¹ Téofilu, ŋ nu edɔ ciwo kpu yi Yesu tɔ wawa wo koɖo enu ciwo kpu e tɔ amɛwo kplakpla le so gɔnmɛjeje do wema ŋkɔtɔ kinnyɛ mɛ. ² Ŋ nu wo sɔ so gɔnmɛjejemɛ kaka va sɔ ɖo gaci yi mɛ yi Yesu yi jeŋkuimɛ ji. Vɔ, gbɔxwe yi a va yi jeŋkuimɛ, le gbɔngbɔn kɔkɔɛ ŋsɛn mɛ ɔ, e ɖe egbe nɔ amɛ ciwo yi e can yi wo a nyi amɛdɔdɔwo. ³ Ci yi Yesu lɔ kpe efun, yi ku degbɔ ɔ, amɛdodo lɔwo yi e doasɛ yiɖeki nɔ todo alɔkpa sugbɔ mɛ mɔ ye le agbe. E do asɛ yiɖeki nɔ wo sɔna ŋkeke eka yi sɔ xoxoɔ nuxu nɔ wo so Mawu fiɔɖuxumɛ nuwo nu.

⁴ Gbeɖeka ci yi e le enu ɖu ɔ koɖo wo ɔ, e nu nɔ wo mɔ : «Mi ŋgbe so le Ʒeluzalɛmu jugan mɛ o. Mi nɔ texu lɔ, yi a nɔ ete kpɔ enu ci yi ŋgbe yi axwetɔ lɔ do nɔ mi; ci nu yi ŋxo nuxu so nɔ mi vayi. ⁵ Ɖo ɔ, kaka je elɛ ɖe, eshi yi Ʒan sɔ le Mawushi nɔ amɛwo. Vɔ, le majiji ɖe mɛ ɔ, Gbɔngbɔn Kɔkɔɛ yi wo a sɔ lii nɔ emiwo.» ⁶ Hweci nu yi wo bɔ ɔ, wo biɔbiɔ se mɔ : «Axwetɔ, kakacɛ yi a na yi Israyɛli fiɔɖuxu lɔ a je yiɖeki shinu ke a ?» ⁷ E ɖonu nɔ wo mɔ : ɔ«E ʒian mɔ mi a jeshi ŋkeke koɖo hwenu ciwo yi Axwetɔ ŋtɔ ɖo dɛ koɖo acɛ go. ⁸ Vɔ nɔ Gbɔngbɔn Kɔkɔɛ ɖyi va mi mɛ ɔ, mi a xɔ ŋsɛ, yi mi a nyi kunuɖetɔwo nɔ ŋ le Ʒeluzalɛmu, Ʒuɖe lɔ pleŋ koɖo Samali kaka a sɔ yi nyigban lɔ sɛnxu.» ⁹ Le enyɔ hunnɔwo godu ɔ, Yesu ɖedo jeŋkuimɛ le ŋmɛ nɔ wo. Yi jeŋkuimɛ zɔ ɖeka xii, yi wo de gbe sɛnŋ a kpɔɛ o. ¹⁰ Ci yi wo gbe kpɔtɔ gloglo ɔ jeŋkuimɛ kpɔ ɖaɖa le hwecinu yi e yi kɔ ɔ, wo va kpɔ ŋsu amɛve ɖekawo le awu ɣi mɛ le axa nɔ wowo ɖekiwo. ¹¹ Ŋsu lɔwo biɔ wo se mɔ : «Galiletɔwo, ŋɖe taɖo yi mi le 'te le elɛ yi kpɔkpɔ jeŋkuimɛ ɖaɖa ? Le han yi mi kpɔkpɔ Yesu yi yi ɔ jeŋkuimɛ do ɖe, nɛnɛ lɔ ke a gbe trɔgbɔ do nɛ.» ¹² E yi Yesu mɛdɔdɔ lɔwo trɔ so Olivu kpo lɔ ji, yi gbɔva Ʒeluzalɛmu jugan lɔ mɛ. Gbɔngbɔn gbe mɔzɔnzɔn ɖeka han wo yi wo a zɔn so Ʒeluzalɛmu va ekpo lɔ ji. ¹³ Ci yi wo gbɔva jugan lɔ mɛ ɔ, wo la sanŋ ci ji wo nɔnɔ. Wo