¹ Nyao ɔ, mi nya mɔ nɔ e nyi mɔ wo gban ci kpajɛxɔ yi nyi nɔxu nɔ mi le nyigban cɛ ji can ɔ, exɔcucu ɖeka le mi shi le jeŋkuisimɛ yi nyi Mawu nuwawa. Nɔxu mavɔmavɔ ɖeka yi e nyi yi. ² Ɔ, mi le edo nyinyɛ le nɔnɔmɛ cɛɛ mɛ. Mi jijiɔ veviɖe mɔ mi a sɔ nɔxu jeŋkuisimɛ lɔ. ³ Yi nyi mɔ nɔ mi vayi ci mɛ ɔ, Mawu ŋgbe va kpɔ mi le amaama. ⁴ Ɖo ci mi kpɔtɔ le kpajɛxo ci yi nyi miwo lankpu cɛɛ mɛ ɔ, mi nyinyiɛ edɔ, ɖo enyɔwo zin mi ji. Ɖo ɔ, d'e nyi mɔ mi jijiɔ mɔ wo le ɖe nyigban ji gbaza cɛ soso ekɔnu nɔ mi yɔ go. Vɔ ɔ, mijijiɔ mɔ wo le do jeŋkuisimɛ gbaza nɔ mi nɔ agbe a sɔ enukuku mi. ⁵ Mawu ci yi na gbɔngbɔn lɔ dɔ kunuwo mi yi dra mi do daɖɛ nɔ esɔmɛ hunnɔ. E yi lɔ yi na gbɔngbɔn ciwo yi ɖonɔ ekpe enuwo ji mi. ⁶ Ci yi e le ahan ɔ, mi le edɔngbegbe mɛ vɛ tɛgbɛɛ yi trɔ nyayna mɔ nɔ mi kpɔtɔ le miwo xwe, le lankpu cɛ mɛ ɔ, mi ci azɔge yi jinjin le Axwetɔ nu. ⁷ Ɖo ɔ, mi zɔnzɔn emɔ lɔ koɖo xɔse. Mi de zɔinzɔin le enukpɔkpɔ nu go. ⁸ Mi le edɔngbegbe mɛ vɛ tɛgbɛ yi e drodroɔ mi mɔ nɔ mi le azɔge yi ci jinjintɔxu nɔ lankpu lɔ ci yi le Axwetɔ gbɔ ɔ, a nyɔ nɔ mi sɔwu. ⁹ E yi na taɖo yi nɔ mi le lankpu cɛ mɛ alo mo to le mɛ can ɔ, enu ci yi le veviɖe nɔ mi yi nyi mɔ mi a nyɔ le Tɔhonɔ ŋmɛ. ¹⁰ Ɖo ɔ, e le mɔ miwo pleŋ a va Kliso lɔ koɖoxu le klɛnklɛn gbajaa mɛ nɔ kojoɖoɖo. Gahunnɔmɛ ɔ, amɛɖeka amɛɖeka a xɔ enyui can, evɔin can yi e wa hweyinu yi e le agbe le lankpu cɛ lɔ mɛ fɛncu. ¹¹ Ci yi mi jeshi enu ci yi nyi mɔ shishi ɖoɖo nɔ Axwetɔ ɔ, mi jinɔ mɔ mi a wɛɛ nɔ agbetɔwo a xɔ enyɔ ci yi mi nunuɔ soso nu. Klɛnklɛnmɛ mi le gbajɛɛ le Mawu ŋmɛ yi ŋ gbe kandoji hɛnnɛ mɔ ahanke yi ŋ gbe le hlɛnklɛnmɛ gbajɛɛ le miwo yexa mɛ do nɛ. ¹² Mi d'a gbe trɔ a tɔ kanfukanfuwema ŋwleŋwle soso miwoɖekiwo nu nɔ mi o. Vɔ ɔ, mi jijiɔ a na mɔnukpɔkpɔ nɔ mi a sɛn eŋ vo fɛɛ do mi nu. Nɛnɛ ɔ, mi a va kpɔ enyɔ ci yi mi a sɔ ɖo enyɔ nu nɔ amɛ ciwo yi sannɔ soso agogbe nuwo nu yi d'e nyi ejimɛ nuɖe nu yɔ o. ¹³ Nyao ɔ, nɔ etagbɔ de sɔ egbe nɔ mi o ɔ, Mawu yi mi le nɛnɛ nɔ. Vɔ nɔ etagbɔ sɔ egbe nɔ mi ɔ, miwo yi mi le nɛɛ nɔ. ¹⁴ Ɖo ɔ, lɔnlɔn ci yi Kliso ɖo nɔ mi dodoɔ leyaleya nɔ mi yi mi do jeshi enyɔ cɛ mɔ: amɛ kuɖeka yi ku do amɛshamɛ ta yi nɛnɛ ɔ, amɛshamɛ ku kodoi. ¹⁵ Nɔ e ku do amɛshamɛ ta ɔ, e wɛɛ nɛnɛ nɔ agbenɔtɔwo ŋgbe gbe nɔnɔ agbe nɔ wowoɖekiwo. Vɔ ɔ, nɔ wo a nɔ agbe nɔ amɛ ci yi ku ji gbe fɔn soso ekuwodi do wowo ta. ¹⁶ E yi na taɖo soso eviɛtroɔ mi de gbe jeshi amɛɖe le lankpu nugo. Nɔ e gbe nyi mɔ mi jeshi Kliso vayi le lankpu nu nɛnɛ can ɔ, mi de gbe jeshi ɖɛ do alɔkpa hunnɔ ji go. ¹⁷ Nɔ amɛɖe le Kliso lɔ mɛ ɔ, amɛ lɔ trɔ enuwawa yoyu. Yoyutɔ yi va xɔ texwe. ¹⁸ Enuwo pleŋ sonɔ Mawu ci yi dra miwo koɖo yi gblamɛ do sɔta Kliso ji. E yi lɔ yi ɖo Mawu koɖo agbetɔwo gblamɛdradrado dɔ nɔ mi. ¹⁹ Ɖo ɔ, Mawu le Kliso mɛ yi dra yi koɖo xexe lɔ gblamɛ do makpɔ do afɛn ciwo yi agbetɔwo wanɔ nu yi sɔ gblamɛdradrado nyɔ do aɖe ji nɔ miwo. ²⁰ Nɛnɛ ɔ, mi nyi Kliso mɛdɔdɔ ciwo yi a va xo nuxu le yi nyikɔ mɛ. Mawu yi donɔ eji exo nɔ amɛ sɔto mi ji. Mi ɖeɖeɔ kuku nɔ mi le Kliso nyikɔ mɛ mɔ: mi tashi miwoɖekiwo nɔ wo a dra miwo koɖo Mawu gblamɛ do. ²¹ Amɛ ci yi de jeshi enuvɔn o ɔ, Mawu sɔ ɖo enuvɔn do miwo ta. Nɔ nɛnɛ le Kliso mɛ ɔ, mi a trɔ Mawu mɛ ciwo yi Mawu sɔ wa amɛjɔjɔɛwo.