¹ Ɖee, mi a gbe trɔ a gbe trɔ kanfukanfuwema ŋwlɛŋwle soso miwoɖekiwo nu a? Alo, e gbe zan mɔ miwo a gbe hɛn kanfukanfuwema va nɔ miwo alo miwo a xɔ nɛnɛ wema soso mi gbɔ shigbe lehan yi amɛɖewo wɛɛni do ɛnɛ a? ² Miwo yi nyi miwo wemaŋwlɛwlɛ ci yi wo ŋwlɛ do miwo ji mɛ. Amɛshamɛ jeshii yi hliinni. ³ E ze petii mɔ mi nyi wewaŋwlɛŋwlɛ ɖe ci yi Kliso lɔ sɔ do alɔmɛ nɔ mi nɔ miwo dɔ lɔ wema. Ɖ'e nyi wemacishi yi e sɔ ŋwlii o. Vɔ ɔ, Mawu Agbeagbe lɔ gbɔngbɔn yi e sɔ ŋwlii. Ɖ'e nyi enuŋwlɛkpe kpakpɛwo ji yi e ŋwlii do o, vɔ ɔ, agbetɔwo jiwo mɛ yi e ŋwlii do. ⁴ Kankandoji ci yi le mi shi do Mawu nu sɔto Kliso lɔ ji nɛ. ⁵ Ɖ'e nyi kpɔ mɔ mi kpe enuɖe ji le miwoŋtɔwo shinu yɔ go. Enujisunsun miwotɔ sonɔ Mawu gbɔ nɔ mi. ⁶ E yi lɔ ke yi gbe na mi enujisunsun ci yi mi a sɔ nyi ezoɖuɖu yoyu ɖeka dɔwatɔwo. Ɖ'e nyi ese ci yi wo ŋwlɛ daɖɛ ji yi e to o, vɔ ɔ, gbɔngbɔn kɔkɔɛ ji yɔ. Ɖo ese ŋwlɛŋwlɛɖɛ lɔ wunɔ amɛ; vɔ gbɔngbɔn lɔ yɛ na yi amɛ nɔnɔ agbe. ⁷ Keŋ ɖee, eku dɔwawa ci yi wo kliko ekpe kpakoviwo yi ŋwlɛ do ji nyi enu yi Mawu klɛnklɛn trɔdo ahan. Mawu klɛnklɛn lɔ le do eɖe kaka Israyɛliviwo de sɛn eŋ cu ŋkuvi do ŋmɛ ji nɔ Mɔyizi o. ⁸ Gankegan Mawu Klɛnklɛn lɔ trɔ nyi enu yi a vayi le hwenu kleŋ ɖe mɛ. Nɔ e le ahan ɖee gbɔngbɔn lɔ dɔwawa yɛ zodada d'a gangan sɔwu ahan ba? ⁹ Nɔ e nyi kpɔ mɔ ekuhwesoso dɔwawa nyi enu yi xɔ kanfukanfu ahan ɖee, jɔjɔɛnyinyi hwɛsoso dɔwawa yɛ a gbe xɔ kanfukanfu sugbɔ haan sɔwu hunnɔ. ¹⁰ Nɔ e le ahan ɔ, kanfukanfu gangan ci yi wo kanfu enu ci yi vayi de nyi enuɖe le kanfukanfu ci yi gbɔgbɔ lɔ gbɔ o. ¹¹ Ɖo nɔ e nyi kpɔ mɔ enu ci yi vayi le hwenu kleŋ ɖe mɛ xɔ kanfukanfu jeshidu ɔ, enu ci yi kpɔtɔ li lɔ yɛ a gbe xɔ kanfukanfu sugbɔ sɔwui taŋ yɔ. ¹² Ci yi emɔkpɔkpɔ hunnɔ le mi shi ɔ, e yi na taɖo yi kankandoji le mi nu ɖoɖu sugbɔ. ¹³ Mi de wawa shigbe Mɔyizi ci yi sɔ avɔn cɔnnɔ ŋmɛ nɔ Israyɛliviwo ŋgbe kpɔ vɔvɔnu nɔ enu ci yi vayinɔ le hwenu kleŋ ɖe mɛ lɔ ɛnɛ o. ¹⁴ Vɔ ɔ, wo gbe mɔ yewo susu d'a le enu o. Nyao kaka sɔnanɔ egbɛ yɛ ɔ, nɔ wo le ezoɖuɖu xoxwitɔ lɔ wema hlɛn ɛɔ le ejugbaja ŋmɛ ɔ, avɔn ci yi cɔn eji ji nɔ wo lɔ kpɔtɔ li wo de ɖii soi o, ɖo ɔ, nɔ wo va le Kliso lɔ mɛ ɖekɛ gbɔxwe yi e denɔ soi. ¹⁵ Kaka je egbɛgbɛ yɛ can nɔ Israyɛliviwo le Mɔyizi wemawo hlɛn ɔ avɔn ɖeka kpɔtɔ cɔn wowo jiwo ji. ¹⁶ «Vɔ nɔ vo trɔ amɛɖeki ɖaɖa Tɔhonɔ gbɔ ɔ, avɔn lɔ ɖenɔ soi nɔ amɛ.» ¹⁷ Keŋ ɔ, Tɔhonɔ yi trɔ nyi gbɔngbɔn lɔ. Eyi fini ci yi Tɔhonɔ gbɔngbɔn le ɔ, hunnɔtɔxu yi vovo le nɛ. ¹⁸ Miwo pleŋ ciwo yi wo klo avɔn lɔ soso ŋmɛ nɔ ɔ, wo da klɛnklɛn zo lɔ do mi ji nɔ mi a le shigbe Tɔhonɔ ɛnɛ yi ezodada a jejiɛ ezodada ji nɔ mi. Edɔ ci yi Tɔhonɔ ci yi nyi gbɔngbɔn lɔ wawa nɛ.