¹ Soso ecɛ ji, ci yi Mawu ku ŋshishi nɔ mi yi so edɔ cɛ doashi nɔ miɔ, edɔngbegbe e vɔ nɔ mi o. ² Mi gbe bebemɛ nu koɖo ŋkpɛn nuwawawo Mi de wanɔ ayemɛnu o yi kpɔ de trɔnɔ eta do egu nɔ Mawu nyɔ lɔ o. Vɔ ɔ, ci yi mi ɖeɖiɛ nyɔnɔnui lɔ mɛ cekeceke ɔ, miwoŋtɔwo dɔ yi amɛshamɛ xɔɛ do mi shi le Mawu ŋmɛ mɔ amɛ yi miwo nyi yi wo a xo do. ³ Nɔ e le ahan gankegan yi avɔn gbe cɔn ŋmɛ nɔ Mawu ŋɛnyui ci nunuɔ yi mi le ɔ, a nyi ke amɛ ciwo yi yiyɛ trɔntrɔnmɛ yi avɔn gbe cɔin nɔ. ⁴ Amɛwo de gbe xɔ Mawu ji se o. Ɖo Legba, xexe cɛ mɛ cɛkpatɔ cɔn enu wowo ŋdɛnyanya ji do eɖe kaka kpɔ wo de kpɔkpɔ lehan yi Kliso lɔ ŋɛnyui klɛnklɛn gangan lɔ, ci yi nyi Mawu kpɔli le ezo dada do o. ⁵ Nyao ɔ, d'e nyi miwoŋtɔwo nu yi mi doduɔ axwa yi xoxɔ nuxusoso o. Vɔ ɔ, mi doduɔ axwa yi nunuɔ mɔ Yesu Kliso yi nyi Axwetɔ yi mi wowoŋtɔwo mi nyi miwo dɔwaviwo do Yesu ŋci. ⁶ Ɖo Mawu nu mɔ: «Klɛnklɛn le kɔ soso vinvinwo mɛ.» Ahan ɔ, yiŋtɔ yi na yi yi klɛnklɛn kɔnɔ do miwo ji mɛ nɔ mi a sɛn eŋ ɖo ŋununyanya ci yi danɔ ezo lɔ, shigbe klɛnklɛn gangan lɔ ci yi danɔ ezo le Yesu Kliso ŋmɛ ɛnɛ. ⁷ Vɔ ɔ, mi hɛn dɔkunu hunnɔ do agban ciwo yi wo sɔ esu mɛ mɛ nɔ ŋsɛn gangan hunnɔ a nyi Mawu tɔ yi d'a nyi miwotɔ o. ⁸ Wamuwo xanɔ mi toto alɔkpawo pleŋ mɛ. Vɔ ɔ, kpɔ wo de cuku mi o. Mi le enulolo mɛ. Vɔ ɔ, kpɔ de vɔ da mi o. ⁹ Wo cinɔ yumɛ nɔ mi, vɔ kpɔ Mawu de gbe mi dɛ o. Wo sɔ mi yanɔ ehun do nyigban gankegan kpɔ mi de ku o. ¹⁰ Mi kpɔtɔ hɛnnɔ Yesu ku lɔ do miwoɖekiwo nu le gbazamɛ tɛgbɛɛ nɔ nɛnɛ ɔ, agbe Yesu tɔ can a gbe va zenɔ hɛnnɛle miwo lankpu lɔ mɛ. ¹¹ Ɖo ci yi mi le agbe ɔ, wo sɔ mi donɔ ashi nɔ eku gashagamɛ do Yesu ŋci. Nɔ nɛnɛ ɔ, agbe Yesu tɔ can a gbe donɔ asɛ yiɖeki le miwo lankpu ci yi nyi enukuku mɛ. ¹² Ahan le miwo mɛ ɔ, eku yi le edɔ ji. ¹³ Wo ŋwlii do Mawu nyɔ wemawo mɛ ɖaɖɛ mɔ: «Ŋ xɔɛ ji se, e yi na taɖo yi ŋ xo nuxu.» Ci yi miwo can mi ɖo xɔse lɔ hanwo gbɔngbɔn ɔ, e yi na taɖo yi mi xoxoɔ nuxu. ¹⁴ Mi nyanya mɔ amɛ ci yi fɔn Axwetɔ Yesu do agbe a va fɔn miwo can do agbe hɛnnɛ koɖo Yesu yi a na yi miwo koɖo miwo a va to do yi ŋmɛ. ¹⁵ Ɖo ɔ, efunkpekpe cɛwo pleŋ vava mi ji do miwo ŋci. Gahunnɔmɛ ci yi xomɛvunu lɔ susuɔ egbɔ do ji ɔ, a na yi amɛ sugbɔ a gbe wawa akpedodo kuifanwo nɔ Mawu yi a sɔ kanfui. ¹⁶ E yi na taɖo ɔ, mi de gbɔjɔ o. Nɔ e nyi kpɔ mɔ amɛ ci mi nyi le lankpu mɛ gblegble le agogbe can ɔ, hlɔnhlɔn yoyu buwo ɖonɔ miwo mɛnyinyi le gbɔngbɔnmɛ nu gbeɖeka duu. ¹⁷ Vevesese egaxoxo maɖyi enuɖe ci mɛ yi mi totoɔ jinɔ kanfukanfu mavɔmavɔ kpɛnkpɛnmɛ va nɔ mi ɖoɖu zeto dredremɛwo nu. ¹⁸ Hɛnnɛ can ɔ, d'e nyi enu ci yi wo kpɔnɔ le ŋkuvi nu o yi miwo kpɔkpɔ ɖaɖa o. Vɔ ɔ, enu ci yi wo de kpɔnɔ le ŋkuvi nu o yi miwo kpɔkpɔ ɖaɖa. Ɖo enu ci yi wo kpɔnɔ le ŋkuvi nu yɛ vayinɔ foyaŋ; vɔ enu ci yi wo de kpɔnɔ le ŋkuvi nu o yɛ li sɔyi mavɔmavɔ.