¹ Mi kpɔtɔ a jinɔ lɔnlɔn. Gbɔngbɔnmɛ nuwawawo le dronɔ mi xaxaxa. Veviɖe ɔ, Mawu ŋɛdodo dɔ le dronɔ ² mi.Nyao ɔ, amɛ ci yi dodoɔ egbe vovovowo ɖe xoxo nuxu nɔ agbetɔwo o. Mawu yi e xoxɔ nuxu nɔ. Ɖo ɔ, 'mɛɖe ɖe seseɛ enyɔ ci yi e nunuɔ mɛ o. Gbɔngbɔnmɛ yi e le, yi nunuɔ enyɔwlawlawo. ³ Vɔ 'mɛ ci yi le Mawu ŋɛdodo dɔ wa ɔ, yɛ xonɔ nuxu nɔ agbetɔwo: e na, yi amɛ shinnɔ, e donɔ ŋsɛn lanmɛ nɔ amɛ, yi donɔ eji exo nɔ amɛ. ⁴ Amɛ ci yi le egbe vovovowo doɔ, na yi yiŋtɔ shinnɔ; 'mɛ ci yi wawa Mawu ŋɛdodo dɔ ɔ, yɛ na nɔ yi Mawu ha shinnɔ. ⁵ Ŋ ji mɔ miwo pleŋ a donɔ egbe vovovowo. Vɔ egbe dro ŋ veviɖe sɔwu mɔ, mi a wanɔ Mawu ŋɛdodo dɔ. 'Mɛ ci yi wanɔ Mawu ŋɛdodo dɔ, nyi amɛ sɔwu 'gan 'mɛ ci yi donɔ egbe vovovowo. Gbɔxwe yi ɖa nyi nɛnɛ ɔ, a nyi nɔ egbe vovovodotɔ ɖegbɔ ɔ, egbegɔnmɛɖetɔ a ɖe egbe lɔ gɔnmɛ, nɔ Mawu ha lɔ a shin. ⁶ Ecɛɛ ɖe, nɔvinyɛwo, enunyui hɛnɖe yi e wa nɔ mi, nɔ ŋ va mi gbɔ, yi do egbe vovovowo ɔ? Ŋ wa enyui ɖe nɔ mi ba. Nɔ ŋ va, yi ɖe enuwo doasɛ nɔ mi, yi hɛn enunyanya vɛ nɔ mi, yi wa Mawu ŋɛdotɔ dɔ le miwo domɛ, alo yi hɛn enukplanmɛnyɔwo vɛ nɔ mi ɔ, ɖa do mi ji sɔwu ba? ⁷ Nɔ e nyi kpɔ mɔ enuxonu ciwo yi ɖyinɔ egbe shigbe ekahun alo acimɛkpɛn ɖe donɔ egbe vovovowo sa ɖee, le yi wa wɛɛ do yi a do jeshi enu ci xoxoɔ yi ekahun le acimɛkpɛntɔ gbɔ ɔ? ⁸ Nɔ ahwakpɛn ɖyinɔ egbe alɔkpabuɖe ɖee, mɛ yi a sɛnŋ drado nɔ ahwa wawa ɔ? ⁹ Nɛnɛke nɔ miwo can mi xoxoɔ nuxu yi wo ɖe seseɛ gɔnmɛ nii nyuiɖe ɖee, le wa wɛɛ do yi a nya enyɔ ci yi mi nunuɔ ɔ? Nuxu yi mi xoxoɔ do jihɔn mɛ kpoŋ. ¹⁰ Nɔ egbewo gbe su egbɔ le xexe mɛ ɖeeɖe can ɔ, eɖe ɖe li, yi gɔnmɛsese diin o. ¹¹ E yi na taɖo nɔ ŋ ɖe sɛnŋ ɖeɖeɛ gɔnmɛ ɔ, na nyi mɛdru hanwo nɔ 'mɛ ci yi dodoɔ; yi 'mɛ ci yi dodoɔ can a nyi mɛdru hanwo nɔ ŋ. ¹² Nɛnɛke ɔ, ci yi Gbɔngbɔn nunanawo nyi kpakpa yi sɔnɔ amɛ ɔ, mi tekpɔ yi a yi ŋkɔ do