¹ Le esaɖyiɖyi lo mɛ ɔ, Pɔlu vayi ɖo Dɛbe jugan mɛ, so le enɔ yi yi Silitɔ jugan mɛ. Nukplavi ɖeka le enɔ lɔ yi wo yɔɛni mɔ Timɔte. Enɔlɔ nyi Yuɖatɔ gbɔxwe va trɔ Klisotɔ . Vɔ ɔ, edalɔ nyii Glɛkitɔ. ² Nɔvi Klisotɔ ciwo yi le Lisitɔ koɖo Ikoniwɔmu ɖenɔ kunu nyuiwo so Timɔte lɔ nu . ³ Pɔlu ji mɔ Timɔte a kplɔ eye do atɔ edɔ wawa koɖo eye a jeŋkɔ. Eyi ci yi Yuɖatɔ ciwo pleŋ yi le ekan hunnɔ mɛ nya mɔ Glɛkitɔ yi nyi Timɔte edalo ɔ, Pɔlu so evo nii. ⁴ Nɔ wo ɖo jugan ɖe mɛ ɔ, wo ɖenɔ gbeta ciwo ji yi amɛdɔdɔwo koɖo Ʒeluzalɛmu hamɛmeganwo ɖo ekpe nɔ wo a wa do wo . ⁵ Eyi Mawu ha lɔwo liliɛ eke le xɔse mɛ yi gbe susuɔ egbɔ do ji ŋkeŋke. ⁶ Ci yi gbɔngbɔn kɔkɔɛ gbe nɔ Pɔlu koɖo silasi mɔ wo ŋgbe nu Mawu nyo lɔ le azi kan mɛ ɔ, wo to Flizi koɖo Galloti kanwo mɛ va yi. ⁷ Gacimɛ yi wo va gogogo ɔ Misi kan lɔ mɛɔ, wo ji mɔ yewo a yi Bitini kan mɛ, vɔ kpɔ Yesu gbɔngbɔn de ɖe emɔ nɔ wo o. ⁸ Eyi wo sui to Misi kan mɛ yi yi Trowasi jugan mɛ. ⁹ Ezan mɛ ɔ, Pɔlu kpɔ maseduwanuto ŋsu ɖeka ŋtegantɔ yi e le ete yi ɖeɖe e kuku nii mɔ: « Va Maseduwanu yi a do alɔ mi.» ¹⁰ Ci yi Pɔlu kpɔ ŋtegan hunnɔ ɔ, mi mɔŋjemɛ mɔ Mawu yi yɔyɔ mi mɔ miwo ɖe hɛn eŋenyui lɔ sɔ yi nɔ amowo le Maseduwanu kan lo mɛ. Eyi drado yi a yi enɔtɔxu. ¹¹ Nɛnɛ ɔ, mi ɖo etɔjihungangan ɖeka le Trowani jugan lɔ mɛ yi yi samɔtasi tɔdomɛju mɛ zeɖeka. E yi ŋkegbu ɔ, mi yi Nɛyapolisi juganmɛ. ¹² Eyi mi va so le eno yi zɔn yi Filipi. Filipi nyi jugan ci yi gangna sɔwu le Maseduwani kan lɔ mɛ yi gbe nyi jugan ci yi Hlɔmutɔwo kpa ace nɔ. Mi nɔ enɔtɔxu ŋkeke ɖewo gbɔxwe va so. ¹³ Gbɔngbɔngbe ɔ, mi to le jugan lɔ mɛ le axa nɔ tɔhwin ɖeka ƒini ci mi bubu ɔ mɔ mi a kpo Yuɖatɔwo kuiƒanwaxu ɖe le. Mi nɔ anyinɔnɔ yi xo nuxu nɔ nyɔnu ciwo yi bɔdo enɔ lɔ. ¹⁴ Nyɔnu ɖeka le nyɔnu lɔwo domɛ yi so Tiyati jugn mɛ. Wo