¹ Pɔlu ŋkuvi do amɛ ciwo yi nɔnɔ sɛnsɛn hwɛxɔnu lɔ ji yi nu mɔ nɔvinyɛwo anyi yixamɛ vo ɖo kpɔ afɛn ɖe le ŋ nu le agbe ci mɛ yi ŋ nɔ kaka va sɔ ɖo egbɛ ɛ le Mawu ŋmɛ go ŋ ɖe kpɔ mɔ ŋje agɔ ɖe do amɛɖe o. ² Avɔsatɔ gangantɔ ananiyasi nu mɔ amɛ ciwo yi sɔ pɔlu mɔ wo ɖe sɔ alɔ gban enu nii. ³ Eyi Pɔlu nu nɔ Ananiyasinmɔ Mawu yi axo wu eglikpu ci yi wo shi kalo ji nɔ gbali e nɔ anyinɔnɔ do enɔtɔ mɔ ye a ɖo kojo koɖo enyɛ do ese ji vɔ trɔ da le ese ji mɔ ɖe gban enu nɔ enyɛ. ⁴ Amɛ ciwo yi le enɔtɔxu nu mɔ e le Mawu vɔsatɔ gangantɔ zu ɔ. ⁵ Pɔlu ɖonu mɔ ŋ ɖe nya sasa mɔ avɔsatɔ gangantɔ yi e nyi o nɔvinyɛwo le nyɔnɔnui mɛ ɔ wo ŋwlɛ do Mawu nyɔ wema mɛ mɔ amɛɖe ŋgbe nu enyɔ vuin ɖe sɔ so amɛ ci yi nyi ega nɔ yi jukɔn nuo. ⁶ Pɔlu nya mɔ amɛ lɔwo do mɛtɔ ɖɖekawo nyi dasukitɔwo yi ebuwo nyi falisitɔwo eyi e tɔ axwa dodo le sɛnsɛn hwɛxɔnu lɔ nunuɔ mɔ nɔ vi nyɛ wo enyɛ ɔ falisitɔ ŋ nyi falisitɔwo yi ji ŋ ci yi ŋ kpɔkpɔ emɔ amɛkukuwo a va fɔn so ekuwodi taɖo yi wo le ŋ va kojo mɛ le elɛ. ⁷ Gacimɛ yi Pɔlu nu nɛnɛ ɔ falisitɔwo koɖo sadukiɔwo tɔ enyɔ dɔndɔn le wowo nɔnɔwo mɛ yi eha do eve. ⁸ Ɖo ɔ sadukitɔwo nunuɔ mɔ fɔnfɔnsokuwodi ɖi li o kpɔ Mawu cikplɔtɔ koɖo gbɔngbɔnwo ɖo li vɔ ɔ falisitɔ wowo nɛnɛ nuwo leŋ ji se. ⁹ Axwa dodo lɔ sɛnsɛn e do ji eyi esedɔwatɔ ɖeka ciwo yi le falisitɔwo gbɛ mɛ so je ete yi nu koɖo ŋsɛn mɔ mi ɖe kpɔ evuin ɖe le ŋsu hunnɔ nuo gbɔngbɔn ɖe alo Mawu dɔla ɖe han yi xo nuxu nii. ¹⁰ Enyɔ lɔ dɔndan gbe va sɛnsɛn eŋ do ji sugbɔ kaka hlomutɔwo sɔjawo ga va tɔ vɔnvɔn mɔ wo o va le Pɔlu yi a driin eyi e ɖe gbe nɔ sɔjawo mɔ wo ɖe ɖo mɛlɔwo mɛ yi a xɔ pɔlu le amowo shi yi a gbe kplɔɛ yi sɔja wo nɔxu lɔ. ¹¹ Le ezan ci yi kplɔɛ do mɛ ɔ axwetɔ ɖe yiɖeki doasɛ nɔ Pɔlu yi nu nii mɔ ŋgbe vɔ no e ɖe xunu nɔ ŋ le zeluzalɛmu jugan mɛ elɛ vɔ e zian mɔ ƥa gbe vayi wɛɛ le hlɔnu jugan mɛ hɛnnɛ. ¹² E yi ŋkegbu nyidin ɔ yuɖatɔ ekawo bla enu do Pɔlu nu wo ta enu mɔ yowo ɖa ɖu alo a nu enuɖƒe gbɔxwe yi a wui o. ¹³ Amɛ ciwo yi bla enu Pɔlu nu su egbɔ wu eka. ¹⁴ Wo vayi kpɔ avɔsatɔ wo gawo koɖo mɛganwo mɔ mi ta enu teŋ mɔ nɔ mi ɖe wu Pɔlu ɔ mi ɖa ɖu enuɖe o. ¹⁵ Ci yi e lɛ nɛnɛ ɔ mi wo mi toi koɖo sɛnsɛn hwɛxɔnu gawo yi a biɔ sɔso sɔjawo ga lɔ gbɔ yi ɖe kplɔ Pɔlu vɛ nɔ mi shigbe mi gbe jijiɛ a biɔ enyɔ yi se nŋuiɖe han nɛnɛ mi wo yɛ ɔ mi le egbesɔsɔ yi a wui gbɔxwe yi a va ɖo mi gbɔ le e lɛ. ¹⁶ Vɔ ɔ Pɔlu ŋiniɛyɔ vi se enu ci yi wo bla ŋiniɛ nu eyi e yi sɔjawo nɔxu lɔ yi fi etofi nɔ Pɔlu le enɔlɔ. ¹⁷ Eyi Pɔlu