¹ Enyɛ Pɔlu, amɛ ci yi nyi Yesu Kliso mɛdɔdɔ sɔto Mawu drɔ mɛ koɖo nɔvi Timɔte yi ŋwlɛŋwlɛ wema cɛ ɖaɖa Mawu ha ci yi le Kolɛnti jugan mɛ. Mi gbe ŋwliiŋwlii ɖaɖa amɛ ciwo yi Mawu can do akpo nɔ yiɖeki le Akayi kan lɔ pleŋ mɛ hɛnne. ² Mawu, miwo da koɖo Axwetɔ Yesu Kliso le wa xomɛvunu nɔ mi yi a na fafa mi! ³ Kanfukanfu nɔ́ Mawu, miwo xwetɔ Yesu Kliso dalɔ. É nyi Eda ci yi ɖɔ koɖo xomɛvu yi nyi Mawu ci nyi fanɔ akɔn nɔ amɛ le nɔnɔmɛ ɖekpokpo mɛ. ⁴ É fanɔ akɔn nɔ mi le miwo vevesese wo pleŋ mɛ kɛn nɔ sɔ soto akɔnfanɔmɛ ciwo yi miwoŋtɔwo xo soso Ada gbɔ mɛ ɔ, mi a sɛn eŋva donɔ eji exo nɔ amɛ ciwo yi le vebesese hata ɖekpokpoì mɛ. ⁵ Hɛnnɛ cán ɔ, shigbe lehan yi Klisi lɔ funkpekpe sugbɔ vava mi ji do ɛnɛ ɔ, ahan lɔ ke yi akɔnfanɔamɛ gbe susuɔ egbɔ egbɔ nɔ mi haan sɔto Kliso lɔ jo do nɛ. ⁶ Nɔ́ é nyi kpɔ́ mɔ́ mi le vevesese mɛ ɔ, nɔ wo a sɔ donɔ eji exo nɔ mi yi a hwlɛn migan ŋcì yɔ́. Nɔ e nyi kpɔ mɔ wo fa akɔn nɔ mi ɔ, nɔ mi a sɔ xɔ akɔnfanɔamɛ yi a kpɔ ŋsɛn yi a va toto miwo funkpekpe hanciwo mɛ ŋci yɔ. ⁷ Miwo mɔkpɔkpɔ do mi nu kpɔtɔ le goŋgoŋ. Ɖo ɔ, mi nya mɔ ci yi miwo can mi kpɔ akpa ci yi nyi miwotɔ yi xɔnɔ le efunkpekpe lɔwo mɛ shigbe miwo ɛnɛ ɔ, akɔnfanɔamɛ lɔ can a gbe va nɔ mi shigbe miwo ɛnɛ. ⁸ Nyao ɖee, nɔvinyɛwo, mi de ji mi to le Azi kan mɛ o: wo do aya nɔ mi vɔntɔ kaka e va wu egan mi. Mi de gbe nya mɔ mi a ci agbe hɛnnɛ kpetii o. ⁹ Mi xɔ egbe do ekuhwe ci yi wo so nɔ mi ji le miwoɖekiwo mɛ. E le ahan nɔ mi ŋgbe kannɔ do miwoɖekiwo ji o. Vɔ ɔ, nɔ mi a kando Mawu, ci yi fɔnnɔ amɛkukuwo do agbe ji. ¹⁰ E yi hwlɛn mi gan le eku ahantɔ shi. Ɛɛ, e yi ji mi sɔ miwo mɔkpɔkpɔ dado yi mi kpɔkpɔ emɔ mɔ yi a gbe hwlɛn mi gan ke. ¹¹ Miwo can mi dodoɔ alɔ i mɛ koɖo mi sɔ toto kuifan ci yi mi wanɔ do eta nɔ mi mɛ. Nɛnɛ ɔ, amɛ sugbɔ a do akpe nɔ Mawu nɔ mi do xomɛvunu lɔ ŋci. ¹² Ɖo miwo yɛyi ɔ, e yi nyi kpɔ miwo yexa kunuɖeɖe soso mi nu. Mi nɔ agbe