¹ Mi kpɔ do anyitɔ nu shigbe lehan yi nyɛŋtɔ kpɔkpɔ do Kliso lɔ tɔ nu, yi wawa nɛ. ² Ŋ kanfu mi. Ɖo ɔ, mi ɖoɖoɔ eŋui ŋ le enushianu mɛ; yi gbe wawa do sɛnsɛnɖoɖo ciwo yi ŋ xɔ, yi va na mi ji. ³ E le ahan ganŋkegan, ŋ ji mɔ miwo le nya mɔ Kliso yi nyi eta nɔ ŋsu ɖeka ɖeka; ŋsu nyi eta nɔ nyɔnu, yi Mawu nyi eta nɔ Kliso lɔ. ⁴ Nɔ ŋsu ɖe sɔ enu cɔn eta, yi le kuifan waa, alo yi le Mawu ŋɛdodo dɔ wawa ɖee, edodoɔ ŋkpɛn amɛ ci yi nyi eta nii. ⁵ Vɔ nɔ nyɔnu ɖe ɖe sɔ enu cɔn eta o, yi le kuifan waa alo yi le Mawu ŋɛdodo dɔ waa ɔ, e do ŋkpɛn amɛ ci yi nyi eta nii. Nenɛ ɔ, a le shigbe nyɔnu lɔ xlɔ eta nɛ. ⁶ Nɔ nyɔnu ɖe ɖe sɔ enu cɔn eta ɔ, le kpa eɖa. Vɔ nɔ a wa ɖeka nɔ nyɔnu mɔ ye kpa eɖa alo ye xlɔ eta ɔ, le sɔ enu cɔn eta. ⁷ Ŋsu ɖe ɖo yi a sɔ enu cɔn eta o. Ɖo ɔ, Mawu nɔnɔmɛ yi le shi, yi e gbe nyi kɔkɔ nɔ Mawu. Vɔ nyɔnu yɛ ɔ, yɛ nyi kɔkɔ nɔ ŋsu. ⁸ Nyao ɔ, ɖe nyi ŋsu yi wo ɖeti le nyɔnu mɛ o; vɔ ɔ, nyɔnu yi wo ɖeti le ŋsu mɛ. ⁹ Nɛnɛke ɔ, ɖe nyi ŋsu yi wo wa do nyɔnu taɖo o; vɔ ɔ, nyɔnu yi wo wa do ŋsu taɖo. ¹⁰ E yi na taɖo yi nyɔnu ɖo yi a ɖo acɛkpakpa jeshidu ɖe le eta nɔ yiɖeki, ɖo Mawu cikplɔtɔwo taɖo. ¹¹ Ganŋkegan ɔ, le Axwetɔ lɔ mɛ ɔ, nyɔnu ɖe li le ŋsu godu o, yi ŋsu ɖe li le nyɔnu godu o. ¹² Nyao ɔ, shigbe lehan yi e nyi ŋsu mɛ yi wo ɖe nyɔnu so do nɛ ɔ, ahan lɔ ke ɔ, nyɔnu ji yi Mawu jinɔ ŋsu so. Eyi enuwo pleŋ sonɔ Mawu gbɔ. ¹³ Miwoŋtɔwo, mi gbeje enyɔ lɔ kpɔ: e nyɔ mɔ nyɔnu a wawa kuifan nɔ Mawu enu masɔ cɔn eta a? ¹⁴ Xexegbɛ ŋtɔ can ɖe kplanɔ enu mi mɔ ŋkpɛn nyɔ yi nyi mɔ ŋsu a wa eɖa jinjin ɖɛ ba? ¹⁵ Vɔ nɔ nyɔnu yɛ wa eɖa jinjin ɖɛ ɔ, bubu yi e nyinɔ nɔ e yɛ. Ɖo ɔ, eɖa jinjinjin lɔ ɖekɛ nyi etacɔnnu han wo nii vɔ. ¹⁶ Nɔ mɛɖe ji mɔ ye a dɔn enyɔ so enyɔ cɛ nu ɔ, le nya mɔ, miwo ɖe ɖo jijɔ hunno o; nɛnɛke yi e gbe le do nɔ Mawu ha lɔwo nɛ. ¹⁷ Le enu kplanmɛ nyɔ cɛwo mɛ ɔ, ŋ ɖa kanfu mi o. Ɖo miwo bɔbɔwo ɖe nana mɔ miwo le nyɔ do ji o. Vɔ ɔ, wo nana yi mi dɔndɔn do ji. ¹⁸ Nɔ na tɔɛ ji ɔ, ŋ seseɛ mɔ, nɔ mi yi bɔbɔ le Mawu ha lɔ mɛ ɔ, klanklanwo nɔnɔ miwo domɛ. Ŋ xɔ enyɔ hunnɔ ji se le akpa ɖeka. ¹⁹ E le mɔ klanklanwo a nɔ mi mɛ; nɛnɛ ɔ, wa