¹ D'e nyi vovomɛ yi le ba? D'e nyi Mawu mɛdɔdɔ yi ŋ nyi ba? ŋ de kpɔ Yesu, miwo xwetɔ ba? Miwoŋtɔwo miwo d'e nyi anyi dɔwawa le Axwetɔ mɛ ba? ² Nɔ amɛdewo nunu mɔ enyɛ, ŋ de nyi Mawu mɛdɔdɔ o ɔ, ŋ nyii nɔ miwo yɛ kpetii. Ɖo Mawu mɛdɔdɔ ci yi ŋ nyi ɔ, miwo yi nyi anyi dɔwawa nutrenu le Axwetɔ mɛ. ³ Enyɔ ci yi ŋ sɔ hwlenɔ eta nɔ nyɛɖeki le 'mɛ ciwo yi donɔ ɖyika ŋ ke. ⁴ Mi ɖe ɖo acɛ yi a xɔ enuɖuɖu alo enununu le edɔ ci yi mi wanɔ mɛ ba? ⁵ Mi ɖe ɖo acɛ yi a ɖe nyɔnu Klisotɔ, yi a kplɔɛ hɛn shigbe lehan yi Mawu mɛdɔdɔ kpɛtɛwo koɖo Kefasi wanɔ do nɛ ba? ⁶ Alo enyɛ koɖo Banabasi ɖekɛ ji yi e ʒin mɔ mi a wa edɔ gbɔxwe yi a kpɔ enuɖuɖu a ? ⁷ Mɛ yi zannɔ yiŋtɔ ho, yi sɔ wanɔ sɔjawo hwa ɔ? Mɛ yi donɔ vɛncikan, yi gɔnnɔ yi sɛnsɛn maɖu ɔ? Mɛ yi kplɔnɔ elanwo yi ɖugbumɛ yi gbenɔ wowo nɔshi manu ɔ? ⁸ Agbetɔ ci yi ŋ nyi yi dɔ taɖo yi ŋ nunuɔ nɛnɛ a? Ese can ɖe nu ahan ba? ⁹ Nyao ɔ, wo ŋwlɛn do ese ci yi Mawu do toto Mɔyizi wema ɖeka mɛ mɔ: «Ŋ gbe bla enu nɔ nyibu, gacimɛ yi e totoɔ jinukun o.» Nyibu lɔ yi Mawu leɔ ebu do yɔ a? ¹⁰ Ɖe nyi miwo taɖo yi Mawu nu ahan do ba? Ɛɛ, miwo taɖo yi wo ŋwlii daɖɛ ahan do. Ɖo ɔ, amɛ ci yi le agble de ɔ, edii ni koɖo emɔkpɔkpɔ nɔ enu, yi amɛ ci le jinukun tooɔ ɖo a toitoiɔ koɖo emɔkpɔkpɔ mɔ ye a va xɔ akpa ci yi nyi yetɔ le jinukun cancan lɔ mɛ mɛ. ¹¹ Nɔ mi can jeŋkuishimɛ jinukunwo do mi mɛ ɖee, enyɔ gangan blebu yi a va nyi mɔ, mi a va ɖenɔ xexemɛ nuwo ciwo yi le mi shi a? ¹² Nɔ 'mɛ buwo zan acɛ hunnɔ do mi ji ɖee, ɖe nyi miwo taŋ yi ɖo a ziin do mi ji ba? Gangŋkegan kpɔ mi ɖe ziin o. Vɔ ɔ, miwo lɔn yi hɛnnɔ agban ɖekpokpoi nɔ mi ŋgbe va xe emɔ nɔ Kliso lɔ ŋɛnyui lɔ kakaka o. ¹³ Dandandan ɔ, mi nya mɔ, enu ciwo yi le Mawuxwe mɛ, yi amɛ ciwo yi wanɔ edɔ le Mawuxwe mɛ a ɖu yi enu ciwo yi wo sɔ sanɔ avɔ do avɔsakpe ji kpa ɖe yi 'mɛ ciwo sanɔ avɔ a ɖu. ¹⁴ Nɛnɛke yi Axwetɔ can ɖoi daɖɛ mɔ eŋɛnyui kakaka dɔ mɛ yi eŋɛnyuikakakatɔ a kpɔ le yi a ɖu nɛ. ¹⁵ Vɔ enyɛ yɛ ɔ, ŋ ɖe sɔ acɛ hunnɔwo domɛtɔ ɖe wa edɔ o. Ɖe nyi mɔ ŋwlɛnŋwlɛn'ɔ enu ɖaɖa mi, yi sɔ biɔnɔ acɛ lɔwo yɔ o. Nɔ ŋ ku ɔ, e nyɔ nɔ ŋ sɔwu! Amɛɖe ɖa va xɔ enu