¹ Enyɛ ɔ, ŋ sɔ gbeta mɔ ŋ d'a trɔgbɔva mi gbɔ yi a va kpɔ mi le ŋshishi mɛ o. ² Ɖo nɔ enyɛŋtɔ na yi mi ci ŋshishimɛ ee mi ŋci yi enyɛ, ne va le azanmɛ do ɔ? Amɛ ci yi ŋ na yi e ci ŋshishimɛ lɔ yɔ a? ³ Ŋwlɛ enu hunnɔ ɖaɖa mi vayi mɔ nɔ ŋ va ɖo mi gbɔo, amɛ ciwo yi ɖo a do jijɔ, nɔ ŋ ŋgbe va wɛɛ nɔ ma ci ŋshishi mɛ o. Ŋ trɔ ɖo kankandoji cɛ do miwo pleŋ ji mɔ anyi jijɔ ɔ, miwo pleŋ yi e nyi hɛnnɛ. ⁴ Vevesese gangan mɛ yi ŋ le vayi, xomɛ de nɔ ŋ o yi ŋ le avin ji hwecinu yi ŋ ŋwlɛ enu hunnɔtɔ ɖaɖa mi. Ɖ'e nyi kpɔ mɔ ji ŋ jinɔ mɔ miwo le ci ŋshishimɛ yɔ go, vɔ ɔ, nɔ mi a jeshi lehan anyi lɔnlɔn sa ekɔn nɔ mi do. ⁵ Nɔ e nyi kpɔ mɔ amɛɖe na yi yi kpena ci ŋshishimɛ ɔ, d'e nyi enyi yi e sɔ do ŋshishi mɛ o. Vɔ ɔ, miwo pleŋ yɔ. Nɔ mi d'a gangan enyɔ gbali o ɔ, miwo kpa ɖeka yi e sɔ do ŋshishimɛ. ⁶ Nɔ amɛ akpagantɔ gbe enyɔ nɔ nɛnɛ mɛ ɔ, e sun ahan. ⁷ E yi na taɖo ɔ, mi tashi enyɔgbegbe nii, mi so ehwɛ kii yi a do ŋsɛn lanmɛ nii. Nɔ d'e nyi ahan o ɔ, a va ci ŋshishi mɛ ɖoɖu kaka yi a dan eta nɔ yideki. ⁸ Ci yi e le ahan ɔ, ŋ dodoɔ ŋsɛn lanmɛ nɔ mi mɔ miwo le ɖe lɔnlɔn fɔ ɖaɖa gbɔ. ⁹ Ɖo ci yi ŋ ŋwlɛ enu ɖaɖa mi vayi ɔ, ŋ ji mɔ ma sɔ do mi kpɔ yi a kpɔ mɔ mi nyi etonusetɔwo le enushanu mɛ ma. ¹⁰ Nɔ mi sɔ enu sɔ ke amɛɖe ɔ, enyɛ can ŋ sɔ kii. Nɔ e nyi kpɔ mɔ enyɛ, ŋ ɖo a sɔ enuɖe sɔ ke amɛɖe yi ŋ sɔ kii ɔ, miwo ta yi ŋ wɛɛ ahan do le Kliso lɔ ŋmɛ. ¹¹ Ŋ wɛɛni ahan nɔ mi ŋgbe va tashi legba nɔ a kpɔ emɔ le mi nu o. Ɖo ɔ, mi jshi enu ciwo yi nyi yi totomɛwo ɖɛ nyuiɖe. ¹² Ci yi ŋ va ɖo Trɔwasi jugan mɛ yi a do Kliso lɔ ŋɛnyui nɔ amɛwo ɔ, ci yi Axwetɔ hun emɔ nɔ ŋ faa mɔ enyɛ le wɛɛ can ɔ, ¹³ Anyi ji de vo o. Ɖo ɔ, ŋ de kpɔ nɔvinyɛ Titu hunnɔtɔxu yi Maseduwanu kanmɛ. ¹⁴ Kanfukanfu nɔ Mawu ci yi kplɔkplɔ mi tɛgbɛɛ do Kliso lɔ jiɖuɖu hwakpa mɛ. E tonɔ mi ji yi na yi amɛwo jejɛshi Kliso lɔ hwɛnhwɛn le afishafi. ¹⁵ Nyao ɔ, mi nyi Kliso lɔ mihwɛnte nɔ Mawu le amɛ ciwo yi le hwlɛngan mɔ ji domɛ koɖo le amɛ ciwo yi le trɔntrɔn mɔ ji domɛ. ¹⁶ Amihwɛnte lɔ hwɛnhwɛn lɔ nyi eku hwɛnhwɛn yi kplɔ amɛwo yiyiɛ ekumɛ. Nɔ amɛ kpɛtɛwowo ɔ, e nyi agbe hwɛnhwɛn ci yi kplɔ wo yiyiɛ agbemɛ. Mi yi a sɛn eŋ sun edɔ hunnɔ ji yi a wa ɔ? ¹⁷ Mi de le shigbe amɛ sugbɔ ciwo yi sɔ Mawu nyɔ wa ajɔdodo nyɔ enɛ o. Nyɔnɔnui yi mi totoɔ, Mawu yi dɔ mi, yi ŋmɛ koɖo Kliso lɔ mɛ yi mi xonɔ nuxu le.