ji; vɔ ɔ, mi wɛɛ nɔ Mawu ha lɔ a shin. ¹³ E yi na taɖo ɔ, 'mɛ ci yi le egbe vovovowo doɔ, le biɔ Mawu nɔ a nii egbe lɔ gɔnmɛ ɖeɖe. ¹⁴ Ɖo nɔ ŋ wawa kuifan do egbe vovovo mɛ ɔ, anyi gbɔgbɔn yi le kuifan waa. Vɔ ɔ, anyi ŋɖɛnyanya yɛ ɖe wawa edɔ ɖe o. ¹⁵ Ci e le ahan ɖee, le na wɛɛ do ɔ? Na wa kuifan sɔto Gbɔngbɔn lɔ ji. Vɔ ɔ, na gbe wa kuifan koɖo anyi susu. ¹⁶ Nyao ɔ, nɔ yɛ dodoɔ akpe nɔ Mawu sɔto Gbɔngbɔn lɔ ji ɖee, lehan yi amɛ kpoŋ ɖe ci le enɔ tɔxu lɔ a ɖo a wu kpedodo nɔ Mawu lɔ nu do mɔ: «Xoaɖyi» ɔ? E mɔŋje enyɔ ci yi e nunuɔ mɛ teŋ a? ¹⁷ Nyɔnɔnui yɔ, eɔ le akpedodo nuxu veviwo xoɔ, vɔ ɔ, ɖe na yi a wu kpena shin o. ¹⁸ Ŋ dodoɔ akpe nɔ Mawu nɔ ci yi ŋ donɔ egbe vovovowo sɔwu miwo pleŋ. ¹⁹ Vɔ le Mawu ha lɔ mɛ ɔ, nɔ ŋ nu enyɔ amatɔn nɔ amowo, yi wa se wo gɔnmɛ, yi ŋ sɔ kplan enu wo ɔ, e jɔnɔ eji nɔ ŋ sɔwu ci yi na nu enyɔ kotokun etaɖeka (10 000) sɔto egbe vovovowo dodo mɛ. ²⁰ Nɔvinyɛwo, mi ŋgbe nyi ɖevixwɛwo le susuɖeɖe mɛ o. Vɔ le enudɔndɔn wawa mɛ ɔ, mi nyi ɖevixwɛwo, yi a nyi mɛganxoxuwo le susuɖeɖe mɛ. ²¹ Ɖo ɔ, wo ŋwlɛ do ese wema lɔ mɛ mɔ: «Egbebudotɔwo koɖo mɛdruwo ji na to yi a xo nuxu nɔ jukɔn ce. Nɔ ŋ wa ahan can ɔ, wo ɖa ɖo eto ŋ o. Tɔhonɔ yi nu nɛnɛ!» ²² Nɛnɛ ɔ, egbe vovovowo dodo ɖe nyi jeshidu ɖe nɔ xɔsetɔwo o. Vo ɔ, maxɔsetɔwo yi e nyi jeshidu nɔ. Mawu ŋɛdodo ɖe nyi jeshidu nɔ maxɔsetɔwo o. Vɔ xɔsetɔwo yi e nyi jeshidu nɔ. ²³ Mi a sɔɛ mɔ Mawu ha lɔ pleŋ bɔ, yi amɛshiamɛ le egbe vovovowo doɔ. Nɔ etoɖotɔ kpoŋ ɖewo alo maxɔsetɔ ɖewo va ɖo enɔtɔxu ɖee, wo ɖa nu mɔ miwo je suku ba? ²⁴ Vɔ ɔ, nɔ ameshiamɛ le Mawu ŋɛdodo dɔ waa, yi 'mɛ lɔ va ɖo enɔtɔxu ɔ, a ze nii petii mɔ yɛ nyi enuvɔnwatɔ le enyɔ ciwo pleŋ yi e seseɔ taɖo. A sɔ enyɔ lɔwo ɖo kojo koɖo yiɖeki. ²⁵ Hwenɔnu ɔ, enyɔwlawla ciwo yi le eji mɛ nii a to, yi a doŋdo, yi a sɛn Mawu, a nu mɔ: «Mawu le miwo