¹ Aglipa nu nɔ pɔlu mɔ : Emɔ li nɔ wu, xo nuxu a sɔ hwlɛn eta gan nɔ wɔɖeki. Eyi pɔlu kɔ alɔ yi tɔ etahwlɛnhwlɛngan nɔ yiɖeki mɔ : ² Efiɔ aglipa, ŋ kpɔ mɔ enu yi nyɔ nɔ ŋ mɔ ŋ jijiɛ a hwlɛn eta nɔ enyɛɖeki egbɛ le ehwɛ ciwo kpu yi yuɖatɔwo dodo ɔ nɔ ŋ mɛ. ³ Do ɔ, jeshi yuɖatɔwo kɔnuxo koɖo enyɔ ciwo pleŋ yi le gblamɛ nɔ wo yiwo hwlɛnnɔ. ŋɖe kuku nɔ wu mɔ wɔ ɖe gbɔn ji ɖɛ yi a se enyɔ ciwo yi na nu. ⁴ Yuɖatɔwo pleŋ nya lehan yi ŋ nɔ agbe do sasa le anyi ɖajɛvi mɛ. Wo Nya lehan yi ŋ nɔ agbe do sɔso gɔnmɛjeje le anyi kɔta lɔ kojo zeluzalɛmɛ jugan lɔ mɛ. ⁵ Wo jeshi ŋ xoxoxo yi nɔ wo dro ɔ, wo a ɖe kunu nɔ ŋ mɔ yuɖatɔwo sɛnsɛn gbɛ sɛnŋsenŋtɔ ci yi nyi Falisitɔwotɔ mɛ yi ŋ nɔ. ⁶ Ci yi ŋ kpɔkpɔ emɔ nɔ egbe ci Mawu ɖo nɔ miwo tɔgbiwo taɖo yi wo le ŋ va kojo mɛ ahan ɛ. ⁷ Miwo kɔta wive lɔwo kpɔkpɔ emɔ nɔ egbeɖoɖo hunnɔ yi sɛnsɛn Mawu koɖo ŋsɛn ezan koɖo kede. Efiɔ aglipa, emɔ hunnɔ ci yi ŋkpɔkpɔ taɖo yi yuɖatɔwo dodo ɔ ehwɛ nɔ ŋ. ⁸ ŋɖe yi tadɔ yi emiwo ɖe xɔsemɔ Mawu fɔnnɔ amɛkukuwo do agbe ɔ? ⁹ Enyɛŋtɔ ŋ bu vayi mɔ na to emɔ ɖe kpokpoi nu yi a kpe eta yesu Nazalɛtitɔ nyikɔ lɔ sasa. ¹⁰ Eyi ŋ wa le zeluzalɛmu yi xɔ ŋsɛn sɔso avɔsatɔwo gawo gbɔ yi cu xɔsetɔ sugbɔ do gakpawo mɛ yi nɔ wo mɔ wo a wu eɖewo ɔ, ŋ xɔnɔ egbe ɖo ji. ¹¹ Gashiagamɛ ɔ, ŋ ɖyinɔ esa todo mawusɛnxuwo yi dɔ yi wo zinnɔ wo ji nɔ wo a zu yesu. Wowo nu venɔ ŋ nu sugbɔ yi ŋ cinɔ yumɛ nɔ wo kaka a yoi kɔdo juganwo mɛ le ejugodu. ¹² E yi ji yi ŋ le yi vayikɔ damasi a wa edɔ ci yi avɔsatɔwo gawo na ŋsɛn mɔ nyɛ ɖe yi wa. ¹³ Efiɔ aglipa, emɔ lɔ ji ŋ le do gawive mɛ han nu yi kpɔ klɛklɛn ɖeka sɔ jeŋkuimɛ klɛnklɛn lɔ klɛn sɔwu ewe yi bibiɔ trɔdo enyɛ koɖo amɛ ciwo yi kpɔ ŋ do wo. ¹⁴ Mi pleŋ juin yi ŋ se egbe ɖeka ɖyiɖyi ɔ. Egbeɖyiɖyi lɔ nunuɔ do Eblegbe mɛ mɔ : sɔlu sɔlu ŋ ɖe yi jɔ yi eci yumɛ nɔ ŋ nɛnɛ ɔ? Awu ŋtashishin lɔ gblegble ɛ enu le wu nu. ¹⁵ Eyi ŋ ɖonu mɔ: exɔ mɛ e yɔ, mɛgan? Eyi axwetɔ ɖo nu mɔ : enyɛ yi nyi yesu, amɛ ci yi eci yumɛ nɔ. ¹⁶ Vɔ ɔ, so ashi ete. Enu ci yi taɖo ŋ sɔ nyɛ ɖeki douse nɔ wu ke. ŋ can wu shigbe edɔ lehan yi e kpɔ ŋ do nɔ amowo. Na gbe dre enu ciwo