ETA 12

1 Sɔ kudo gbɔngbɔnmɛ nuwawawo nu ɔ, nɔvinyɛwo, ŋ de ji mɔ miwo le nɔ enumanya mɛ o. 2 Mi nya mɔ hwecinu yi mi nyi maxɔsetɔwo ɔ, enulɔ cucunɔ mi to alɔkpa ɖekpokpui mɛ ɖaɖa vojuwo, enumaxonuxuwo gbɔ. 3 E yi na taɖo yi ŋ ɖoɖoɔ ekpe yi ji nɔ mi mɔ: 'mɛɖe ɖe li yi a xoxoɔ nuxu sɔ to Mawu Gbɔngbɔn ji, yi a nu mɔ: «Wo pofi do Yesu» o. Nɛnɛke yi 'mɛɖe ɖe nunɔ mɔ: «Yesu nyi Axwetɔ» nɔ Gbɔngbɔn Kɔkɔɛ ɖe le amɛ lɔ mɛ o nɛ. 4 Keŋ ɔ, Mawu xomɛvu nunanawo li hamɛhamɛ; vɔ ɔ, Mawu Gbɔngbɔn kuɖeka lɔ yɔ. 5 Edɔwawawo li vovovo; vɔ ɔ, Axwetɔ kuɖeka yɔ. 6 Alɔkpa vovovowo li nɔ edɔwawa lɔwo; vɔ ɔ, Mawu kuɖeka lɔ yi wanɔ enuwo pleŋ le amɛshiamɛ mɛ. 7 Gbɔgbɔn lɔ ɖenɔ yiɖeki doasɛ le amɛ ɖeka ɖeka mɛ sɔ to enunana ɖe ji nɔ eha lɔ nyɔnyɔ. 8 Nyao ɔ, wo to Gbɔngbɔn lɔ ji, yi na enunyanya nuxuwo 'mɛɖe; wo gbe to Gbɔngbɔn lɔ ke ji, yi na enunyanya nuxuwo 'mɛ bu. 9 Wo to Gbɔngbɔn kuɖeka lɔ ji, yi na xɔse 'mɛ bu, yi gbe to eyɛ lɔ ke ji, yi na edɔdada 'mɛ bu ke. 10 Gbɔngbɔn lɔ na acɛ, ci yi wa sɔ wawa enujiŋwo 'mɛɖe; yi 'mɛ bu ɔ, e na acɛ ci yɛ a sɔ wawa Mawu ŋɛdotɔ dɔ. E na acɛ ci yi wo sɔ donɔ jeshi gbɔngbɔnwo 'mɛɖe; e na egbe ebu ebuwo dodo 'cɛ 'mɛbu; yi na egbewo gɔnmɛɖeɖe 'mɛ bu hɛnnɛ. 11 Vɔ ɔ, Gbɔngbɔn kuɖeka lɔ yi wawa edɔ hunnɔwo pleŋ, yi gbe wawa enunana hamɛhamɛwo, nɔ 'mɛ ɖeka ɖeka shigbe lehan yi e drui do nɛ. 12 Nyao ɔ, lankpu lɔ nyi kuɖeka, yi wa ŋcinu sugbɔ ɖɛ. Ci yi ŋcinu lɔwo sugbɔ can ɔ, wo pleŋ nyi lankpu kuɖeka. Ahan lɔ ke yi e nyi nɔ Kliso lɔ nɛ. 13 Ɖo ɔ, Gbɔngbɔn kuɖeka mɛ yi mi pleŋ lɔ le Mawushi le keŋ yi a nyi lankpu kuɖekatɔ le: Yuɖatɔ can, Glɛkitɔ can, hwashiwo can, amɛ ciwo yi le vovomɛwo can. Gbɔngbɔn kuɖeka hunnɔ nyi eshi hanwo nɔ mi, yi mi pleŋ nu. 14 Nɛnɛ ɔ, lankpu ɖe wa ŋcinu kuɖeka ɖɛ o. Vɔ ɔ, ŋcinu sugbɔ yi le nu. 15 Nɔ afɔ nu mɔ: «Ci ŋ ɖe nyi alɔ ɔ, ŋ ɖe nyi ŋcinu