¹ Ecɛɛ ɖee, nɔvinyɛwo, ŋ ɖoɖoɔ ekpe Yesu Kliso ŋɛnyui ci yi ŋ va do nɔ mi ji; eŋɛnyui lɔ ci yi mi se, yi le doashi goŋgoŋ. ² Eŋɛnyui hunnɔ ke yi kplɔ mi yikɔ hwlɛngan mɔ ji nɔ mi lii do tamɛ shigbe lehan yi ŋ dui nɔ mi do ne. Nɔ ɖe nyi ahan ɔ, a nyi mi xɔse gbali. ³ Do ŋkɔ nɔ enushianu ɔ, ŋ do eŋɛ ci yi enyɛŋtɔ, ŋ xɔ nɔ mi. E yi nyi mɔ: Kliso lɔ ku do miwo nuvɔnwo ta shigbe lehan yi wo ŋwlii daɖɛ do Mawu nyɔ wemawo mɛ do nɛ. ⁴ Wo ɖyii, yi e gbe fɔn so ekuwodi le ŋkeke amɛtɔn lɔ gbe shigbe lehan yi wo ŋwlii daɖɛ do Mawu nyɔ wemawo mɛ do nɛ. ⁵ E doasɛ yiɖeki nɔ Kefasi. ⁶ Le e yi godu ɔ, amɛdɔdɔ wive lɔwo kpɔɛ. E gbe doasɛ yiɖeki nɔ nɔvi hlɛnhlɛnmɛ sanŋdiatɔn (500) kaka enu gbe le ji. Amɛ ciwo yi kpɔɛ sugbɔtɔ kpɔtɔ le agbe, yi e ɖewo ku. ⁷ Le e yi godu ɔ, e doasɛ yiɖeki nɔ Ʒaki koɖo amɛdɔdɔ lɔwo pleŋ. ⁸ Ci yi wo pleŋ lɔ kpɔɛ ɖegbɔ ɔ, e doasɛ yiɖeki nɔ enyɛ can hɛnnɛ, enyɛ ci yi le shigbe ɖevi ci yi gamɛ ɖe sun nɔ gbɔxwe yi wo ji nɛ. ⁹ Nyao, enyɛ ɔ, enyɛ yi nyi amɛdɔdɔ hwɛhwɛtɔ le amɛdɔdɔwo domɛ. Bubudoamɛnu sugbɔ yi e nyi nɔ ŋ mɔ, wo yɔyɔ ŋ mɔ amɛdɔdɔ. Ɖo ɔ, ŋ ci yumɛ nɔ Mawu ha lɔ vayi. ¹⁰ Vɔ, sɔ toto Mawu xomɛvu mɛ ɔ, ŋ nyi enu ci yi ŋ nyi; yi yi xomɛvu nɔ ŋ, ɖe nyi enugbali o. Vɔ ɔ, ŋ wa edɔ sɔwu amɛdɔdɔ kpɛtɛwo pleŋ. Ɖe nyi enyɛ yi wa edɔ o. Vɔ ɔ, Mawu xomɛvu ci yi le ŋ ji, yi wa edɔ. ¹¹ Ci yi e le ahan ɔ, nɔ e nyi enyɛ yɔ can, wowo yɔ can ɔ, eŋɛ ci yi mi donɔ koɖo axwa ɔ, yi nɛ nyi eŋɛ ci ji yi mi xɔse nɛ. ¹² Keŋ nɔ mi nunuɔ nɔ amowo koɖo axwa mɔ Kliso lɔ fɔn so ekuwodi ɔ, le e wɛɛ do yi amɛ ɖewo le mi mɛ, yi sɛnŋ, yi nunuɔ mɔ, "lehan yi amɛkukuwo a fɔn so ekuwodi ɔ?" ¹³ Nɔ e nyi mɔ fɔnfɔn so ekuwodi ɖe li ɔ, a nyi Kliso lɔ can ɖe fɔn so ekuwodi o. ¹⁴ Nɔ e nyi mɔ Kliso lɔ ɖe fɔn so ekuwodi ɔ, a nyi ke eŋɛnyui lɔ ci yi mi do nɔ mi nyi enugbali, yi miwo xɔse can gbe nyi enugbali. ¹⁵ Nɔ e le ahan ɔ, a nyi ke wa kpɔkpɔ mi shigbe Mawu