¹ hwecinu yi Apolosu le kolɛntiɔ; Pɔlu yɛ to ekpowo kan mɛ yi yi Eƒɛzi. E kpɔ nukplavi ɖekawo le enɔtɔxu. ² Yi nu nɔ wo mɔ : « Mi xɔ gbɔngbɔn kɔkɔɛ lɔ hwecinu yi mi xɔse a?» wo ɖonu nii mɔ: « Mi ɖe se yi wo xo nuxu sɔso a gbɔngbɔn kɔkɔɛ ɖe nu kpeti o.» ³ Eyi Pɔlu nu mɔ:« Mawushi ci yi wo le nɔ mi ɔ?» wo ɖonu nii mo: « Mawushilele ʒan tɔ.» ⁴ Eyi Pɔlu nu mɔ : « Amɛ ciwo yi lɔn mɔ yowo tro yowoɖekiwo yi a ji ʒan le no Mawushi nɔ. Ʒan le nɔ Mawushi nɔ. Ʒan nu nɔ Israyɛli jukɔn mɔ yi ɖe xɔ amɛ ci yi le godu nɔ eye yi gbɔgbɔ ji se. Amɛ lɔ yi nyi Yesu.» ⁵ Ci yi amɛ lɔwo se enyɔ hunnɔwo ɔ, wo na yi wo le Mawushi no wo le Axwetɔ Yesu nyikɔmɛ. ⁶ Pɔlu sɔ alɔ daɖo eta nɔ wo yi Gbɔngbɔn kɔkɔɛ ɖyiva wo ji yi wo tɔ egbe ebu ebuwo dodo yi tɔ eŋɛnnyui lɔ dodo shigbe eŋɛnyuidotɔwo tɔ nɛnɛ . ⁷ Amɛ lɔwo kpu nyi wive han wo. ⁸ Eyi Pɔlu yi yi to nuxu xoxo nɔ amowo le Mawusɛnxu lɔ koɖo kankandoji sɔnanɔ wleci ametɔn . E xono nuxu sɔso Mawu ƒiɔɖuxu lɔ nu yi te nɔ kpɔ nɔ wo a nya mɔ ye nyɔ nyi nyɔnɔnui. ⁹ Vɔ ɔ, amɛ sugbɔtɔ shinnɔ ŋta yi gbenɔ mɔ yowo d'a to emɔ ci yi axwetɔ lɔ mɔ wo ɖe to o yi nunuɔ enyɔ ƒluƒluwo nu do le lehan yi Axwetɔ ji mɔ wo ɖe nɔ agbe do lo nu le ameshamɛ ŋmɛ. Eyi Pɔlu kplɔ nukplavi lɔwo yi so le wo gbɔ yi yi Tilanɔsu suklu kpamɛ koɖo wo. Gbeɖeka duu ɔ, Polu tonɔ Mawu nyɔ mɛ koɖo nukplavi lɔwo le enɔtɔxu. ¹⁰ Nɛnɛ yi e wɛwɛ kaka nɔ exwe amɛve nɛ. Eyi amɛshamɛ ci yi le Azi kan hunno lo mɛ, Yuɖatɔwo koɖo glɛkitɔwo se mavɔ mavɔ tɔ lɔ nyɔ. ¹¹ Gahunnɔmɛ ɔ, Mawu wawa enujiŋ gangano to do Pɔlu ji. ¹² Kaka amowo sɔnɔ atroviwo koɖo avɔviwo tɔnɔ gotu nii yi sɔyi tɔnɔ edɔnɔwo yi edɔ minɔ nɔ wo. Nɛnɛke wo gbe sɔ wo yi tɔn amɛ ciwo yi gbɔngbɔnvɔnwo ɖeɖeɛ efun nɔ yi wo tonɔ le ame lɔwo mɛ nɛ. ¹³ Yuɖatɔ ɖeka ciwo yi ɖyinɔ esa to aƒi, aƒiwo yi a nya nya gbɔngbɔnvɔnwo le ame wo ma can tenɔkpɔ mɔ yowo a sɔ axwetɔ Yesu nyiko nya gbɔngbɔnwo. wo nu nɔ gbɔngbɔnnɔnwo mo: « Ŋ ɖeɖeɛ egbe do mi ji mo miwo ɖe to le Yesu ci nyɔ yi Polu donɔ axwa yi nunɔ nyiko mɛ.» ¹⁴ Amɛ amadrɛ ɖekawo yi wanɔ nɛnɛ. Wowo