¹ É yi ná taɖo ɔ, wo ɖó yi a kpɔ mi dó Kliso dɔwaviwo koɖo Mawu nudanŋdonuwo jikpɔtɔwo ji. ² Enu kuɖeka yi wo jijiɛ soso enuwojikpɔtɔ gbɔ. É yi nyi nyiɛ mɔ́ lé nɔ egbeji nɔ́ yì gá. ³ Le enyɛ yɛ gbɔ ɔ, d'é wa ŋɖe nɔ ŋ mɔ mi a ɖó kojo koɖo ŋ alo agbetɔwo kojoɖoxutɔwo a ɖó kojo koɖo ŋ o. Ŋ de ɖonɔ kojo koɖo enyɛɖeki kpetii o. ⁴ Le anyi yixa mɛ ɔ, ŋ de kpɔ́ enyɔ ɖe yi a sɔ́ dó ehwɛ nɔ nyɛtɔ o. Vɔ d'é nyi mɔ́ ŋ nu mɔ́ ŋ nyi amɛjɔjɔɛ yɔ go. Axwetɔ yi nyi amɛ ci ɖonɔ kojo koɖo ŋ. ⁵ É yi ná taɖo ɔ, mi ŋgbe ɖonɔ kojo koɖo amɛɖe gbɔxwe nɔ́ kojoɖoɖo gamɛ a vá sun o. Mi nɔ ete nɔ́ Axwetɔ lɔ a trɔgbɔ yi a vá ɖe enu ciwo yi wowo wlá do ʒinfrumɛ ti dó dandanŋgbe yi a gbe klo enu soso susu ciwo kóŋ ji yi agbetɔwo sɔ́ ebuwo cɔ́n le wowo jiwo mɛ. Xwenɔnu ɔ, amɛɖeka amɛɖeka a xɔ kanfukanfu ci yi je ni le Mawu gbɔ́. ⁶ Nɔvinyɛwo, miwo taɖo yi ŋ sɔ enyɛ koɖo Apolosu kpɔwɛ cɛwo sɔ kplan enu mi. Ŋ ji mɔ mi a xɔ ekplen so miwo kpɔwɛ cɛ mɛ, keŋ nɔ 'mɛɖe ŋgbe wawa enu kaka yi a zeto enu ci yi wo ŋwlɛ daɖɛ nu o. Hwenɔnu ɔ, 'mɛɖe ɖa yiyiɔ ego le yi kpena nu, yi a mɔ, e ye yi nyi enu ci yi ajɔ o. ⁷ Mɛ yi dodoɔ bubu wo nu sɔto akpo nɔ 'mɛ kpɛtɛwo ɔ? Nɔ e nyi mɔ, na wo na wo ɖee, ŋɖe yi taɖo yi e kɔkɔ wɔɖeki shigbe ɖe nyi na wo na wo nɛ ɔ? ⁸ Xodu ɖɔ miwo sugbɔ vɔ! Miwo nyi dɔkunnɔwo vɔ nɛ! Miwo tɔ efiɔ ɖuɖu le miwo godu. Oxoo, nɔ mi a sɛnŋ ɖu efiɔ nyao ɛ ɖee, miwo can a ɖu efiɔ koɖo mi! ⁹ Ɖo ɔ, ŋ kpɛkpɛ shigbe mɔ Mawu sɔ miwo ciwo yi nyi amɛdɔdɔwo dado texwe vɔvɔ kpɛtɛkpɛtɛ nɛ; yi mi le shigbe 'mɛ ciwo yi wo so eku kojo nɔ nɛ: wo sɔ mi wa enukpɔkpɔ nɔ xexe lɔ, nɔ dɔlawo koɖo agbetɔwo. ¹⁰ Miwo yɛ ɔ, mi nyi sukunɔwo do Kliso tamɛ; vɔ miwo nyi enunyatɔwo le Kliso lɔ mɛ. Miwo yɛ ɔ, miwo kle; vɔ yi miwo yɛ ɔ, miwo nyi ŋsɛntɔwo. Miwo ɖe, wo bunɔ miwo, vɔ yi miwo yɛ ɔ, wo gbanɔli miwo! ¹¹ Kaka va sɔna eviɛɛ can ɔ, shive, shikɔ, awumakpɔdo, ayadonɔamɛ koɖo fluflu, dandan mɛ, yi mi le. ¹² Mi donɔ aya nɔ emiwoɖekiwo, yi wanɔ edɔ emiwoŋtɔwo. Nɔ amowo zu mi ɔ, mi cunɔ eshi nɔ wo. Nɔ wo ci yumɛ nɔ mi ɔ, mi donɔ eji, yi nɔnɔ mɛ. ¹³ Nɔ wo nunuɔ enyɔwo so mi nu, yi sɔ xonɔ eɖyi mi ɖe, mi donɔ ŋsɛn lanmɛ nɔ wo. Kaka va sɔna egbɛ ɛ can ɔ, mi va trɔ xexemɛ nukplɔwo, enu xoɖyi ciwo yi wo lɔnɔ kɔŋgbe. ¹⁴ Ŋ ɖe ŋwlɛŋwlɛ enu cɛ ɖaɖa mi nɔ a wa ŋkpɛn nɔ mi o. Vɔ ɔ, ŋ ɖoɖoɔ afɔ afɔta nɔ mi shigbe evinyɛwo nɛ. ¹⁵ Ɖo nɔ amɛ kotokun amɛwo (10 000) kplannɔ enu mi so lehan yi mi a zɔn koɖo Kliso do can ɔ, eda kuɖeka yi mi bɔ yi waɖɛ: enyɛ yi ji mi le Yesu Kliso mɛ sɔto eŋɛnyui lɔ ci yi ŋ do nɔ mi mɛ. ¹⁶ E yi na taɖo ɔ, ŋ dodoɔ ŋsɛn lanmɛ nɔ mi mɔ, miwo le wa enu shigbe nyɛŋtɔ hanwo nɛ. ¹⁷ Enyɔ hunnɔ taɖo yi ŋ dɔ Timɔte ɖaɖa mi nɛ. Eyɛ ci yi nyi evinyɛ vevi koɖo gbejinɔtɔ le Axwetɔ lɔ mɛ. A va ɖonɔ eŋui lehan yi ŋ nɔnɔ agbe do le Kliso lɔ mɛ nɔ mi shigbe lehan yi ŋ kplannɔ wo le afishiafi le Mawu hawo pleŋ mɛ do nɛ. ¹⁸ Miwo domɛtɔ ɖekawo bubuɔ mɔ, enyɛ, ŋ ɖa gbe va mi gbɔ, yi a kpɔ lehan yi mi le do sa nɛ o. ¹⁹ Vɔ nɔ e drɔ Axwetɔ ɔ, na va mi gbɔ, yi a va kpɔ lehan yi mi le do le majinjinɖe mɛ. Nɔ ŋ va va ɔ, ŋ ɖa ji mɔ na nya enyɔ ciwo sasatɔlɔwo nunuɔ o; vɔ ɔ, na jeshi fini ci yi wowo ŋsɛn wa edɔ je. ²⁰ Ɖo ɔ, Mawu fiɔɖuɖu lɔ ɖe le nuxu xoxo mɛ o; vɔ ɔ, ŋsɛn mɛ yi e le. ²¹ Ŋɖe yi mi jijiɔ ? Ma va mi gbɔ koɖo ekpoxoamɛ, alo ma va mi gbɔ koɖo lɔnlɔn koɖo xomɛfafa gbɔngbɔn?