¹ Sɔ kuso enunana, ci wa jɔnɔ xɔsetɔwo ɔ, miwo can mi mɛɛ do lehano. yi ŋ nui nɔ Mawu ha ciwo yi le Galati kan mɛ nɛ ji. ² Miwo domɛtɔ ɖeka ɖeka le ɖe enu ci yi a sɛnŋ na do akpa ɖe le yi xwe le ŋkeke ŋkɔtɔ ji nɔ kwɛshiɖagbe lɔ. Gahunnɔmɛ ɔ, ɖa nyi enyɛ yi a va ɖo gbɔxwe yi mi a tɔ enunana lɔwo jɔjɔ ³ Nɔ ŋ va ɖo ɔ, na ŋwlɛ wemawo bɔdo enu ci yi mi jɔ nu, yi a sɔ wo na 'mɛ ciwo yi mi can ɖɛ, yi wa hɛn miwo nunana lɔwo yi Zeluzalɛmu. ⁴ Nɔ e va ʒian mɔ enyɛŋtɔ na yi ɔ, 'mɛ lɔwo a yi koɖo ŋ. ⁵ Na to Maseduwanu kanmɛ gbɔxwe yi a va mi gbɔ. Ɖo na todo e nɔ. ⁶ Nɔ ŋ va ɔ, ŋ sɛnŋ nɔ mi gbɔ, yi a xɔ azan hwɛɖeka. Taŋfɔin ɔ, ŋ sɛnŋ nɔ mi gbɔ kaka vuvɔ hwenu lɔ pleŋ a vayi. Gahunnɔmɛ ɔ, mi a do alɔ ŋ le enu ciwo yi ʒian ŋ mɛ nɔ ma sɔ yi anyi mɔzɔnzɔn ɖekpokpui ji. ⁷ Ecɛɛ ɔ, ŋ ɖe gbe ji mɔ na to mi gbɔ kpoŋ, yi a gbe ɖedo o. Ŋ le emɔkpɔkpɔ mɛ nɔ Axwetɔ lɔ lɔn ɔ, na ci mi gbɔ hwɛɖeka. ⁸ Vɔ ɔ, na nɔ Efɛzi jugan mɛ kaka a sɔna nɔ Panŋtekoti zangbe. ⁹ Ɖo ci yi ketɔwo sugbɔ can ɔ, Mawu hun emɔ nɔ ŋ ganganɖe, yi na wa edɔ nyuiɖe, yi enyui a to so mɛ. ¹⁰ Nɔ Timɔte va mi gbɔ ɔ, mi na nɔ ŋ gbe vɔn le miwo domɛ o; ɖo ɔ, e wawa edɔ shigbe enyɛ nɛ nɔ Axwetɔ. ¹¹ Ci yi e le ah.an ɔ, 'mɛɖe ŋgbe gbalii o. Mi ji enu ciwo yi a sɔ zɔn emɔ lɔ nyuiɖe kaka yi a va ɖo ŋ gbɔ nii. Ɖo ɔ, ŋ le ete kpɔ yi koɖo miwo nɔviwo. ¹² Sɔ kudo miwo nɔvi Apolosu nu ɔ, ŋ do ŋsɛn lanmɛ nii veviɖe mɔ, yi ɖe va kpɔ miwo koɖo miwo nɔvi buwo. Vɔ ɔ, ɖe ji ɖeeɖe mɔ ye a va kaakaɛ o. Nɔ e va kpɔ emɔnu ɖe ɔ, a va. ¹³ Mi nɔ ŋzɔn. Enuɖe ŋgbe hunhun mi le xɔse mɛ o. Mi do eji. Mi do ŋsɛn. ¹⁴ Mi wa enushianu koɖo lɔnlɔn. ¹⁵ Ŋ gbe jijiɛ a ɖo edɔ ɖeka ekɔ nɔ mi nɔvinyɛwo. Mi nya mɔ 'mɛ ciwo yi le Sitefanasi xwemɛ yi nyi amɛ ŋkɔtɔ ciwo yi trɔ Klisotɔ le Akayi kan mɛ. Wo sɔ wowoɖekiwo jo, yi tɔ edɔ wawa nɔ 'mɛ ciwo yi Mawu can, yi ɖe do akpo. ¹⁶ Mi bɔbɔ miwoɖekiwo nɔ nɛnɛ mɛwo koɖo 'mɛ ciwo pleŋ yi wawa edɔ koɖo wo sɛnŋsɛnŋɖe. ¹⁷ Eji jɔjɔ ŋ ɛ, nɔ ci yi Sitefanasi, Fɔtunatusu koɖo Akayikusu va ŋ gbɔ. Ɖo ci yi mi ɖe li ɔ, wo nɔ miwo dumɛ nɔ ŋ. ¹⁸ Wo na yi susumɛ vo nɔ ŋ shigbe lehan yi wo wɛɛ nɔ miwoŋtɔwo vayi do nɛ. Mi nya lehan yi, mi a kanfunɔ nɛnɛ 'mɛwo do. ¹⁹ Mawu ha ciwo yi le Azi kan mɛ do egbe ɖaɖa mi. Akilasi koɖo Plishili sɔkpenɔ Mawu ha ci yi le wowo xwe mɛ do egbe ɖaɖa mi nyuiɖe le Axwetɔ lɔ mɛ. ²⁰ Nɔvi xɔsetɔwo pleŋ do egbe ɖaɖa mi. ²¹ Enyɛ Pɔlu ŋtɔ yi sɔ enuŋwlɛci yi ŋwlɛŋwlɛ egbedodonɔamɛ nyɔ cɛwo nɔ mi. ²² Nɔ 'mɛɖe ɖe nyi Axwetɔ xlɔ ɔ, ekpɛnsɛn le va ji. Malanata! Axwetɔ a trɔva ! ²³ Axwetɔ Yesu xomɛvu le nɔ koɖo mi. ²⁴ Ŋ lɔ mi pleŋ le Yesu Kliso mɛ.