yi nyi Yuɖatɔwo vɔsatɔ gangan ci yi wo yɔonɔ mɔ seva eviɛwo. ¹⁵ Vɔ gbeɖeka ɔ, gbɔngbɔnvɔn va nu nɔ wo mɔ: « ŋ jeshi Yesu ɖɛ yi nya amɛ ci yi Pɔlu nyi ɖɛ. Vɔ amiwo yɛ ɖee, mɛ e mɛ miwo nyi ɔ?» ¹⁶ Eyi amɛ ci gbɔngbɔnvɔn ɖeɖê efun nɔ lɔ teje wo ji yi do egbla koɖo wo pleŋ koɖo ŋsɛn kaka ɖu wo ji. E do akpa wo nu yi ɖe wo do ama yi wo shi to le axwe lɔ mɛ. ¹⁷ Amɛ ciwo kpu yi le Aƒɛzi jugan mɛ, yuɖatɔwo koɖo Glɛkitɔwo, se enu ci yi jɔ do sava evie lɔwo ji. Enu lɔ ɖyi vɔnvɔn no wo yi wo kanƒu axwetɔ Yesu nyikɔ. ¹⁸ Amɛ ciwo yi va trɔ xɔsetɔ domɛtɔ sugbɔ ɖewo wa hunhun enuvɔn ciwo yi wo wa sasavayi me le ameshamɛ wo ŋmɛ. ¹⁹ Ame sugbɔtɔ ci yi wanɔ Maziki sasa lɔ wowo wema mazikitɔwo ve yi va tɔtɔ ezo wo le ŋmɛ nɔ amɛshamɛ. wo drɔ wema lɔwo ho kpɔ yi kpɔ mo yi yi gajunho kotokun kahowo (50 000). ²⁰ Nɛnɛ yi Mavɔmavɔtɔ ŋsɛn na yi e yi nyɔ lɔ kekekeɛ eta yi gbe ɖoɖo ɔ ŋsɛn do ji do nɛ. ²¹ Le enu ciwo yi jɔ hunnɔwo godu ɔ, Pɔlu va can le yiɖekimɛ mɔ yea esa a todo Maseduwanu koɖo Akayi kan mɛ keŋ yi a yi Ʒeluzalɛmu jugan mɛ. E nu mɔ: « Nɔ n va so le Ʒeluzalɛmu ɔ ŋ ɖo a gbe yi kpo Hlomu jugan me ke.» ²² Eyi e dɔ e yi kpesonutɔ amɛve, Timɔte koɖo Elasi ɖaɖa Maseduwanu yi yiŋtɔ gbe ci Azi kan lo mɛ viɖeka. ²³ Hwenɔnu ɔ, ʒingidi ɖeka xo le Eƒɛzi jugan me sɔso emɔ ci yi axwetɔ ji mɔ wo de to nu. ²⁴ Gajenuwatɔ ɖeka li. Wo yɔɛni mɔ Demɛtriwusu e sɔnɔ ehokɔ mɛnɔ voju ci yi wo yɔnɔ mɔ atemisi xɔvi hanwo. E sanɔ wo yi cunɔ eƒɛn sugbɔ nɔ amɛ ciwo yi wanɔ edɔ koɖi. ²⁵ Gbeɖeka ɔ, Demɛtriwusu va bɔ ame lɔwo koɖo amɛ ciwo yi wanɔ edɔ hunnɔ hanwo yi nu mo: «Anyi xlɔwo, mi nya mɔ edɔ hunnɔ yi na yi mi kpɔ yi ɖuno nɛ! ^{26 27} Vɔ mi trɔ kpɔkpɔ yi gbe seseɛ mɔ Pɔlu hunnɔ va nunuɔ mɔ voju ciwo yi agbetɔ lɔwo mɛ ɖaɖɛ ɖe nyi enu yi wo a sɛn o. E wɛɛ kaka ame sugbɔ xɔ egbe do e yi nyɔ ji le Efɛzi jugan mɛ elɛ kaka je Azi kan lo pleŋ mɛ. Enyɔ hunnɔ d'a va gble edɔ nɔ mi ba? D'a na yi amɛɖe can d'a gbe va kpɔkpɔ voju Atemisi xɔ do enu gbaliji ba? D'a na yi amɛwo can d'a gbe mi bubu ɖoɖo nɔ voju gangan hunnɔ ci yi wo sɛnnɔ le Azi kan lɔ mɛ koɖo xexe lɔ kpu mɛ sasa ba? Nɔ e le nɛnɛ ɔ, a nyi a bu gangangangan e yi tɔ.» ²⁸ Ci yi amɛ lɔwo se enyɔ hunnɔ wo ɔ, wo shin xomɛ yi tɔ axwa dodo mɔ: « Voju gangan yi nyi Atemisi. Eƒɛzitɔwo voju!» ²⁹ Eyi zingidi xo le jugan lɔ pleŋ me amowo teje zingidi lɔ mɛ vayi le Gayiyusi koɖo Alishitaki, Maseduwonutɔ ciwo yi kplɔnɔ Pɔlu do. Nɛnɛ ɔ, wo kpu lɔ ahwa yi dɔn wo yi jugan lo bɔbɔwaxu. ³⁰ Polu yɛ ji mɔ ye a kplɔ wo do le ahwakɔn lo mɛ. Vɔ ɔ, nukplaviwo gbe nii. ³¹ Azi kan lɔ me ƒiɔhadɔwatɔ gangan ɖeka ciwo yi nyi exlɔ koɖo Pɔlu dɔ amowo ɖaɖɛɛ mɔ yowo ɖe kuku mɔ yi ŋgbe yi jugan bɔbɔwaxu lɔ o. ³² Nɔ amɛɖewo dodo ɔ axwa yi le nyɔɖe nuɔ ɔ, mɛbuwo a dodo ɔ, axwa a le ebu nu ɔ. Ʒingidi nana le bɔbɔ lɔ mɛ kaka amɛ sugbɔtɔ ŋlɔbe enu ci agbe yi e to. ³³ yuɖatɔwo sɔ ŋsu ɖeka ci yi wo yɔnɔ Alɛsandri ɖaɖa doŋkɔ nɔ wowoɖekiwo yi amɛ ɖekawo ɖeɖe ɛ enu jɔjɔ gɔnmɛ nii le ahwakɔn lo mɛ. Eyi alɛsandri kɔ alɔ yi eji yi a xo nuxu a sɔ hwlɛn eta nɔ yiɖeki le jukɔn lɔ ŋkɔ. ³⁴ Vɔ ɔ, ahwakɔn lɔ do jeshi yi mɔ Yuɖatɔ yi nyi . Eyi amɛshamɛ bɔ tɔ axwa dodo sɔnanɔ egaxoxo yi nyi atemisi Efɛzitɔwo voju.» ³⁵ Le vɔvɔnu ɔ, jugan lo wemajikpɔtɔ kaka yi ahwakɔn lo bɔ enu yi enu mɔ:« eƒɛzitɔwo, mi ɖe nya mɔ miwo jugan yi nyi voju gangan Atemisi xɔ koɖo voju lɔ cikpakpɛ ci yi juin so jeŋkuimɛ ɔ ? ³⁶ Amɛɖe d'a gbe hunnɔ yɛ o. Eyi na taɖo ɔ, mi xɔ gbɔngbɔn nɔ mi ŋgbe va a enuɖe tamɛmabukpɔ o. ³⁷ Ɖo amɛ ciwo yi mi kplɔ va elɛ ɖe ŋble enuɖe le voju lo xɔmɛ o. Nɛnɛke yi wo ɖe zu voju nɛ. ³⁸ Eyi na taɖo nɔ Demɛtriwusu koɖo e yi kpenawo ɖo ehwɛ ɖe yi a do nɔ mɛɖe ɔ, Kojoɖo o ŋkekewo li yi kojoɖotɔwo li. Wo ɖe yi do ehwɛ nɔ amɛ lɔwo le enɔ. ³⁹ Nɔ enyɔ bu ɖe gbe le mi shi ɔ, wa gbe va bɔ yi a nu do nu shigbe lahan yi miwo se nui do nɛnɛ. ⁴⁰ Nɔ mi ɖe kpɔ nyuiɖe ɔ, wwo a va do ahwe nɔ mi mɔ miwo ƒɔn egu do ƒisha nu yi a nyi ʒingidi egbe tɔ taɖo? Ɖo enyɔ ɖe ɖe li yi nɔ wo biɔ mise, mii a nu mɔ eyi jɔ yi bɔ ahan o.» ⁴¹ Ci yi wemajikpɔtɔ lɔ nu enyɔ lɔwo ɖegbo ɔ, e nu bɔbɔ lɔ mɔ wo ɖe kaka.