ɖe le lankpu nu ɖee», e yi a nyi ɖe le lankpu lɔ nu a? 16 Nɔ eto nu mɔ: «Ci ŋ ɖe nyi ŋkuvi ɔ, ŋ ɖe nyi ŋcinu ɖe le lankpu nu ɖee», e yi a nyi ɖe le lankpu lɔ nu a? 17 Nɔ lankpu lɔ pleŋ nyi ŋkuvi ɖee, le lankpu lɔ a wɛɛ do, yi a se enu ɔ? Nɔ yi pleŋ nyi eto ɖee, le a wɛɛ do yi a hwɛn enu kpɔ ɔ? 18 Nɔ wa nui ɔ, Mawu ɖo ŋcinu ɖeka ɖeka do lankpu nu shigbe lehan yi e drui do nɛ. 19 N ŋcinu lɔwo pleŋ nyi kuɖeka sa ɖe, fini yi lankpu lɔ a le ɔ? 20 Ecɛɛ ɔ, ŋcinuwo su egbɔ; vɔ ɔ, lankpu kuɖeka yi li. 21 Ŋkuvi ɖa sɛnŋ nu nɔ alɔ mɔ: «Ŋ ɖe ʒian wu o». Yi eta ɖa sɛnŋ nu nɔ afɔwo mɔ: «Ŋ ɖe ʒian mi o». 22 Nɔ wa nuii ɔ, ŋcinu ci mi kpɔ mɔ wo kle, can wo le veviɖe. 23 Ciwo mi kpɔ mɔ wo ɖe nyi ŋɖe ɔ, wowo nu yi mi va donɔ bubu sɔwu kpɛtɛwo. Nɛnɛ ɔ, ŋcinu ciwo yi ɖe nya kpɔkpɔ, yi mi lenɔ ebu nɔ taŋ. 24 Afi ciwo yi nya kpɔkpɔ ɖe gbe hian ebulele o. Vɔ can ɔ, Mawu trɔ to lankpu lɔ do eɖe yi sɔ na bubu ciwo yi bubu hwedo. 25 Gahunnɔmɛ nɔ mama ŋgbe va nɔ lankpu lɔ mɛ ɔ, e yi ŋcinuwo pleŋ a bɔ yi a nɔnɔ ɖekɛ le wowo nɔnɔ wo nu. 26 Nɛnɛ nɔ enuɖe wawa ŋcinu ɖe ɔ, ŋcinu kpɛtɛwo pleŋ a se veve koɖyi. Nɔ wo kankanfu ŋcinu ɖe ɔ, ŋcinu kpɛtɛwo pleŋ a le jijɔ kpɔɔ koɖyi. 27 Mi nyi Kliso lɔ lankpu, yi miwo domɛtɔ ɖeka ɖeka le lankpu lɔ nu. 28 Keŋ le Mawu ha lɔ mɛ ɔ, Kliso 'mɛdɔdɔwo yi Mawu sɔ ɖo anyinɔnɔ doŋkɔ, amɛvetɔ ɔ, e sɔ Mawu ŋɛdotɔwo, amɛtɔntɔ lɔ, cica enukplanmɛtɔwo yi e sɔ do anyinɔnɔ. Le e yi godu ɔ, wa kpɔ enujiŋwawawo nunana, edɔyɔyɔ, amɛnukpekpedo, ejukplɔkplɔ koɖo egbe vovovowo dodo nunanawo. 29 Wo pleŋ yi nyi cica enukplanmɛtɔwo a? Wo pleŋ yi le enujiŋwo waa a? 30 Wo pleŋ yi xɔ edɔdada nunanawo a? Wo pleŋ yi dodoɔ egbe vovovowo a? Wo pleŋ yi ɖenɔ egbewo gɔnmɛ a? 31 Mawu xomɛvu nunana ciwo yi le etajiwo le nyi enu yi a dronɔ mi xaxaxa. Nɛnɛ ɔ, ma doasɛ emɔ ci yi nyɔ sɔwu kpɛtɛwo yi mi a to nɔ mi.