yɔ sɔ jakavehowiga lɔ wo domɛtɔ ɖeka yi nu nii mɔ kplɔ ɖajɛvi cɛ yi miwo ga lɔ gbɔ eɖo enyɔɖeka a nu nii. ¹⁸ Eyi e kplɔ ɖajɛvi lɔ yi yi nu nɔ wowo ga lɔ mɔ gakpamɛtɔ Pɔlu mɔ enyɛ ɖe kplɔ ɖajɛvi cɛ sɔ yi wu gbɔ nɔ enyɔ ci yi le shi a nui n wu. ¹⁹ Cɔ ja wo ga lɔ le alɔnu nɔ ɖajɛvi lɔ yi kplɔɛ yi azɔge yi biɔ enyɔ lɔ yi se mɔ nyɔ hinɖe yi e jiji a nu nɔ ŋ ɔ. ²⁰ Ɖajɛvi lɔ ɖonu nii mɔ yuɖatɔwo bla enu do Pɔlu mɔ yowo a biɔ so gbɔ mɔ eo ɖe kplɔɛ va sɛnsɛn hwɛxɔnu nɔ yowo esɔ shigbe wo gbe jiji a biɔ enyɔ yi se nyuiɖe do ji nɛnɛ. ²¹ Vɔ ɔ ŋgbe lɔn do ji nɔ wo o ɖo ɔ amɛ lɔ wo su egbɔ sɔwu eka yi jijiɛ do emɔ ji ɖɛ nɔ Pɔlu wo ta enu mɔ nɔ yowo ɖe wu Pɔlu wo ta enu mɔ nɔ yowo ɖe wu Pɔlu ɔ yowo ɖa ɖu enu alo a nu enuɖe o wo leegbesɔsɔ ɖɛ ɛ yi nɔ nɔ mɔ eo ɖe ɖe egbe nɔ yo wo. ²² Sɔjawo ga lɔ nu nɔ ɖajɛvi lɔ mɔ yi ŋgbe vayi nu nɔ amɛɖe o mɔ yi ɖe yi. ²³ Le yi godu ɔ sɔjawo ga lɔ yɔ sɔjakaweho wigawo domɛtɔ amɛve yi nu nɔ wo mɔ mi bɔ sɔja sanŋdire (200) koɖo esɔkutɔ kahowi howo (70) koɖo ehwandatɔ sanŋdive (200) nɔ wo pleŋ a drado yi a yi sezale jugan mɛ do ezangashiɖe kɛ mɛ nu. ²⁴ Mi dra esɔwo do yi a kɔ Pɔlu yi nɔ ekanjipɔtɔ felisi mi kpɔkpɔ Pɔlu lɔ nɔ enuɖe ŋbe wɛɛ gbɔxale nɔ mia vayiɖo. ²⁵ Le enyɔ hunnɔwo goduɔ, e ŋwlɛ wema doashi nɔ wo. ²⁶ Wema lɔ nu mɔ :«klodiwusu lisiyasi yi ŋwlɛ wema cɛ ɖaɖa eo bubutɔ ekanjikpɔtɔ felisi. ŋ do egbe ɖaɖa eo. ²⁷ Yudatɔwo le ŋsu yijiji a wui. Eyi nyɛ koɖo anyi sɔjawo vayi xɔɛ le woshi. Do ŋ va se mɔ hlɔmujuvi yi yi nyi . ²⁸ ŋji mɔ jeshi ehwɛ ci yi e wudo yudatɔwo yi kplɔɛ yi wowo sɛnsɛn hwɛxɔ nu. ²⁹ ŋ va mɔŋje mɛ mɔ wowotɔwo sewo nu yi wo dodoɔ ehwe nii do. ŋsu lɔ ɖe je agɔ e kaka a je nɔ eku alo gakpa mɛ o. ³⁰ Le yɛ godu ɔ, wo vafi etofi nɔ ŋ mɔ yudatɔ ɖekawo bla egbe do nu. Eyi na taɖo yi ŋ dɔ yi wo kplɔɛ vɛ nɔ eo zedeɖeka. ŋgbe lɔn nɔ amɛ lɔwo mɔ wo ɖe vayi do ehwɛ lɔ nɔ pɔk=lu le eo gbɔ. ³¹ Sɔjawo w do enyɔ ci yi wo nu nɔ woji yi kplɔ pɔlu hɛnyi antipatrɔsu jugan mɛ ezan lɔ mɛ. ³² Ci yi eŋke ɔ, sɔja ciwo yi tɔ afɔ trɔgbɔva wowo nɔxu yi sɔja esɔkutɔ lɔwo ɖekɛ kplɔ pɔlu yi wo le emɔ kpɛtɛ do enu yi ɖe do. ³³ Ci yi wo vayi ɖo sezale jugan mɛ ɔ, wo sɔ wema lɔ jɔ nɔ ekanjikpɔtɔ lɔ yi gbe doasɛ pɔlu nii. ³⁴ Ekanjikpɔtɔ lɔ hlɛn wema lɔ kpɔ yi biɔ pɔlu se mɔ kɔxwi hinɖe mɛ yi yi so mɛ. Do e se mɔ yi so silisi kanmɛ. ³⁵ Eyi ekanjikpɔtɔ lɔ nu nii mɔ : nɔ amɛ ciwo yi do doɔ ehwɛ nɔ eo va va ɔ, biɔ enyɔwo eo se. Ci yɛ vayi ɔ, e ɖe egbe mɔ wo ɖe kplɔ pɔlu yi Elodi gbogbu mɛ.