋ, nɔ nyɛŋ gbe vɔn o. ²⁶ Eyi taɖo yi eji jɔnɔ ŋ, yi ŋ jinɔ eha. Ŋ le agbe le jiɖeɖe mɛ. ²⁷ Eyi nɔ egbe va ku can ɔ, anyi cɔ a vo le yɔdu mɛ, yi ale emɔkpɔkpɔmɛ ɖɛ. Ɖo ɔ, da ɖe emɔ yi anyi se a ci ekuwodi o. Da tashi ao mɛ mɛmi anyinyɔ do yɔdu mɛ o. ²⁸ Ewɔ yi doasɛ emɔ ci na to yi akpɔ agbe nɔ ŋ. Nɔ e le ŋgbɔ ɔ, ŋ kpɔ nɔ jijɔ." ²⁹ Nɔvinyɛwo, woɖe ɖe emɔ nɔŋ nɔ maxo nuxu cɛ nɔ mi nyuiɖe sɔ so miwo tɔgbi Davidi nu. Eku yi wo ɖyi kaka e yi yɔdu le mi gbɔ egbɛ ɛ. ³⁰ Vɔ ɔ, ci yi e nyi Mawu ŋɛdotɔ ɔ, e nya mɔ Mawu ɖo egbe nɔ eye, yi ta yiɖeki do ji mɔ yea va sɔ ye jijimɛmɛviwo ɖeka dado ye fiɔʒinkpin ji. ³¹ Davidi doŋkɔ yi kpɔ Kliso lɔ fɔnfɔn so kuwodi. Eyi e xo nuxu sɔso nu mɔ: "Mawu da lɔn yi eyi se a ci ekuwodi o; yi e yi cɔ anyinyɔ do yɔdumɛ o." ³² Mawu fɔn Yesu Kliso sɔ so ekuwodi, yi miwo kpu see kpɔ tɔxu. ³³ Mawu kɔ Yesu lɔ yi dado e yi ɖushimɛ, yi Yesu xɔ Gbɔngbɔn Kɔkɔɛ ci yi ŋgbe yi Mawu do lɔ, yi na yi e ja do mi ji. Enu ci yi mi kpɔkpɔ yi gbe seseɛ egbɛ nɛ. ³⁴ De nyi Davidi ŋtɔ yi yi jeŋkuimɛ o. Vɔ ɔ, e nu mɔ: "Mavɔmavɔtɔ nu nɔ anyi Xwetɔ mɔ: va nɔ anyinɔnɔ do ɖushimɛ nɔ ŋ, ³⁵ nɔ ma sɔ awu ketɔnɔwo sɔ wa afɔcucunu nɔ eo. ³⁶ Nɔ e le nɛnɛ ɔ, Israyɛli xwelɔ kpu ɖo a nya nywiɖe mɔ: Yesu hunnɔ ci yi mi kan do aci sosa ji ɔ, e yi Mawu sɔ ɖo Axwetɔ koɖo Yesu Kliso lɔ." ³⁷ Ci yi wo se enyɔ lɔ wo ɔ, wo caka le wowoɖekiwomɛ, yi nu nɔ Piyɛ koɖo dɔla kpɛtɛwo mɔ: «Nɔvinyɛwo, le mia wɛ do?» ³⁸ Eyi Piyɛ nu nɔ wo mɔ: «Mi trɔ miwoɖekiwo a ji. Miwodomɛtɔ ɖeka ɖeka ɖe le Mawushi le Kliso nyikɔ mɛ nɔ nuvɔnwo sɔsɔke koɖo Gbɔngbɔn Kɔkɔɛ xɔxɔ. ³⁹ Ɖo ɔ, miwo koɖo miwo viwo koɖo mɛciwo yi le jinjintɔxu yi woɖo egbɛ lɔ nɔ. Amɛshiamɛ ci yi Mavɔmavɔtɔ miwo Mawu a va yɔ wo yi wo ɖo nɛnɛ gbe ɖɛ nɔ.» ⁴⁰ Piyɛ gbe nu enyɔ sugbɔ buwo nɔ wo yi a sɔ ɖe kun nu nɔ wo yi gbe sɔ do ŋsɛn lanmɛ nɔ wo. E nu nɔ wo mɔ:« Egbiviwo wawa enu do akpo mi ŋgbe nɔ wo mɛ o» ⁴¹ Amɛ ciwo yi xɔ egbe do Piyɛ nyɔwo ji ɔ, wo le Mawushi nɔ wo. Gbenɔgbe ɔ, agbetɔ shigbe kotokun amɛtɔn han wo yi xɔ Mawu ji se gbenɔgbe. ⁴² Xɔsetɔ lɔwo vanɔ dɔlawo nukplamɛnyɔwo tɔxu yi gbe nɔnɔ agbe fofo koɖo nɔvitɔ. Woɖo enu do dekɛ yi gbe wanɔ kuifan do ɖekɛ. ⁴³ Wowo domɛtɔ ɖekaɖeka vanɔ, ɖo ɔ, Mawu wawa ŋdanŋdonu koɖo jeshidu sugbɔ todo dɔlawo ji. ⁴⁴ Xɔsetɔ lɔwo pleŋ le ɖekawawa mɛ, yi gbe bɔnɔ wowo nuwo do ɖekɛ. ⁴⁵ Wo sanɔ wowo dɔkunnuwo, yi manɔ eho lɔ le wowo nɔnɔwo mɛ, do wudo ci le amɛ ɖekaɖeka ji nu. ⁴⁶ Gbeɖeka duu ɔ, wo donɔ ego do Mawu xwemɛ, yi ɖunɔ enu do ɖekɛ le wowo xwewo mɛ koɖo jijɔ koɖo xomɛ hunhun. ⁴⁷ Xɔsetɔ lɔwo kannɔfu Mawu, yi e jenɔ ŋnɔ jukɔn lɔ pleŋ. Eyi ŋkeke ɖeka duu ɔ, Axwetɔ lɔ kplɔnɔ mɛciwo yi e hwlɛn gan yoyuwo va wo mɛ.