¹ Kuso elan ciwo yi wo wu nɔ vojuwo ɖuɖu nu ɔ, mi nya mɔ mi pleŋ nya enu ɖe soso nu. Vɔ ɔ, enunyanya na yi wo yinɔ ego, vɔ lɔnlɔn yɛ blanɔ amɛ do eju. ² Nɔ amɛɖe bunɔ mɔ ye jeshi enuɖe ɔ, d'e jeshi enu lɔ shigbe lehanci yi e ɖo a jeshii do ɛnɛ o. ³ Vɔ nɔ amɛɖe lɔn Mawu ɔ, Mawu jeshii ɖe. ⁴ Ci yí e le ahan ɔ, kudo elan ciwo yi wo sɔ sa avɔn nɔ vojuwo ɖuɖu nu ɔ, mi nya mɔ gbe voji ɖe de le xexe cɛ mɛ o yi Mawu kuɖeka yi le egbe lɔ mɛ. ⁵ Ci eji enu sugbɔ le jeŋkuishi mɛ koɖo nyuigban ji yi amɛwo yɔnɔ mɔ enusɛnsɛnwo yi le wowo gbɔ enusɛnsɛnwo koɖo axwetɔwo su egbɔ can ɔ, ⁶ Mawu kuɖeka yi li nɔ miwo yɛ. E yi nyi Mawu Eda ci gbɔ yi enuwo pleŋ sonɔ; yitɔ yi mi nyi. Axwetɔ kuɖeka yi li hɛnnɛ. E yi nyi Yesu kliso ci ji yi enushanu to yi li; e yi ji mi to yi le agbe. ⁷ Vɔ amɛ shamɛ de nya ahan o. Nyao, voju sɛnsɛn gbe kpɔtɔ le lanmɛ nɔ amɛ ɖewo. E yi na taɖo, kaka je egbɛwo yɛ can ɔ, wowo ɖunɔ elan hunnɔtɔ hanwo yi a sɔnɔ wo shigbe voju lɔwo tɔ yi wo nyi ɛnɛ wowo yexawo de shin o yi nunɔ mɔ yewo je edyi mɛ. ⁸ Keŋ ɔ, d'e nyi enuɖuɖu yi a te mi gogo Mawu o. Nɔ mi de ɖui o ɔ, enuɖe de gu mi o. Nɔ mi de ɖui o ɔ, enuɖe de gu mi o. Nɔ mi ɖui ɔ, mi de xɔ enuɖe do ji sɔwu o. ⁹ E le ahan gankegan ɔ, mi kpɔ nyuiɖe nɔ acɛ ci mi ɖo hunnɔ ŋgbe nyi afɔklɛnnu nɔ amɛ ciwo yi nyi amɛ klikliwo le xɔse mɛ o. ¹⁰ Ɖo nɔ amɛ ci yi ayexa de shin nɔ o ɖe eo ci yi nya enu yi e le enu ɖuɖu le vojuxwe ɔ, d'a do ŋsɛn lanmɛ nɔ eyɛ ci yi nyi amɛklekli le xɔse mɛ yi yɛ a tɔ vɔnsa lan ɖuɖu ba? ¹¹ Nɛnɛ ɔ, nɔvi, amɛ klekli le xɔse mɛ hunnɔtɔ ci yi kliso lɔ va eta nɔ a bu xɔse do enu ci yi e nya ŋci. ¹² Nɔ mi wa enuvɔn do miwo nɔvi ciwo yi ayexa kle nɔ ahan yi d'o akpa wowo yexa nu ɔ, kliso ŋtɔ nu yi mi wa enuvɔn do. ¹³ E yi na taɖo nɔ ɔ, enuɖuɖu ɖe a va nyi afɔklɛnnu nɔ nɔvinyɛ ɔ, ŋ d'a gbe ɖu elan kpɔ o. Gahunnɔtɔmɛ ɔ, nɔvinyɛ lɔ d'agbe bu le xɔse mɔ ji do anyi tamɛ o.