a kpɔ Piyɛ, Ʒan, Ʒaki, Andre, Filipu, Tɔma, Batelemi, Matiye, Ʒaki Alufe eviɛ, Simɔ koɖo Ʒudi Ʒaki eviɛ. ¹⁴ Mali, Yesu nɔlɔ koɖo Yesu nɔviɛ ŋsuwo va bɔnɔ do Yesu mɛdɔdɔ lɔwo nu, yi wo wanɔ kuifan do ɖekɛ koɖo susu ɖeka. ¹⁵ Le hwenɔ nu ɔ, xɔsetɔ shigbe ekatɔn han nɛnɛ wo le bɔbɔmɛ, yi Piyɛ shite le wo mɛ yi nu mɔ: ¹⁶ «Nɔvinyɛwo, enyɔ ci yi jɔ do Yuɖa ji hun nɔ ɖo a jɔ shigbe lehan yi Gbɔngbɔn Kɔkɔɛ nu ɖɛ to do Davidi ji le Mawu nyɔ wemawo mɛ do nɛnɛ. E xo nuxu sɔso Yuɖa ci yi nɔ ŋkɔ nɔ amɛwo yi wo va le Yesu. ¹⁷ Đo ɔ, e nyi emiwo do mɛ tɔ ɖe, ci yi kpɔ nɔ gomɛ le edɔ cɛ mɛ. ¹⁸ Yuɖa sɔ eho ci yi wo cu nii nɔ enubaɖa ci yi e wa lɔ, xwle nyigban ɖeka. Nyigban hunnɔ ji yi e va sɔ eta cu egu do yi ku nɛ. E yi lankpu yi tɔ da ecu, yi e yi jijimɛviwo kaka do nyigban. ¹⁹ Ʒeluzalɛmutɔwo pu se enyɔ hunnɔ. E yi taɖo wo na nyikɔ nyigban hunnɔ lɔ do wowo xwegbe mɛ mɔ ''Hakelidama" ci gɔnmɛ yi nyi mɔ "Ehun nyigban". ²⁰ Eyi dɔ taɖo yi wo ŋwli do Psomu wema mɛ daɖɛ mɔ: "E yi xwe ɖe ci tootu ; amɛ ɖe ŋgbe gbe nɔ axwe lɔ mɛ o". Wo gbe ŋwlɛ daɖɛ mɔ: "Mɛ bu ɖo a xɔ e yi dɔ a wa". ²¹ E le veviɖe mɔ ŋsu ɖeka a va bɔdo mi nu, nɔ mia nu lehan yi Axwetɔ Yesu fɔn so ekuwodi nɔ amɛwo. ²² Amɛciwo yi kplɔnɔ mi do sɔso hwecinu yi Ʒan le Mawushi nɔ Axwetɔ Yesu, yi gbe kplɔ mi, yi mi tɔ esa ɖyiɖyi to do eju lɔ pleŋ mɛ kaka va sɔ na hwecinu yi eyi jeŋkuimɛ, domɛtɔ ɖeka yi ɖo a nyi nɛnɛ mɛ. ²³ Eyi wo sɔ amɛve ɖo ŋmɛ nɔ wo. Amɛɖeka tɔ mɔ Ʒozɛfu ci yi wo gbe yɔ nɔ mɔ Basabasi, ci gbe tɔ mɔ Ʒutusi. Amɛ amɛve tɔ lɔ tɔ mɔ Matiyasi. ²⁴ Le eyi godu ɔ, wo wa kuifan, yi nu mɔ: "Axwetɔ, ewɔ ci yi nyan enyɔ ci yi le eji mɛ nɔ agbetɔ pleŋ, do asɛ amɛ ci e can le ame amɛve cɛwo do mɛ, ²⁵ do edumɛ nɔ Yuɖa ci yi gbe amɛdɔdɔwo dɔ eyi tɔ daɖɛ, yi tashi texwe cci yi je koɖi dɛ nɔ mi. ²⁶ Eyi wo troɛ kpoɛ, yi e va je Matiyasi ji ; yi wo soɛ bɔdo dɔla wiɖeka lɔwo nu.