¹ Ci yi Fɛsutusu va egaji le akpanɔxwe e yi nyisɔ mɛ ɔ, e so le sezale jugan mɛ yi yi zeluzalɛmu. ² AVɔsatɔ gangantɔwo koɖo yuɖatɔwo mɛganwo vayi do ehwɛ no pɔlu le fɛsutusu gbɔ yi ɖe kuku nii mɔ : ³ Yi ɖe wa xomɛvunu nɔ yowo yi a na nɔ wa a kplɔ pɔlu gbɛ va zeluzalɛmu. Le nyɔnɔnui mɛ ɔ, wo bla enu do nu yia wui le emɔ ji. ⁴ Vɔ ɔ, fɛsutusu ɖonu nɔ wo mɔ : pɔlu a nɔ gakpamɛ le sezale jugan mɛ. Yeŋtɔ ye gbe trɔyi enɔtɔxu viɛ le majiji ɖe mɛ. ⁵ E gbe nu mɔ : amɛ ciwo yi nyi ega le miwo dɔmɛ ɖe kplɔ ŋ do yi a vayi do ehwɛ nii le ŋgbɔ nɔ mi kpɔ mɔ yi wu ehwɛ ɖe do yowo nɛ. ⁶ Fɛsutusu ɖe wa sɔwu ŋkeke amɛnyi alo amɛwo le wo gbɔ gbɔxwe yi gbe trɔvayi sezale jugan mɛ. E yi ŋkegbu ɔ, e va yi nɔ anyinɔnɔ le ahwɛxɔnu yi dɔ yi wo vayi kplɔ pɔlu vɛ. ⁷ Eyi ci pɔlu va ɖo ɔ, yuɖatɔ ciwo yi so zeluzalɛmu yi va sezale xa dii yi tɔ ehwɛ dofo nii. Ehwɛ lɔwo sugbɔ yi gbe sɛnŋ. Vɔ kpɔ wo ɖe sɛn eŋ sɔ enuɖe doasɛ mɔ nyɔnɔnui yi yowo nunu ɔ. ⁸ Vɔ ɔ, pɔlu hwlɛ eta nɔ yiɖeki yi nu mɔ : ŋ ɖe je agɔ ɖe o. ŋ ɖe da le yudatɔwo se ɖe ji o. Nɛnɛke yi ŋ ɖe gble ekɔ ɖe sɔso Mawuxwe lɔ nu alo yi wa enuɖe koɖo hlɔmutɔwo fiɔ gangan nɔ. ⁹ Fɛsutusu ji mɔ ye a wa xomɛvunu nɔ yuɖatɔwo yi ɖonu nɔ pɔlu mɔ : E ji mɔ ye a yi zeluzalɛmu nɔ wo a vayi ɖo kojo lɔ koɖo le enɔtɔxu le ŋmɛ nɔ ŋ a? ¹⁰ Pɔlu ɖonu nii mɔ : Hlɔmutɔwo fiɔgangan hwɛxɔnu ke yi ŋ le ke. Enɔtɔxu yi wo ɖo a ɖo kojo koɖo ŋ le nɛ. Shigbe lehan yi eoŋtɔ jeshii du nyuiɖe mɛ ɔ, ŋ ɖe je agɔ ɖe do yuɖatɔwo o. ¹¹ Nɔ ŋ je agɔ ɖe alo ŋ wa ŋɖe yi je nɔ eku ɔ, ŋ ɖe gbe mɔ wo ɖ'a wu ŋ o. Vɔ nɔ ŋ ɖe wa eɖe le ehwɛ ciwo yi amɛ lɔwo dodo ɔ nɔ ŋ mɛ ɔ, ese ɖe ɖe emɔ nɔ amɛɖe mɔ y'a sɔŋ dioashi nɔ wo o. ŋ biɔ mɔ Hlɔmutɔwo fiɔgangan lɔ ɖe ɖo kojo ŋ le hlɔmu jugan mɛ. ¹² Fɛsutusu yi ekpa koɖo yi ɖaŋɖetɔwo. Ci yi e ɖegbɔ ɔ, e nu nɔ pɔlu mɔ : co yi e nyi seza, efiɔgangan lɔ yi eji mɔ eyi a ɖo kojo lɔ nɔ eo ɔ, a yi gbɔ. ¹³ ŋkeke ɖewo godu ɔ, efiɔ aplipa koɖo belenisi va sezale jugan mɛ yi a va do egbe nɔ fɛsutusu. ¹⁴ Wo nɔ enɔtɔxu xɔ ŋkeke sugbɔ. Fɛsutusu ɖe nyɔ nɔ efiɔ lɔ mɔ : «Felisi cu ŋsu ɖeka do gakpamɛ.» ¹⁵ Ci yi ŋ yi zeluzalɛmu ɔ, avɔsatɔwo gawo koɖo yuɖatɔwo mɛganwo do ehwɛ nii yi mɔ nyɛ ɖe nu mɔ eyi nyɔ ɖe nyɔ. ¹⁶ Yi ŋ ɖo nu nɔwo mɔ nɔ amɛɖe wu ehwɛ ɔ, hlɔmutɔwo ɖe dɔnnɔ eto nii gbɔxwe yi kplɔɛ ni va kojo mɛ nɔ a va hwlɛn eta nɔ yiɖeki le amɛ ciwo yi dodo ɔ ehwɛ nii wo ŋ mɛ o. ¹⁷ Eyi wo va elɛ. E yi ŋkegbu etemanɔ ɔ, ŋ yi nɔ anyinɔnɔ do ehwɛxɔnu yi dɔ yi wo yi kplɔɛ vɛ nɔ ŋ. ¹⁸ Yi amɛ ciwo yi mɔ yi wu ehwɛ do yowo to wowo nyɔwo. Enu dɔndɔn ciwo yi enyɛ ŋ bubu ɔ mɔ yi wa sasa ɖe ɖe le wowo nyɔwo mɛ o. ¹⁹ Enyɔ ci ɖekɛ kpaŋ yi wo va nu yi nyi mɔ yowo dɔn enyɔ koɖyi sɔso yowo sɛnsɛn koɖo amɛ ɖeka ci yi wo yɔnɔ mɔ yesu nu. Yesu ci yi ku gan yi pɔlu nunu ɔ yi le agbe. ²⁰ Vɔ ci yi nyɛ ŋ ɖe nya lehan yi na so enyɔ lɔ do ɔ, ŋ biɔ pɔlu se mɔ yi lɔn mɔ wo yi ɖo kojo lɔ nɔ eye le wzeluzalɛmu mɛɛ. ²¹ Eyi pɔlu biɔ mɔ hlɔmutɔwo fiɔgangan lɔ yi a ɖo kojo lɔ nɔ eye. Taɖo ɔ ŋ ɖe gbe mɔ yi a va ɖui ɖaɖa seza go. ²² Eyi aglipa nu nɔ fɛsutusu mɔ : enyɛ can, ŋ ji mɔ nase enyɔ ci yi le enumɛ nɔ ŋsu cɛ. Fɛsutusu nu mɔ : Esɔ ɖe, a sii. ²³ Eyi eŋke lɔ nya oɔ, aglipa koɖo belenisi va ɖo ehwɛxɔnu lɔ koɖo sɔjawo gawo koɖo amɛ ŋkuvileji ciwo yi le jugan lɔ mɛ yi le zinguidi na a. Fɛsɛtusɛ dɔ yi wo vayi kplɔ pɔlu vɛ. ²⁴ Eyi enu mɔ : Efiɔ aglipa koɖo miwo kpu ciwo yi le ehwɛxɔ lɔ nu, mi kpɔ ŋsu cɛ ɖa. Yuɖatɔ sugbɔtɔ dodo ehwɛ nii le ŋgbɔ le elɛ koɖo ezluzalɛmu yi dodo ɔ axwa mɔ yi ɖe gbe ɖo a nɔ agbe o. ²⁵ Enyɛ yɛ ɔ, ŋ kpɔ mɔ yi ɖe wa enuɖe ci yi je nɔ eku. Vɔ ɔ, yiŋtɔ biɔ mɔ hlɔmutɔwo fiɔgangan yi a ɖo kojo nɔ eyr. Ci yi ele nɛnɛ ɔ, ŋsɔ gbeta mɔ na ɖui ɖaɖɛɛ. ²⁶ Kpɔ enyɔ ɖe ɖe le ŋ shi yi na ŋwlɛ so nu ɖaɖa efiɔgangan lɔ. E yi dɔ taɖo yi ŋ dɔ yi wo kplɔɛ va miwo ŋmɛ, veviɖe va ewɔ efiɔ aglipa ŋmɛ. Ganɔmɛ ɔ, nɔ miwo biɔ enyɔwo yi se ɔ, ma kpɔ enyɔ a ŋwlɛ so nu. ²⁷ Do ŋ kpɔ yi ɖe nyɔ mɔ wo a cucu gakpamɛtɔ ɖaɖa hlɔmu yi wo ɖo ŋwlɛ enu ci yi hwɛ wo ɖoɖo nii bɔ do nu go.