yɔɛnimɔ Lidi yi e sanɔ avɔ adoduiwo yi sɛnnɔ Mawu. E sesɛ enyɔ ciwo yi Pɔlu nunu ɔ yi Tɔhonɔ hun eji nii yi e xɔ wo. ¹⁵ Wo le mawu shinɔ nyɔnu lɔ koɖo yi xomu pleŋ yi e yɔ mi yi nu nɔ mi mɔ: « Nɔ mi kpɔ mɔ ŋxɔ axwetɔ ji se nya o , mi a ze ŋ gbɔ. » E tɛ do mi ji nɔ mi a lɔn. ¹⁶ Gbeɖeka ci yi mi yi yiɛ kuifanwaxu ɔ, edɔwavi nyɔnu ɖeka va do ego mi. Enukankan gbɔgbɔn le mɛ yi nanɔ yi e nunɔ enu ci yi gbɔgbɔ yi a va jɔ nɔ amowo. E yi gawo kpɔnɔ aho sygbɔ le enu ci yi e kannɔ lɔ mɛ. ¹⁷ Nyɔnu hunnɔ kplɔ miwo koɖo Pɔlu do yi yi dodo ɔ axwa mo: « Mawu ci yi eji boo dɔwaviwo yi nyi amɛ cɛwo! wo le emɔ ci yi wo a to yi a kpɔ hlɛngan dre ɔ nɔ mi!» ¹⁸ Nɛnɛ yi nyɔnu wawa enu lɔ kaka sɔnanɔ ŋkeke ɖewo nɛ. Kpɛtɛkpɛtɛ lɔ ɔ, enyɔ lɔ va do dɔmɛzi nɔ Pɔlu yi e trɔkpɔ godu yi nu nɔ gbɔngbɔn lɔ mɔ: « Le Yesu Kliso nyikɔ mɛ, ŋ ɖeɖeɛ egbe wu ji, to le nyɔnu lo mɛ!» Eyi zeɖeka vɔ, gbɔngbɔn lɔ to mɛ. ¹⁹ Nyɔnu lɔ gawo va kpɔ mɔ emɔnu ɖe ɖe gbe li yi yowo a kpɔ eho to do nyɔnu lɔ ji o. ²⁰ Eyi wo le Pɔlu koɖo Silasi yi wo hɛnyi dodoxu le jumɛ gawo ŋkɔ. Eyi wo kplɔ wo yi Hlɔmutɔwo kojoɖotɔwo gbɔ yi nu mɔ: Yuɖatɔwo yi dodo ɔ hannyahanya do miwo jugan lo mɛ. ²¹ Wo kplakpla ekɔ ciwo yi wo ɖe emɔ mɔ miwo Hlɔmutɔwo a xɔ alo nyi amowo.» ²² Ahwakɔn lɔ can gbe trɔkpe Pɔlu koɖo Silasi. Kojoɖotɔwo dɔ yi wo ɖe awu nɔ wo yi do eba nɔ wo. ²³ Ci yi wo do eba nɔ wo veviɖe ɖegbɔ ɔ, wo vayi cu wo do gakpamɛ yi nu nɔ gakpajikpɔtɔ lɔ mɔ yi ɖe le ŋkuvi do wo nu. ²⁴ Zeɖeka ci yi wo ɖe egbe lo nii nɛnɛ vɔ, e sɔ wo do exɔ dodomɛtɔ mɛ yi do eka cikpu aƒɔwo nɔ wo. ²⁵ Ezanmɛ shigbe ezangawive han nɛnɛ ɔ, Pɔlu koɖo Silasi wawa kuiƒan yi te jiji ɛ eha yi kankan Mawu. Gakpamɛtɔ kpɛtɛwo ɖo eto yi seseɛ. ²⁶ Eyi zeɖeka vɔ, nyigban hunhun sɛŋsɛŋ yi gakpa lɔ gɔnmɛ ɖokpewo hunhun. Ehɔnwo pleŋ hun Zeɖeka yi ekawo cu le aƒɔwo nɔ gakpamɛnɔtɔwo pleŋ. ²⁷ Gakpajikpɔtɔ lɔ nyɔ yi kpɔ gakpɔxɔ lɔ hɔnwo le hunhun. E budo mo gakpamɛnɔtɔ lɔwo shi yi ɖe dekpi ti le aku mɛ yi a wu yiɖeki. ²⁸ Eyi pɔlu do axwa sɛnŋsɛnŋ ɖe mɔ: « Ŋgbe wa enuvɔn ɖe koɖo ewɔɖekio! mi kpu le ekɛ» ²⁹ Gakpajikpɔtɔ lɔ vɔn vɔn kaka yi hunhunɔ ɖeɖeɖeɖe yi dɔ yi wo sɔ kaɖigban vɛ nii yi e ɖe eblɛ yi ɖo exɔ lɔ mɛ yi je eklo ji do akɔn mɛ nɔ koɖo Silasi. ³⁰ E dɔ yi wo kplɔ wo ti yi nu mɔ: « Mɛganwa, ŋde yi na wa yi a kpɔ hwlɛnganɔ?» ³¹ Eyi wo ɖo nu nii mɔ: « xɔ axwetɔ Yesu ji se yi a kpɔ hwlɛngan ewɔ koɖo awu tiomu jpu.» ³² Eyi wo nu Mavɔmavɔtɔ nyɔ nii koɖo amɛ ciwo pleŋ yi le e yi xwemɛ. ³³ Gakpajikpɔtɔ lɔ kplɔ wo ezan hunnɔ mɛ yi vayi klɔ akpawo nɔ wo. Eyi le Mawushi nɔ yi koɖo yi mɛwo. ³⁴ E dɔ yi wo kplɔ Pɔlu koɖo silasi eyi xwe yi e da enu yi wo ɖu. Eji jo wo mɔ yewo xɔ yewo xɔ Mawu ji se. ³⁵ Ci yi eŋ ke ɔ, Hlɔmutɔwo kojotɔwo do kpouishiwo ɖaɖa gakpajikpɔtɔ lɔ mɔ yi ɖe tashi pɔlu Silasi nɔ wo a yi. ³⁶ Eyi e vayi nu nɔ Pɔlu koɖo Silasi mɔ: «kojoɖotɔwo do eŋɛ ɖaɖa mɔ enyɛ ɖe tashi mi. E yi na taɖo ɔ, mi a nyuiɖe. ³⁷ Vɔ ɔ, Pɔlu nu nɔ wo mo: « Kojoɖotɔ lɔwo dɔ yi wo xo mile amɛshiamɛ ŋmɛ yi sɔ mi yi cu do gakpamɛ, Kojomaɖo ganŋkegan e nyi hlɔmu jumɛviwo yi mi nyi . Ecɛyɛ ɔ, le yi enyi yi wo jijie a va tashi mi le bebemɛ ɔ? A nyi nɛnɛ go! Wowoŋtɔwo ɖe va tashi mi.» ³⁸ Kpo vishi ciwo yi wo dɔ ɖaɖa lɔwo vayi ɖe enyɔ lo nɔ kojotɔ hlɔmutɔ lɔwo nɛnɛ. Eyi vɔnvɔn ɖo wo gacimɛ yi wo va se mɔ Pɔlukoɖo Silasi nyi hlɔmutɔwo. ³⁹ Eyi wo va Pɔlu koɖo Silasi gbɔ yi va ɖe kuku nɔ wo yi Tashi wo keŋ wo keŋ yi biɔ sɔso wo gbɔ mɔ wo ɖe so le Filipi jugan lo mɛ. ⁴⁰ Ci yi koɖo Silasi to le gakpamɛ ɔ, wo yi Lidi xwemɛ yi vayi kpɔ nɔvi Klisotɔwo yi do ŋsɛɛn lanmɛ nɔ wo keŋ yi so le jugan lɔ mɛ.