¹ Nɔvinyɛwo, ŋ ɖe ji mɔ mi a nɔ manyamanya mɛ o. Miwo tɔgbiwo pleŋ nɔ jeŋkuizɔ mɛ. ² Wo pleŋ yi so axu lɔ. Wo le Mawushi nɔ wo pleŋ le jeŋkuizɔ koɖo axu lɔwo mɛ le ɖekawawa koɖo Mɔyizi. ³ Wo pleŋ yi ɖu gbɔngbɔnmɛ ŋɖuɖu ŋmɛɖeka, ⁴ yi gbe nu gbɔngbɔnmɛ shi ŋmɛɖeka. Nyao ɔ, wo nunɔ eshi le gbɔngbɔnmɛ kpegbaja ɖeka ci yi kplɔ wo do yinɔ. Kliso lɔ yi nyi ekpegbaja lɔ. ⁵ Ganŋkegan kpɔ amɛ sugbɔtɔ nu ɖe jɔ eji nɔ Mawu le wo mɛ o. Yi nɛ yi wo ku do zoxu sakli sakli lɔ mɛ nɛ. ⁶ Enu hunnɔwo nyi kpɔwɛwo nɔ mi, nɔ miwo ŋgbe gbe va ɖonɔ edro baɖawo shigbe lehan yi wowo ɖo vayi do nɛ o. ⁷ Mi ŋgbe va trɔ vojusɛntɔwo shigbe wowo domɛtɔ ɖekawo nɛ o. Wo ŋwlɛ daɖɛ do Mawu nyɔ wema ɖeka mɛ mɔ: «Jukɔn lɔ nɔ anyinɔnɔ, yi a ɖu enu, yi a nu enu; yi godu ɔ, wo shite keŋ a mu munu.» ⁸ Mi ŋgbe na nɔ mi a wa heteli shigbe wowo domɛtɔ ɖekawo nɛ o. E dɔ yi agbetɔ kotokun etave hotɔn (23 000) ku le wo mɛ le ŋkeke ɖeka ji. ⁹ Mi ŋgbe ji adrɛn le Kliso lɔ nu shigbe lehan yi wowo domɛtɔ ɖekawo mɛɛ do nɛ o. E dɔ yi edanwo vɔ wo. ¹⁰ Mi ŋgbe fannɔ ekui shigbe wowo domɛtɔ ɖekawo nɛ o. E dɔ yi cikplɔtɔ ci yi wunɔ amɛ va vɔ wo shi. ¹¹ Keŋ ɔ, enuhunnɔwo jɔ do wo ji, yi a nyi kpɔwɛ dɛ; yi wo ŋwlɛ wo daɖɛ, a sɔ ɖo afɔ afɔta nɔ miwo ciwo yi xexe vɔvɔnu va cu. ¹² Ci yi e le ahan ɔ, amɛ ci yi bunɔ mɔ ye le ete, le kpɔ nyuiɖe nɔ ŋgbe juin o! ¹³ Tetekpɔ ɖe ɖe va mi ji yi ɖe nyi ci yi a va agbetɔ ji dru yɔ o. Keŋ ɔ, Mawu nɔnɔ gbeji. Ɖa ɖe emɔ yi tetekpɔ ci yi a wu egan mi ɖe a va mi ji o. Nɔ tetekpɔ ɖe va mi ji ɔ, a na mi emɔnu ci yi mi a to, yi a ɖuleji. ¹⁴ E yi na taɖo ɔ, anyi xlɔ veviwo, mi shi nɔ vojusɛnsɛn. ¹⁵ Ŋ xonɔ nuxu nɔ mi shigbe amɛ ciwo yi mɔŋje enu mɛ vɔ nɛ. Miwoŋtɔwo, mi gbeje enyɔ ci yi ŋ nunuɔ nɔ mi mɛ kpɔ. ¹⁶ Nɔ mi nu vɛn le shici kɔkpu ci ji yi mi xonɔ eɖe do, mɛ ɖee, ɖe nyi eka yi mi ca koɖo Kliso hun lo ahan ba? Nɛnɛke nɔ mi ma kpɔnnɔ yi ɖu ɖe, ɖe nyi eka yi mi ca koɖo Kliso lɔ lankpu ahan ba? ¹⁷ Ci e nyi kpɔnnɔ kuɖeka yi li ɔ, miwo sugbɔsugbɔ lɔwo can nyi lankpu kuɖeka. Ɖo kpɔnnɔ kuɖeka lɔ yi mi pleŋ manɔ, yi ɖunɔ. ¹⁸ Mikpɔ Israyɛliviwo le agbetɔ nukpɔkpɔ mɛ ɖaa! Amɛ ciwo yi ɖunɔ elan ciwo yi wo sɔ sa avɔ ɖe le ekacaca mɛ koɖo avɔsakpe lɔ ba? ¹⁹ Enyɔ hɛnɖe yi ŋ nunuɔ nɔ mi nɛnɛ ɔ? Ŋ mɔ voju ɖo ashixɔxɔ yɔ a? Alo enuɖuɖu ci wo sɔ sa avɔ nɔ voju ɖo ashixɔxɔ yɔ a? ²⁰ Oo, enu ci wo sɔ sa avɔ ɔ, gbɔngbɔnvɔnwo yi wo sɔ sa avɔ nɔ. Ɖe nyi Mawu yi wo sɔ sa avɔ nɔ o. Keŋ ɔ, ŋ ɖe ji mɔ, miwo le nɔ ekacaca mɛ koɖo gbɔngbɔnvɔnwo o. ²¹ Mi ɖa sɛnŋ nunu enu le Axwetɔ kɔpu nu, yi agbe nunuɔ le gbɔngbɔnvɔnwo kɔpu nu o. Mi ɖa sɛnŋ donɔ alɔ agban ɖekɛmɛ koɖo Axwetɔ, yi a gbe donɔ alɔ agban mɛ koɖo gbɔngbɔnvɔnwo o. ²² Alo, ji yi mi jinɔ a ho ŋhwan nɔ Axwetɔ a? Mi ɖo ŋsɛn sɔwui yɔ a? ²³ «Wo ɖe 'mɔ nɔ enushianu,» vɔ ɔ, ele ɖe le enushianu mɛ o. «Wo ɖe 'mɔ nɔ enushianu,» vɔ ɔ, enushianu cunɔ amɛ do o. ²⁴ Amɛɖe ŋgbe jinɔ yiŋtɔ nyɔnyɔ o; vɔ ɔ, le ji 'mɛbu nyɔnyɔ. ²⁵ Nɔ mi dro ɔ, mi a ɖu enuɖekpokpui ci yi wo sasa le afimɛ enyɔɖe mabiɔ se yi a sɔ caka miwoɖekiwo le ayixa mɛ o. ²⁶ Ɖo Mawu nyɔ nu mɔ: «Axwetɔ tɔyi nyi nyigban koɖo enu ciwo pleŋ yi le ji.» ²⁷ Nɔ maxɔsetɔ ɖe yɔ mi mɔ, miwo le va ɖu enu, yi mi lɔn yi yiɔ, mi ɖu enushianu ci yi wa na mi. Mi ŋgbe va biɔbiɔ enyɔ se so enuɖuɖu lɔ nu keŋ yi a xa le ayixa mɛ o. ²⁸ Vɔ nɔ amɛɖe nu nɔ mi mɔ enu cɛ nyi avɔsanu ɔ, mi ŋgbe ɖui o; nɔ nɛnɛ ci yi mi se, koɖo nɔ ayixamɛ ŋ gbe va xa nɔ wu taɖo o. ²⁹ Nɔ ŋ nunuɔ mɔ wɔŋ gbe va xa le ayixa mɛ ɔ, ɖe nyi miwo yixa nyɔ nunuɔ yi ŋ le o; vɔ ɔ, amɛ ɖyitɔ lɔ yixa nyɔ nunuɔ yi ŋ le. Nyao ɖee, ŋde yi na taɖo yi 'bɛbu yixa a va ɖoɖoɔ kojo koɖo ŋ nɔ enu ci yi ŋ vo yi wa ɔ? ³⁰ Nɔ e nyi mɔ enyɛ, ŋ do akpe nɔ Mawu do akpa ci yi ŋ xɔ ji ɖee, ŋde na taɖo yi wa nu enyɔ yi a sɔ xonɔ eɖyi ŋ nɔ enu ci taɖo yi ŋ do akpe nɔ Mawu do ji ɔ? ³¹ Nɛnɛ ɔ, enu mi a ɖuɖuɔ a, enu mi a nunuɔ a, enuɖekpokpui ci mi a wawa ɔ, mi wɛɛ yi a sɔ kanfu Mawu. ³² Mi ŋgbe nyi afɔklɛnnu nɔ yuɖatɔwo, nɔ glɛkitɔwo alo nɔ Mawu ha lɔ o. ³³ Nɛnɛke, enyɛŋtɔ can, ŋ tenɔ kpɔ mɔ ma wa enu ci yi jɔnɔ eji nɔ amɛ ɖeka ɖeka do nɛ. Ŋ ɖe jinɔ enyɛŋtɔ nyɔnyɔ o. Ŋ jinɔ xɔsetɔ sugbɔtɔ nyɔnyɔ, nɔ wa hwlɛn wo gan.