kunnuɖetɔ evihotɔwo nɛ. Ɖo ɔ, mi ɖe kunnu evixoxotɔ do Mawu nu mɔ yi fɔn Kliso lɔ so ekuwodi. ganŋkegan yi ɖe fɔin o; nɔ e le mɔ amɛkukuwo ɖe fɔnnɔ so ekuwodi nɛ. ¹⁶ Nyao ɔ, nɔ amɛkukuwo ɖe fɔnnɔ so ekuwodi ɔ, a nyi ke Kliso lɔ can ɖe fɔn so ekuwodi o. ¹⁷ Eyi nɔ Kliso lɔ ɖe fɔn so ekuwodi ɔ, a nyi ke, miwo xɔse ɖe ɖo eta o; mi gbe kpɔtɔ le miwo nuvɔnwo mɛ. ¹⁸ Yi 'mɛ ciwo yi ku le Kliso mɛ, bu gbijigbiji. ¹⁹ Nɔ e nyi mɔ agbe cɛ mɛ ɖekɛ taɖo yi mi kpɔkpɔ emɔ nɔ Kliso lɔ do ɔ, mi waŋshishi sɔwu amɛshiamɛ. ²⁰ Vɔ ɔ, Kliso lɔ fɔn cekii nyao so ekuwodi. E yɛ yi nyi amɛ ŋkɔtɔ le amɛkukuwo domɛ yi fɔ so ekuwodi. ²¹ Ɖo ci yi e nyi agbetɔ kuɖeka ji yi eku to, yi va ɔ, agbetɔ kuɖeka ji ke yi fɔnfɔn so ekuwodi to, yi va hɛnnɛ. ²² Nyao ɔ, shigbe lehan yi amɛshiamɛ ku sɔto Adam ji do nɛ ɔ, nɛnɛke yi amɛshiamɛ a kpɔ agbe sɔto Kliso lɔ ji do nɛ. ²³ E le ahan ganŋkegan ɔ, wa fɔn amɛɖeka amɛɖeka so ekuwo ekuwodi do ɖoɖo nu: Kliso lɔ yi fɔn do ŋkɔ. Le e yi godu ɔ, wa fɔn amɛ ciwo yi nyi Klisotɔ hwecinu yi Kliso lɔ a va trɔgbɔ. ²⁴ Le eyi godu ɔ, vɔvɔnu a ɖo gacimɛ yi Kliso lɔ a sɔ efiɔɖuɖu jo nɔ amɛ ci yi nyi Mawu koɖo Eda le efiɔɖuɖuwo pleŋ, acɛkpakpawo pleŋ, koɖo ŋsɛnwo pleŋ gugu gbijigbiji. Eyi a nyi e vɔ. ²⁵ Ɖo ɔ, e le mɔ, Kliso lɔ a ɖu efiɔ kaka sɔnanɔ hwecinu yi Mawu a sɔ yi ketɔwo trɔ yi fɔɖojinuwo. ²⁶ Ketɔ kpɛtɛkpɛtɛ ci yi wa va gu, yi nyi eku. ²⁷ Nyao, Mawu sɔ enuwo pleŋ do Kliso cɛkpakpa gɔnmɛ. Vɔ ci yi e nunuɔ mɔ enushianu a bɔbɔ nii ɔ, e ze petii mɔ, Mawu, amɛ ci yi na, yi enushianu bɔbɔ nii yɛ ɖe le mɛ o. ²⁸ Eyi gacimɛ yi enushianu va bɔbɔ nɔ Kliso ɖegbɔ ɔ, Evi lɔ, yiŋtɔ, a va bɔbɔ nɔ amɛ ci yi na yi enushianu bɔbɔ nii. Gahunnɔmɛ ɔ, Mawu a ɖu efiɔ do enushianu ji. ²⁹ Nɔ amɛkukuwo ɖa fɔn so ekuwodi nyɔnɔnuitɔ ɖe, ŋɖe yi na taɖo yi amowo na yi wo lenɔ Mawushi nɔ wo do enu nɔ 'mɛ ci yi ku do ɔ? ³⁰ Miwo ɖee, ŋɖe taɖo yi mi gbenɔ miwoɖekiwo do afɔku