¹ É ɖyiɖyiɛ le afishiafi mɔ́ heteliwawa ɖuɖuɔ efiɔ le miwo domɛ. Miwo heteliwawa lɔ wù egan kaka kpɔ wo de gbe kpɔ nɛnɛ han wo le afiɖekpokpui le maxɔsetɔwo kɔtawo domɛ o. Heteliwawa lɔ jejeɛ jí kaka amɛ le miwo domɛ yi dondon ɔ edalɔshi gbɔ. ² E le nɛnɛ gankegan yi migbe sasa! D'e avi yi mia fanfan do enyɔ ce tamɛ sa ba? Wo ɖo a ɖe amɛ ci yi wa nɛnɛ nu shi le miwo domɛ. ³ Ciyi mi ɖe kpɔkpɔ gotu nɔ ŋ can ɔ, ŋ le mi gbɔ le gbɔngbɔn mɛ. Ŋ ɖo kojo koɖo amɛ ci yi wa nɛnɛ nu xoxoxo vɔ, shigbe ŋ le mi gbɔ nɛ. ⁴ Gacimɛ yi mi a bɔ do eju le Axwetɔ Yesu nyikɔ mɛ ɔ, anyi susu a le mi ji yi miwo Xwetɔ Yesu ŋsɛn can a le koɖo mi. ⁵ Nɛnɛ ɔ, mi a sɔ amɛlɔ do ashi nɔ legba nɔ a do ahɛn yi lankpu, gbɔxwe nɔ yi gbɔngbɔn teŋ va kpɔ hwlɛngan gbecigbe yi Axwetɔ lɔ a trɔ va. ⁶ D'e nyi enyɔ yi e nyi yi mi a kɔkɔ miwoɖeki le mɛ o! Miɖe nya mɔ kpɔnnɔcike hwɛɖeka yi honɔ kpɔnnɔ wɔnyanya blebu lɔ pleŋ ba? ⁷ Mi cucu kpɔnnɔcike xoxwi ciyi le lanmɛ nɔ mi keŋ yi a va nyi kpɔnnɔ wɔ yoyu. Yi gɔnmɛ yi nyi mɔ kpɔnnɔcike ɖe le mi mɛ o. Ɖo ɔ, wo sɔ Kliso lɔ ci yi nyi miwo Paki lɛngbɔvi sa avɔ. ⁸ E yi na taɖo ɔ, mi na nɔ mi a sɔ kpɔnnɔ cikemado, ci yi nyi eji kɔkɔɛ koɖo nyɔnɔnuinunu ɖu exwe lɔ. D'e nyi kpɔnnɔ wɔ ci yi wo nya koɖo kpɔnnɔcike xoxwi ci yi nyi enudɔnɖɔnwawa koɖo xomɛveve yi mi sɔ ɖui o. ⁹ Ŋ nu nɔ mi le wema ci yi ŋwlɛ ɖaɖa mi vayi mɛ mɔ, miwo ŋgbe do eha koɖo hetelitɔnɔwo o. ¹⁰ D'e nyi hetelitɔnɔ, sukanyitɔ, flafinɔ alo vojusɛntɔ ciwo pleŋ yi le xexe lɔ mɛ yi ŋ nunu o ; nɔ e nyi ahan yɔ nɛ ɔ, a nyi mɔ mi ɖo yi a tó le xexe lɔ mɛ! ¹¹ Enu ci yi ŋ ŋwlɛ do wema lɔmɛ ɖaɖa mi yi nyi mɔ miwo ŋgbe do eha koɖo amɛ ci yi sɔ nyikɔ mɔ ye nyi nɔvi klisotɔ gankegan yi nyi hetelitɔnɔ, sukanyitɔ, vojusɛntɔ, amɛzutɔ, ahanumutɔnɔ alo flafinɔ o. Mi de ɖo yi a ɖu enu koɖo nɛnɛ mɛ kpetii o. ¹² D'e nyi enyɛ yi a ɖo kojo koɖo amɛmanyi klisotɔwo o. Vɔ ɔ, ɖe miwo yi ɖo a ɖo kojo koɖo amɛ ciwo yi le miwo hamɛ mɛ ba? ¹³ Mawu yi a ɖo kojo koɖo amɛvɔin o. Do ɔ wo ŋwlɛ do Mawu nyɔ wema ɖeka mɛ mɔ: « Mi nya amɛvɔin le miwo domɛ.»