le xexe lɔ mɛ, vexiɖe ɔ, ɖaɖa miwo gbɔ le cukaɖamawa koɖo nyɔnɔnuitoto ciwo yi so Mawu gbɔ mɛ. D'e nyi kpɔ mɔ agbetɔ ŋununyanya yi mi sɔ kplɔ miwoɖekiwo le mi gbɔ o, vɔ ɔ, sɔ toto Mawu xomɛvunu mɛ yɔ. ¹³ Mi de ŋwlɛnɔ enu bu ɖe ɖaɖa mi sɔ zeto enu ci yi mi hlɛnnɔ yi mɔnɔŋje mɛ nu o.Ŋkpɔkpɔ emɔ mɔ mi ava se enugɔnmɛ vɛ. ¹⁴ Le mɛ ɔ, mi se enu gɔnmɛ akpa ɖe yɛ mɔ gbecigbe yi miwo xwetɔ Yesu a trɔgbɔ ɔ, miwo yi a va nyi enu ci yi na kanfukanfu miwo can nɛ. ¹⁵ Kankandoji hunnɔ yi le ŋ shi yi ŋ sɔ gbeta sasa doŋkɔ mɔ na va ji mi kpɔ, nɔ mia gbe kpɔ xomɛvunu zevetɔ lɔ. ¹⁶ Nɔ ŋ va mi gbɔ sasa ɔ, na va so le mi gbɔ yi a yi Maseduwanu kanmɛ yi nɔ ŋ gbe trɔgbɔ ɔ, ma gbe va to mi gbɔ. Gahunnɔmɛ ɔ, ma xɔ enu ciwo yi a ɖo ezan nɔ ŋ le anyi mɔzɔnzɔn yi zude kanmɛ le mi shi. ¹⁷ Ci yi ŋ wa totomɛ hunnɔ ɔ, ŋ wɛɛ mabuikpɔ nyuiɖe tɛŋ yɔ a? Alo ŋ sɔnɔ enyi gbetawo le gbazamɛ yi e gbe nɔnɔ lanmɛ nɔ ŋ mɔ ma xɔ egbe a mɔ «ɛɛ» gankegan yi a gbe gbenɔ le enyɛɖeki mɛ mɔ «oo» do eju yɔa? ¹⁸ Mawu ŋtɔ le egbeji; e nya koɖo ŋ mɔ enyɔ ci yi mi nu nɔ mi ɖ'e nyi «ɛɛ» yi gbe nyi «oo» o. ¹⁹ Ɖ ɔ, Yesu KLiso, Mawu Eviɛ lɔ ci nyɔ yi enyɛ Silasi koɖo Timɔte do axwa yi nu nɔ mi ɔ, d'e nyi «ɛɛ» ɖekɛ yi le eyɛ mɛ! ²⁰ Yesu Kliso lɔ mɛ yi Mawu gbeɖu sugbɔsugbɔ ɔ lɔwo nyi «ɛɛ» le. E yi na taɖo yi e nyi sɔto eyɛ lɔ ji yi mi nunɔ nɔ Mawu mɔ: «xoaɖyi» yi sɔ kannɔfui. ²¹ Mawu ŋtɔ yi na yi miwo koɖo miwo lo edo goŋgoŋ le Kliso lɔ mɛ. E yi lɔ yi shi ami nɔ mi yi sɔ can mi do akpo nɔ yiɖe ki. ²² E sɔ yi nyikɔjejeshi biɔ do mi nu yi sɔ gbɔngbɔn lɔ kpeɖojinu cinɔnuwo dado miwo jiwo mɛ. ²³ Enyɛ yɛ ɔ, ŋ sɔ anyi gbe ke eku yi sɔ Mawu ɖonɔ kunuɖetɔ nɔ enyɛɖeki mɔ cukaɖa ŋ mɔ ŋ ɖenɔ soso ekɔ nɔ mi taɖo yi ŋ de gbe trɔva Kolɛnti jugan mɛ o. ²⁴ Mi de jinɔ mɔ mi a tɛ do mi ji mɔ enu leli ji yi mi a xɔse ke o.vɔ ɔ, edɔɖekɛwatɔwo yi mi bɔ nyi koɖo mi nɔ a nyi jijɔ nɔ mi. Ɖo le xɔse nyɔ mɛ ɔ, mi lo edo goŋgoŋ.