yi na va doasɛ nɔ wu nɔ amowo ¹⁷ hɛnnɛ. Na dɔdɔ wu ɖaɖa jukɔn hunnɔ koɖo amɛmanyi yuɖatɔwo gbɔ. Na ɖe wu tii le wo mɛ yi wo ɖa wa ŋɖe nɔ wu o. ¹⁸ ŋdɔdɔ wu nɔ na vayi hun ŋkuvi nɔ wo yi wo a ɖe ekɔ le vivinu yi a kpe klɛnklɛn gbɔ. Wo aɖe ekɔ so legba ŋsɛn nu yi a kpe mawu gbɔ. Nɔ wo xɔ ŋ ji se ɔ, Mawu a sɔ sɔ wowo nuvɔnwo ke wo yi wo a ɖo mawu viwo gbɛ mɛ. ¹⁹ E yi ɔ, efiɔ aglipa, ŋ wa do enu lɔ ci yi wo doasɛ nɔ ŋ so jeŋkuimɛ ji. ²⁰ ŋ nu mawu nyɔ Damasi koɖo zeluzalɛmu juganmɛtɔwo dɔŋkɔ. ɖyi esa todo zuɖe kan lɔ kpu mɛ yi gbe yi amɛmanyi yuɖatɔwo can gbɔ. ŋ nu nɔ wo mɔ wo ɖe trɔ wowoɖekiwo a ji atrɔva Mawu gbɔ. Atɔ enu ciwo yi sɔgbe koɖo Mawuviwo nu wawa. ²¹ Enyɔ hunnɔ taɖo yi yudatɔwo le ŋ le Mawusɛnxu yi ji mɔ yowo a wu ŋ do nɛ. ²² Vɔ kaka a vasɔje egbɛ ɛ ɔ, Mawu kpenɔ do ŋ ŋ le gaɖekpokpwimɛ yi ŋ gbe kpɔtɔ yi ɖeɖe ɛ kunu sonu le ɖeviwo koɖo mɛganxoxuwo gbɔ. Enyɔ ciwo yi Mawu ŋɛdotɔwo koɖo mɔyizi nu wo ɖekɛ nu ɔ ŋ le mɔ : ²³ kliso lɔ kpe efun yinyi amɛ ŋkɔtɔ ci yi fɔn so ekuwo yi nu klɛnklɛn lɔ nyɔ nyɔ nɔ jukɔn lɔ koɖo amɛmanyi yuɖatɔwo. ²⁴ Gbɔxwe yi pɔlu a hwlɛn eta nɔ yiɖeki ɖegbɔ ɔ, fɛsutusu do axwa yi nu mɔ : pɔlu, e je suku! Ekpla wema kaka va je suku do mɛ!. ²⁵ Pɔlu ɖonu nii mɔ : bubutɔ Fɛsutusu, ŋ ɖe je suku lo. Enyɔ ciwo yi ɖo gɔnmɛ sese yi ŋ nunuɔ. Enyɔ lɔwo gbe nyi anyɔnɔnui. ²⁶ Efiɔ, ese enyɔ hunnɔwo vayi. E yi taɖo yi ŋ xoxoɔ nuxu nɔ wu koɖo kankandoji. ŋ kandoji mɔ ɔ ɖe ŋlɔbe eɖe le wo mɛ. Do eɖe ɖe jɔ le owu godu. ²⁷ De, efiɔ Aglipa, e xɔ enyɔ ci yi Mawu ŋɛdotɔwo nu ji se a? ŋ nya nyuiɖe mɔ wɔ xɔɛ ji de! ²⁸ Aglipa nu nɔ pɔlu mɔ : hwɛɖeka yi kpɔtɔ yi awu nyɔwo a na yi ma xɔ egbe a trɔ klisotɔ. ²⁹ Pɔlu ɖonu nii mɔ : Nɔ e gbe nyi trolo cɛ alo gabumɛ can ɔ, ŋ ji mɔ Mawu ɖe wɛɛ nɔ ɔ koɖo amɛ ciwo pleŋ yi ɖoɖoɔ eto ŋ atrɔ enyɛ hanwo. ɖekɛ yi mi ɖa yii. ³⁰ Efiɔ lɔ koɖp ekanjikpɔtɔ gangan lɔ koɖo belenisi sɔkpenɔ amɛ ciwo pleŋ yi bɔdo mɛ yi nunuɔ nɔ wowonɔnɔwo mɔ : ³¹ ŋsu cɛ ɖe wa enuɖe kaka aje nɔ eku alo gakpamɛ lo. ³² Eyi Aglipa yɛ va nunɔ Fɛsutusu mɔ : Nɔ ŋsu cɛ ɖe nu sa mɔ seza yi a ɖo kojo nɔ eye ɔ, wo a tashii dru.