domɛ nyao!» ²⁶ Ci yi e le nɛnɛ ɖee, le yi wa wɛɛ do ɔ, nɔvinyɛwo? Nɔ mi va bɔ ɖee, miwo domɛtɔ ɖe sɛnŋ ji eha, eɖe sɛnŋ kpla enu amɛ, ebu sɛnŋ ɖe enyɔ doasɛ, ebu sɛnŋ ɖe egbe lɔwo gɔnmɛ. Wo ɖo a wa enu hunnɔwo pleŋ, nɔ Mawu ha lɔ a shin le xɔse mɔ ji. ²⁷ Nɔ wa do egbe vovovowo ɔ, le nyi zeve alo zetɔn nɔ e wu egan glo, yi 'mɛɖeka ɖo a li hɛnnɛ yi a ɖe egbe lɔwo gɔnmɛ. ²⁸ Nɔ 'mɛɖe ɖe li, yi a ɖe egbe bu lɔ gɔnmɛ ɔ, 'mɛ ci yi donɔ egbe vovovowo lɔ le bɔ enu kplii le Mawu ha lɔ mɛ. Nɔ a xo nuxu ɔ, le xui nɔ yi koɖo Mawu. ²⁹ Sɔ kuso Mawu ŋɛdotɔwo nu ɔ, amɛ amɛve alo amɛtɔn ɖe wawa edɔ lɔ, yi 'mɛ kpɛtɛwo a glogloɔ enyo lɔwo mɛ kpɔ. ³⁰ Vɔ nɔ 'mɛ bu va bɔbɔ lɔ, yi Mawu ɖe enuɖe doasɛ nii ɔ, amɛ ŋkɔtɔ ci yi le nuxu xoɔ le bɔ enu. ³¹ Nyao ɔ, miwo pleŋ a sɛnŋ wa Mawu ŋɛdodo dɔ dru, eɖe kplɔ eɖe do, yi a sɔ kplan enu amɛshiamɛ, yi a gbe do ŋsɛn lanmɛ nɔ wo. ³² Mawu ŋɛdotɔwo ɖonɔ acɛ do Mawu Gbɔngbɔn ci yi le wo mɛ ji. ³³ Ɖo ɔ, Mawu ɖe lennɔ enu ciwo yi ɖe le ɖoɖo nu o. Vɔ ɔ, e lɔnnɔ fafa. Shigbe lehan yi e le do le Mawu hawo pleŋ mɛ do nɛ ɔ, ³⁴ nyɔnuwo le bɔ enu le Mawu hawo mɛ. Ɖo ɔ, wo ɖe ɖe emɔ nɔ wo mɔ, wo le xo nuxu le bɔbɔwo mɛ o. Wo le bɔbɔ wowoɖekiwo shigbe lehan yi ese nui do nɛ. ³⁵ Nɔ wo ji mɔ yewo a xɔ ekpla ɖe ɔ, wo le biɔ wowo suwo se le axwe mɛ. Ɖo ɖe je acɔ mɔ nyɔnu a xoxoɔ nuxu le Mawu ha lɔ mɛ o. ³⁶ Miwo gbɔ yi Mawu nyɔ to so a? Alo miwoɖekɛwo gbɔ yi Mawu nyɔ lɔ va a? ³⁷ Nɔ 'mɛɖe bubuɔ yiɖeki do Mawu ŋɛdotɔ alo amɛ ci yi Mawu Gbɔngbɔn kplɔkplɔ ɔ, e ɖo a xɔ enu ci yi ŋ ŋwlɛ ɖaɖa mi cɛ, shigbe Axwetɔ gbeɖeɖe nɛ. ³⁸ Eyi nɔ 'mɛɖe ɖe sɔ eɖe le mɛ nɔ enyɔ lɔ ɔ, wo ŋgbe sɔ eɖe le mɛ nɔ eyɛ hɛnnɛ o. ³⁹ Ci yi e le ahan ɔ, nɔvinyɛwo, Mawu ŋɛdodo dɔ le dronɔ mi wawa veviɖe , yi mi ŋgbe xe emɔ nɔ egbe vovovowo dodo o. ⁴⁰ Vɔ ɔ, enushianu le yi do lehan yi e je do nu koɖo ɖoɖo nu.