¹ Ŋde yi na taɖo yi nɔ enyɔ ɖe le gblamɛ nɔ amɛɖe koɖo nɔviɛ le miwo domɛ ɔ, amɛlɔ a fɔ egu kaka yi a sanma yi kpena lɔdo amɛ majɔmajɔewo gbɔ yi d'a yi sanmai do Mawu hamɛtɔwo, amɛkɔkɔewo gbɔ oɔ? ² Mi de nya mɔ amɛkɔkɔewo a va ɖo kojo koɖo xexe lɔ gbeɖeka ba? Nɔ enyi mɔ niwo ji yi a va to yi a ɖo kojo koɖo xexe lɔ ɖe, mi de je yi axo enyɔ klikliwo ba? ³ Mi de nya mɔ mi a va ɖo kojo ɖolawo ba? Nɔ e le nɛnɛ ɖee, nyi yi na yi mi d'a sɛn eŋ xodo agbe ce mɛ nyɔwo nu o ɔ? ⁴ Ci yi e le nɛnɛ ɖe, ŋɖe yi na taɖo yi nɔ agbemɛ nyɔ ɖeva do evu gblamɛ nɔ mi ɔ sɔɛ yi amɛ ciwo yi wo de jeshi ɖe le mawu ha lɔ mɛ le fiɖe o mɔ yi le xo enyɔ lɔ yewo ɔ? ⁵ Ŋ nuinuiɛ nɔ a wa ŋkpɛn nɔ mi! Ŋɛnɛ ɖe, nu mi nunuɔ mɔ ŋununyatɔ kuɖeka kpetii de lii yi a sɛn eŋ xo enyɔ nɔ nɔvi xɔsetɔwo o yɔ a? ⁶ Xɔsetɔ a sanma nɔviɛ xɔsetɔ kaka a nyi kojoɖotɔ maxɔsetɔ gbɔ yi a sanmai do! opui! ⁷ Eɖekpo kpoiɖe ɔ, kojo nyɔ ciwo yi le gblamɛ nɔ mi doase mɔ mi gɛn. Ŋde yi na taɖo yi mi de tashi amɛ sanmasanma yi se vevi yi lɔn nɔ wo de tafu mi ɔ? Ŋde yi na taɖo yi mi de lɔn mɔ wo le lɔ enuwo pleŋ le yewo shi o ɔ? ⁸ Vɔ ɔ, miwo yi le amɛwo tafuɔ yi le wowo nuwo pleŋ lɔ ɔ le wo shi. Miwo nɔvi klisotɔwo yi nɛnɛ mɛ lɔwo trɔ nyi! ⁹ Mi de nya mɔ amɛmajɔmajɔwo d'a sɛn eŋ kpɔ texwe le Mawu fiɖuxu lɔ mɛ o ba? ¹⁰ Mi ŋgbe ble miwoɖekiwo o: d'e nyi amɛ ciwo yi nyi hetelitɔnɔ, vojusɛntɔ, asuwatɔ, ŋsu ŋsugbɔdɔntɔ, flanfinɔ, dukanujitɔ, ahanumutɔnɔ, amɛʒutɔ alo amɛxoɖutɔ yi a kpɔ texwe le Mawu fiɔduxu lɔ mɛ o. ¹¹ Ganŋkegan ɔ, nɛnɛ mɛwo yi miwo domɛtɔ ɖekawo nyi sasa nɛ. Vɔ ecɛyɛ ɔ, wo le eshi nɔ mi, wo can mi do akpo, wo sɔ mi wa amɛjɔjɔwo sɔto axwetɔ Yesu kliso nyikɔ mɛ koɖo niwo Mawu gbɔngbɔn mɛ. ¹² Amowo nunɔ le miwo domɛ mɔ: «wo ɖe emɔ nɔ ŋ na wa enushanu. Vɔ ɔ, ele de le enushanu mɛ o. Wo ɖe emɔ nɔ ŋ mɔ na wa enushanu, vɔ kpɔ ŋ d'a lɔn yi enuɖe wawa a ɖo acɛ do ŋ ji o» ¹³ Mi gbe nunuɔ hɛnnɛ mɔ: «Enuɖuɖuwo li ɖɛ nɔ xodu» shigbe lehan yi xodu can li ɖɛ nɔ enuɖuɖuwo nɛ. E le nɛnɛ gankegan ɔ, Mawu a va gu wo amɛve lɔwo. Wo de wa lankpu mɔ wo le sɔ wa heteli o. Lankpu nyi axwetɔ tɔ shigbe lehan yi axwetɔ nyi lankpu tɔ ɛnɛ. ¹⁴ Keŋ ɔ, Mawu ci yi fɔn Axwetɔ sole ekuwodi a sɔ yi ŋsɛn fɔn miwo can sole ekuwodi hɛnnɛ. ¹⁵ Mi de nya mɔ miwo lankpuwo nyi kliso lankpu nuwo ba? Ci yi e le nɛnɛ ɖe, na sɛn eŋ sɔ kliso ŋcinu wa sakabo ŋcinuwo aa? Gbeɖe, a jɔ kpɔ go! ¹⁶ Mi de nya mɔ nɔ ŋsu ɖe yi sakabo ɖe gbɔ ɔ, yi lankpu koɖo sakabo lɔ tɔ wa enu kuɖeka ba? Ŋyao ɔ, wo ŋwlɛ daɖɛ mɔ: «Wo amɛve a va tro lankpu kuɖeka » ¹⁷ Vɔ amɛ ci wa ɖeka koɖo axwetɔ ɔ, amɛ lɔ gbɔngbɔn nyi kuɖeka koɖo axwetɔ gbɔngbɔn. ¹⁸ Mi shi nɔ heteliwawa! Enuvɔn bu de ciwo yi amɛ a wa ɔ, wowo nɔnɔ aʒɔge nɔ lankpu lɔ. Vɔ hetelitɔnɔ yɛ ɔ, yɛ wawa enuvɔn do yiŋtɔ lankpu. ¹⁹ Mi de nya mɔ miwo lankpu nyi nɔxu nɔ gbɔngbɔn kɔkɔɛ ci yi Mawu na mi yi e le mi mɛ ba? Mi de nyi etɔ nɔ miwoɖekiwo o. ²⁰ Ɖo ɔ, efɛn yi Mawu cu yi sɔ xwle mi. E yi na taɖo ɔ, mi sɔ miwo lankpuwo kanfui.