ci yi ŋ sɔ gezenɔ lɔ le ŋ shi o! ¹⁶ Nyao ɔ, eŋɛnyui lɔ kakaka ɖe nyi enu yi ŋ sɔ gezenɔ o; ɖo ɔ, enu vevi ɖeka yi e nyi, yi wo dɔ ʒinŋ ji. Nyao ɔ, babɛɛ nɔ ŋ, nɔŋ ɖe kaka eŋɛnyui lɔ o! ¹⁷ Nɔ e nyi kpɔ mɔ enyɛŋtɔ yi ɖo edro yi wɛɛwɛ sa ɔ, edɔwawafɛncu a le mɛ nɔ ŋ. Vɔ ci yi e nyi ʒin wo ʒinŋ ji, yi ŋ wɛɛwɛ can ɔ, edɔ ci yi wo ɖo nɔ ŋ waa yi ŋ le. ¹⁸ Ci e le ahan ɖee, eho hɛnɖe yi wa cu nɔ ŋ ɔ? Eŋjeje hɛnɖe yi na kpɔ le eŋɛnyui kakaka ehoɖemaxɔ koɖo acɛ ciwo yi le eŋɛnyuikakaka eleɖemaɖu mɛ yɔ. ¹⁹ Ɖo ŋ vo, ŋ ɖe le mɛɖe shi o. Ganŋkegan, ŋ sɔ enyɛɖeki wa hwashi nɔ amɛshiame keŋ a sɛnŋ le amɛ sugbɔ va Kliso gbɔ. ²⁰ Ci yi ŋ ɖo yuɖatɔwo gbɔ ɔ, ŋ sɔ nyɛɖɛki sɔ wa yuɖatɔ keŋ a sɛnŋ le yuɖatɔwo gbɛ nɔ Kliso. Ci ŋ ɖo ''mɛ ciwo yi le ese cɛkpakpa gɔnmɛ ɔ, ŋ wa shigbe amɛ ci yi le ese cɛkpakpa gɔnmɛ nɛ; keŋ a sɛŋ dɔn nɛnɛ mɛwo hɛngbɛ nɔ Kliso. Ganŋkegan kpɔ ɖe nyi Mɔyizi se cɛkpakpa gɔnmɛ yi ŋ le o. ²¹ Nɛnɛke ci yi ŋ ɖo esejimawadotɔwo gbɔ ɔ, ŋ wa shigbe ŋ ɖe jeshi ese nɛ o; keŋ a sɛnŋ dɔn nɛnɛ mɛwo hɛngbɛ nɔ Kliso. Vɔ le Mawu ŋmɛ ɔ, ŋ ɖe nyi esemajeshitɔ o. Kliso lɔ se yi bla ŋ. ²² Ci ŋ ɖo 'mɛ ciwo yi nyi amɛ klekliwo le xɔse mɛ gbɔ ɔ, ŋ wa shigbe amɛ klekli le xɔse mɛ yi ŋ nyi nɛ; keŋ a sɛnŋ dɔn wo gbɛ va Kliso gbɔ. Nɛnɛ ɔ, ŋ sɔ nyɛɖeki donɔ amɛshiamɛ han le enushianu mɛ keŋ a sɛnŋ hwlɛn 'mɛɖewo gan sɔto alɔkpawo pleŋ mɛ. ²³ Eŋɛnyui lɔ taɖo yi ŋ wawa enu hunnɔwo pleŋ keŋ yi a kpɔ anyi tɔ a xɔ le mɛ. ²⁴ Mi ɖe nya mɔ ejushitɔwo sunɔ egbɔ le ejushixu ganŋkegan kuɖeka yi va xɔnɔ ajɔ ci wo sɔ daɖɛ nɔ wo lɔ ba? Ci e le ahan ɔ, mi shi eju do ajɔlɔ xɔxɔ fɔ ji. ²⁵ Ejushitɔ ɖekpokpoi ɖunɔ yiɖeki ji le enushianu mɛ. Ejushitɔ hunnɔwo wɛɛni nɛnɛ a sɛnŋ va xɔ efiɔkuku ɖeka ci yi donɔ ahɛn. Vɔ miwotɔ ci ju ji yi miwo le, ye nyi efiɔkuku magblemagble. ²⁶ E yi na taɖo ɔ, enyɛ ɔ, ŋ le eju shiɛ, vɔ ɔ, ŋ ɖe shishiɛ do davotoimɛ o. Ŋ donɔ ekɔn ɖaɖa, vɔ kpɔ ɖe nyi hahamɛ kpɔŋ yi ŋ doidoiɛ ɖaɖa o. ²⁷ Vɔ ɔ, ŋ donɔ gabzavi nɔ anyi lankpu; ŋ kpanɔ acɛ do ji shigbe hwashi yi e nyi nɔ ɔ nɛ. Nɔ 'nyɛ ŋ gbe va nu eŋɛnui lɔ nɔ amowo koɖo axwa ɖegbɔ keŋ a va gɛn enyɛŋtɔ o.