mɛ gashiagamɛ do ɔ? ³¹ Nɔvinyɛwo, ŋkeke ɖeka duu ɔ, eku glinɔ ŋ do. Ŋ nunuɔ ahan nɔ kanfukanfu ci yi ŋ xɔnɔ sɔto mi ji le miwo Xwetɔ Yesu Kliso mɛ taɖo. ³² Ŋɖe yi na kpɔ le ahwa ci yi ŋ wa koɖo egbemɛ lanwo le Efezi mɛ, nɔ e nyi mɔ agbetɔwo susu nu yi ŋ wɛɛ do ɔ? Nɔ e nyi mɔ amɛkukuwo ɖa va fɔn so ekuwodi ɖee, «mi na nɔ mi a ɖu enu yi a nu enu, ɖo esɔ mi a ku.» ³³ Mi ŋgbe na nɔ wa ble mi o. Eha baɖawo dodo wunɔ jijɔ nyuiwo le amɛ mɛ. Afɔ zanzan yi banɔ emi nɔ jɔjɔɛtɔ. ³⁴ Mi trɔgbɔva miwoɖekiwo mɛ nyuiɖe, yi a tashi enuvɔn wawa. Nyao ɔ, 'mɛɖewo ɖe jeshi Mawu ɖɛ le mi mɛ o. Ŋ nunuiɛ nɔ a wa ŋkpɛn nɔ mi. ³⁵ Vɔ ɔ, amɛ a biɔ se mɔ lehan yi amɛkukuwo a fɔn so ekuwoɖi do ɔ? Lankpu hɛnɖe han yi a le wo shi, gacimɛ yi wa fɔn wo ɔ? ³⁶ Enumamɔŋjemɛtɔ yi e nyi! Nɔ e do jinukun ɖe, eɔŋt ɖee, ɖe benɔ le egu mɛ gbɔxwe yi minɔ ba? ³⁷ Enu ci yi e do ɔ, ɖe nyi mɔ e yi nyi jinuku nɔnɔmɛ ci yi a va to esɔmɛ o. Eliku ku alo jinuku bu ku ɖe kpoŋ yi e do. ³⁸ Jinuku ci ku yi e do lɔ ɔ, Mawu nanɔ nɔnɔmɛ ci yi drui, yi jinuku ɖeka ɖeka ɖonɔ yiŋtɔ nɔnɔmɛ. ³⁹ Gbazawo pleŋ ɖe nyi enu ŋmɛɖeka o. Agbetɔwo gbaza nyi ebu, elanwotɔ nyi ebu, xeviwotɔ nyi ebu, yi kpaviwotɔ gbe nyi ebu hɛnnɛ. ⁴⁰ Gbaza dewo nyi jiŋkuimɛtɔ, yi ɖewo nyi nyigbanjitɔ hɛnnɛ. Vɔ ɔ, klɛnklɛn ci yi le jiŋkuimɛtɔwo nu to akpo, yi ci yi le nyigbanjitɔwo nu yɛ gbe to akpo. ⁴¹ Klɛnklɛn ci yi le ewe nu nyi ebu, ci yi le wleci nu to akpo, wleciviwotɔ gbe le ebu. Eyi le wlecivi lɔwo can ɔ, klɛnklɛn ci yi le ɖeka ɖeka nu to akpo nɔ yi kpena. ⁴² Ahan yi a va nyi hwenu yi amɛkukuwo a va fɔn so ekuwodi nɛ. Enugblegble yi lankpu nyi, yi wo sɔ do edumɛ. Vɔ ɔ, wa va fɔin so ekuwodi magblemagble. ⁴³ Ci yi wo sɔ do egu le enugbali nyinyi mɛ ɔ, wa va fɔin so ekuwodi le klɛnklɛn mɛ. Ci yi wo sɔ do egu le klekli mɛ ɔ, wa va fɔin le ŋsɛn mɛ. ⁴⁴ Ci yi wo ɖyi koɖo jɔjɔmɛ lankpu ɔ, wa va fɔin koɖo gbɔngbɔnmɛ lankpu. Nɔ e nyi mɔ jɔjɔmɛ lankpu li ɔ, gbɔngbɔnmɛ lankpu can li hɛnnɛ. ⁴⁵ Eyi na taɖo yi wo ŋwlɛ do Mawu nyɔ wema mɛ mɔ: «Adamu, agbetɔ ŋkɔtɔ, va trɔ amɛleagbe, ci yi nyi jɔjɔmɛ mɛ.»; Vɔ yi Adamu godugodutɔ nyi gbɔngbɔn ci yi nanɔ agbe. ⁴⁶ Ɖe nyi mɔ gbɔngbɔnmɛtɔ yi nyi ŋkɔtɔ o. Jɔjɔmɛ yi nyi ŋkɔtɔ, yi gbɔngbɔnmɛtɔ va kplɔɛ do. ⁴⁷ Agbetɔ ŋkɔtɔ ci yi wo ɖe ti le nyigban mɛ ɔ, ekɔ yi wo sɔ mii. Agbetɔ amɛvetɔ so jiŋkuimɛ. ⁴⁸ Agbetɔ ciwo yi le nyigban le shigbe agbetɔ ciwo yi wo sɔ ekɔ mɛ nɛ. Agbetɔ ciwo yi le jeŋkuimɛ le shigbe amɛ ci yi so jiŋkuimɛ va nɛ. ⁴⁹ Shigbe lehan yi agbetɔ ci yi wo sɔ ekɔ mɛ nɔnɔmɛ le mi nu do nɛ ɔ, ahan lɔ ke yi agbetɔ ci yi so jiŋkuimɛ nɔnɔmɛ can a va nɔ mi nu do nɛ. ⁵⁰ Nɔvinyɛwo, enyɔ ci yi ŋ nunuɔ, yi nyi mɔ, lankpu koɖo ehun ɖa sɛnŋ kpɔ akpa ɖe a xɔ nɔ Mawu fiɔɖuxu lɔ o, yi enu ci yi nyi enugblegble can ɖa sɛnŋ ɖu cinɔ nɔ enu magblemagble o. ⁵¹ Na nu enyɔwlawla ɖeka nɔ mi: mi pleŋ, mi ɖa ku o. Vɔ ɔ, wa ɖɔli nɔnɔmɛ nɔ mi pleŋ. ⁵² Zeɖeka kpataa, le ɖabaxoxo ɖeka mɛ, hwecinu yi ekpɛn godugodutɔ a ɖyi egbe. Ekpɛn lɔ a ɖyi, yi amɛkukuwo a fɔn so ekuwodi koɖo nɔnɔmɛ magblemagble. Miwo yɛ ɔ, Mawu a ɖɔli miwo nɔnɔmɛ. ⁵³ Nyao ɔ, e le mɔ enu ci yi nyi enugblegble hunnɔ a sɔ enu magblemagble nɔnɔmɛ do, yi enukuku a sɔ enumakumaku nɔnɔmɛ do. ⁵⁴ Nɔ enugblegble sɔ enumagblemagble nɔnɔmɛ do, yi enukuku sɔ enumakumaku nɔnɔmɛ do ɖegbɔ ɔ, e yi enyɔ ci yi Mawu nu, yi wo ŋwlɛ daɖɛ a va mɛ. E nu mɔ: «Wo ɖu eku ji vɛ, yi gui!» ⁵⁵ «Eku, fini yi a wu jiɖuɖu lɔ le ɔ? Eku, fini yi ŋsɛn ci yi e sɔ wunɔ amɛ le ɔ?» ⁵⁶ Eku ŋsɛn yi nyi nuvɔn; yi enuvɔn ŋsɛn nyi ese. ⁵⁷ Vɔ ɔ, akpe yi mi a do nɔ Mawu ci yi na ejiɖuɖu mi sɔto miwo 'Xwetɔ Yesu Kliso ji. ⁵⁸ Ci yi e le ahan ɔ, nɔvinyɛ veviwo, mi le miwoɖekiwo sɛnsinɖe. Mi ŋgbe hunhun o. Mi yi ŋkɔ do ji hweshiahwenu le Axwetɔ dɔ lɔ wawa mɛ, yi a nya ɖɛ mɔ, edɔ ci mi wawa nɔ Axwetɔ ɖa nyi enugbali o.