sɛnŋ jeshi miwo domɛtɔ ciwo yi donɔ eji le tetekpɔ hwenu. ²⁰ Ci yi e le ahan nɔ mi yi bɔbɔ ɔ, ɖe nyi va mi vayi bɔnɔ yi a ɖu Axwetɔ nuɖuɖu yɔ o. ²¹ Ɖo nɔ wo jijia tɔ enu ɖuɖu ɔ, amɛ ɖeka ɖeka shinɔ eju a yi sɔ yiŋtɔ nu, a tɔ ɖuɖu. Gahunnɔmɛ ɔ, 'meɖewo cinɔ shive yi 'mɛɖewo nunɔ vɛn kaka yi a mu. ²² Axwe ɖe le mi shi yi mi a ɖu enu, yi a nu enu le mɛ ba? Alo gba mi gbagbali Mawu ha lɔ, yi dodoɔ ŋkpɛn 'mɛ ciwo shi yi enu ɖe ɖe le wo a? Enyɔ hɛnɖe yi ŋ ɖo a nu nɔ mi ɔ? Le enyɔ hunnɔ yɛ mɛ ɖe, ŋ ɖe kanfu mi o. ²³ Ɖo enyɛ ɔ, ŋ xɔ enu ci yi ŋ va nu nɔ mi so Axwetɔ gbɔ: ezan ci mɛ yi wa sɔɛ doashi le ɔ, Axwetɔ Yesu sɔ kpɔnnɔ. ²⁴ Ci yi e do akpe nɔ Mawu doji ɔ, e fiin mɛ, yi nu mɔ: «Ecɛ yi nyi anyi lankpu ci yi wo sɔ na do miwo ta. Mi wɛɛni ahan, yi a sɔ ɖonɔ eŋui ŋ kpɔ.» ²⁵ Nɛnɛke, ci yi wo ɖu enu ɖegbɔ ɔ, e sɔ vɛn kɔpu ci nyi ɖɔɖɔ ɖeka, yi nu mɔ: «Kɔpu cɛ nyi Mawu zoɖuɖu yoyu so anyi hun ci yi lemɛ mɛ. Hweɖekpokpuinu ci yi mi a nui ɔ, mi wɛɛni nɛnɛ yi a sɔ ɖonɔ eŋui ŋ kpɔ.» ²⁶ Ɖo ɔ, hweɖekpokpuinu ci yi mi a ɖukpɔnnɔ cɛ, yi a nu vɛn kɔpu ɖɔɖɔ cɛ ɔ, eku ci yi Axwetɔ lɔ ku yi mi kakaka nɔ amowo kaka sɔna hwecinu yi a trɔ gbɔ. ²⁷ E yi na taɖo ɔ, nɔ amɛɖe ɖu kpɔnnɔ lɔ, yi nu Axwetɔ ven lɔ, makɔmakɔɖe ɔ, e je agɔ do Axwetɔ lankpu koɖo yi hun. ²⁸ Amɛ ɖeka ɖeka le gbeje yiɖeki mɛ kpɔ gbɔxwe yi a ɖu kpɔnnɔ lɔ, yi a nu vɛn le kɔpu lɔ mɛ. ²⁹ Ɖo nɔ amɛɖe ɖu kpɔnnɔ lɔ, yi nu vɛn le kɔpu lɔ mɛ, yi ɖe nya enu ci nyi Axwetɔ lankpu lɔ o ɔ, e dɔndɔn Mawu kojoɖoɖo va yiɖeki ji. ³⁰ Enu ci yi na taɖo yi amɛ sugbɔ nyi edɔnɔwo le miwo domɛ, amɛ sugbɔ xo ekplɛ, yi amɛ sugbɔ can gbe ku le miwo domɛ nɛ. ^{31 32} Nɔ mi gbejenɔ miwoɖekiwo kpɔ gbɔxwe yi wanɔ enu ciwo yi mi a wa ɔ, mi shishiɛ nɔ kojoɖoɖo. Vɔ ɔ, nɔ Axwetɔ ɖo kojo koɖo mi ɔ, eto yi e dɔndɔn nɔ mi nɔ Mawu ŋgbe va so eku kojo nɔ miwo koɖo xexe lɔ mɛtɔwo o. ³³ Ci yi e le ahan ɔ, nɔvinyɛwo, nɔ mi bɔ yi a ɖu Axwetɔ nuɖuɖu lɔ ɔ, mi nɔnɔ ete kpɔ miwonɔnɔwo. ³⁴ Nɔ shive ci 'mɛɖe ɔ, le ɖu enu le axwe mɛ nɔ mi ŋgbe va dɔn Mawu kojoɖoɖo va miwoɖekiwo ji o. So miwo nyɔbiɔse kpɛtɛwo nu ɔ, nɔ ŋ va va mi gbɔ ɔ, na ɖo wo nu nɔ mi.