¹ Nɔ ŋ sɔɛ mɔ ŋ dodoɔ agbetɔwo koɖo acikplɔtɔwo gbewo can, ganŋkegan yi ŋ ɖe lɔnnɔ amɛ ɔ, ŋ le shigbe kleli ci yi wo xo, yi e ɖyiɖyiɛ egbe, alo egakpacɛ ci yi wo xo, yi e ɖyiɖyiɛ egbe nɛ. ² Nɔ e nyi mɔ na sɛnŋ wa Mawu ŋɛdotɔ dɔ, a ɖo enunyanya ci yi mɔnje enudanŋdonuwo pleŋ mɛ, a ɖo enunyanya pleŋ ɖɛ, nɔ e gbe nyi mɔ ŋ ɖo xɔse ci yi tenɔ ekpowo shi can, ganŋkegan yi ŋ ɖe lɔnnɔ amɛ ɔ, ŋ ɖe nyi enuɖe o. ³ Nɔ e nyi mɔ, ŋ ma anyi nuwo pleŋ nɔ amowo, nɔ ŋ gbe sɔ anyi lankpu sɔ sa avɔ, yi a sɔ yigo can, ganŋkegan yi ŋ ɖe lɔnnɔ amɛ ɔ, ele ɖe ɖe le mɛ nɔ ŋ o. ^{4 5 6 7} Lɔnlɔn gbɔnnɔ eji ɖɛ, lɔnlɔn wanɔ dɔmɛnyui. Ɖe hwannɔ'ŋ o. Lɔnlɔn ɖe xonɔ susu o. Ɖe yinɔ ego o; ɖe wanɔ enu yi a ɖu ŋkpɛn o; ɖe jinɔ yiŋtɔ nyɔnyɔ o; ɖe wanɔ xomɛshin o; ɖe lenɔ amɛ do xomɛ o. Amɛjiʒinʒin de jɔnɔ eji nii o. E sɔnɔ enu pleŋ kenɔ amɛ; e xɔnɔ enu pleŋ ji se; ekpɔnɔ emɔ nɔ enushianu; yi donɔ eji le enushianumɛ. ⁸ Lɔnlɔn ɖe vɔnɔ gbeɖe o. Mawu ŋɛdodowo a gu. Egbe vovovowo dodo a vɔ. Enunyanyawo a gu. ⁹ Ɖo ɔ, sɛnxu li nɔ miwo nunyanyawo, yi miwo Mawu ŋɛdodo dɔ can ɖo sɛnxu. ¹⁰ Vɔ nɔ enuwawavɛ hwenu va ɖo ɔ, enu ciwo yi ɖo sɛnxuwo a gu. ¹¹ Hwenu yi ŋ le ɖevixwɛ mɛ ɔ, ŋ xonɔ nuxu shigbe ɖevixwɛ nɛ. Ŋ bunɔ tamɛ kpɔ shigbe ɖevixwɛ nɛ, yi ɖenɔ susu shigbe ɖevixwɛwo nɛ. Ci yi ŋ va trɔ mɛganxoxu ɔ, ŋ gu ɖevixwɛmɛ nuwawawo. ¹² Egbɛɛ ɔ, mi kpɔkpɔ enu shigbe lehan yi wo kpɔnnɔ enu le mɛkpɔnni mɛ do nɛ, yi e kpɔtɔ le ficifici. Vɔ nɔ gamɛ va sun ɔ, mi a va kpɔ enuwo do ŋkuvi nu gannaganna. Egbɛɛ ɔ, ŋ nya enu akpaɖe. Vɔ nɔ gamɛ va sun ɔ, na va nya enuwo shigbe lehan yi Mawu jeshi ŋ vɛ do nɛ. ¹³ Keŋ ecɛ ɔ, enu amɛtɔn cɛwo kpɔtɔ li: xɔse, emɔkpɔkpɔ koɖo lɔnlɔn. Vɔ ɔ, lɔnlɔn wu egan wo pleŋ.